وتين الجلال

البارت الرابع والعشرين (فرصه تانيه)

احيانا يجب ان تكون الفرصه الثانيه لانفسنا وليس للاخرين فقط لذلك عندما نعطيها لانفسنا تكون بعد تفكير طويل هل نستحقها حقا ام ماذا؟!  وهل القدر من يختار النهايه لنا ام نحن من نقرر ذلك 

اسرع امير بالدخول الي جلال ووتين عندما سمع صوت جدالهما خارج الغرفه و. ..

جلال وهو ياجي ليه لا وكمان جايب  ورد وزفت بتاع ايه اصلا 

امير ايه ياجماعه صوتكم جايب لاخر الطرجه

وتين: مفيش حاجه ممكن نمشي من هنا ولا هتتخانق اكتر من كدا

جلال: اتخانق يعني انتي شايفه اني غلطان

وتين: ايوا غلط الراجل جاي يباركلك فتقوم تضربه 

جلال: لا كنتي عايزاني اتفرج عليه هو عما يتغزل فيكي وفالبت

امير: طب ممكن تفهموني بدل مانا واجف اكده مش فاهم حاجه 

وتين: ادهم الزهدي جه يباركلي وكان جايب ورد وكمان هديه علشان حياه اظن مفهاش حاجه دي لكن لا لازم جلال يتعصب ومش بس كدا ضربه لتاني مره 

امير: ادهم الزهدي مش دا اللي كان مع نرمين الزهدي هو مش كان سافر

وتين: لا مسافر النهارده علي الضهر

جلال: انت دا اللي هامك سافر ولا لا ومش هامك انه عمال يتغزل فالهانم عادي كأني مش واجف معاهم لا وهي ساكته وعتضحكله

وتين جلال انا مسمحلكش 

امير: اهدوا ياجماعه ايه يا جلال براحه عليها مراتك لساتها والده غلط عليها العصبيه  ولا عايزها تتعب 

وتين: تقريبا مش فارقه معاه

جلال: شوف الكلام اللي ينرفز ويحرق دم الواحد 

وتين: وانت مش سامع انت بتقول ايه ومش فارق معاك حاجه

امير: والله عيب اللي عتعملوه دا 

ليقاطعهم صوت طرق الباب

امير: طب ممكن تهدوا كدا علشان اشوف مين علي الباب 

ادخل

استأذنت الطبيبه للدخول

الطبيبه صباح الخير ها مدام وتين عامله ايه دلوجتي 

وتين بحزن الحمد لله 

الطبيبه لا شكل حضرتك زعلانه ودا مينفعش كدا هيأثر عليكي وكمان علي الجنين لانها هتحس بكل حاجه منك انتي 

جلال: جرا ايه يا دكتوره انتي جايه تكشفي عليها علشان تخرج وعلي جايه تحققي معاها زعلانه ولا مزعلناس

شعرت الطبيبه بالاحراج من جلال ليتحدث امير تلطيفا للاجواء

امير:ايه ياجلال الدكتوره عتشوف شغلها ولا ايه يا دكتوره انا عقول ان احنا نخرج نستني بره تكون الدكتوره كشفت براحتها ولا ايه رايك 

جلال: لا انا هستني اهنه علشان اطمن  عليها 

امير : طب انا هستني بره 

خرج امير وبدأت الطبيبه بمعاينه وتين وبعد فتره قصيره انتهت

الطبيبه: طبعا انا كتبتلك علي خروج لانكم اصريتوا علي دا بس اكيد شرط اساسي الراحه التامه ودا انا اتفقت عليه مع جلال بيه 

وتين بهمس لاماهو واضح خناق من اقولها من قبل ما نخرج

الطبيبه: افندم 

وتين: لا ابدا 

جلال: تمام يا دكتور احنا كدا كدا هنخرج دلوقتي واكيد هخليها هترتاح 

الطبيبه: تمام طبعا انا كتبتلها علي علاج تاخده فمعاده وهتكون بخير ان شاء الله قريب 

جلال: تمام 

الطبيبه: مره تاني الف مبروك لمدام وتين عن اذنكم

جلال: اتفضلي 

خرجت الطبيبة واستأذن امير للدخول

امير: خير الدكتوره جالت حاجه

جلال: لا ابدا كانت عتكشف عليها قبل الخروج وعتاكد علي العلاج

امير: طب كويس ها هتمشوا امتي

جلال: دلوجتي بس وتين تجهز

امير: طب انا هستناكوا تحت وهجهز العربيه و اول ما تخلصوا كلموني 

جلال :خلاص ماشي

خرج امير وتركهم فحاولت وتين النهوض ولكن و..

وتين: ااااه

جلال: ايه مالك اجبلك الدكتوره تاني

وتين بزعل:لا مش عايزه حد  

جلال: امال اتوجعتي ليه

وتين: والله بيقولوا اني لسه والده امبارح وطبيعي اتوجع انا وبقوم

جلال: طب في رد احسن من كدا واستني هساعدك عشان تقومي

وتين: لا شكرا 

جلال:مش عاخد رايك استني جولت هجومك

بالفعل ساعدها جلال بالنهوض لتنهي تجهيزها للخروج من المستشفي 

وتين: ياريت ماما حليمه كانت باتت معايا

جلال: وتين متجعديش ترمي بالكلام وانتي عارفه كويس اني مكنتش هخليه حد يابت معاكي ولا يعملك حاجه واصل طول مانا موجود انتي مسؤوله مني وانا اخدمك بعنيا وخلافنا بسبب الزفت ادهم دي حاجه تانبه فمتخلطيش المواضيع ببعضها

وتين: انا….

جلال: خلصنا يابت الناس

وتين: يووووه ممكن نمشي من هنا 

جلال: حاضر

استني اجيب كرسي تقعدي عليه 

احضر جلال كرسي متحرك لتجلس عليه وقامت بحتضان صغيرتها وجلال يقوم بتحربك الكرسي من الخلف بعد فتره قصيره كان جلال يقف امام السياره وساعدها بالجلوس هي والصغيره بعد ذلك انطلقوا عائدين الي القصر وكان الجميع سواء من اصحابه او خادمين يقفون باستقبالهم وبعد فتره من التهاني حمل جلال وتين وصعد بها الي غرفتهما تحت اعتراضها ولكن صمتت حتي لا يشعر احد بخلافها مع جلال

حليمه: طولتوا يعني ياولدي

جلال: لا ابدا دا الدكتوره كشفت علي وتين وعقبال مجهزت كمان وجينا علي طول

حنين: نورتي القصر يا مرات الغالي انتي والجمر اللي جارك دي

وتين: حبيبتي تسلميلي

حليمه: مالك يابتي حاسه فيكي حاجه

وتين بارتباك: هااا… لا ابدا ياماما...دا ..عشان بس الطريق و العربيه ومفعول المسكنات قرب يروح فحاسه اني تعبانه شويه 

حليمه: هو اول اسبوع اكده هتحسي بتعب وبالعلاج اللي الدكتوره كتبته هتروجي عليه انا هنزل اجبلك وكل عشان تاكلي لازم تتعذي كويس علشان بتك يابنيتي دلوجتي انتي عترضعي لازما تكون قويه سمعاني يابتي 

وتين: حاضر ياماما 

حنين: خليكي انتي يامه انا هنزل اجيبلها الوكل

حليمه: ماشي يابنتي انا قولت للبنته فالمطبخ علي اللي يعملوه زمانه جهز 

حنين: من عنيا هنزل اجيبه مش هتاخر

حليمه:مالك ياجلال واقف كأنك مش معانا واصل

جلال: لا ابدا يامه 

حليمه: طب خليك انت مع مراتك وانا هشوف حنان و العيال وكمان عايزه اوصي الولد تحت يدبحولهم كام عجل تاني

جلال: ريحي انتي يامه وانا جولتلهم تحت قبل ما طلع 

حليمه:و ايه يعني يدبحوا تاني خلي الناس تفرح معانا دي بت الغالي اللي جت بعد شوقه 

جلال: ربنا يخليكي لينا ياست الكل ومنتحرمش منيكي واصل

حليمه: ولامنيك ياولدي يلا هجوم انا وخلي بالك من مراتك

جلال: فعنيا

خرجت حليمه وظل جلال كما هو بالغرفه مع وتين فقط ينظر اليها الي ان….

وتين: بتبصلي كدا لي 

جلال: حجك عليا

وتين: نعم 

جلال: انت سمعتيني علي فكره بس ياستي حجك عليا انا محجوجلك انا معرفش اتعصبت كيف وكسرت بخاطرك وكسرت فرحتك اكده بس غصب عني لما لاقيت الزفت دا نازل غزل فيكي كأني مش واجف ولا مالي عينه معرفش جرالي ايه فقومت ضاربه

وتين: يسلام المفروض اني خلاص كدا مزعلش

جلال: عارف حجك تزعلي علشان زعلتك واتخانجنا بالمستشفي لكن انك تزعلي علشان ضربته دا اللي مش هسمح بيه لانه لو قدامي دلوجتي هضربه تاني 

وتين: ياجلال مش معقول كدا لازم تسيطر علي نفسك

جلال: يا سلام يعني عايزاني اشوفه عيتغزل فيكي اسكت وهو هيرضاها اني اتغزل فمراته

وتين: كنت قتلتك فيها يابن المحمدي

جلال بضحكه: طب اهه يعني مش لوحدي اللي عغير

وتين: طب اعمل ايه دا انا اموت ولاني اشوفك بتبص لواحده تانيه 

جلال: يعني انا صح لو مكاني هتعملي اكتر من اكده 

وتين: الصراحه اه 

جلال: امال ليه زعلانه ومخليه موضوع زي دا يعكنن علينا فرحتنا بالقمر اللي نور حياتنا

وتين: ربنا يخليك ليا

جلال: ويخليكي ليا و يحفظك ليا وعايزك تسمحيني انا مقدرش علي زعلك واصل

لياقطعهم دخول حنين بالطعام 

حنين: احم..احم.. شكلي جيت بوقت غلط

جلال: تعالي يام لسانين 

حنين:انا بلسانين مش هتكلم بس علشان مراتك جاعده

جلال: ولو مش جاعده يعني هتعملي ايه

حنين: ولا حاجه

وتين بضحكه: انتي مشكله يا حنين 😂

جلال: هاتي انا هوكلها

وتين: متتعبش نفسك

جلال: تعبك راحه

حنين: ياسيدي ياسيدي علي الجلع لا انا هروح اتخانق مع امير عاد 

جلال: يكون احسن يلا بالسلامه

وتين: جلال بس احسن تزعل

جلال: هي نسيتنا بخناقتها مع امير خلينا فيك انتي ياقمر عايزك تخلصي وكل وتنامي شويه علشان انتي منمتيش مليح الليله اللي فاتت وانا هخلص كام مشوار وهاجي علي طول

وتين: انت هتخرج

جلال: قولتلك مش هطول يادوب  عبال ماتصحي اكون جيت اتفجنا

وتين بعبوس: ماشي

جلال: وبعدين عادي افردي وشك امال مش هتاخر ياستي وعد 

وتين: اذا كان وعد خلاص ماشي

جلال: متجوز عيله 

وتين: عيله بس كبيره

جلال: مجنونه يلا كلي 

وتين: حاضر

انهت وتين طعامها فتركها جلال لياخذ دوش سريعا خرج ووجدها قد خلدت للنوم فكانت تحتاج للراحه ارتدي ملابسه هدوء حتي لا يوقظها وخرج سريعا لقضاء بعض الامور المتراكمه عليه وعاد بحلول الليل ليجد الجميع بالغرفه عند وتين فصعد اليهم

وتين: لا بس جلال خرشمه خالص

حنين: احسن وهو ياجي ليه اصلا 

سمر: ياستي راح يبارك 

حنين: وهو عرف منين انها ولدت

سمر: اكيد عرف من نرمين ماهي كانت لسه فالشركه لما وتين جالها الطلق 

حنين: ايوا ايوا دا انا احمد ربنا ان الموضوع عدي علي خير امير كان هيتكلم معايا علشان خدت وتين وروحنا الشركه روحت جلبت الموضوع وطلعته غلطان علشان ميجلبش عليا احسن جلبته صعبه جوووي

لتعلو ضحكات الجميع علي حديث حنين ليقاطعهم جلال بدخوله

جلال: متجمعين عند النبي متضحكوني معاكوا

حنين: ااخوي انت جيت امتي

جلال: لسه جاي دلوجتي امال كنتوا عتضحكوا علي ايه 

حنين: هااا. ..لا ابدا 

لحقتها وتين حمد علي السلامه يا حبيبي هو دا اللي مش هتتاخر

جلال: غصب عني والله يابوي خلصت اللي ورايا وجيت علي طول

حنين:ياعيني علي الجبل لما…

سمر: مبلاش ولا تحبي جلال يعرف كنا عنضحك علي ايه

حنين:طب انا عجول امير عينادم عليا هروح اشوفه هو والعيال عايزين حاجه

جلال: مالها الهبله دي

حليمه: سيبك منها ياوولدي اتعشيت ولا هجيبلك عشا

جلال:لا لسه انتوا اتعشيتوا

حليمه:ايوا سبقناك لما اتاخرت 

جلال: ووتين

وتين: انا كلت يا حبيبي ماما حليمه قايمه بالواجب وزياده

سمر: طب هروح اجبلك تتعشى عقبال متغير خلجاتك 

جلال: اكون تعبتك معايا ياخيتي

سمر: تعبك راحه ياغالي

حليمه: طب قوم انت غير خلجاتك عبال ماسمر تجبلك الوكيل وانا هروح اشوف الولد ناموا ولا لسه

جلال: انا عديت عليهم فالاوضه ست حنان كانت عتنيم فيهم

حليمه: خلاص هشوفهم واروح انا كمان علي اوضتي عايزين حاجه ياولد

جلال: تسلمي يامه عايز سلامه جلبك 

وتين: تسلميلي يا حبيبتي 

تركتهم حليمه وقام جلال بابدال ملابسه  وكانت سمر قد احضرت الطعام و..

سمر: الوكيل ياخوي

جلال: تسلم يدك ياست البنته 

سمر: تعيش ياخوي

جلال: جوليلي مرتاحه فالشغل عاد

سمر: الحمد لله مرتاحه جووي فعلا كنت صح لما خليتني انزل اشتغل معاك 

جلال: طب كويس وانا اللي يهمني راحتك انتي  وحماد 

سمر: ماله

جلال: كويس هو كمان ولا اغيره 

سمر: لا لا 

جلال: طب براحه مش هغيره اتخرعتي لي اكده

سمر: لا متخرعتش ولا حاجه انا بس كان قصدي انه محترم معايا فالتعامل اكده يعني

جلال: امممم ماشي علي العموم اللي يريحك انا معاكي فيه ومدام انتي جولتي كويس فخلاص وحماد بالنسبه ليا اكتر من اخ

سمر: ربنا يحفظك ياخوي 

جلال: حبيبتي 

سمر: يلا عايزين حاجه 

جلال: لا سلامتك

خرجت سمر فالتفت جلال ووجد وتين تنظر له نظره ذات مخزي 

جلال: مش مرتاح للبصه دي

وتين: يبقي اكيد مش هتخبي حاجه عن نونو حبيبتك صح

جلال: لي هو في حاجه  عشان اخبيها

وتين: جلال 

جلال: جلبه 

وتين: يلا بقي ماهو كلامك مع سمر و انك تسالها عن الشغل وبعدين حماد اكيد مش لله وللوطن

جلال: لي مكلامي كان معاها عادي 

وتين: جلال قول يا حبيبي لانه باين عليك

جلال: يعني مصره

وتين: اينعم

جلال: ماشي ياستي ايه المقابل علشان تعرفي

وتين: اللي انت عايزه 

جلال: للاسف اللي عايزه مش هينفع اخده دلوجتي

وتين بفهم لمخزي الحديث: اه يا قليل الادب

جلال: وانا اتكلمت انتي اللي دماغك حادفه شمال علي طول

وتين: ماشي يا جلال قول بقي

جلال: امري لله حماد طالب ايد سمر

وتين: متقولش 

جلال: خلاص جولت

وتين:بس ياغلس اكيد بتهزر

جلال: والحاجات دي فيها هزار الراجل فاتحني النهارده بالموضوع

وتين: بس سمر…

جلال: عارف ان العده لسه مخلصتش

وتين: مش قصدي

جلال: امال !!!

وتين: معتقدتش ان سمر توافق 

جلال: لي حماد ميتعايبش 

وتين:انا قصدي مش هتوافق عليه او علي غيره

جلال: يعني ايه هتفضل طول حياتها اكده من غير جواز

وتين: جلال متنساش ان التجربه اللي هي مرت بيها صعبه  ولا اي رايك

جلال: عارف وانا اتكلمت مع حماد بالموضوع دا وقولتله يتوقع الرفض 

وتين: ورد قال ايه

جلال: قال انه عارف الكلام دا كله ومستعد يصبر عليها العمر كله 

وتين: وانت رايك ايه 

جلال: رأيي واضح انا لو مش موافق مكنتش فتحت الموضوع من الاصل معاكي وانا هتكلم معاها

وتين: تفتكر هي توافق

جلال: هنشوف 

وتين: طب وشغله

جلال: ماله ما الراجل شغال معايا 

وتين: قصدي معندوش شغل خاص بيه 

جلال: لا ليه 

وتين: ايه

جلال: حماد ناوي يفتح شركه امن 

وتين: طب كويس اظن انه عنده خبره بالموضوع دا

جلال: طبعا هو بس كان مستني يظبط اموره 

وتين: حقيقي فرحتلها اتمني انها توافق 

جلال: بصي انا مستني بس عدتها تخلص علشان اتكلم معاها

وتين: طب متكلماه الايام دي ووتفكر لحد ما العده تخلص

جلال:لا مينفعش سمر لسه منسيتش الزفت طليقها ولو فاتحتها دلوجتي هترفض علي طول لكن بعد العده علي الاقل هيكون عدى فتره

وتين: خلاص اللي تشوفه

جلال: اوعي انتي تقعي بلسانك جدامها

وتين: لا متخافش

جلال: الحمد لله

وتين: ايه لحقت تاكل

جلال: فضل ونعمه 

وتين: بالهنا 

جلال: هناكي الله انا هجوم اغسل يدي واجي عشان انام احسن انا هلكان جووووي

وتين: تمام

دخل جلال المرحاض وغسل يديه وعاد سريعا وجلس بجوار وتين اخذها بين ذراعيه لتشعر به يلبسها شئ ما بمعصمها
وتين اي دا

جلال: ايه رايك

وتين: الله  ايه الانسيال التحفه دادا يجنن ربنا يخليك ليا مكنش ليه لازم تتعب نفسك يا حبيبي

جلال:اولا ياستي مفيش تعب ولا حاجه ثانيا دا هديه الولاده وكمان اعتذار علي  زعلك مني من اللي حصل بالمستشفي
وتين: انت عارف اني بحبك اد البحر وسمكاته

جلال: سمكاته مره واحده

وتين:  اه

جلال: لا اذا كان كدا ماشي😂ربنا يجدرني واعرف افرحك دايما

وتين: حبيبي انا يا ناس

جلال:ماشي ياستي يلا ننام عاد احسن حبيبك فصل خلاص
وتين: يلا ننام ان شاءلله يكون نوم الهنا والسعاده لقلبك

...مرت عدة اسابيع علي حديث جلال ووتين كانت سمر قد انهت عدتها ليقم جلال بمفاتحتها بطلب حماد بالزواج منها 

سمر:طلبتني ياخوي

جلال:تعالي ياسمر اجفلي الباب وراكي

دلفت واغلقت الباب خلفها وجلست امامه

سمر: خير ياخوي

جلال:خير ان شاء الله طبعا انتي عارفه  اني لو عملت حاجه بخصوصك يبقي اكيد فمصلحتك

سمر: دا اكيد مش محتاج تجول دا

جلال: حلو يبجي عارفه اني لما نزلتك الشغل فدا كان علشان تشغلي نفسك وكمان تبدأي حياه جديده

سمر: معلوم 

جلال: وكمان خليت حماد يكون معاكي فاي مكان تروحيه لكن دلوجتي هو مشي عشان زي مانتي عارفه هو بدأ يعمل فشركه الامن بتاعته

سمر:ربنا يوفجه ويرزجه ببت الحلال

جلال: وانتي جولتيها 

سمر: مش فاهمه

جلال: اللي اقصده ان حماد طالب يدك مني 

سمر:ايه

جلال: زي ماسمعتي حماد عايز يتجوزك

سمر: و اكيد انت عارف ردي

جلال: لا معرفوش

سمر: طب انا ردي لا وانت عارف ياخوي اني خلاص جفلت موضوع الجواز دا نهائي

جلال: كيف دا 

سمر: يعني زي ما سمعت دلوجتي

جلال: بصي ياسمر انا مش هاخد علي ردك دا دلوجتي لانك لسه مفكرتيش فالموضوع

سمر: وولا هفكر من الاصل

جلال: سمر انا عارف كويس انتي مريتي بايه  ومجدر دا ومش عايزك تردي دلوجتي بس فكري فكري فانك لساكي صغيره ومش معني انك مريتي بتجربه وفشلت يبجي دي نهايه الدنيا و انك تجفلي علي موضوع الجواز من الاصل لا تجربتك الاولي خلصت خلاص واتعلمتي منها كتير ودلوجتي ربنا بعتلك ولد الحلال اللي انا متاكد انه هيشيلك فعنيه 

سمر: ياجلال اسمعني 

جلال: اسمعيني انتي انا لما امنيه ماتت جولت خلاص انا لا يمكن اتجوز تاني و كدا انا خدت نصيبي فالدنيا وعمري ماكنت اتخيل اني اتجوز وتين مش هنكر اننا اتجوزنا بسبب ظروف معينه بس بعدين قدرننا اننا نعمل عيله انا وهي والحمد لله دلوجتي عندينا 3 عيال وكانوا هما وامهم عوض ربنا ليا وانا مش عجولك انك لازم تتجوزيه لا عجول انك تدي لنفسك فرصه زي مانا اديت لنفسي فرصه فرصه انك تعرفيه وصدقيني انتي هتاجي وتجولي انك المره دي اختارتي صح وارجع  واجول انا مش بجبرك علي الجوازه انا عايزك تفكري وبس 

سمر:حاضر ياخوي هفكر بس الاول انا عايزه اتكلم معاه 

جلال: من عنيا اللي انتي عايزاه هكلمه اخليه ياجي  وتتكلموا

سمر: تمام هرد عليك بعد ماجابله  

بعد فتره من الحديث استأذنت سمر للصعود الي غرفتها فسمح لها مر يومان علي حديثها  مع جلال فقط مافعلته خلال هذين اليومين هو اشغال نفسها قدر المستطاع حتي لا تنشغل بالتفكير في موضوع الزواج واشغال تفكيرها بالاجابه علي مئات الاسئله التي تدور بفكرها ولكن اين المفر من لقاء محتوم ….بعث جلال بهيه اليها يعلمها بوصول حماد

سمر: بهيه قالتلي انك عاوزني

جلال: تعالي ياسمر سلمي علي حماد

سمر: اهلا وسهلا

حماد : اهلا بيكي 

جلال:طب اسيبكم مع بعض 

سمر: تمام 

تركهم وذهب ليعطيهم فرصه الحديث معا باريحيه اكثر...لكن كان الصمت سيد الموقف لفتره الا ان قرر حماد  بدأ الحديث وقطع هذا الصمت

حماد:عامله ايه 

سمر: الحمد لله 

حماد: جلال جالي انك طالبه تشوفيني

سمر: يبجي قالك انا طالبه اشوفك ليه

حماد: بس انا حابب اسمع منك انتي

سمر: لي 

حماد:مش فاهم

سمر: لي انا 

حماد: علشان انتي 

سمر:ماهو علشان انا وكمان علشان اللي حصلي يبجي اكيد متوقع ردي لطلبك

حماد: انا ميهمنيش اللي فات انا كل اللي عايزه انك توافجي علشان نعمل احنا اللي جاي اللي فات عدي وراح لحاله 

سمر: لا معداش ولا راح لحاله انا لساتني موجوعه من اللي حصلي مش سهل عليا ان الانسان اللي وثقت فيه وحاربت الكل علشانه  يعمل فيا اللي عمله ودا خلقني صعب اثق فحد تاني ووالتفكير اصلا بالجواز مره تانيه

حماد: جولتها وهجولها انا ميهمنيش اللي فات كل اللي يهمني انتي مش هنكر اني لما عرفت اللي عمله كان نفسي اموته هو والكلب التاني وبالنسبه ليا جليل جوي اللي عمله معاه جلال كل دا وانتي متخصنيش فحاجه بس خدوا جزائهم وكمان لما جلال خلاني اكون معاكي علي طول عرفتك اكتر وجولت كيف يفكر يعمل فيكي اكده ومن وجتها اتمنيتك تكوني حلالي ودعيت ربنا واتوكلت عليه وطلبتك من اخوكي والحمد لله انا دلوجتي مجتدر واجدر اعيشك عيشه مرتاحه

سمر: انا معتكلمش علي عيشه 

حماد: انا عارف انها مش بالعيشه دي بالنفس وانتي النفس اللي اتمنيها اكمل بيها نص ديني وتكون ونسي للاخر عمري 

سمر: مش هتتحملني انا ووجعي 

حماد: وجعك هو وجعي ووعد مني هصبر عليكي 

سمر: صبرك هيطول يا ولد الناس 

حماد: لو للاخر يوم فعمري بس انتي وافجي 

سمر: لو وافجت هكون بظلمك معايا 

حماد: انتي لو رفضت هتكون عتظلميني بحج وكمان عتظلمي نفسك جبلي 

سمر: خايفه

حماد: هكون ليكي الامان 

سمر:بس

حماد:مبسش كل اللي طالبه توافجي وسيبي الباقي عليا

كادت ان تجيبه لكن قاطعها جلال بستأذانه للدخول ..

جلال: ايه ياجماعه انتوا نسيتوني ولا ايه

سمر: عن اذنكم 

تركتهم وصعدت لغرفتها سريعا لتلحق بها وتين فوجدتها تجلس تبكي و..

وتين: وبعدين بقي يعني دا موضوع تعيطي فيه 

سمر: امال عايزاني اعمل ايه

وتين: تفكري 

سمر: وفكرك مفكرتش هو انا ععمل حاجه غير التفكير

وتين: ووصلتي لايه

سمر: مخبراش 

وتين:يبقي مدتيش نفسك فرصه كافيه تفكري فيها

سمر: انتي ايه رايك

وتين:مش هكدب عليكي لو قولتلك اني مكنتش فحيرتك دي لما عرفت اني المفروض اتجوز جلال اينعم ظروفنا تختلف عنك بس الفكره واحده اننا لازم ندي فرصه تانيه مش بس للطرف التاني لا دا لنفسنا قبل الكل فادي لنفسك فرصه انتي تستاهلي الفرح وصدقيني حماد ميتعايبش دا هيصونك ويحطك فقلبه وباين انه شاريكي 

سمر: محتاره وخايفه 

وتين: دا طبيعي و عارفه ان الموضوع صعب بس دا فالاول لكن خطوه بخطوه هتعرفي انك اخترتي المره دي صح وفكري برضو تاني لان القرار الاول والاخير ليكي ومحدش يقدر يجبرك وانا هسيبك دلوقتي وفكري براحتك

تركتها وتين بحيرتها بالتفكير ليمهلها جلال اسبوعا اخر لتتخذ قرارها بكامل ارادتها واخبرها انه بجانبها مهما كان قرارها اما عنها العديد والعديد من السيناريوهات بعقلها تقبل ام ترفض تقبل وتنسي ماحدث لها وتحاول الوثوق بشخص اخر وتبدأ حياة جديده لكن مهلا من اين تاني بالثقه مره اخري وحتي ان وثقت ماذا تفعل ان كان اسوء من زوجها السابق مهلا حماد يختلف يكفي حديثه معها واطمئنانها بالحديث معه وكم كان حنون معها لكن حتي وان وافقت بالتاكيد ستظلمه معها وهل سيصبر عليها اما ماذا هكذا مر عليها الاسبوع بالتفكير بين المقارنه بالمحاسن والمساوء والقبول والرفض الي ان اتي يوم اخبار جلال بقرارها 

جلال: ها ياسمر بجالي ساعه عمال اتكلم وبرضو مش راضيه تجولي قرارك 

سمر:انا…..وهنا نقول استووب ياحلوين😍

فالبارت الجاي مع وتين الجلال

هتوحشووني😘😘