My Heart Belongs To A Soldier_Completed [ Z&U ]

MHBTAS (50)

Part (50) U

ကိုကိုနှင့်ဝမ်လေးတို့အခန်းလေးက အရာရှိလိုင်းခန်းရဲ့ အစွန်ခန်းဖြစ်၍ မျက်စိတစ်ဆုံး စိုက်ခင်းစိမ်းစိမ်းများကို တမျှော်တခေါ်မြင်နေရသည်။

နံရံတွေကို ဝမ်လေးအကြိုက် ဆေးအစိမ်းဖျော့ဖျော့လေး ကိုကိုကိုယ်တိုင် သုတ်ပေးပြီး ကန့်လန့်ကာ အစိမ်းလေးတွေ တပ်ပေးထားသည်။
အိပ်ရာအပြင်အဆင်ကအစ အသုံးအဆောင်တွေကအစ စိမ်းဖျော့ဖျော့လေးတွေမို့ နုသစ်စိုလွင်နေသည်။

ဝင်ဝင်ချင်း ဧည့်ခန်းနံရံမှာ မင်္ဂလာဓါတ်ပုံအကြီးကြီးနှင့် ကိုကို့ဘွဲ့ပုံ၊ prewedding တုန်းက ပုံလေးတွေ စီချိတ်ကာ ကော်ဇောတွေ ကူရှင်တွေက အစိမ်းဖျော့လေးတွေဖြစ်ပြီး တပ်ရင်းက စီစဥ်ထားပေးသည့် ပရိဘောဂလေးတွေကို သူ့နေရာနှင့်သူ စနစ်တကျစီထားသည်မို့ ရိုးရိုးရှင်းရှင်း နေချင့်စဖွယ် လှပနေသည်။

အိပ်ခန်းနှစ်ခန်းပါပြီး အတန်အသင့်ကျယ်သော ဧည့်ခန်းလေးရယ်၊ မီးဖိုဆောင်နှင့် ရေချိုးခန်း၊အိမ်သာက တွဲလျက်သားမို့ နှစ်ယောက်စာအတွက်တော့ ကျယ်ပင်ကျယ်နေသေးသည်။