الفارس والوردة

البارت الثلاثون

الكاتبة : عليا الناصر

الفارس والوردة

البارت : 30

ليه كل ما تقترب
مني أخاف
وليه كلما تبعد
عني أصيح
وليه أحس بلا
حنانك بالجفاف
وليه ورقي
في خريفك
ما يطيح

ساطع : فز من حس قبل الفجر على صوت شذر اللي كانت گاعدة بالگاع وساندة ظهرها على حافة السرير وتبچي بكل حرگة گعد يمها ومسكها من إيدها شذر شبيچ شصاير

شذر : ناظرته وبعدت إيده وهي تدفعها وصاحت لا تلمسني أصلاً كل اللي جاي يصير من وراك بس گولي إنتَ شتريد مني وضربته على صدرة إحچي شتريد مني وليش جاي هيچي تسوي بيه  وشهگت بالبچي وإختنگت كحت وبعدين بلعت ريگيها يعني تاخذني وتوصلني لسابع سما وبعدين تشمرني وتنزلني لأسفل السافلين إحچي شتريد إحچي ورجعت ضربته على صدره وبقوة

ساطع : بس كافي إهدي صوتچ لا تعلينه فضحتينه شذر كافي وصاح بيها شذذذر ومسك إيديها بعدين سحبها وحظنها قوي وهي دفنت راسها بحظنة وگامت تشهگ

شذر : ورى ما هدت بعدت عن حظنة ومسحت دموعها أني رايحة على سرمد

ساطع : عوفي سرمد نايم ومرتاح وخلينه نحچي وبهدوء وبدون صراخ وعياط وبچي شوفي شذر سبق وگلتها إلچ إنتِ لازم تتعلمين توثقين بيه ولا تناظريني بهالطريقة هذي لأن هالشي مهم وبالذات بالنسبة إلچ إنتِ حتى ترتاحين وتعوفين هالأوهمام والأفكار الغلط المعشعشة بدماغچ شذر الحياة أخذ وعطى وإذا تظلين جامدة وما تتنازلين ودومچ تفهمين الأمور غلط  راح تتعبين وتخسرين هواية أشياء وصدگيني بوكتها ما راح ينفعچ الندم لأن اللي ينكسر صعب بعد يتصلح وإذا كلش عازة عليچ نفسچ وكرامتچ وتحسين إذا وثقتي بيه راح تنهانين وتنذلين وتنكسرين خلاص ماكو داعي وبلاها هالثقة هذي وما أريدها بس خلي بالچ سرمد جاي يكبر وهو ذكي وأبسط شي اللي صار قبل يومين وشفتيه بعينچ شصار بي فلا تعقدينه من ورى سوالفچ هذي وخاصةً هو هواية متعلق بيچ ويتأثر بأي شي يصير وياچ حتى لو چان شي صغير وتافه وإذا تهمچ مصلحتة حاولي حتى لو تضغطين على نفسچ وتتجاوزين عقدچ لخاطره لسرمد حتى ما يتدمر وبعدين بس فهميني إنتِ شنو اللي تريدينة وشنو اللي يرضيچ يعني على فرض لو رجع عزام وإنكشفت الحقيقة وطلگتچ إي وبعدين شراح يصير راح ترتاحين إحچي لا تسكتين راح ترتاحين

شذر : مو على أساس تگول ما أطلگچ لو شي ما يصير وحتى خبرتها لماما بهالشي لو هذا الكلام هم بس خرط مثل ما من جيت خطبتني وتعهدت لبابا تصوني وما تأذيني وضحكت عليه

ساطع : يا هالسالفة اللي ما تخلص ولا تنسي شوفي أني مليت وما عندي بعد طاقة أظل أدور وياچ بنفس الدوامة اللي حابسة نفسچ بيها وما ترضين تطلعين منها وأحسن شي أگوم من يمچ وأروح أتوضى وأقرى قرأن شوية لما يأذن الفجر حتى أصلي وعافها وگام طلع من البيت راح للجامع مالتهم ...
-----------