"كل شيء بميعاد، وكل شيء له وقت، وعندما يأتي الوقت المناسب ستجد كل شيء يحدث بأدنى حد من المجهود.. ما قُدِّرَ له الإنتهاء سينتهي، وما قُدِّرَ له البدء سيبدأ، وما قُدَّر له النسيان ستنساه، وكل شيء، كل شيء سيأخذ مساره الصحيح.. الضغط على النفس لتغيير واقع لم يحن وقت تغييره جهد مهدور وهَلكة للنفس 🖤🍁
نزلت جنب بيت حلو و كبير شديد و مسور ، أول ما قربت للباب لقيت حرس جنبو ، قلت ليهم انا...قبل ما أتم كلامي قالوا لي خشي المدام كلمتنا انو نخليك تدخلي ، دخلت و مشيت في ممر طويل و على حوافو شجر و أزهار كتيره ، منظر يفتح النفس ، و انا ماشه كدا جا أحمد طالع ، سلم علي و دخل معاي جو ، قال لي أمي فوق في غرفتها دقيقه أناديها ليك ، قلت ليهو اذا عيانه شديد خليها انا بطلع ليها بس وصف لي الغرفه ، قال لي امشي بالسلم دا طويل و لفي على يدك اليمين في أول ممر يلاقيك ، أول غرفه دي غرفتها ، قلت ليهو طيب تمام ... أول ما وصلت غرفتها ضربت ليها الباب جاني صوتها و هي بتقول لي اتفضلي ، دخلت عليها و سلمت عليها و قلت ليها سلامتك ألف سلامة ، قالت لي الله يسلمك يا بتي و آسفه على التعب ، قلت ليها لا والله ماف أي تعب ، قالت لي خلينا نشرب شي بالأول ، قلت ليها لا لا ما عايزا حاجه انا والله ، قالت لي عيب تجيني في البيت و ما أضيفك شي ، طلعت و ما تمت دقيقتين جات و معاها الشغاله و هي شايله عصير و شاي ، قلت ليها ما كان في داعي ، قالت لي لا في داعي ، بما انك جيت فحتشربي معاي شاي الصباح ، قعدت معاها شربت الشاي و العصير ، مشت على دولابها و طلعت ظرف فيهو أوراق كتيره قالت لي ديل أديهم للوكيله (سميره) و عايزا اقول ليك بكرا في مسابقه أكادميه عايزاك تشرفي عليها إنت و برضو في .......الخ ، عشان عندي ثقة فيك عشان كدا كلفتك بالمهام دي كلها ، قلت ليها إن شاء الله أطلع عند حسن ظنك و ما حأقصر أبدا ، قالت لي متأكده ما حتخيبي لي ظني ، زي أمك طيبانه و محل ثقه ، اتونست معاها حبه و قلت ليها بعد دا أنا حأمشي ، قامت عشان تقدمني وقفتها و قلت ليها لا بمشي براي انتي ارتاحي و ما تتعبي نفسك ، كان واضح عليها التعب و المرض ، اتحركت من جنبها كدا ، قالت لي مها ، إلتفت عليها و قلت ليها نعم ، قالت لي بالنسبه لجامعتك كيف حتقدري توافقي بين المدرسه و الجامعة خاصة انهم في نفس الزمن ، قلت ليها حأتابع مع صحبتي أول بأول ، قالت لي طيب عندي فكرة ، المحاضرات متغيره مره بتكون في الصباح و مره في الظهرية ، عشان كدا لمن تكون محاضرتك صباحيه امشي الجامعه و بعدها تعالي للمدرسه و العكس في المحاضرات الظهريه ، قلت ليها طيييب تمام مع عندي مانع ، قالت لي ربنا يوفقك يا بتي ، بس ممكن سؤال ؟ قلت ليها اتفضلي ، سكتت مسافه و تاني قالت لي خلاص امشي عشان ما تتأخري على المدرسة ، استغربت ليه سكتت و اصلا كانت عايزا تسألني عن شنو ؟ ودعتها و طلعت ، لقيت أحمد جاي داخل ، قال لي خلاص طالعه ؟ قلت ليهو أيي ، قال لي طيب انتظريني دقيقه بس أودي الأدويه دي لأمي و اجي أوصلك ، قلت ليهو لا حأمشي بالمواصلات اصلا اليوم هي متوفره ، قال لي رجاء ما تحرجيني يا مها ، دقيقه بس و ارجع ليك ، قلت ليهو ب....ما انتظرني اكمل كلامي مشى بعيد مني و هو بقول لي بصوت عالي راجع ليك هسسسي ما تمشي ، ما قدرت امشي و ما انتظرو ، شفتها ما حلوه بعد ما أصر علي الإصرار دا كلو ، فعلا ما تمت دقيقه إلا و شفت أحمد واقف قدامي قال لي يلا عشان ما تتأخري ، ركبنا في العربيه و قبل ما نتحرك في واحد من الحرس ناداهو ، نزل مشى ليهو و جا ، قلت ليهو لو عندك شغل امشي كملو و انا بمشي بكمل براي ، قال لي لا ما عندي شي ، دا بتاع التوصيل ، مآب اختي كانت طالبه ليها شوية حلويات و وصلوها ليها ، قلت ليهو ايوااا......
