لم يكُن عابر سبيل ..💔
كان عابر عُمر و الذين يعبرون الأعمار يقتطعون مسافاتهم منا و ليس من الطريق ..💔
شلت تلفوني و عاينت مسافه في رقم أنس ، كان نفسي اتصل عليهو و اسمع صوتو ، نفسي نرجع زي زمان ، ضغطت على الرقم كان خاشي فجأة انهيت المكالمة و قفلت التلفون ، عايزا تسمعي شنو تاني بعد الحصل ؟ ما كفايه السمعتو ؟ سرحت بعيد و اتذكرت قبل المحاكمة بإسبوع :
اتصلت على المحامي و اتناقشت معاهو في قضية سجود ، قال لي ممكن قضية النصب و الإحتيال دي نحلها بسهوله يعنى اذا رجعتوا المبالغ دي لأصحابها ح تتحل المشكله و حيكون فاضل لينا قصة المخدرات و هي كمان ما ساهله ابدا ، قلت ليهو طيب المبلغ كم ؟ قال لي سجود و مجموعتها ما احتالوا و نصبوا مره أو مرتين ، ديل نفذوا عدة عمليات ، المحكمة حتشوف عدد الناس الإحتالوا عليها و المبلغ المطلوب كم في كل عملية نصب و إحتيال عملوها و آخر شي حتشوف عدد الناس الشاركوا في العملية دي و تقسم عليهم المبلغ بالتساوي ، حأشوف ليك المبلغ كم و اديك خبر لكن ما اظن المبلغ يكون شويه ، و انا كلمت أنس قبل كدا و قلت ليهو المبلغ المطلوب حيكون كبير و فوق استطاعتكم ، قال لي حأحاول أدبر المبلغ دا و تاني ما اداني خبر ، قلت ليهو طيب خير حنحاول نجهز المبلغ دا ، قال لي تمام .....
بقيت افكر نجيب مبلغ كبير زي دا من وين مؤكد انو حيكون بالمليارات ، اجيبي قروش من وين يا ربي ؟ لمن أنس جا قعدت معاهو عشان نتناقش في الموضوع دا و نفكر كيف نقدر نجيب المبلغ دا ، بس للآسف أنس ما حاول يقعد و يتفاهم معاي ، شال بعضو و طلع من الغرفه للشارع طوالي ، ما استغربت من تصرفو دا ، بقى ما جديد علي دي بقت معاملة أنس لي ، مع ذلك ما ح اتخلى عنو ، حأفضل اقيف معاهو و ادعمو لحدي آخر نفس ، شلت اللابتوب و خشيت النت فتشت لشغل خاص بالبرمجه أو التصميم بس ما لقيت ، شلت تلفوني و دخلت الفيس و فيهو خشيت قروب اسمو "المبرمجين و المصممين السودانيين" كان في واحد منزل بوست و كاتب فيهو انو عايز لمصمم ، دخلت عليهو خاص و قلت ليهو اني مصممه و بقدر اساعدك في شغلك دا ، هو كان ما خاشي ، انتظرت ساعه و اتنين و تلاته بس ماف رد 💔 في النهايه نعست لميت اللابتوب و رجعت نمت ، صحيت الصباح بدري ، مشيت الجامعه و منها للمدرسة ، بعد ما انتهيت من الحصة ، فتحت تلفوني و لقيت رسالة من الراجل الرسلت ليهو أمبارح ، قال بعتذر منك لقيت لي مصمم في زول سبقك ، قلت ليهو طيب ما مشكلة ، بعد ما خلاص فرحت و قلت حتتحل بإذن الله ، بس ما اتوفقت ، حسيت نفسي عاجزه شديد ما فاضل لي إلا البكى 💔 دوامي انتهى كنت طالعه من المدرسه ، تلفوني رنه وقفت جنب أقرب شجرة و رديت و كانت المتصله صحبتي شديد ، قالت لي اها حصل شنو بخصوص الشغل الكلمتيني عنو ؟ قلت ليها للأسف ما اتوفقت و قال لي انو لقى ليهو مصمم ، قالت لي طيب يا مها ممكن انا اساعدك ممك....قاطعتها و قلت ليها لا يا وجدان ما بقدر أشيل منك قروش تاني ، انا شاكره ليك شديد والله ، قالت لي يا مها الله يرضى عليك بطلي عناد ، قلت ليها ما بقدر يا وجدان أفهميني ندمتيني لأني حكيت ليك ، قالت طيب يا مها و قفلت الخط ، عارفاها زعلت بس والله ما بقدر كل مرة اشيل منها قروش هي ما بتقصر معاي لكن ما عايزه أزودها ، و بعدين المبلغ المحتاجه ليهو انا كبير شديد و ما حتقدر عليهو ،، بعد ما انتهيت من المكالمة حسيت في زول وراي ، لمن إلتفت لقيتو دا احمد قال لي كيفك ؟ قلت ليهو كويسه الحمدلله انت كيف ؟ قال لي نحمدو ، قلت ليهو طيب عن إذنك انا مستعجله مع السلامه ، قال لي مع السلامه ...
بعد ما صليت العشا ، فتحت تلفوني و لقيت رسالة من نفس الراجل القال عايز مصمم كاتب لي فيها بعد السلام : محتاجين لمصمم تاني و اتذكرت انك عايزا الشغل دا ها موافقه ؟ قلت ليهو ما عندي مانع و ممكن أبدا ليكم من اليوم بس قول لي عايزني اصمم ليكم شنو ؟ قال لي مطلوب .....و......الخ ، قلت ليهو طيب تمام قال لي كل تصميم عليهو 30 ألف ، قلت ليهو طيب تمام ، مع انو لو كان الشركه دي برا السودان المبلغ حيكون اكبر من كدا ، قلت يلا 30 ما بطالة و لو اجتهدت اكتر و لقيت لي شغل حأقدر أوفر المبلغ ، خلال يومين عملت ليهم 3 أعمال ، رسلت ليهو الأعمال و رسل لي المبلغ ، قال لي شغلك حلو رايك شنو تجي تشتغلي عندنا في الشركه ، بدون تردد قلت ليهو ما عندي مانع ، كنت محتاجه للشغل دا شديد ، قلت ليهو ممكن انزل من بكرا ؟ قال لي اذا حابه كدا فممكن ، رسل لي عنوان الشركه بتاعتهم ، قربت أطير من الفرح ، يعنى فجأة كدا الأمور اتسهلت و لقيت شغل ، بس بقيت مضغوطه شديد ، البيت و الجامعة و المدرسه و الشغل في الشركه مع اني ما بمشي ليهم كتير أغلب الشغل بعملوا في البيت بس برضو متعب ، في الفتره دي بقيت ما بشوف أنس كتير و حتى لو قعدت جنبو بقوم من جنبي ، حاسه بقى بكرهني شديد ما بديني فرصه افهم منو الحاصل ، قلت ما مشكلة برا لمن تتحل قصة سجود دي ح نحل مشاكلنا دي كلها و نرجع زي زمان و احسن المسأله مسألة وكت بس ، بقيت عايشه على الأمل دا
في يوم مشيت الجامعة و طلعت منها الساعه 12 م مشيت على طول للمدرسة درست حصصي و طلعت منها الساعه 3 منها للشركه طوالي ، المواصلات براها أخدت مني ساعه و شويه لمن وصلت الساعه كانت ماشه ل5 م ، أول ما دخلت الشركه ، لمحت زول من بعيد ما غريب علي ، الجابو هنا شنو ؟
يتبع.........
