هَل ضَرّ هذا الكَونُ نبضُ لقائِنا أم أنّ هذا الحُزنَ أدمَنَ أضْلُعي
قُل للمَسافاتِ البَعيدةِ بيننا أرجُو بحق اللهِ أن تتواضَعي 💔
قربت من الزول أكتر و زي ما اتوقعت طلع أحمد ، قلت ليهو بإستغراب انت ؟ الجابك هنا شنو يا احمد ؟ ضحك و قال لي انا شغال هنا لكن انتي الجابك شنو ؟ قلت ليهو برضو شغاله هنا لي أسبوع ، قال لي اهاااا كويس والله يلا بالإذن....مشيت قعدت في مكاني و بديت الشغل على اللابتوب ، قاطعتني وحده اسمها علياء ، قالت لي مها انتي بتعرفي المدير؟ قلت ليها مدير شنو ؟ قالت لي مدير الشركه دي ، قلت ليها لا ما بعرفو و لحدي الآن ما حصل شفتو ، ضحكت و قالت لي هسي الكنتي واقفه معاهو دا المدير ذاتو ، قلت ليها شششنو أحمد مدير الشركه دي ؟!! قالت لي ايي هو المدير ، يعنى بتعرفيهو ؟ قلت ليها ايي بعرفو بس ما عارفه انو هو المدير ..
قلت معناها أحمد هو الكان ورا شغلي دا ، دي ما دايره ليها تفكير واضحه شديد ، يعنى ألقى شغل بالسهوله دي و في شركه كبيره زي دي في ليله و ضحاها !! الساعه 7 جات و انا لسه في الشركه ، شلت تلفوني على أمل ألقى رساله أو مكالمة من أنس يسألني فيها عن سبب تأخري بس للآسف ماف ولا شي 💔 تاني قلت كدا احسن عشان ما اضطر اكذب عليهو تاني ، اثناء ما أنا طالعه من الشركه لقيت احمد جنب الباب ، قلت ليهو احمد بالجد انت المدير ؟ و الشركه دي بتاعتك و انت اللقيت لي الشغل دا صح ؟ قال لي دقيقه واحده واحده 😂 اي انا المدير و صاحب الشركه ، أما قصة شغلك فأنا ما لي يد فيها ، جود قال لي شغلك حلو و عشان كدا وظفك و انا اصلا ما كنت عارف انو دي انتي ، قلت ليهو كذاب ، انتوا بتوظفوا ساي يعنى ، لا شهادات خبره لا غيرو 😏 قال لي حظك كدا اعمل شنو ، قبل ما ارد عليهو تلفونو ضرب استأذن مني و طلع ، كنت متأكده انو هو الورا الشغل دا و ما حب يعترف المهم لقيت لي شغل لأني محتاجه ليهو شديد ، عاينت للساعه و لقيت نفسي اتأخرت شديد ، طوالي جريت على المواصلات الناس كانت كميه و الدنيا ماشه على ضلام ، وقفت قريب النص ساعه و لسه ما قدرت اركب ، في وقفتي ديك جا أحمد بعربيتو قال لي اركبي اوصلك معاي قلت ليهو لا حأستنى المواصلات ، قال لي مها بطلي عناد حتقيفي لمتين ؟ محسساني كأني غريب عنك ، خلي الرسميه و خليني اوصلك ، قلت ليهو ما كدا يا احمد بس طريقك ما نفس طريقي و ما عاي.....قاطعني و قال لي ما عايز نقاش في الموضوع دا ، ما بقدر اخليك واقفه كدا و امشي ، اركبي عشان ضميري يكون مرتاح ، اتنهدت و قلت ليهو طيب ، ركبت معاهو و وصلني لحدي البيت ، نزلت و قلت ليهو شكرا ليك قال لي ماف داعي للشكر و اتحرك ....فتحت الباب كدا لقيت أنس في وشي ، عاين لي بنظره كدا كلها احتقار ، قبل ما يقول أي شي قلت ليهو الوصلني دا احمد ولد خالتو رشي....قاطعني و قال لي ما بهمني تمشي مع منو أو ترجعي مع منو ، و طلع خلاني ، كلامو دا حسسني بالذل و اني رخيصه و حاجه ما كويسه عمري ما ح انسى نظرة الإحتقار الشفتها منو ، دخلت ، و صليت العشا ، مشيت عملت الغدا و ختيتوا ليهم ما كان عندي نفس آكلو بيها ، ماف زول فقدني ماف زول قال لي تعالي أكلي ، حتى ماف زول قال لي خير الليله ليه جيتي متأخره 💔أنس جا داخل الغرفه و كان بفتش ليهو في حاجه ما عارفه شنو ، قلت ليهو بتفتش لشنو ؟ ما رد علي ، انتبهت انو ما شايل تلفونو فعرفت انو بفتش عليهو ، كان واقع تحت السرير ، شلتو و مديتو ليهو ، مدا يدو عشان يشيلو ، سحبت يدي منو ، قلت ليهو قبل ما اديك تلفونك ممكن اتكلم معاك ؟ قال لي مها انا ما عندي أخلاق عشان اقعد اتناقش معاك ما ناقص انا ، قلت ليهو طيب ماف ليك تلفون ، قال لي بضيق انا ما بهاظر معاك جيبي الزفت دا ، قلت ليهو أنس ، احمد دا انا بعرفو من زمان و اليوم لمن اتأخرت ، لقيتو في الموقف و اصر انو يوصلني و ما قدرت احرجو و اصلا ما كان في مواصلات ، قال لي بغضب و ضيق و نبره عاليه مش دا الموضوع العايزا تناقشيني فيهو ؟ هزيت ليهو راسي ، قال لي خلاص سمعتك ، جيبي التلفون دا ، ما عرفت اقول ليهو شنو بعد ردو دا ، مديت ليهو التلفون و شالو مني ، في اليوم البعديهو طوالي شلت القروش الكانت عندي و مشيت أديتا لعمتي عشان تقدر تديها لأنس.....
من جهه تانيه أحمد كان طالع على شغلو اتصلت عليهو اختو و قالت ليهو إلا تجيب لي معاك حلويات من حلواني ()المتعوده تشترى منهم دايما ، قال ليها تمام ، فعلا اتحرك و مشى على المحل ، اول ما دخل لقى واحد كدا و قال ليهو لو سمحت إلتفت عليهو و قال ليهو نعم الولد أول ما شاف احمد وقع فيهو ضرب و قال ليهو تاني ما اشوفك ماري بجنبها ساي أحمد قال ليهو بتتكلم عن منو انت و حاول يتفكى منو عشان يتفاهم معاهو بس ما اداهو فرصه و فضل يضارب معاهو لحدي ما الناس ادخلت و حجزتهم ،و الولد دا كان أنس ،،، احمد طلع من المكان و هو غضبان و ما فاهم شي .....
في الشركه :
- احمد مالو وشك دا وارم كدا ؟ انت اضاربت مع زول ولا كدا ؟ قال لي شكله بسيطه ، قلت ليهو فعلا المظاهر خداعه البشوفك ما بقول انك بتاع مشاكلك و ممكن تشاكل زول ، ضحك و قال لي لا مظهري ما خداع ولا شي و فعلا انا ما بتاع مشاكل ، القصه و ما فيها ....الخ قلت ليهو كيف يعنى ما بتعرفو معقوله ضربك ساي بدون سبب ؟ قال لي والله يا مها الراجل دا انا ما بعرفو و ما حصل بينا أي خلاف قبل كدا ، قلت ليهو بكون شبهك بواحد متشاكل معاهو ، حصل خير يا زول ، قبل ما اتحرك من مكاني اتذكرت اسم المحل الذكرو احمد و عشان اتأكد قلت ليهو عيد لي اسم مكان الحلواني ، قال لي اسمو حلواني () قلت ليهو في اي حته ؟ قال لي في () اخدت لي صنه و انا بكلم نفسي دا نفس المكان الشغال فيهو أنس ، بعدين ح أحاول اسأل أنس و اعرف منو الحصل في المكان بطريقه غير مباشرة ، ما انتبهت إلا لمن احمد طق طق اصابعو ، قال لي شردتي وين ؟ و ليه سألتي عن اسم المحل و مكانو بس ما يكون عايزا تنتقمي منو 🤣🤣 قلت ليهو يمكن ، و مشيت خليتو كملت شغلي و رجعت البيت ...
-أنس في شنو ؟ مالك اليوم زهجان كدا ؟ في شي حصل معاك في شغلك ؟
عاين لي مسااااافه و ما رد ، قلت ليهو أنس عليك الله ما تسكت قول أي شي سكوتك دا بخوفني و بقلقني 💔 قال لي عايزا تعرفي شنو ؟ قلت ليهو انت زهجان من شنو الليله ؟ يعنى في الشغل في شن....قبل ما اتم كلامي قال لي ببرود يعنى لحق يحكي ليك ، قلت ليهو ما فهمتك ، قرب مني و مسك لي يدي شديد و كان لاويها لي قال لي بصوت عالي و نبره قويه شايفاني شنو قدامك ؟ قايلاني غبي ولا ما بفهم يعنى عشان ما بجي اشاكلك و اتناقش معاك معناها تتمادي في قلة أدبك ؟ عشان قلت مها بتعمل كدا و عمرها ما بتعمل كدا و وثقت فيك ثقة ما حصل وثقتها في زول غيرك حتى اخواتي ما بثق فيهن زيك 💔 مشكلتك كانت شنو ؟ قروش ؟ عشان ما قدرت أعيشك العيشه البتحلمي بيها و اسكنك في بيت براك تمشي تخونيني و بكل عين قويه بتجي تتكلمي معاي و تمثلي علي و تحسسيني اني مهم عندك ، قايله سكوتي دا غباء و عدم فهم مني ؟ لا والله انا تحركاتك دي كلها عارفه ياما كذبتي علي و انا عارفك و كاشفك بس دايما بقول ما تتسرع يا أنس اصبر خليها هي تجي و تحكي ليك براها بس بتجي ولا كأنو في شي ولا كأنو عملتي شي ، حقيقة العيشه معاك بقت لا تطاق ، العيشه مع مره خيانه مقرفه جدا و ....قبل ما يتم كلامو و لأول مره رفعت يدي عليهو ....
يتبع........
