هنالك اشخاص يأتون متأخرين إلى حياتک
رائعين..لدرجة انک تقول:
اين كنتم منذ البداية..
....
بعد ماشفت خالد هذاك اليوم كانت آخر مرة اشوفه بيها لهسة بعدها ماتصل علية او دز اي مسج
يمكن تقبل فراقي او يمكن هو محبني اصلا لهذا كان نسياني سهل علي
كنت كاعدة ويا ريما بمطعم
_زين هسة انتي ليش ضايجة
_ومنو كلج اني ضايجة
_مادري بس من يومها لهسة انتي وضعج متغير
_مبية اي شي
باوعتلي بنظرة ماكرة_مجاوبتيني على سؤالي هذيج المرة
_يا سؤال
_لما كتلج انتي تحبي لو لا
حجيت بثقة_ماحبه
_لعد ليش بجيتي بعد ماعفتي هذاك اليوم
_يمكن تأنيب ضمير احس انو اني اذيته
_هو مال اذيتي فانتي اذيتي بس شمعرفج هو مو مثلهم
_يي ليش لا احتمال يكون صدك مثلهم صح اني طول معرفته مشفت علي شي بس هذا ميأكد انو هو غير عنهم
_هاهية لعد انسي لتضوجين نفسج اعتبري مثلهم
باوعتلها بحزن_تدرين بعد الي صار بية حسيت انو هذا أصعب شعور ممكن اعيشه بحياتي شعور اني مظلومة بس بعد الي صار ويا خالد عرفت اكو شعور أصعب وهو انو اكون ظالمة
خايفة ريما خايفة اكون ظلمته مثلما ذولاك الحقراء ظلموني
تعصبت_انجبي لتشبهين نفسج بذولاك الي حتى مو بشر انما حيوانات لا ياحيوانات هم خطية الحيوانات احسن منهم صح انتي غلطتي بس غلط ميتقارن بالي همة سوا
_تتصورين سامحني
_هسة اصلا تلكي ارتبط ويا وحدة ثانية
_لا لا ماتصور
رفعتلي حاجبها_وليش متتصورين اشو احس ضجتي
_انجبي مضجت بس ماحسه من الأشخاص الي بسهولة يدخل ناس لحياته ويتعود عليهم
_ماعرف بعد انتي تعرفي أكثر مني
باوعت لساعتها وشهكت _عزة تأخرت اياد كلي لتتأخرين من تطلعين لازم قبل ساعة اني بالبيت
كامت من مكانها_يلا كومي
_على كيفج سندريلا لتنسين حذائج بالمطعم
رجعت للبيت شفت ماما بالصالة سلمت وكعدت يمها
اندارت علية فجأة _جوجو ماما شبيج
باوعتلها بأستغراب_شبية ماما مبية شي
_احس صار فترة اكو شي مضوجج
_لا ماما لتخافين كلشي ماكو
_اكيد يعني ماكو شي
_يي ماما اكيد
كمت وصعدت لغرفتي واني اتسائل معقولة لهدرجة مبين علية بحيث كل الناس حاسة
….
بالشغل كاعدة اسولف ويا بنين بصوت ناصي ويمنا مازن كاعد يشتغل ودعاء وثامر مموجودين
سألتني باستغراب_مفهمت شتردين تسوين
_هسة تفهمين بس اريد تسايريني
_ماشي
عليت صوتي واني احجي وياها _يعني باجر زين
حجت وهي مفاهمة شنو الموضوع _يي زين
_هسة يجون وتشوفيهم كلش عائلة مرتبة
_تجين وياهم انتي مو
_يي اكيد اجي
حسيت مازن بدأ ينتبه لكلامنا
سألنا_شنو دتتخططون لطلعة
جاوبته _لا بس باجر حنروح اني وكرايبي لبيت بنين
بدت ملامح الاستغراب على وجهه _وكرايبج شيسون يم بيت بنين
_ابنهم يريد يخطب واني رشحتله بنين
هز رأسه بمعنى يي وسكت
وراها كال_زين هو مادام كرايبج شكو ترشحين بنين ليش ميخطبج الج
_اني ويا متربين سوة من صغار فأعتبره اخوية
باوع لبنين _بعدج صغيرة شسوين بالزواج وشلعان القلب
دتجاوب واني قاطعتها_صح هي صغيرة بس هو الولد ميتفوت
_لعد على الخير
حسيت اكو تغير صار بملامحه مادري ضوجة لو غير شي من هالموضوع
سألتني بنين بصوت ناصي_ها شتشوفين ضاج لو لا
_مادري ممتأكدة بس اصبري خل نشوف الايام الجاية يذكر الموضوع لو لا
بعد ماطلعت من دوامي مادري ليش شفت نفسي اتوجه لطريق بيته بدون ماحس حتى بقيت واكفة شوية بعيد عن البيت بعدها سألت نفسي اني ليش جاية اصلا ليش اريد المحه شنو الي دا احسه تجاهه معرفت الجواب او يمكن الاصح كنت اتهرب من الجواب
ورا يومين
كاعدين دنشتغل وفجأة اندار مازن على بنين
_شصار على موضوع الخطوبة
جاوبته_اجوي البارحة وشافوني
_شلونه الولد حلو لو كانت جمانة تصبغ بي
_لا لا حلو
رفعلها حاجبه_يعني عجبج
همست بخجل _يي
حجيت اني _حتى هو اول مطلعنا من يمكم كلي هاي القمر منين لكيتيلياهة وكال احجي وياها علمود ليتأخرون بالرد
مازن_ليش هو هيج متأكد انو هي مرح ترفضه
_وليش ترفضه الولد يجنن شكل وشغل ومعجب بيها
_شكد عمره هو
جاوبته واني اخلي شي ينتقد بي الموضوع _أكبر منها بعشر سنين
_هواية
_لا هواية هي غير تريد تأخذ شخص مكون نفسه مستحيل يكون اصغر من هالعمر
_لا مو شرط هسة اني مكون نفسي
_مادام هيج ليش متخطب اسماء
باوعلي بأستغراب_اسماء ترى اسماء مجرد صديقة مو اكثر مبينا شي اما بالنسبة للخطوبة بعدني ممفكر اخطي هالخطوة
سكتت مجاوبته
باوع لبنين _ارفضي احسن ترى أكبر منج بهواية وانتي بعدج صغيرة يجيج الاحسن
وراها اندار يكمل شغله
شفت بنين بين الفرح على ملامحه من كدامه من جهة نفى علاقته بأسماء ومن جهة كللهة بصورة مباشرة ارفضي
باوعتلي وهي تبتسم _مدا اصدك يعني طلع معنده علاقة وية اسماء
_غير احنا العراقيين هذا تفكيرنا شكو اثنين نشوفهم سوة نكول مرتبطين
....
بيوم اتصلت بية حنين
_هلو جمانة شلونج
_هلو الحمد لله بخير
انتي شلونج والبنات
_الحمدلله بخير كلنا
البنات يسألون عليج كل فترة يكولولي وين خالة جمانة ليش مدا تجينا
_حبايبي والله اني هم مشتاقتلهم
ان شاءالله جايتكم هالايام
أكثر من مرة من اطلع من البيت انتبه اكو سيارة مظللة قريب من بيتنا بس كلت يمكن يكون جيرانة مشترين سيارة جديدة
رحت لشقة حنين علمود اشوفها خطية ماعدها احد غيري محد يطب عليها اكيد بناتها يكونون ضايجات
فتحتلي الباب
_نورتي الشقة
اول مادخلت ركضوا علية البنات
_مشتاقيلج خالة كلش ليش متجينا
_هالفترة كان عندي كومة شغل
بقيت كاعدة يمهم نسولف اني وحنين والبنات يمنا كاعدين
_شلونه شغلج
_الحمدلله كلش مرتاحة
اصرت اتعشى يمهم بس كتلها ماكدر اتأخر وراية اروح اشوف ريما
قبل ماطلع حطيت بيدها فلوس
باوعتلي بانزعاج _شنو جمانة انتي عبالج من خابرتج لان معتازة فلوس
_لا والله مو هيج تفكيري ابد
_لعد مادام مو هيج صدكي ممحتاجة وانتي صرتي اختي بيوم الي احتاج ماجي لغيرج
سلمت عليها وبوست البنات ورحت وراها لبيت ريما الي كان قريب من شقة حنين بنفس المنطقة
دكيت الجرس فتحت أمها
_ها جوجو عاش من شافج
بوستها_خالة حبيبتي مشغولة هالفترة عذريني
طبيت كعدت يمها بالصالة نسولف
_صدك خالة وين ريما
_اوك بعدها نايمة
انتي مكايلتلها حتجين
_لا مكلتلها كنت جاية اشوف حنين تعرفيها انتي وانتو قريبين اجيت
_يي اعرفها صدك شلونها
_الحمدلله وضعها زين
صعدت فوك لغرفة ريما شفتها نايمة ومتلحفة محاسة بالدنيا
شلت الفراش من عليها رجعتة على رأسه
_شوية شوية ماما هسة اكعد
ضحكت عليها ورجعت وخرتة
_بس شوية ماما شبيج
_كومي لج شدعوة هلكد نايمة
فتحت نص عين _هاي شنو شجابج
_دكعدي يلا
كامت من فراشها بس النوم بعده بعينها
_كومي غسلي وتعاي
غسلت ورجعت
_ليش مكتيلي حتجين كان منمت
_ممخططة كنت جاية على حنين وصرتوا بطريقي
_هاي يعني مجاية علمودي
_لا طبعا مو علمودج
_صدك على طاري حنين تدرين قبل شكم يوم شصار
_شصار
_تخيلي حسام يكولي ريما ممحتاجة ملابس كتله ملابس شنو كال ملابس جديدة لدوامج اني بقيت صافنة علي
_هاي شنو منه من الشيطان
_اني هم هيج كتله هاي معقولة انت كان يكولي غير اختي وادللج المهم اني مكذبت خبر راسا رحت ويا
تدرين وين وداني
سألتها_وين
_لمحل صديقه الي تشتغل بي حنين
_يي وشكو بيها
_اني هم بالبداية كلت عادي احتمال اصلا رايح يشوف صديقه بس طلع ماكو بالمحل بس حنين
_يي يمكن ميعرف وقته دوامهم بالضبط
_لج شنو من دخلنا لحد مطلعنا هو موخر عينه من عليها
فتحت عيني بصدمة_تشاقين
_والله بحيث بقيت مصدومة وهي حسيتها مرتبكة من وجوده صح مباوعتله ابد بس حسيتها متوترة
_يعني معقولة بينهم شي
_مادري
_ماتصور تعرفين ليش لان لو بينهم ميأخذج حجة حتى يشوفها احتمال هو ديزحفلها وهي متعطي وجه
_تتصورين هيج
_يي اعتقد هيج السالفة بس شعجب محجتلي
باوعتلها _انتي متأكدة من كلامج
_لج يي نظراته الها ابد مو خالية
باوعتلها بعصبية _لج بس لا اخوج يريد يستغلها لان ماعدها احد والله أموته
_لا لا ليروح بالج بعيد حسام مستحيل هيج يسوي
_والله اني ماأمن بأي احد كمت
_اني كنت ويا وشفت نظراته مال واحد يحبها مو نظرات رغبة
_والله ياريت يطلع صدك ويعوضها عن الي صار بيها ولو اني خايفة عليها
_خاف اخوج يطلع مو كفو ويأذيها اكثر مما هي متأذية
_لج لتحجين على حسام
غلست _اكلج شنو رأيج اسألها عن الموضوع علمود نعرف بالضبط شكو
_اذا ساليتها هاي اكيد رح تكولج شلون عرفتي بالموضوع
_لعد انتي سألي اخوج
بقينا نسولف اني وريما بالموضوع الصراحة صدمتني معقولة بينهم شي اذا صدك بينهم فاتمنالها كل سعادة اقلها يعوضها عن الي صار بس تبقى شغلة وحدة احتمال يكون بس رايدها كعلاقة صح اني اعرف حسام وأخلاقه بس بعد ماكو ثقة بأي احد بقيت افكر شلون اكدر افاتحها بالموضوع واتأكد اذا صدك اكو شي لو ريما تتخيل
ورا يومين متحملت الفضول اتصلت بحنين
بعد ماسلمت عليها
_حنين اريد اسألج شي
_سألي
_حسام أخو ريما خوما ديتعرضلج
ارتبك صوتها _لا لا ماكو هيج شي
_متأكدة حنين ترى اني مثل اختج تكدرين تحجيلي
سكتت مجاوبتني
_زين بينكم شي يعني تحبون بعض
جاوبت بسرعة _لا والله ماعندي اي شي ويا
_لعد
_باعي هو أكثر من مرة يتردد على المحل كان يسأل علية وعلى البنات كنت استغرب ليش ميجي بالوقت الي صديقه موجود بي لحدما فديوم دزلي مسج حتى معرفت منين جاب رقمي
_احتمال مأخذه من فون ريما
_يي بدأ يحجي وياية يومياً كلام عادي مبي اي شي
_يي وبعدين
_قبل فترة اجاني للمحل وصارحني انو هو أنعجب بية بشخصيتي وبقوتي ويحبني
_شكتيلي انتي
_رفضت راسا وكطعت علاقتي بي نهائيا
_ليش هيج سويتي حنين
_ماريد احد بحياتي جمانة اني مرتاحة هيج بناتي كلش كافي علية يكفي اشوفهم مرتاحات ماريد ادخل نفسي بعذاب مرة ثانية
_بس ترى حسام خوش ولد وحباب وحيسعدج
_مانكر انو هو صدك خوش انسان من خلال كلامي ويا وحتى متكلم اي كلمة زايدة وياية كلامة كان قمة بالاحترام بس اني قلبي مليان قهر ماريد أذي وياية
_اذا يحبج يتحمل علمود اعطي لنفسج فرصة مرة ثانية الحياة لازم تستمر ترى
_واهله تتصورين يقبلون بي واني مطلقة وعندي بنتين وهو اعزب
_واذا مطلقة يعني شكو بيها
_هذا كلامج ونظرتج انتي جمانة المجتمع ميباوع هيج صدكيني اذا وافقت علي رح اعذبه وادخله بمشاكل ويا اهلها وهذا آخر شي اريده
_ترى بيت ريما كلش طيبين
_ادري بهالشي بس صدكيني الوضع يختلف بهيج موقف مستحيل يوافقون علية ممكن اذا حسام ضغط عليهم هواية يوافقون بس حيبقون يكرهوني ويكرهوني بعيشتي مثل ماصور وياية ماريد ارجع للضيم مرة لخ
_على راحتج بس هم فكري مرة ثانية بالموضوع انتي هم محتاجة عائلة وياج انتي وحدج بهاي الحياة لازم شخص وياج وانتي ماشاءالله بعدج بعز شبابج فتحي قلبج مرة لخ للحياة
_اخاف انصدم مرة ثانية خاف اسمي ويا ويعوفني بنص الطريق خليني هيج احسن كلش سعيدة بوضعي هسة ويا بناتي من اشوفهم فرحانات احسن نفسي مالكة الدنيا كلها هالشي كلش كافي علية يعوضني عن مليون رجال ماريد ادخل بحرب مرة ثانية واني متأكدة أهله اذا عرفوا بالموضوع حيتخبلون منو يقبل بأم عدها بنتين لابنهم الأعزب
_هالشي اني اشوفه مو سبب للرفض بالعكس هالشي فخر انو انتي امرأة قوية كدرتي تطلعين من الضيم الي بحياتج وكفتي من جديد على رجليج
بقيت احاول اقنعها بي كانت مصرة على رأيها هم حقها الي شافته من طليقها واهله ابد مو شايفة مو سهل عليها تبدي من جديد بس ننتظر ونشوف اذا تأكدت انو حسام كلش متمسك بيها احاول وياها مرة ثانية
مرت أشهر احيانا كنت أضعف لما اخلي راسي على المخدة لازم فوني واطلع رقمه ادوس اتصال بس اسده بسرعة قبل ميرن لو اكتب مسج وامسحه بأخ٤ و قر لحظة ماعرف شنو الي كنت احسه بس حسيت نفسي مستفقدة وجوده بحياتي ابتسامته الي مدري شلون كنت اشوفها ابتسامة مكر وحيلة شكد كنت غبية لعد هاي كانت اول مرة احس انو اني مافتهم مكدرت احس بأختلاف تصرفاته عن أحمد او اختلاف نظراته عن بشير الا متأخر هسة لمن اكعد واذكر خوفه علية بأول يوم التقيت بي او اتذكر لما قربت السجينة من صدره وهو واثق انو مستحيل انو أذيه بينما اني كنت مستعدة اغرزها بصدره وميرفلي جفن احتقر نفسي لو لما سممته وحتى كنت مقررة اعوفه يموت واطلع بس تراجعت مو علمود شي بس علمود اكمل خطتي يعني لو صاير بي شي شلون كنت رح اكمل حياتي واني سويت هيج بشخص ماله اي ذنب كلما اتذكر هالمواقف احتقر نفسي لو آخر يوم لما شفته ونظرته الي نظرة الخذلان والانكسار الي بعيونه مستحيل اكدر انساها لهسة احس بألم بقلبي لما أتذكرها
بيوم من الايام كنت راجعة من دوامي الظهر فتت بواحد من الأفرع الي دائما افوت بي مثل كل يوم بس هالمرة غير كطعت طريقي سيارة وهي توكف كبالي
حسيت بالخوف يتسلل لقلبي كانت السيارة مظللة مبين منو داخلها بس واضح انو متقصدة تقطع طريقي
والشارع كان فارغ تماما من أي بشر
نزل من السيارة أكثر شخص اكرهة بحياتي كلها
فتحت عيوني على وسعهم واني اشوفه يجي بأتجاه سيارتي بأبتسامة مستفزة روحي حتطلع رجعت مرة ثانية جمانة الخايفة قبل ٦ سنين تبخرت كل قوتي واني اشوفه حسيت الموقف الي صار بية بهذاك اليوم دينعاد من جديد هذا شجابه بطريقي وشيريد مني
....
توقعاتكم للقادم
اكيد عرفتوا منو هذا الشخص
برأيكم عرف منو جمانة
خالد انتهى من حياة جمانة لو لا
انتظروني ببارت حماس
....
تفاعلكم بالمشاهدات والتصويت والتعليقات
ابد لتنسون التصويت
ارجعوا للبارت السابق وصوتوا علي لان الي قرأوا قليلين اريد تفاعل اكثر منكم
شجعوني للبارت القادم حماس