أنارت عتمة قلبي

الحلقة الأولى

بس ماهيا إلا ثواني ورجعت شافتلها..
زاد قلبها وجعها عليها لما شافت نظرتها قداش حزينه وعيونها يلمعو بالدموع

هنادي: ليش توجعيلي في قلبي بهالنظره، تي الوضع هذا ليه سنين، وأنتي بسكاتك وموافقتك على أي شي يقولوه خليتيهم يتمادو أكثر توا خلاص المفروض أنك تعودتي عليهم، ليش تقعدي كل مره تنكدي على روحك بزياده

.......تنهدت ونزلو دموعها اللي ماقدرتش تشدهم أكثر وقعدت تبكي: تحسابيني فرحانه هكي ولا مرتاحه باللي إندير فيه!!؟؟
أبدا لكن وربي تعبت ياهنادي
نكمد في قلبي وساكته ونضحك ونبصر ونأخذ في كل شي بروح رياضيه ونبتسم ونمشي خلاص معاش عندي حيل،
ماتشوفيش في البنات اللي في عمري كيف عايشين مرتاحين ومتهنيين وكل طلباتهم مجابه ليش أني نخدم ونتعب ونشقي وياريتني محصله حتى فايده منهم، تعبي يتمتعو بيه هما وصغارهم، اااااه ياغيبة بوي لو كان قاعد عايش مافيش حد قدر يطاول عليا أو يوصل فيا بكلمه، وحطت إيديها على وجهي وقعدت تبكي بالعبره
هنادي تنهدت بحزن على حال صاحبتها اللي حاسبتها كيف أختها،
ناضت من مكانها وقعمزت في الكرسي اللي جنبها وخذتها في حضنها وقعدت إطبطب عليها، وبحزن: خلاص ياروحي لازم كل يوم تقطعيلي قلبي وتنكدي عليا وعلى روحك بنفس الموال، هاذم خوتك ماينفع فيهم كان تدعي ربي يبعتلهم اللي أقوى منهم ويخلصك من بين إيديهم، أه بس لو كان رايف ربي طول في عمره، راهو وراهم نجوم الليل في الظهر وخلاهم كلهم يقدمولك الولاء والطاعه
.......زادت في بكاها أكثر وهيا تشهق بالعبره بعد ماجبدت هنادي سيرته وكأنها زادت حطت ملح على جروحها اللي قاعده تنزف حتى بعد كل هالسنين

........، خذي قهوته وجي بيطلع فات عليهم شافها كيف مغطيه وجهها وواضح إنها تبكي من شكلها وصاحبتها حاضنتها، أبتسم بهزوه😏: بنات أخر وقت الله يقطع أمثالكم، وفات وهو معصب وعلى باله أنها تبكي على نفس الموضوع اللي سمعهم يتكلمو عليه من شويه

...... وهنادي قامو رؤوسهم مستغربين🤔 في صاحب الصوت وهل هو يقصدهم أو لا وقعدو يدورو عليه بعيونهم، بس للأسف الكافتيريا كانت معبيه وماقدروش يميزوه
......: زعما علينا الكلام؟
هنادي، بخوف: حيييي كان ماشافنا حاضنين بعض فهمنا غلط هالمريض
دفتها من عليها ووقفت: فضحتي بينا في الجامعه الزفت، نوضي نوضي خير ماتفوتنا المحاضره

وقفت ....... وهيا تمسح في دموعها بالكلينكس، وبضيق: زعما لقو مهندس يعطيها الماده ولا زي الإسبوعين اللي فاتو نجو ونروحو على الفاضي
هنادي، بنص عين😒: المفروض أنتي اللي عارفه كل شي إمالا شني إديري مع عموده؟
.......: بطلي براده!! يوم الإثنين أني ماجيتش واليوم مامشيتش جهة القسم لأنه الباش مهندس عماد بعتلي رساله وقال مش جاي
هنادي وهيا تقيم في حاجاتها قالت: الصبح شفت في الجدول منزلين أسم واحد متعاون على أساس، قامت رأسها وأبتسمت: ماعلينا منه توا هيا أفردي وجهك مش طالع عليك الزعل راهو وجهك تناسبه الإبتسامة أكثر #وأبتسمي_ماخلقك_الله_لتعبسي😁
......أبتسمت وهيا تهز في رأسها يمين ويسار وخذت مذكراتها وشنطتها وطلعت هيا وهنادي بعد ماتعنقو إيديهم ببعض متوجهين للقاعه اللي فيها المحاضره، وهيا تردد في خاطرها زي عادتها