وَهرمت قلوبنا قبل أوانها أوجعتنا هذه الحياة بحجم السماء! فما كان لقلوبنا أن تتحمل ف شابت مُبكرةٌ... 🖤🥀🥀
بعد مرور 6 سنوات :–
- روفااااا ، روفاااا ، وين انتي ؟
أنس ما شفت رفيف مشت وين ؟ من قبيل بفتش عليها و ما لقيتها
– لا ما شفتها ، ح انزل تحت لأمي احتمال تكون معاها ، هسي بجيبا ليك....
مشيت لأمي و فعلا لقيت رفيف معاها ، قلت ليها انتي هنا و ماما من قبيل بتفتش عليك ، شلتها من أمي و بستها على خدها ، أمي قالت لي كانت في الشارع و دي دخلتها ، خليها معاي شويه لسه ما شبعت منها ، قلت ليها أمها بتفتش عليها من قبيل خليني أوديها ليها ، قالت لي التقول انا غريبه منهم ، قلت ليها ما كدا يا أمي بس هي كانت خايفه و مقلقه عليها ، قالت لي بصره سمح وديها ليها ، سقتها و مشيت وديتا لأمها ، أول ما شافتها أخدتها في حضنها و فضلت تبوس فيها ، قالت لي لقيتا وين يا أنس ، قلت ليها كانت في الشارع و هسي جات داخله ، عاينت ليها و قالت ليها مش قلت ليك ما تطلعي الشارع تاني ، باستها و دخلت بيها غرفتنا 🌹💙
أحمد ياخ ما شايف أولادك ديل بعمل في شنو ؟
قلت ليها خليهم هم لسه اطفال و ما عارفين حاجه ، و لو على الملابس دي هسي بطبقها ليك و بدخلها ليك في الدولاب ، قالت لي غيتو انت و و أولادك ديل حتجننوني في النهايه ، شلت هيثم و نون و رقدتهم في صدري قلت ليهم سامعين ماما بتقول عننا شنو ؟ هيثومي ، نون انتوا حتجننوا ماما ؟ الإتنين سوا قالوا لي "لع"ما " ننجمها " بمعنى " ما نجننها "ضحكت و بستهم مساااافه طويله ، و ضميتهم علي شديد ♥️ ساره قالت لي بالمناسبه ما تنسى يا أحمد انك وعدتني توديني لأمي بعدين العصر ، قلت ليها والله مشغول يا ساره ما بقدر ، حسيتا زعلت و كانت حتطلع من الغرفه ، قمت سحبتها علي و ضميت و قلت ليها ح أأجل شغلي عشانك كلو ولا زعلك ، قالت لي بالجد حتوديني 😍 قلت ليها أكيد حصل كذبت عليك ؟ قالت لي لا باستني على خدي و قالت لي حأمشي اجهز ملابسنا ...
اخيرا و بعد غياب دام 5 سنوات رجعت تاني للسودان مع إني ما كنت عايزا أرجع بس أمي و ابوي قالوا لي كفاك ارجعي بلدك ، اول ما خطيت أول خطوه في السودان مر علي شريط حياتي كلو ، سافرت عشان اتخلص من العشتو دا هنا ، و حاليا انا اتخلصت من الإحساس بس الذكريات لسه موجوده ، المهم قدرت اتجاوز أنس و اتخلصت من المشاعر الكنت بحسها تجاهو ، اليوم انا انسانه تانيه خالص ♥️
جا العصر ، صليناه و طلعنا ، قلت ل"ساره" ليه قعدتي هيثم في الكرسي الورا كدا حيقع ، قالت لي يعنى انت ما عارفو عنيد كيف ، حالف إلا يقعد في الكرسي دا ، إلتفت عليهو و قلت ليهو حبيبي خلي ماما تقعدك معانا قدام زي نون ، بس هزا راسو بمعنى لا ، اضطريت اشيلو غصبا عنو و اقعدو في رجولي ، لأنو ساره شايله نون ، بكى شديد و كان مصر انو يقعد ورا ، اتحرك بالعربيه و خليتو يبكى ساي ، سايق في أمان الله و منتبه مع سواقتي ، فجأة صرخت ساره و قالت مها !! قلت ليها شنو ، قالت لي مها ! اقيف اقيف يا أحمد ، قلت ليها بإستغراب مها ؟!! وينا قالت لي عاين هناك و أشرت لي على الجهه التانيه ، عاينت كويس في الناس بس ما لمحت زول ، قلت ليها ساره مالك في شنو ؟ عيانه انتي ولا حاجه ؟ قالت لي لا ما عيانه و هسي شفت مها ، قلت ليها مها البجيبا شنو تاني نسيتي إنها سافرت قبل 6 سنوات ، قالت لي و هي بتبكي بس انا متأكده اني شفتها يا احمد صدقني 😭 قلت ليها بتكوني شفتي وحده بتشبها ، ما تكبري الموضوع يا ساره ، قالت لي يمكن ، سكتت مساااافه و بعديها قالت لي يمكن عشان ما حيكت لأنس و قلت الحقيقه ؟! يمكن احساسي بالذنب هو الخلاني اتهيأ وجودها ؟! انا كنت حأحكي لأنس الحقيقه بس اتراجعت لمن أنس فاجأنا و قال لينا إنو قرر يعرس صفاء بت خالتي ، قلت مدام مها ح تسافر و أنس قرر يبدا حياة جديده و ينسى مها ، ماف داعي أجيب ليهو سيرة الموضوع و سكت على كدا 💔 قلت ليها هسس انتي ما ليك أي ذنبي مها هي القررت ترمي كل شي وراها و تسافر و اتخذت القرار دا عن قناعه ، آخره مره لاقيتا فيها أكدت لي إنها مستحيل ترجع ل"أنس" تاني ، يعنى حتى لو كان انتي حكيتي ل"أنس" الحقيقه ما كان ح يتغير شي ، سكت لحظه و قلت ليها حتى أنا في اليوم داك حاولت امشي و امنعها تسافر .
فلاش باك :
كنت مستعجل و سايق بأقصى سرعه عشان اوصل المطار ، ما حسيت إلا بالعربيه و هي منقلبه بي ، حسيت إنو راسي بقى تقيل و الدنيا لافه بي ، سامع أصوات من بعيد بتقول ألحقوهو يا ناس ، الحادث دا كبير و ناس بتقول لا حول ولا قوة إلا بالله ، كنت شايف طشاش طشاش و شويه شويه انعدمت الرؤيه ، الناس أسعفتنا بسرعه .... قاطعتني ساره و قالت لي يعنى كنت ماشي توقفها ؟ عشانك ولا عشان أنس ؟ ابتسمت و قلت ليها بتبقى حلوه لمن تغيري علي ، سكتت و ما ردت علي و بقت تلاعب في نون ، قلت ليها ما اكذب عليك كنت ماشي أوقفها عشاني ، قلت بما إنو هي ما عايزا أنس ف دي فرصتي عشان أطرح ليها ، بس كويس إنو حصل لي الحادث دا و خلاني اجتمع بأروع انسانه في العالم ، اهتمامك و خوفك علي بعد الحادث الحصل لي خلاني كل يوم أحبك و اتعلق بيك أكتر ، و ياهو في النهايه ربنا جمعنا في بيت واحد و رزقنا بأحلى طفلين 🌹🥀 اكتفت بإنها تبتسم بس ، قلت ليها لسه زعلانه مني ؟ قالت لي لا ، قلت ليها متأكده ؟ ضحكت و قالت لي والله ما زعلانه ، قلت ليها كدا ياداب صدقتك ، عساها الضحكه ما تفارق محياك ، زادت في الضحك و خطفت قلبي معاها ♥️
و اخيرا وصلنا بيت ناس أنس ، دخلنا عليهم و سلمنا ليهم و استقبلونا احسن استقبال ، ساره طوالي جرت لأمها و حضنتها ، قلت ليها محسساني إنو ليك سنه ما شفتي أمك دي قبل اسبوع كنتي معاها😂 عاينت لي بغيظ و قالت لي لو فارقتها لحظه ح اشتاق ليها ، أمها ضمتها عليها و قالت ليها ربنا يحفظك لي ، فكتها و جات شالت مننا الأطفال و قعدت تلاعبهم ، بعد منوال الغدا و الشاي ، قعدنا كلنا و بدينا في الونسه ، أنس طول قعدتنا دي كان بلاعب في بتو رفيف و مرات مرات بشارك معانا ، علاقتي معاهو لسه متوتره ، بس بحاول أكون زوج اختك كويس في نظرو ، أمو لاحظت ليهو ، ضحكت و قالت لينا أنس لسه فرحان ببتو رفيف ربنا يخليها ليهو ، لو كان من زمان عرست صفاء و ما عرست ال....ساره قاطعتها و قالت ليها أمي و عاينت ليها في عيونها ، سكتت و قالت لينا خشمي و عندي ، بعد كلامها دا أنس ساق بتو و قام مننا ، كلنا اتحسسنا من موقفو دا ، ساره عشان تلطف الجو قالت ل"صفاء" اها ما ناويه تجيبي لبتك أخو ؟ صفاء ضحكت و قالت ليها بإذن الله قريبا ♥️و استمرينا في الونسه لحدي ما المغرب جا ، صليناهو هناك و رجعنا البيت ...
"لستُ حزينه لأن الأمور تغيَّرت، ولا لأننا أصبحنا أقل حديثاً، أنا حزينه لأننا اعتدنا على ذلك..ولأن الشوق الذي كان يرافقنـا بمجرد أن نغيب عن بعضنـا لم يعد يرافقنا ألان 😕 لأننـا اعتدنا الغياب لفترات طويلة وذلك اسوء شعور "
يتبع......
