Arts and Goodbyes

Kabanata 4 : Mansion

HINDI mapakaling kagat-kagat ni Krayola ang hintuturo at hinlalaki. Napabuga siya ng hangin bago iniiling ang ulo. Hindi maaring makonsensya siya sa ginawa. Ang pag-iwan sa lalaki ay ang pinakatamang desisyon na kanyang ginawa sa araw na ito. Kaya naman hindi siya puwede makonsensya. Hindi. Tama lang iyon sa lalaking kakatwa na nakilala niya lamang sa bukal.

"Alam ninyo, ma'am. Balikan n'yo na po ang kasintaham n'yo. Nakakaawa naman po iyon," anas ng taxi driver matapos siyang sipatin nang saglit mula sa salamin.

Nagtatakang napatingin siya sa rearview mirror bilang tugon dito. Aba't kung hindi ba naman siya minamalas ay napagkamalan pa siyang kasintahan ng kataka-takang lalaki na iyon. Mukha ba siyang sumasama sa mga taong kakaiba ang mga trip sa buhay?

"Hindi naman po sa panghihimasok pero halata namang nagsasabi ang kasintahan ninyo ng totoo. Nako, kapag napaano talaga ang kasintahan n'yo sa daan, magiging isa po kayo sa mga samahan nang sa huli na nagsisi."

Naningkit ang mga mata ni Krayola bago nagbuntong-hininga. Sa tuwing maririnig niya ang salitang kasintahan ay napapangiwi siya. Sa tagal nang pamamalagi sa mundo ay tila ba nananayo pa rin ang kaniyang mga balahibo sa tuwing naririning ang katagang iyon. Hindi dahil may pinagdaanan siyang nakapagpabiyak ng kanyang puso kundi sa isipin na magkakaroon ng kasintahan.

Kung ang pangarap niya nga'y hindi niya kayang mapanindigan, ang papasok pa kaya sa relasyon? Kung sakali mang tatanda siya ng dalaga ay ayos lang para sa kanya. Isa pa, kadalasan ng mga bantugang pintor na mga kababaihan ay hindi kailanman naikasal; si Alma Thomas, Mary Cassat, Elizabeth Coffin, at Cecelia Beaux. At kung mapapabilang siya sa hanay na iyon ay hinding-hindi iyon magiging problema.

"Ma'am, kung sasabihin niya po na balikan ang kasintahan ninyo, handa po akong bumalik sa daan. Sabihin mo lang po," pang-uudyok muli ng driver para mapahilamos na lamang siya sa mukha gamit ang mga kamay.

Pinaikot ni Krayola ang mga mata sa sobrang iritasyon nang tinaas-babaan pa siya nito ng mga kilay. Napabuntong-hininga siya at tumango sabay wasiwas ng mga kamay. "Sige na po, Manong. Sige na po. Para sa ikakapanatag ng kalukuwa ninyo. Sa sobrang daldal ninyo po grabe, meter ninyo nakalimutan ninyong buksan."

Magiliw na niliko nito ang manubela at bumalik sa daan at saka pa pinaandar ang meter. Nang papalapit na sa lugar ay maiging pinakatitigan niya ang lalaki na ngayon ay walang ideya at namamasid sa kapaligiran. The man somehow has a spark in his eyes that she couldn't fathom, that somehow telling her that the bizarre man could be telling the truth... at least. She's not sure and she is still doubting the man but her conscience was eating her. Marahil nga ay masiyado siyang naging mapanghusga. Baka nga nagsasabi ang lalaki ng totoo.

Nang maihinto na ang sasakyan ay agad niya itong pinagbuksan. Nakasalubong pa ang mga kilay nito nang tumingin sa kaniyang gawi, tila marahil ay naguguluhan hanggang ngayon. At iyon na naman ang mga mata nitong tumititig sa kanya na walang kamuwang-muwang.

"Oh? Ano pa ang tinititig-titig mo? Sakay na."

May kung anong saya ang pumaibabaw sa reaksyon nito na tila ba kanina lamang ay kay lungkot, o kung sa kanyang tatawagin base sa kanyang napansin ay kaginhawaan. Nang umandar ang sasakyan ay narinig niya ang gulat na pagsinghap ng lalaki. Hindi ito kumibo kundi nagmasid lamang sa paligid habang mahigpit na hawak ang upuan. Sa tuwing madadaanan nito ang mga ilaw ay mananaas ang leeg ng lalaki at susundan nito ng tanaw, animo hindi pa nakakita ng ganoong bagay.

"Ang mga kumikinang..." naaliw na sumipat sa kanya ang lalaki bago ibinalik ang mga mata sa tanawin. "Ano ang tawag sa mga bagay na kumikinang?"

"You mean the lights?" tanong niya sa patuya na paraan.

"Hindi ko maintindihan ang iyong sinabi, Binibini. Nakapagtapos lamang ako ng kolehiyo ng sining dito sa Pilipinas ngunit hindi ako katulad ng iba na nakapag-aral sa Europa upang mag-aral ng Ingles. Kaya... ipagpaumanhim mo kung sakaling hindi ko maintindihan ang iyong mga sinabi, Binibini."