#من_صفحة_هنا_نحكي_حكايتي
#ليلى
#الحلقة9
نوجد فالعشا و خاوتي مجمعين مع يما برا فالحوش حتى سمعت خويا الكبير يقلها المهم انسان عاقل قلي هذ الخميس يجيب العجوز و يجي يشوفها قوليلها ...فشلت .....مقدرتش نوقف ....بغيت نروح نهدر بصح عرفت بلي مكاش لي راه مقيمني و حاط معايا ...ديتلهم العشا و دمعتي على خدي ...قاتلي ما واش بي جدك واش بيك ...حطيتلهم و جيت رايحة ..قاتلي علبالي بلي سمعتينا و راكي تبكي براس ما لعزيزة كون نجي ليك غير ننتفلك شعرك ...رحت لشومبرتي نبكي ..كيفاه يزوجني غير باه يستروني من الفضيحة ..باسكو دايرين في بالهم بلي مكاش لي يتقدم ليا بعدما صرات ذيك الضربة ....بت ليل نبكي صباح جات لي زهيرة مرت خويا ( زهيرة انسانة عاقلة بزاف و نادرا نا تمد رايها عندها بنتها صغيرة لاهيا غير معاها و يما مع بابا يبغوها بزاف باسكو فري بنت فامليا ) ..المهم جابتلي القهوة وجات ليا لشومبرة ..قاتلي ليلى اسمعي تعرفيني بلي مضاري مندخلش روحي بصح البارح جمعت مع خوك و حكالي على السيد وقلي بلي عاقل و تاع ليلى صح هوما على قدهم بصح المهم تتهناي ...بقات تفهم فيا بصح قاع متفاعلتش معاها ....قاتلي ولازم نقلك بلي مهمش رايحين يدو برايك المهم انا جيت نخبرك واش قلي خوك ....العشية كي جا بابا رحت نجري ليه وطحت عند رجليه وحاكمو من راكبيه لزووج و نبكي ونقلو ابابا انا بنتك و الله ما نعاود ابابا وك انت تبغيني ..ابابا متخليهمش يديرو رايهم ني خايفة ...نبكي ونشهق ....دمرني برجلو وراح وخلاني طايحة في بلاصتي ..ومهدرش قاع معايا ..نخلعت مأمنتش عقلي ...جامي لا تخيلت بلي بابا يعملني بهذ التعامل ....جيت نهدر مع يما ...مخلتنيش قاع نهدر ..قاتلي رحمي على الله لي راهم جايين يشوفك ...جيت نهدر مع خويا الزاوج ثاني والووو ...مكاش لي عبرني ....بغيت نتصل بخوالي بصح ما عندي تلفون ما يخلوني نخرج ....مصبتش قاع حل ....المهم لحق نهار لي راهم جايين فيه ...بديت كيما القرد حالتي تشف ...جابتلي زهيرة مرت خويا وحد الروبا باه نلبسها ...بدات تبكي و قاتلي ني حشامنة منك و الله ما بيدي حيلة وهدرت مع خوك قريب رخا فيا بكف ....قاستلي ذيك الروبا عند رجليا ..وقاتلي رقدي باه نوض صباح نمشطلك شعرك ....ما هدرت حتى كلمة ....الصباح نضت دوشت نورمال ....جات زهيرة تجبدلي في شعري و انا ولا كلمة خلاص رضيت دموع بلا بكا دمعة وحدها هابطة ...لبستني وقعدنا نستناو فيهم .....حتى جاو وانا فالشومبرتي محوستش نعرف كي دايرين ...جات زهيرة عينيها معمرين بالدمعة ..قاتلي هايا قولي بسم الله ...نضت ورحت دخلت عليهم تخيلو ......#يتبع .....
YOU ARE READING
ظلموني و بكاو عليا قصة ليلى " باللهجة الجزائرية "
Novellaاخطأت فلازمها عذاب ضميرها .. ارادت فعلا ان تصحح خطأها .. ليلى فتاة مدللة وجدت نفسها امام ظلم كبير فقط لانها حالت ان ترضي ضميرها قصة واقعية و للامانة حزينة من عمق المجتمع الجزائري
