🖤💔
بِنْتُم وَبِنّا، فَما ابتَلّتْ جَوَانِحُنَا شَوْقاً إلَيكُمْ، وَلا جَفّتْ مآقِينَا
نَكادُ، حِينَ تُنَاجِيكُمْ ضَمائرُنا، يَقضي علَينا الأسَى لَوْلا تأسّينَا
حَالَتْ لِفقدِكُمُ أيّامُنا، فغَدَتْ ، سُوداً، وكانتْ بكُمْ بِيضاً لَيَالِينَا
💔🖤
مهااا مهااا
- كر علي أنا يا ولدي ، حسبي الله و نعم الوكيل في الكانت السبب ، جننت لي ولدي الله لا كسبها ، ليل و نهار بهاتي بيها ، حرقت حشاي في أولادي الإتنين الله ينتقم منها .
- امي شوفي جسمو مسخن كيف ، حتى و هو عيان بنده عليها ،،، من قبيل يا أمي ماف اسم على لسانو غير اسم مها .
- كاتباهو ، كتبتو عشان ما يرتاح في الدنيا دي من غيرا ، حأقعد أدعي عليها كدا لحدي آخر نفس فيني ، الله ينتقم منك يا مها ، الله يسود عيشتك زي ما سودتي عيشتنا ، الله يحرق قلبك زي ما حرقتي قلوبنا كلنا ...💔
دا شنو الضلام الإنتي قاعده فيهو دا ، افتحي الشبابيك دي و لمي الستاير دي و خلي الباب مفتوح ، جنيتي انتي يا بتي ؟ عايزا تقعدي بالحاله دي لمتين ؟ يعنى شنو لو طلقك ؟ آخر راجل هو ؟ ما تخجلي تبكي ليك عشان راجل ؟
- يا مره هوووي ما عندك بيها شغله ، خليها تبكي عشان تريح نفسها ، انتي قايله الطلاق دا ساهل ولا قايله العشره دي هينه ؟
عشره ؟ هو خت اعتبار للحته دي ؟ لا احترمك لا احترمني لا احترم بتنا ، بكل برود ساقها من يدها زي الغنمايه و جابها لينا و قال البت دي ما بتنفع معاي ، بالله دي أي عشره دي ؟
-كونو يجيبها لحدي البيت و يصلني و يقعد معاي قعدة رجال و يقول لي ماف قسمه بيناتنا و زي ما طلعتها مكرمه رجعتها مكرمه ، في دا بحد ذاتو احترام لي و ليها .
هو وكتن بحترمها مطلقها لشنو ؟ هو لاقي زي بتي دي وين ؟ ما كفايه إنها كانت متحمله وشوش أمو و اخواتو الحامضات ديل ، و فوق دا تشتغل ليهن و تغسل و تكوي ليهن ، حصل يوم شكت ليهو ولا حصل يوم جات شكت لي انا أمها دي ؟
- يا مره هو الراجل دا بالواضح قال ماف قسمه بيناتم و طريقهم ما واحد ، عايزاني احنسو عشان يتراجع عن قرارو و أفرض عليهو بتي ؟ جايبها من الشارع أنا و لا غالبني أمسكها ؟ انا تاني ما عايز نقاش في الموضوع دا طلقها يعنى طلقها و انتهينا ، تاني ما تفتحي السيره دي و ما تضغطي على البت .
يعنى عاجباك الحاله الهي فيها دي ؟ ما شايف وضعها كل يوم ماشي للأسوأ حتقعد كدا لمتين يعنى ، و تبكي ليها شنو ذاتو ، هسي دا راجل يبكوا عشان والله هي الكانت كتيره عليهو و اصلو ما بستاهلها ...الخ
💔قمت من جنبهم و مشيت قعدت تحت شجرتنا الفي الحوش ، و سرحت بعيد و اتذكرت ....
صوت عمتي و سارة و هم بصرخوا و ببكوا لسه ما قادره أنساهو ، صدمة أنس و تعابير وشو و الجمود الحصل ليهو للحظه دي ما قادره أنساها ، احساس اني كنت السبب لسه ملازماني ، لو من البداية ختيت أنس في الصوره ما كان الحصل حصل ، لو ما اتهورت و اتصرفت من عندي ما كان دا حصل ، لو اني أديت الموضوع أهميه كبيره و حسيت بخطورتو ما كنت اليوم هنا و ما كنت بالحاله دي ولا كان أنس و امو حيكونوا بالحاله الهم فيها حاليا ، عمري ما حسامح نفسي ، عمري ما ح اسامحها 💔💔
