يعنى خلاص طالع؟ انتظرني اعمل ليك الشاي ما تطلع من غير ما تشربو بتصدع والله
أنس انا بتكلم معاك ماشي وين اسمعني بس أنس دقي...
طلع من غير ما يتفاهم معاي ما عارفه ليه بقى يتعامل معاي كدا مع إنو الموضوع ما بستاهل الزعل دا كلو حتى إنو ما بديني فرصة عشان اشرح و أوضح ليهو ...
مشيت لعمتي صبحت عليهم و عملت ليهم الشاي ، قالت لي أنس وينو ناديهو خلي يجي يشرب معاي الشاي ، قلت ليها أنس طلع قبل شويه ، قالت لي من غير ما يجيني هنا و يشرب الشاي؟ قلت ليها ايي قال مستعجل عشان كدا ، عاينت لي مساااافه و قالت لي عملتي ليهو شنو كمان؟ قلت ليها ولا شي يا عمتي هو قال مستعجل سكتت و ما اتكلمت تاني جهزت نفسي و مشيت الجامعة .....
في نهاية اليوم و اثناء ما أنا طالعه من الجامعه اتذكرت إنو لي فترة ما زرت بيت أهلي و هو قريب من الجامعة ، اتصلت على أنس عشان أكلمو و اقول ليهو يغشاني بعدين في بيت أهلي و نرجع سوا ، اتصلت عليهو كتيييير بس ما رد 💔دي اول مره اتصل عليهو و ما يرد ، في فجوه بقت حاصله بيني و بين أنس ، بحاول قدر الإمكان إني اكون الزوجة المطيعة، البنت الباره ، و مرة الأخ اللطيفة بحاول قدر الإمكان اني ما أكبر المواضيع و أي نقاش بحلو بالهداوة ما بالجأ للتعصب و التشدد ، عمري ما اتعاملت مع الناس بنفس معاملتهم لي بتعامل بطريقتي أنا و الحاجه الإتربيت عليها ♥️
لمن ما رد علي اتصلت على عمتي و قلت ليها ماشه بيت أهلي ح أقعد معاهم لحدي المسا و اتصلت على أنس عشان اكلمو بس ما رد لو جا كلميهو اني في بيت أهلي ، ما ردت علي اكتفت بإنها تسمعني و تقفل الخط ، غشيت السوق و اشتريت حاجات و شلتها معاي ......
هل الزمن بغير الناس؟ هل ممكن الإنسان الكويس يجي يوم و يبقى ما كويس ؟ هل فعلا هم بيتغيروا ولا اساسا هم من البداية كانوا كدا و نحنا الما قدرنا نشوفهم على حقيقتهم ؟ هل ممكن نكون نحنا البنتوهم و بننسج صوره جميله للناس البنحبها؟
- مع إني ما عارف الحاصل معاك شنو ولا المشاكل البتعانى منها حاليا يا صحبي ، بس حأقول ليك الزمن ما ليهو علاقة بتغير الناس الظروف و المواقف هي البتجبر الناس إنها تتغير ، و الإنسان الكويس ما بغيرو إلا الشديد القوي.
طيب حيحصل شنو لو عرفت إنو اقرب انسان ليك ما كان بنفس الصوره الراسمها ليهو في خيالك و انو المضى كلو كان خيال رسمو ليك عقلك عنو لأنك بتحبو و ما بترضى تشوفو سيئ
- يا أنس نحنا دايما بنسأل نفسنا ليه دا اتغير علينا ليه دا بقى ما بتصل ما برسل و ما بسأل عننا، حصل مرة سألتك نفسك انا عملت شنو خلاهم يزعلوا مني ؟ أكيد هم ما حيبعدوا و يزعلوا بدون سبب يمكن كلمة منك أو جملة طلعت منك خلتهم يرجعوا خطوتين لورا و يمكن الحاجه دي اتكررت أكتر من مرة بحيث التعامل معاك بقى مؤذي جدا
بعد كلام محمد صحبي قعدت افكر براي انا عملت شنو؟ معقوله يجي يوم و مها تتخلى عني؟ معقوله ما قدرت اكون قدر المسؤولية و ما قدرت أعيشها العيشه البتحلم بيها كل بت؟ برضو ليها حق تمل مني انا ما قدمت ليها أي شي ما حصل مرة طلبت مني شي ما حصل مرة شكت لي من حاجه يمكن عشان هي متأكده اني ما حأقدر اعمل حاجه مؤمنه بضعفي و عدم قدرتي أكتر مني ما حصل شاركتني بحاجه دايما بتكون متحفظه و ما بتحكي أو تظهر لزول قدر ما حاولت أكون قريب منها عشان تحكي لي أدق التفاصيل ما قدرت دايما مشغوله دايما ما عندها لي وكت كل يوم نفس الروتين ارجع من الشغل تجيب لي الأكل و تمشي ترجع لشغلها ما حصل جات قالت لي انا عايزا قروش عشان أجيب الحاجه الفلانيه ، عارف إنها براها بتشتغل و بتطلع قروشها براها بس برضو مفروض ما تتعامل معاي برسمة و تحسسني اني غريب عنها ، يعنى انا لو ما من نفسي اديتا مصروف عادي سنة و 100 سنة لقدام ما تطلب مني الحاجه دي زاعجاني شديد و مع ذلك ما ببين ليها 💔 ياما كذبت علي و اختارت ما تشاركني حاجه بتعنيها أو بتعني زول غيرا دايما بتفضل تحل كل مشكلة براها بدون ما تطلب مساعده مني بحجة انها ما عايزا تشغلني و تزعجني و هي ما عارفه انها كدا بتجرحني و بتزعجني أكتر ، انا أكتر حاجه بكرها الكذب بكرهو شديد و مها ياما كذبت علي و مشتني ما كنت مصدقها بس عشان عارفها حتتحايل و ما حتحكي لي كنت بمشيها و بعمل نفسي نسيت الموضوع ، بتحاول دايما إنها تكون مثالية في كل حاجه بس كمان المثالية الفايته الحد ممكن تضر 💔
بعد يوم طويل و مرهق من العمل و التفكير رجعت البيت ، كنت متوقع إنها حألقى مها موجوده كالعاده و نفس روتين كل يوم ، طلعت تلفوني و عاينت للمكالمات الكانت منها و ما رديت عليها بصراحة ما كان عندي نفس اتكلم معاها ، طلعت جزمت و رقدت في السرير بعاين فوق في السقف ، سمعت صوت كركبه فطوالي غمضت عيوني ، ما فتحتهم إلا بصوت ساجده و هي بتقول لي أنس أنس، قلت ليها خير في شنو؟ قالت لي تعالي شوف امي أظنها عيانه، قمت سرعه من السرير و اتحركت عليها أول ما وصلتها لقيتا تعبانه و راقده في السرير و جنبها ساره، قلت ليها بلهفة امي خير مالك ، حاسه بشنو، ولا اقول ليك قومي خلينا نمشي للدكتور ، قالت لي لا انا كويسه ، قلت ليها بغضب كويسه؟ ما شايفه حالتك كيف و بتقول لي كويسه ما بتفاهم معاك قومي خليني أوديك للدكتور ، قالت لي انا كويسه يا أنس بس الأدوية بتاعتي خلصت ، قلت ليها كيف يعنى و ليه ما اتصلتي علي، عاينت ل سارة و سجود و عيوني كلها شرار قلت ليهم دا شنو البتقول فيهو أمي ليه ما كلمتوني ، اكتفوا بإنهم يبكوا بس، ردت امي و قالت لي يا ولدي براحه على أخواتك بكون نسوا هسي حتجي مها و تجيب لي معاها الأدوية لأني اتصلت عليها، قلت ليها مها؟! مشت ياتو صيدلية و متين يعنى طلعت هسي؟ قالت لي ما عارفه اتصلت عليها قبيل من الساعة 2 كلمتها تجيب لي الأدوية معاها و قلت ليها أدويتي خلصت ، قلت ليها من 2 و ما جات ؟ قالت لي بكون أخرتها المواصلات يا ولدي هسي بتجي طلعت من البيت و انا كلي غضب من تصرف مها كيف قدرت تكون مهمله للدرجه دي ، مشيت أقرب صيدليه و جبت لأمي ادويتها ، بعد ما أخدتها بقت احسن شويه شلت تلفوني و اتصلت على مها قبل ما تقول أي حاجه قلت ليها 5 دقايق ألقاك قدامي و قفلت الخط
يتبع......
