ظلموني و بكاو عليا قصة ليلى " باللهجة الجزائرية "

12

#من_صفحة_هنا_نحكي_حكايتي
#ليلى
#الحلقة_12
قتلكم داوني لداري جديدة عفوا داوني للمقبرة من طريق عرفت المعوجة بلي دعوة موخذة ...المهم نهار نزلت و حطيت رجلي على لرض عفست على الزبل تاع البقر حشاكم و حشا قدركم ...و ذراري ونسمع دربوكة تضرب ضرب الداخل مشفت والو كنت مغمدة بالبرنوس ...المهم دخلوني نيشان لشومبرة نهار نحاو عليا البرنوس مأمنتش عقلي حسبت روحي راني نحلم شومبرة بتارنيت (زانق) مهيش مبنترة مومبا .....حيطان هاكك مطرح تاع حديد و مغطينها بكوفري تاع العصر الحجري خزانة وخلاص تاع 4 بيبان ....لا اله الى الله بداو يهبطو فالقش و زهيرة تخملي فالشموبرة و تبكي ....بادا الغاشي داخل و خارج مع ولادهم لا حشمة و لا هم يحزنون من قوة الزعاف خرجتهم وزقيت عليهم من نهار لول (و يارتني مدرتهاش ) المهم بلعت الباب غير انا و يما و زهيرة ...قلت لزهيرة مكان لا تصديرة لا لا والو  هذا الخرذة ديري معاهم تصديرة ...باسكو كنت رايحة نتصدر بكسوة زهيرة ...جات يما تهدر قتلها ..هشش قاع متهدريش مكيش حشمانة قتلها رميتني هنا و باغية دخلي روحك فيا ....والله نخرج ضروك و نروح متعرفونيش و ين مت ....سكتت ....لبست غير ذيك لاغوب بلونش وخرجت ...و ياا نهار خرجت الغاشي كامل يشوف ..المعاين فالطريق الذراري الصغار موسخين .يلحقو فيا ...الحصاير الفراش ....الغبار .....بديت نفيبري قلت ضروك ياكلوني ....المهم مكان لا ديكور و لا هم يحزنون غير كرسي وخلاص ..دربوكة و الرقص بقينا مخلعة ..ياربي شاهذا ...كلما نشوف في يما نصيبها تشوف فيا هي وزهيرة ....عارفين بلي رماوني ....المهم قاعدة و تحسب راني قاعدة على الجمر ..قاع هذيك الحالة و زايدين ميقيموش الغاشي ...مدواهش قاع فينا .....قعدت و حد الشوية  حتى جات و حدة ختو كبيرة بزاف عزبة  لابسة روبا و خلاص و تمشي بلحفا كرعيها مشلحين ... قاتلي اسمعي تصديرتك وين راهي ..( لافوا تاع راجل ) ...قتلها تاع واش تصديرة عطيتوني سمانتين كسوتي و مجبتهاش قاع ...قاتلي و ذراري علاه طيري عليهم و تخرجي فيهم من شومبرة ...قتلها زهيرة اسمعي ا ختي جيتي دابزي انتي قتلها كيفاه هذا وين دخلنا مخليتوهاش حتى تشرب كاس ما ....قدمت ليها وحلت عينيها فيها ....مأمنتش راسي ......#يتبع...