كلش اسفة على الخربطة الي صارت هذا بارت 14 كامل اتمنى اي شخص قرا القديم هم يجي يصوت هنا لان القديم رح امسحه فرجاء صوتوا هنا كلكم
..........
هذه الحياة
تكره اليد المرتعشة
وتحتقر الضعيف
ان لا تعطي زهرك
الا للزهور
لا أحد يحمل خطايانا
.....
_جمانة فهميني على شنو ناوية
_امشي خل ننزل نجيب الي اريده ومن نرجع حفهمج كلشي
نزلنا لمحل الالكترونيات
_السلام عليكم
_عليكم السلام
_اريد كاميرات مراقبة لاسلكية تكون صغيرة بحيث متنشاف
_موجود طلبج تفضلي اشوفج النماذج
شوفني هواية انواع من الكاميرات
آخر شي اختاريت نوع تكون صغيرة يعني متبين ابد
رجعنا لبيتنا
_شكو ريما شكو كالبة وجهج
_ولج خايفة عليج يعني بلكي شافج وانتي دتركبيها واحتمال حتى ينتبهلها
_اول شي محيشوفني من اركبها اني اختاريت من هذاك اليوم وين حخليها يعني مرح اتأخر
ثاني شي هي صغيرة يعني مرح ينتبه
بقت تتأفف _زين انتي شحسوين بيها بالضبط
_حتصوره من حيجيب وحدة للشقة
فزت ريما من مكانها _عزة صدك تحجين
_لعد شنو قابل اشاقة هذا الحل الوحيد
مال تردين اروح لخطيبته اكلها خطيبج ديخونج انسيها هي مبينة وحدة غبية بكلمتين يضحك عليها ويكدر يطلع من السالفة لازم دليل قوي انو هو ديخونها
_زين شلون رح نطيه الها
_ندزه على بيتها بيد احد ونكول من فاعل خير
هنا بعد مستحيل ينكر
_زين وهي تتوقعين شحسويلة
_حتفصخ الخطوبة وتطرده من الشركة بس اكو شغلة ثانية ببالي لو تصير لو لا خل نشوف
_شنو هي
_اذا صارت اكلج عليها هسة ممتاكدة منها
.....
دك تلفوني بالليل
_هلو سحورتي شلونج
_ هلو الحمدلله بخير
وانتي اخبارك
_مادام انتي بعيدة عني يعني اني ابد مو زين ابد
بقلبي كلت بعد فد ابد ثالثة
_لتصير طماع مو جنت يمك قبل شكم يوم
_بس مشبعت من شوفتج
_انت كلش ضوجتني هذيج المرة بحركتك
_ياحركة ما ذكر شسويت
_لا تذكر كلش زين
_اكيد من حبي الج
_اني اريد توعدني على اتفاقنا نمشي بعلاقتنا شوية شوية
_ماشي على راحتج الي يريد الحلو يصبر
شوكت حشوفج بعد
_عكب باجر ماعندي شي بس خل اشوف اكدر لو لا
.....
كعدت الصبح راسي مصدع من كثر التفكير
اول ماوصلت الشغل اخذت كوب قهوة
صار الظهر ودكيت على ريما علمود نتفق على باجر
_هلو جوج
_هلو عمري
ترى روحتنا باجر
_بعد وقت جمانة الله يخليج فكري زين
_مفكرة زين حاسبتها من كل النواحي لتخافين
_ماشي نفس موعد هذيج المرة مو
_يي نفس الشي هم ورا الدوام نطلع
سديته منها
كان كاعدة بصفي بنين
_هاي نفسها صديقتج الي انخطب
_يي هي نفسها
_عن حب لو تقليدي
_لا عن حب هو الولد كان ويانا بالجامعة
حجة مازن الي كان يستمع لحديثنا
_هاي الناس الي مستفادة من كليتها خوما مثلي بنات جامعتي جنهم اخوية من يكعد من النوم
خزرته بنين
ضحك _لج والله انسى دائما انتي وياية بالكلية لان مو نفس مرحلتي
هم بقت مطنكرة علي
_يابة اسف اقصد بنات دفعتي
_ومادام هم هيج شكلهم شكو جنت لامهم يمك طول السنة
_شنو انتو جنتو نفس الجامعة
جاوبني مازن _يي نفسها بس مو نفس المرحلة تخلي من داومت بنين هنا انصدمت من كالت جانت وياية ولا شايفها
_طبعا متباوع كدامك جنت مشغول بهاي وذيج
ضحك _ترى أني ولد فقير وكاعدة تتبلين علية
باوعتله بنص عين _يي صح اني اتبلى عليك
....
بقيت الليل كله افكر بالي حسويه
اكذب من اكول لريما مخايفة ويمكن حتى احيانا اكذب على نفسي هم
افكر اذا كشفني شسوي معقولة اضطر أقتله لاياربي ماريد اوصل لهاي المرحلة
أصعب شي بحياة الانسان لمن يخاف من المجهول يخاف من الي جاي وهو اصلا ميعرفه شنو
أصعب خوف هو لمن تكون متعرف المقابيلك شديفكر وشيخطط ياترى هو كاشفني لو لا
يعني لو كان اكو قانون يجيبلي حقي ويحميني مستحيل الجأ لهاي المخاطرة
بس مرح أتراجع مرح اخلي انسانة ثانية تعاني من الي اني عانيته وعشته وبعدني دا أعيشه لحد هاي اللحظة
اذا اني سكتت وتنازلت عن حقي فامثال هذا الكلب حيظنون انو يكدرون يفلتون بدون عقاب
......
واكفة يم باب العمارة واحس رجلية ثقيلة خايفة ادخل
وجهت نظري لريما الي كاعدة بسيارتها من بعيد واني احاول ماحسسها بخوفي
دخلت للعمارة وتوجهت لشقته
فتحلي الباب
_نورتي المكان سحورتي
ابتسمتله واني احاول اخفي ارتباكي _منور لأصحابه
دخلت واني عكس هذيج المرة احس الخوف مالي قلبي
كعدنا على ميز الطعام
شلت كوب العصير واخذت رشفة منه
واني دا ارجعه لمكانه تعمدت اخلي بالنص بحيث يصير نص على الميز ونص ثاني بالهوى
انكب قسم من العصير على بنطروني وهذا الي كنت رايدته
هو راسا توجهلي وبيده مناديل
مسحته بالمناديل
_رح اكوم اغسله بالمي لان وكع هواية
توجهت للحمام
ذبيت كومة مي على البنطرون متعمدة ابللة كلش
طلعتلة
_تبلل بنطروني كلش
اكو شسوار
_يي اكو بالغرفة بالمجر الثاني مال ميز
_حروح انشفه واجي
رحت للغرفة وسديت الباب وراية
طلعت الشسوار شكلتة بالكهرباء وشغلتة على أعلى درجة وعفته على الميز
طلعت الكاميرا من جنطتي وبديت اركبهم اني حاطة مكانات ببالي من هذيج المرة علمود ماخذ وقت هواية وأفكر وين اخليهم
حطيتهم بوضعية بحيث أكثر شي يبين السرير
اشتغل واحس ايدي ترجف ودكات قلبي احس صوتها ينسمع اخاف بأي لحظة يدخل علية مقفلت الباب لان خفت يشك انو دا اسوي شي
رجعت للشسوار نشفت بنطروني شوية
وراها دكيت على ريما رنة وسديته وطلعت
_ها حبيبتي نشف
_يي شوية بس بعده رطب
_تعاي كملي اكلج
_لا شبعت
أثناء منحجي دك تلفوني كانت ريما مثل ماصويتهة بعد ماارن تدك علية
_الو
صدك شبيها
شوية شوية فهميني
ماشي جاية
سديت التلفون
_اني لازم اروح صديقتي امها متخربطة شوية وماكو احد بيتهم لازم اوديها للمستشفى
_دقايق ابدل واجي وياج
حجيت بسرعة _لا لا ميحتاج اني رايحة
_ماشي على راحتج
نزلت بسرعة وصعدت
حركت السيارة واشرت لريما تحرك وياية
فتحت الجامة
_حرجع للبيت كلش تعبت
_ماشي عمري اني هم راجعة
توجهنا كل وحدة لطريقها
......
حاط اللابتوب كدامي واراقب غرفته
بقيت طول هاي الايام أراقب كل حركة يسويها وكنت منتظرة الشي الي اريده يصير وصار شي منه
دك تلفوني كانت ريما
_ها جوج شسويتي
_بعدني دا انتظر
وانتي سويتي الي كتلج عليه
_يي يي باعي رحتلها وبقيت مثل مكتيلي احسسها انو هو ديخونها وانو الوحدة ميصير تطي مجال لخطيبها وتعوفه بكيفه وهيج وهي صدكت وحتى كالت كل مرة رح تطب عليه فجأة بالشقة
_عفية عليج هذا الي اريده بالضبط
_زين شحنستفاد بروحتها احنا بكل الاحوال دنصوره
_حتعرفين
......
ثاني يوم بعد مارجعت من دوامي
رحت اقلب بالكاميرا ورجعتها ليورا خلال الفترة الي كنت بيها بالشغل
ابتسمت واني اشوفه الي اريده ديصير
بديت أحفظه وسويت علي التعديلات الي اريدها
بديت ارتب الفيديوهات واسوي عليها تعديلات
الصبح
بدلت واخذت جنطتي وطلعت
وصلت لبيتها حطيت سيارتي بعيد ونزلت امشي
شفت ولد عمره تقريبا ١٦ او هيج كان مبين رايح محاضرة
_صباح الخير
باوع علية _صباح النور
_اكدر اطلب شي منك
_تفضلي تأمرين
_شايف هذا البيت الي كدامك
كنت واكفة بمكان بحيث ماابين بكاميرات المراقبة الي خاليها برا بيتهم
_يي شبي
طلعت السي دي من جنطتي واطيته اله
_هذا اريدك توصله لهذا البيت ومتكول منو اعطاكيا واذا سألوك تكول اعطانيا شاب
_ماشي تدللين
طلعت فلوس من جنطتي دا اطيه
باوعلي _ اني ماسوي خدمات بفلوس
وراح للبيت
بقيت اباوعله من بعيد شفت الخدامه طلعت واخذت السي دي
ابتسمت وركبت سيارتي
وتوجهت لمشوراي الثاني
وسويت تقريبا بنفس الشي هم اعطيت السي دي لشخص وطلبت منه يوصله
وراها رحت لبيت ريما
فتحتلي الباب وصعدنا لغرفتها
_ها وصلتي
_يي وصلته لبيتها
_اني فد شوية حخابرها لان البارحة اتفقنا ازوها ببيتهم العصر
نزلنا اني وريما جوة وتريكنا
_ها اخابرها
_ بعد وقت
كنت متأكدة شافت الفيديو الأول بس الثاني ممتأكدة
وبقينا كاعدين ننتظر الوقت يمر
لحد مصار العصر
خابرتها ريما
_الو
شكو حياتي شبيج
شنو شصاير
شبي خطيبج شمسوي
خانج لو شنو
باوعتلي ريما وهي تحجي شنو شدتكولين شنو ياريت لو بس خانج شصاير
مدا افتهم منج شي بس هدي نفسج
زين روحي ارتاحي شوية واخابرج بعدين
سدت ريما التلفون منها وباوعت علية
_ولج هاي شمسوية شنو تكولين ياريت لو بس خاني
ابتسمتلها _شسويت يعني هي شغلة صغيرة
_ولج ياصغيرة هاي منهارة
.....
جنتو متوقعين الي سوته ريما لو لا
توقعاتكم جمانة شمسوية بعد مصيبة غير الي هي مخططتها
توقعاتكم للقادم شنو مصير احمد
......
تفاعلكم على هذا البارت كلش
شجعوني اكتب البارت الجاي لان هم بي أحداث قوية
اريد تشجيعكم بالمشاهدات والتصويت والتعليقات
تفاعلكم يشجعني للبارت القادم
خصوصا بالتصويت ابد لتنسون تصوتون