Chapter 18 part 1
Walang kaalam-alam si Alejandro na kanina pa nakikinig si Lourdes habang nakikipag-usap siya sa kanilang anak.
“Dahil sa ginawa mo baka lumayo na ng tuluyan ang loob ng anak mo sayo.” Walang emosyong sabi ni Lourdes habang umiiling.
“Yun naman talaga ang gusto mo di ba?! Kaya kung anu-anong kasiraan ko ang sinasabi mo sa kanya.” Medyo malakas na ang boses ng matandang lalaki.
Dati-rati tuwing tumataas ang boses ni Alejandro ay natatakot si Lourdes pero ngayon ay hindi man lang ito natinag. Matapang niyang hinarap ang asawa. “Kung gusto kitang siraan sa anak mo sana sinabi ko sa kanya na I was victim of rape and was forced to marry to a monster!” nanginginig sa galit ang ginang. Pilit niyang itinatago kay Jesica ang madilim niyang nakaraan. “Pero hindi ko ginawa yun, pinalabas ko sa harap ng sarili kong anak na ako ang masama, na ako ang pumilit sa ama niya na pakasalan ako dahil pilit kong pinoprotekhan ang imahe mo sa kanya.” Tuluyan ng tumulo ang mga luha ni Lourdes, matagal na panahon niyang kinikimkim ang paghihirap na dinanas niya kay Alejandro.
Sa tagal nilang nagsamang mag-asawa ay ngayon lamang nakita ni Alejandro ang galit sa mukha ng asawa. Noon tuwing may mga argument sila ay lagi lamang itong mahinahon kahit kalian ay hindi siya sinigawan nito kahit ilang beses na niyang niloko.
Mabilis na nilapitan ni Alejandro ang asawa at mahigpit na niyakap. Habang yapos niya ito ay may awang bumalot sa puso niya para dito. “I’m sorry Lulu, kung maibabalik ko lang ang nakaraan hindi ko gagawin yun..” tila may isang kamao ang pumipiga sa puso niya ng mga sandaling yun.
Pilit na kumalas si Lourdes sa pagkakayapos ng asawa habang pinupunasan ang mga luha. “Alam ko dahil sa drugs kung bakit mo nagawa sa akin yun, ang gusto lang naman ay hayaan mo ang iyong anak na siya ang magdesisyon para sa kanyang sarili. Ayoko siyang matulad sa akin, kaya hwag mong ipagpilitan si Vincent sa kanya.” May halong pakiusap na ang boses nito.
Matamang tinitigan ni Alejandro si Lourdes bago muling nagsalita. “Hindi ko sila ipagpipilitan na ipakasal ang gusto ko lang naman na makuha ng apo ko ang karapatan ng isang Almonte.”
“Para ano pa? hindi natin kailangan ang kayamanan nila.” Protesta ni Lourdes.
“It’s not about the money, karapatan din ng bata ang malaman ang tunay na pagkatao niya. Nasa kay Vincent na ang pagpapasya kapag nalaman niya ito.” Pilit na paliwanag ni Alejandro.
“Sa tingin ko you’ve already made your decision.” Umiiling na sabi ni Lourdes.
“Yes, and I need your help.”
“Ayoko, magagalit sa akin si Jesica.” Mabilis na tugon ni Lourdes.
“I need your cooperation and whether you like it or not sasama ka sa akin bukas. We have dinner with Divina and Francis at baka nga dumating din si Vincent.” May pinalidad sa tinig ni Alejandro.
Alam na ni Lourdes kapag ganito na ang tono ng pananalita ng asawa. Hindi na talaga niya mapipigilan ito sa gustong mangyari.
Samantalang si Vincent naman ay pinatawag ni Francis ang sabi lamang nito ay kailangan nilang mag-usap bago tumungo muli sa America ang mga ito. Pabalik-balik ang mag-asawa sa America dahil sa pagpapagamot ng kanyang tiyahin kaya silang dalawa ng pinsan ang nag-aasikaso ng kumpanya.
Nang makarating sa mansion ay agad na umibis siya sa kanyang kotse. “Nasaan sina tito?” agad na bungad nito sa katulong na sumalubong sa kanya.
“Sir, nasa study room po. Kanina pa po nila kayo hinihintay.” Magalang na tugon ng kasambahay.
Tinanguan lamang ito ni Vincent at mabilis na tinungo ang direksiyon ng study room. Isang katok lamang ang ginawa niya at diretso na siyang pumasok.
“Hi tito, tita.” Sabay halik sa pisngi ni Divina. Umupo siya sa pang-isahang couch na naroroon.
“Bakit ngayon ka lang? kanina ka pa naming hinihintay.” Mapapansin ang pagkainip sa mukha ng tiyahin.
“Sorry tita, may mga inasikaso pa ako. Papunta ako ng Singapore mamayang gabi.” Imporma ni Vincent.
“Nandun naman si Dennis, bakit kailangan mo pang pumunta doon?” nakakunot ang noon a sabi ni Francis.
Natigilan si Vincent, hindi siya maaaring magsumbong tungkol sa relasyon ni Dennis sa asawa. Kasunduan nilang magpinsan na walang makikialam sa personal nilang buhay.
“Tito, syempre gusto ko rin namang magbakasyon.”Nakangiti niyang sabi sa mga ito.
“Gusto mong magbakasyon o dahil alam mong nasa Singapore din si Jesica?” nanantiyang tanong ni Divina.
“Really? Wow! Mukhang sa Singapore mabubuo ang love story naming.” Pang-aasar ni Vincent sa tiyahin. Alam kasi niyang ayaw ng kanyang tita Divina kay Jesica dahil may anak ito.
“That’s the reason why we have to talk to you.” Seryosong sabi ni Francis.
“Tito, pati kayo tumututol din kay Jesica?” hindi makapaniwalang bulalas ni Vincent.
“I’m not against her. Ang ipinagtataka ko lang ay kung bakit gustong makipag-usap sa amin ni Alejandro Tenorio. May ginawa ka bang kalokohan sa anak niya?” walang paligoy-ligoy na tanong ni Francis sa pamangkin.
Bago dumating si Vincent ay nagtatalo na ang mag-asawang Almonte sa maaaring dahilan kung bakit nais makipag-usap ni Alejandro sa kanila.
“Huh? Wala tito, ang alam ko lang ay nililigawan ko si Jesica.” Pag-amin niya sa mga ito.
“Baka naman dahil kay Mia.” Biglang singit ni Divina.
“Bakit naman nasama si Mia dito?”nakakunot na tanong ni Vincent.
“Pinagkakalat ng babaeng yun that you’re getting married. Baka nalaman ni Alejandro kaya gusto niyang makipag-usap sa atin.”panghuhula ni Divina.
“Tito, kayo na lang muna ang makipag-usap kay Mr. Tenorio, I really need to go to Singapore as soon as possible.” baling ni Vincent sa tiyuhin.
“We’ll just let you know kung ano ang mapag-uusapan namin.”pagsang-ayon ni Francis sa pamangkin.
Gusto rin sanang makausap ni Vincent ng personal ang ama ni Jesica kaya lang hindi na niya maaaring ipamove ang flight niya.
___________________________