بس دا ياهو الفضل ، انا مقصر معاها في شنو عشان تورط نفسها في حاجات زي دي ؟ من يوم الإتوفى فيهو أبوي وعدت نفسي إني ما اقصر منكم في حاجه و طوالي ما أنا عايش ما حتحتاجوا حاجه ، نهاري كلو في الشغل من صباح الرحمن لأذان المغرب دا كلو عشان منو ؟ مش عشانكم انتوا يا أمي ؟ كنت محتاجه شنو عشان تعمل كدا ؟ حصل طلبتوا مني حاجه و ما وفرتها ليكم ؟ قالت ليهو أهدي يا ولدي والله انت ما مقصر معانا و انا بشهد ليك بالحاجه كدا ، كدي فهمني واحده واحده سجود بتي مالا ؟
أول ما سمعت اسم سجود ، قلت ليها سجود ؟ سجود مالا يا أنس ؟ قعد في أقرب سرير و خت يدينو في راسو و سكت ، جيت قعدت جنبو و قلت ليهو في شنو يا أنس ما تقلق بينا سجود الحاصل معاها شنو ؟ ما رد علي ، تلفون ضرب ، قام على حيلو و اتحرك من جنبنا و رد على التلفون و جانا راجع ، عمتي مسكتو من يدو و قالت ليهو الله يرضى عليك يا ولدي قول لي أختك مالا ، بتي مالا يا أنس ، كويسه هي ؟ مسح وشو بيدو و أخد ليهو نفس و قال لينا قبيل اتصلوا على من قسم الشرطة و قالوا لي تعالينا في القسم اختك عندنا ، انا و عمتي في وكت واحد قلنا ليهو شنو ؟!! واصل كلامو و قال ، طوالي طلعت من الشغل على قسم الشرطة ،، قلت ليهم أنا اخو سجود و اتصلتو علي قبل شويه ، اختي مالا ليه ألقيتوا القبض عليها ؟ قالوا لي اختك تاجرة مخدرات و بالإضافة لإنها بتنتمي لأكبر مجموعة دجل و شعوذة ، المجموعه دي نصبت على ناس كتيره ، عشان تاخد منهم أموال طائلة ، لينا فترة مراقبنهم و اليوم قدرنا نلقى القبض عليهم بالجرم المشهود و لسه في غيرهم و أكيد حنلم فيهم ،، سمعت الكلام دا و انا حاسي نفسي ما فاهم ، معقولة أختي انا تعمل كدا ؟ معقولة اختي تتاجر بالمخدرات و تنصب و تحتال على الناس ؟ عشان شنو .
امو قالت الليله ووووبعلي ، الليله كر علي ، لا لا يا ولدي أختك ما بتعمل كدا ، ديل كضابين ساي و عايزين يورطوها في الموضوع اختك ما بتعمل كدا يا أنس ليه خليتا معاهم هناك و ما جبتها معاك ؟
قالت كلامها دا و قعدت تبكي ،، اما أنا كنت مصدومة لأني افتكرت إني حليت الموضوع و ما كنت متخيله إنو الموضوع خطير للدرجة دي و فيهو تجارة مخدرات و دجل و شعوذة ،، قلت بصوت مسموع بس انا حذرتها ،، أنس انتبه لي و قال لي قلتي شنو ؟ ياداب انتبهت لنفسي و قلت ليهو م ممم ما قلت شي ، قرب علي و مسكني من يدي و قال لي قسما عظما يا مها ألقى إنو ليك علم بالموضوع دا ما حيحصل خير ،، قلت ليهو أنس فكني يدي واجعاني شديد ،، عمتي قامت على حيلها ،، و قالت لي بس ما تكون عارفه و داسه مننا حاجه ،، سكت مسافه و قلت أحسن اقول ليهم لأنو كدا كدا هم سمعوني حأقول ليهم البعرفو بس ، اتنهدت و قلت ليهم قبل فتره .....الخ ، بعد ما انتهيت قلت ليهو أن.... قبل ما أتم كلامي حسيت بكف على وشي ، كانت عمتي 💔 قالت لي دا كلو بسببك ، اصلا من اليوم الدخلتي فيهو على البيت دا ما جاتنا إلا المشاكل و وجع الراس ، فيها شنو لو جيتي قعدتيني في الواطه دي و حكيتي لي ؟ كنت حأقتلك يعنى ؟ اصلك ما بتدوري الخير لبناتي من اليوم الجيتي فيهو على البيت دا و انتي كارهانا ، عشان أنس مسكنك معانا في نفس البيت ؟ عشان ما لقيتي العيشه الكنتي بتتمنيها ؟ ولا عشان حارقاك القروش البطلعها أنس لأخواتو ؟ انا شايفاك و عارفاك و فاهمه تصرفاتك كلها بس ما حصل سألتك ، عارفاك ما راضيه إنو أنس يصرف علينا و شايفه القروش البديك ليها شويه عشان كدا بتشتغلي براك و بتطلعي مصروفك ، حصل قلنا ليك أدينا من قروشك دي ؟ ولا حسسناك إننا طمعانين فيها ؟ طيب ليه مالك مع بنات و هن ما عملن ليك حاجه ، بتدوري ليهن الشين ليه ؟ كنت بعاملك زي بتي بس انتي عمرك ما اعتبرتيني في مقام أمك .
كلامها دا نزل علي زي الصاعقة كل كلمة بتطلع منها قصادها بتكون في دمعه مني ، قلت ليها و انا بشهق من كترة البكى ، انا ما كنت حابه الموضوع يكبر ما كنت عارفاهو خطير للدرجة دي و يمكن يوصلنا للمرحلة دي 💔 تتذكري يا عمتي اني كلمتك بخصوص الموضوع دا متذكره قلتي لي شنو ؟
أنس طوالي عاين لأمو و قال ليها انتي ذاتك عارفه يا أمي ؟ قالت ليهو لا والله ما عندي أي علم ، هو انا كن عارفه بخلي بتي تقع الوقعه السوده دي ؟ عاينت لي و قالت لي هووووي يا بت هو فتحي عيونك دي كويس و أوعاك تكضبي فيني عشان تطلعي نفسك ،، والله والله سجود يحصل ليها شي ،، دقيقه واحده ما بتقعديها في البيت دا ،، قالت كلامها دا و دخلت جوا ،، عاينت لأنس و كنت منتظراهو يقول حاجه ،، منتظراه يقول لي انا مصدقك أنا واثق فيك ،، بس اكتفى إنو ينظر لي نظرة كلها عتاب و كلها غضب ،، بعد دقيقتين أمو طلعت لابسه توبا و قالت ليهو أرح هسي دا وديني ل"بتي ، دقيقه وحده ما حتقعدها هناك ،، قال ليها طيب أرح ، قلت ليهو دقيقه يا أنس انا ماشه معاكم و طوالي مشيت سرعه عشان ألبس عبايتي لمن جيتهم راجعة لقيتم مشوا و خلوني 💔
طيب ما ممكن نطلعها بكفالة ؟
...: لا ما ممكن الموضوع دا ما بالسهولة دي ،، اختك تاجرة مخدرات عارف يعنى شنو ؟ دي فيها سجن عديل و دا غير اعمال النصب و الإحتيال الشاركت فيها مع مجموعات الدجل و الشعوذة
لا حول ولا قوة إلا بالله ، يعنى ماف أي طريقه ؟ انا ما بخلي اختي تبيت ليله وحده في السجن .
...: ما على كيفك يا زول ، تخلوا بناتكم فاكات ساي و ماف زول بسأل ماشه وين و جايه وين و لمن الفاس تقع في الراس تجوا و تعملوا لينا دراماتكم دي هنا .
احسن ليك تحترم نفسك تسكت ولا
أنس اهدي يا ولدي ما تتجادل معاهم ،، معليش على الحصل ممكن تخلوني أخش و اشوف بتي ؟،، عندك 5 دقايق بس عشان تخشي و تشوفيها .
اتصلت على أنس كم مرة بس ما رد ،، لمن سارة رجعت من بيت خالتها حكيت ليها الحصل ،، شالت تلفونها و اتصلت على أنس رد عليها و قال ليها جايين البيت ماف داعي تلحقينا هناك و قفل الخط
أنس الحصل شنو ؟ سجود لقيتوها كيف ؟ كويسه هي ؟ قالوا ليكم شنو ؟ يعنى ماف طريقة نطلعها بيها ؟
قابل اسئلتي دي كلها بالسكوت حتى ما رفع راسو و عاين لي كأني ما كنت بتكلم ،، عمتي قالت لي عايزا تشمتي فيها ؟ عارفه إنو دا كلو بسببك ؟ انتي انسانه حاقده و حاسده عشان كدا ربنا خلاك تكوني عاقر
حصلت لحظة صمت ،، كلهم سكتوا و فضلوا يعاينوا لي ،، ما أبديت أي ردة فعل ، لسه صدى الكلمة دي بتردد في مسامعي ،، حسيت كأنو في زول طعني بسكين في قلبي 💔 ما عارفه كيف وصلت بيتي ، دخلت جوا و فضلت أبكي ،، المرة دي بكيت بحرقة شديده مع إنو الكلام ما جديد علي ،، كنت بسمعو في لمة الجبنه و في قعدة الصندوق و بسمع عمتي بتونس بيهو النسوان ،، بس اليوم قالتو لي في وشي ، اليوم صرحت بكرهها لي و أعلنتو 💔
قدر ما حاولت أوقف البكي ما قدرت ، بمسح دموعي و هي بتنزل تاني من جديد
يتبع....
