ولأنَّ روحَك قَريبة مِن رُوحي, أنَا أعلَم علْم اليقِين, أنَّ كلّ ماتفكِّر فِيه يمرّ مِن ذهْني....♥️
"جمال الدين الرومي"
عارف الكلام القالتو أمي ل"مها " قاسي شديد ، مقدر الوضع الهي فيهو حاليا ، كان نفسي امشي و اراضيها زي كل مرة ، كان نفسي اقول ليها ما تقلقي انا معاك و حأفضل معاك و ماف شي حيفرقنا أو يخليني أفقد الثقة فيك ، حأفضل طول عمري ممتن لوجودك جنبي و دعمك المستمر لي ، كان نفسي اقول و اقول بس ما حأقول ولا شي 💔 ما بسبب الحصل لسجود ، لا بس في مواقف كتيره و حاجات كتيره حصلت قبل كدا خلتني أفكر ألف مرة قبل ما افكر اقول ليها كلام زي دا ، ما قادر أصارحها ما قادر اسألها عن كلام انا بنفسي سمعتو منها ، يمكن لأني مكذب نفسي و متمني انو يطلع كذب و أكون سمعت غلط ؟ يمكن خايف كلامي يجرحها و يأثر في علاقتي بيها ؟ يأثر و يوتر علاقتي بيها !! طيب يا أنس ما حاليا علاقتك بيها متوتره ، خايف من شنو تاني ؟
خايف أبادر انا بالشينه ،، خايف أطلع انا الطرف المؤذي و المتسرع ما عايز اظلمها ولو بكلمة واحده أو سؤال ما عايز أختها في موقف بايخ و اسألها سؤال كلو شكوك و ظنون ،، ما عايز اتهمها اتهام ممكن يزعلها و يقلل من قيمتها ،، ما عارف شكل علاقتي بيها حتكون كيف لقدام و انا في شكوك ماليه راسي ،، حاليا حاسي نفسي معلق في النص لا قادر اواجها و اسألها و ارتاح لا قادر اطرد الأفكار دي من راسي و اتعامل معاها كأنو ما حاصل شي 💔
مرا أسبوع و نحنا لسه جاريين ورا قصة سجود ،، حاولنا قدر الإمكان إنو نطلعها بكفالة بس رفضوا و أكدوا لينا خطورة الموضوع و ما حيمر بالساهل كدا من غير عقاب ،، في الأسبوع دا بقيت ما بشوف أنس كتير بجي بليل و بطلع الصباح بدري بمشي عشان يحل مشكلة أختو و منها للشغل عشان يطلع ليهو قروش يوكل بيها محامي ، من جهتي وقفت من الجامعة كم يوم و بقيت أفتش في شغل من النت عشان اقدر أساعد أنس في توكيل المحامي ، خشيت صفحة اسمها "Sudan jop" دخلت فيها و شفت كل الوظائف الموفرنها بس للآسف شرطها الأساس إنو المقدم للوظيفة يكون خريج 💔 كنت حأطلع من الصفحة بس لمحت بوست تاني لوظيفة كانت استاذ مساعد "لعلوم الحاسوب " و بما إني بحب الحاسوب و ماخده فيهو كورسات كتيره و حاليا هو مجالي في الجامعة قررت إني اقدم للوظيفة دي مع إني ما مقتنعه بقبولهم لي بس قلت أجرب ما بخسر شي ، دخلت الرابط و شفت المطلوب شنو ،، بعدها مشيت جهزت الأوراق المطلوبه و قدمت للوظيفه دي .
أنس !! جيت متين ؟ طيب ما مشكلة اقعد ارتاح شويه و انا حأمشي اجهز ليك الأكل طيب ؟
قال لي ما عايز حاجه انا ، قلت ليهو بس ليك كم يوم بقيت ما بتاكل كويس و صحتك بقت متدهوره شديد ، عارفه انك شايل هم أختك و خايف عليها ، ماف مشكلة و ما ليها حل خليك واثق من الحاجه دي ، لازم تهتم بصحتك عشان تقدر تقاوم و تساعد اختك لأنها محتاجه لوقفتك جنبها .
قال لي خلصتي ؟! اتفاجأت من برودو و كلامو دا ، قلت ليهو أنس انا عارفه انك زعلان مني و مفتكر إني السبب ، ما حألومك لأنو ليك الحق تزعل من الحصل مع أختك ، ردة فعلك طبيعيه ما حأعاتبك عليها بس ممكن تحاول تخفف من حدتك دي شويه ؟ حاول تخفف غضبك مني دا حبه ، ايي عارفه إني السبب في الحصل دا كلو ، والله لو كنت عارفه حيحصل كدا كان اتصرفت بحكمة و وعي أكتر .
قال لي شفتي ؟! مش كان مفروض تقولي : كان حأكلمك و نحل المشكلة دي سوا ؟ مفروض تقولي كدا صح ؟ بس لا دايما بتحبي تظهري نفسك للناس على أساس انك المنقذه ، انك حلالة المشاكل ، انك الزوجه و الأخت و البنت المثاليه ، حتستفيدي شنو يعنى ؟ عايزا الناس تكون مديونه ليك ولا عايزاهم يشكروك و يكون ممتنين ليك ؟ طول عمرك انانيه و ما بتدي الناس فرصه عشان تتصرف أو تحل مشكله حتى ولو في حاجه بتخصها.
قلت ليهو تخصها ؟ يعنى ما معتبرني جزء من أسرتك ؟ شايفني غريبه عنكم يا أنس ؟
قال لي بغضب و صوت عالي لو ما كنتي كدا ما كان اتصرفتي من عندك كان تختيني في الصوره و تجي تحكي لي من طق طق للسلام عليكم ، يعنى خايفه على سجود مني ؟ عايزا تحميها مني ؟ تخافي على اخت من أخوها ؟ كنت حأعمل ليها شنو مثلا ؟ حأضربها ؟ و يعنى شنو اذا ضربتها مش احسن من قعدتها ورا أربع حيطان بالشكل دا ؟ مش احسن من الهي فيو هسي ؟ انقذتيها مني صح ! يلا اتصرفي و أنقذيها من السجن ، مش بتحبي احساس العظمه و بتحبي تحسي انك انسانه واو و الناس ما بتقدر تتصرف من غيرك ؟ اتصرفي و طلعيها لينا من السجن .
بكون كذبت لو قلت كلامو ما أثر فيني ، بكون كذبت لو قلت انو كلامو ما جرحني ، معقولة بفكر فيني كدا ؟ معقولة فسر العملتو دا كلو و قال إني عايزا اظهر للناس عشان يشكروني ؟
مسحت دموعي و أخدت نفس عميق و قلت ليهو برضو ما ح أزعل من كلامك يا أنس انا عاذراك و عارفاها صعبه عليك تشوف اختك في السجن ، حتتحل ان شاء الله يا أنس ،،،، ما رد علي اكتفى بإنو يحمل نفسو و يطلع من الغرفه 💔
بعد يومين جاني اتصال من رقم غريب ،، أول ما رديت جاني صوت مره عرفتني على نفسها و قالت إنها من المدرسة الأجنبيه الأنا قدمت لوظيفه فيها ، بعدها قالت لي حتبدي من متين ؟ قلت ليها من بكرا ان شاء الله ، قالت لي طيب تمام ، أشوفك بكرا ......
فرحت شديد ، الحمدلله لقيت شغل ، اخيرا حأقدر أساعد أنس و حنوكل محامي و ان شاء الله حنطلع سجود من السجن ، كنت ماشه أكلم أنس بس وقفت آخر لحظة ،، أنس ما حيرضى اني أمشي اشتغل عشان اساعدو في القروش ، اصلا طول عمرو ما حصل مد يدو على قروش بطلعها انا من شغلي ، فما بالكم لما يكون زعلان مني و خاتي كل اللوم علي ،، متأكده ما حيقبل ، عشان كدا قررت ما اوريهو و بعدين لمن أطلع القروش حأشوف طريقه ظريفه اقدر اديهو بيها القروش دي .
جهزت نفسي و طلعت ، ناس البيت مفتكرين إني ماشه الجامعة ، لكن انا ما ماشه الجامعة ، انا ماشه للشغل الجديد ، وصلت المدرسة المقصوده و وقفت قصادها ، مدرسه ما شاء الله عليها ، شكل المبنى و الموقع حلو شديد ، لو من برا كدا معناها من جوا حتكون كيف ؟
دخلت المدرسة و قابلت المديره بتاعتها ، رحبت بي شديد و اتكلمت ليها عن نفسي شويه ، قالت لي عارفه إنو نحنا محتاجين استاذه مساعده لفترة مؤقته ؟ قلت ليها ايوااا عندي علم ، حأقضي معاكم الفتره المؤقته ، قالت لي اذا اتفقنا ، نادت واحده من المعلمات و قالت ليها سوقيها معاك خليها تشوف المدرسه و الفصول الحتدرس فيها ، طلعنا من مكتبها و اتجولنا في المدرسة ، ما شاء الله كانت من خمس طوابق و شكلها من جوا حلو شديد ، يحسسك كأنك ما في السودان ، اتعرفت على المعلمة الكانت مرافقاني و قالت لي اسمها "مرام " ، اثناء ما نحنا بنتجول كدا ، سمعت صوت راجل بنده علي مهاااا مهاااا
يتبع........
