Pakiusap, tulungan Mo akong imulat ang mga mata,
'Pagkat ako'y isang bulag sa mundong balot ng dalita,
Puso ko'y nabibikig ng kasalana't pagdurusa,
At maging sa pagpikit, kadiliman ang nakikita.
Pakiusap, ibukas Mo ang aking dalawang tainga,
Upang sa wakas ay madinig ko ang Iyong Salita,
'Pagkat ako'y bingi na sa mundong mapang-alipusta,
Sa sumisigaw na damdaming hindi makawala.
Pakiusap, turuan Mong magsalita ang aking bibig,
Tanggalin ang pangambang sa'kin ay dumadaig,
Upang mabigkas ko, mailabas ang aking tinig,
Ang Iyong Kabutihan, masambit ko sa daigdig.
Pakiusap, linisin Mo ang aking utak at puso,
Upang sa kasalanan,tuluyan nang makalayo,
Bigyan nawa ng pag-asang muling makatatayo,
Mabigat mang balakid ay hindi susuko.
Iyong abutin ang napapagal kong mga kamay,
Nawa'y hawakan ng mahigpit upang 'di na mawalay,
Pakiusap, tulungan Mong maayos ang aking buhay,
Upang ako'y hindi na nabubuhay lamang sa tinapay.
BINABASA MO ANG
Mga Binhi: Antolohiya ng Isang Sawing Makata
PoetryMga katagang pinagbuklod ng kaisipang mapang-alipin. Mga taludturang nililok ng mga karanasan. Mga saknong na hinubog ng pagkakataon. Nagkaroon ng diwa. Nagkaroon ng damdamin. Nagkaroon ng puso. Nakabuo ng isang tula.
