#أحبيني_بلا_عقُدِ ((777))
#الحلقة_15
.
.
.
لايك قبل تقري 🥰 وأسفة لو في اخطأء مالحقتش انعدل
.
.
.
نوح : الو
نسمة تبكي : نوح لحق عليا ...ااااه😭😭
نوح : خيرك شن في ؟
نسمة : نزار ...نزار خطفوه ماهناش 😭😭
نوح : شني ؟!!
نسمة : دقوا على الباب واخدوه 😭
نوح : نسمة أهدي وأدوي بالشويا ..مافهمت منك شي
نسمة تمسح في دموعها واتحاول تحكي بالشويا : نزار طلع يفتح في الباب ..وسمعت عياط وهرجة وبعدين معاش في صوت ...ولما طلعت مالقيت حد ..وحتى نزار مهناش ...نتصل بيه مايردش 😥
نوح : بالك نزل ايجيب في شي ؟
نسمة : لا لا اخدوه ...اتصلت حتى بالريسبشن تحت قالوا طلع مع مجموعة شباب 😭
طبعا دارين تسمع فيهم ...وخاطرها تعرف نسمة خيرها ..بس ماتبيش تدوي مع نوح 💔
نوح : باهي تمام ...اسكتي وخليك مكانك ...أنتي في اي فندق ؟
نسمة : اااءء شن اسمه هادا ...اي فندق تلال المدينة
نوح : تمام عرفته ...أتصلتي بحد غيري ؟
نسمة : لاا
نوح : اوكي ..خليك مكانك ..ماتتصليش باي حد ..ولا تتطلعي من غرفتك ولا تفتحي الباب لعند انجيك
نسمة : ماتتاخرش عليا ..الله يخليك 😭
نوح : مسافة الطريق بس
صكر المكالمة ..وشاف لدارين ...بس دارين نزلت اعيونها
نوح قرب منها : بنطلع ..نسمة قالت نزار شدوه وحدين واخدوه ..وتتصل بيه ماريردش ..بنمشي انشوفها
دارين من غير ماتشوفله : اي ..تمام
نوح شافلها زين ..تنهد ...واخذاء مفتاحه ...وفتح الباب وطلع ...خطم على دار أوس ..ودق الباب
اوس ورغد راقدين ...بس رغد سمعت الدق وناضت ...نوح رجع دق ثاني ...ورغد نزلت من السرير ومشت لباب : منو ؟؟
نوح : رغد نوضي اوس ..نبيه ضروري
رغد : خير إن شالله ..شن في ؟!!
نوح : رغد بالله نوضي اوس وتوا تعرفي
رغد : اي حاضر حاضر
ومشت بسرعة اتنوض في أوس ...ناض ورغد قالتله يبيك نوح
أوس صبا ومشى فتح الباب : خيرك نوح شن في ؟
نوح : مانعرفش شن صاير بالضبط ...بس نسمة اتصلت بيا توا ..تبكي واتقول نزار خطفوه
رغد واقفة وراء الباب تسمع فيهم : 😱
أوس : خطفوه ؟!! ..من خطفه ؟
