آسميتها جارية فأصبحت سيدة قلبي

بارت 28

التافينه حوالين البيت ووگفنه مقابيله نزل بابا شايل فهد ..

واجه علاء بسرعه فتحلي الباب ساعدني انزل اتمسكت بي اخاف اوگع لأن الم العملية شال رجلي ..

سد باب السياره وبقه لازمني يمشيني لداخل البيت ..

كلهم فاتو بس هو اتحملني وبقه يمشي على خطواتي لأن يدري متأذيه ..

اجتي ايميليا من وصلنه للباب لزمتني من الجهه الثانيه ساعدتني امشي ..

دخلوني للصاله وبوقتها عرفت المفاجئه چانت رايحه من بالي بس من دخلت اتذكرت ..

بيبي روعه وبيبي زمزم ومحمد ..

اجه محمد حضني وباس راسي ..

محمد :- الحمد لله على سلامتچ حبيبتي .

نور :- الله يسلمك شنو هالمفاجئه الحلوه .

محمد :- غصباً عليچ حلوه .

نور :- هههه اوك .

لزمني بدال ايميليا ومشوني هو. وعلاء وگفت يم بيبياتي سلمت عليهن وگعدت يمهن ..

نور :- اني اگول شو اليونان منوره .

بيبي روعه :- شنو يونان ؟!

نور :- هاي الدوله اللي احنه بيها اسمها اليونان .

بيبي روعه :- چا ليش يگول رايحين امريكا ؟!!!

علاء :- منو هذا يگول !؟

بيبي روعه :- هذا نوير الچذاب ماتصيحه اطگه بهاي العصه .

نور :- انور هنا ؟!

التفتت على مصدر صوته :- اي ياروح انور .

نسيت الألم والزعل والعتب وگمت ملهوفه عليه ماخلاني اتقدم اكثر اتقرب عليه وحضني بكل قوته ..

نور :- والله مشتاقتلك حيل والله .

انور :- اني اكثر عمري الحمد لله على سلامتچ .

ابتعد عنه وسألته بعتب ..

نور :- ليش مااجيتني قبل العمليه !؟

انور :- اسف حبيبتي بس چان عندي شغل مهم .

التفتت على سؤال علاء ..

علاء :- ليش مو گلت امتحانات ؟!

رجعت باوعت على انور بشك ..

نور :- صدگ انت گلت عندك امتحانات ويفصلوك اذا تأجلهن .

نظراته على علاء ويحچي ..

انور :- عادي خلصت امتحانات وتوجهت لشغل مهم چان لازم انهي .

علاء :- اهاا وان شاء الله نهيته ؟!

انور :- اكيد اني مااعوف شي على النص .

علاء :- دير بالك لعد .

بقيت اباوع على الأثنين عيونهم جمر عبالك بينهم حرب بالنظرات ..