طلعت من البيت متوجهة للمكان الي اتفقنا علي
وصلت للمكان
نزلت من سيارتي متوجهة للمطعم
من شافني دخلت للمكان وكفلي وهو مبتسم
تحسي ديسوي دعاية معجون اسنان
كعدت وهو كعد بعدي
_ممصدك دا اشوفج كدامي ايست من ورا عنادج
ابتسمت مجاملة _لا مو سالفة عناد بس صدك كنت مشغولة
_وهسة فضيتيلي
_نوعا ما
باوعلي بنظرة بهيام_احس بشعور غريب واني وياج
نزلت رأسي متصنعة الخجل _اني هم واحد من أسباب ابتعادي هو هذا الشعور
ابتسم ابتسامة عريضة وبين الفرح على وجهه
_وهسة تأكدتي من مشاعرج
ابتسمت بخجل وسكتت
_اني من نوع احب الصراحة ماحب الف وادور
لهذا ردت من البداية تعرفين مشاعري
وتأكدي غرضي شريف
بقلبي كلت واضح من خطوبتك وبعدك تدور بنات الشرف ينكط
_اني حبيت هالشي بيك انو انت صريح بمشاعرك
بانت على ملامحه الجدية _اوعدج رح تكونين سعيدة وياية طول علاقتنا
ابتسمتله ابتسامة غامضة _واني اوعدك رح تشوف وياية كل السعادة
هو ابتسم وهو متفهم الكلام شي
واني اقصد شي ثاني
طلبنا عصائر
بعد ماشربت شوية
خليت العصير على الجانب
_احمد اني بعد ماكدر اطلع دائما وياك
_ليش حياتي
_الصراحة اخاف احد يشوفنا
_حياتي لتخافين واني يمج ابد
_ادري انتي تحميني بس حتى لو الاحتياط واجب
_ماشي حبيبتي نحاول نلكي حل لهالموضوع
ابتسمت واني اعرف الي برأسي رح يصير
طلعنا من المكان سوة
وكل شخص توجه لطريقه
رجعت للبيت
تفاجئت انو مهند يمنا يعني رجع
وكالعادة كان صاير اسمر مثل كل مرة نروح لتركيا
ابتسمت اول ماشفته _ها دودي شوكت جيت
بانت الضوجة على ملامحه _البارحة وصلت
كم مرة كايل ماحب اسمع هالاسم اني
غلست عليه _شنو هاي الجنطة
_بيها الأشياء الي طلبتيها
واشتريت شكم شغلة على ذوقي
توجهت للجنطة _خل نشوف شجبت
فتحت الجنطة اول شي طلع الفستان الي حلبسه بحنة عذراء
كان كلش حلو
اني حجيتلة عن التفاصيل الي اريدها وكتلة اريد شي قريب من هالتفاصيل
_ها عجبج
_كلش عجبني يجنن
_علمود تعرفين ذوقي شلون حلو
_مع انو اني اطيتك التفاصيل بس مانكر ذوقك حلو
_ شوفي البقية
بديت اقلب بالشغلات الي اني موصيتها
كانت مثل ما اني اريد
وراها شفت الشغلات الي جايبها على ذوقه
كانت شغلات منوعة ملابس بيت وملابس طلعة وحتى ملابس عملية للدوام
_شوفي جبت هاي السترة اذا عجبتج لبسيها بالعرس
شفتها عجبتني كانت كلش انيقة
_عجبتني احتمال البسها بس انسق شي جواها
_شوفي هاي الجنطة جبتها وياها حسيتها راهمة بعد مادري
كانت الجنطة صغيرة نوعا ما تراهم كلش لمناسبة والاهم راهمة ويا السترة
_والله عاشت ايدك على هالذوق
_شعبالج لعد
_بس انت طبعا تطلع هيج منو خالتك بعد
هسة كلي تونست هناك
_كلش هالمرة غير
صح رايح لتركيا ويا اهلي ووياكم
بس ويا اصدقائي الونسة فول
_ها يعني طلعنا احنا منونس
_لا مو هيج بس يعني براحتنا نطلع ونطب
ومنتعب نبقى نفتر بالساعات
خو واحد من اصدقائي لو حمار ويمشي هلكد جان تعب
وهو ميتعب ابد
بقيت اسأله عن تفاصيل سفرته وين راح و شنو الاماكن الجديدة الي شافها
........
مر الاسبوع عادي
واليوم تصادف حنة عذراء
كنت كدام المراية اتفحص شكلي
مكياجي سويته بالبيت
كان وسط مخليته كلش غامق كلش
بس حطيت حمرة غامقة
الفستان والحذاء ملبستهم
رح البسهم ببيت خالتي
خليت الحذاء بالعلبة وكذلك الفستان
ونزلت جوة
شفت ماما مبدلة وجاهزة
_ها ماما هاي شطالعة حتى ماكدر ادخل وياج حتغطين علية
ضحكت _لتبالغين مو لهدرجة
_والله طالعة صاكة
بعد شتردين حلفتلج
طلعنا اني وماما
وصلنا لبيت خالة كانوا الناس بعدهم مجايين اكثرهم
_عذورة اني حصعد فوك ابدل بغرفتج
_اخذي راحتج حياتي
دخلت لغرفة عذراء وقفلت الباب
طلعت الفستان ولبسته ولبست الحذاء الكعب وياه
وكفت كدام المراية
كان الفستان بلون ذهبي
بحمالتين رفيعة يصعد على الكتف
منطقة الصدر كانت مطرزة بعدين يضيق بمنطقة الخصر
وراها ينزل عدل كان طويل الفستان بفتحة من منطقة الركبة للنهاية
ومنطقة الظهر كانت مفتوحة
تحسست العقد الي لابسته
وعدلت شعري
نزلت جوة
كانوا الناس واصلين
كعدت يم ماما
اغلبهم كان من بيت عمتها وعمها
أما عذراء فكانت طالعة تجنن
تقريبا الحضور كمل وبدت الحفلة
صوت الاغاني كان يصدح بالمكان
وكاموا أكثر البنات يركصون وياهم عذراء
اني ماحب أجواء المناسبات كلش
احسها تقيدني
دخل خطيبها وبدأ يحطلها الحنة
اني طلعت من الغرفة قبل مايدخل كعدت بمكان ثاني
وحدة من النساء الي كانوا كاعدين يمي مجنت اعرفها اصلا _ليش متخلين حنة
_ماحب ريحتها خالة
_يا ليش هو اكو احلى من ريحة الحنة
كانت ربى كلش مندمجة ويا بنات عمها حسب الي اعرفه من عذراء انو علاقتها ويا بنات عمها احسن من علاقتها وياها
من شفت ديوزعون كيك
رحت وياهم للمطبخ علمود اوزع هم
شفت ربى وبنت عمها ديسولفون سوة بالمطبخ
حسيت الحجي علية لان بنت عمها التفت علية باوعتلي عبالك كاتلة احد من اهلها
شلت الكيك وبديت اوزعه على الموجودين
شفت ماما واكفة ويا خالة يسلمون كلساع على وحدة
رحت كعدت يم عذراء
_عذورة حياتي طالعة تخبلين اليوم
_جوجو حياتي شهالجمال منتبهتلج من نزلتي من فوك
_طبعا منتبهتيلي جنتي منتظرة محمد
ضحكت
_ذولة صديقاتي
بنات تعالوا هاي جوجو بنت خالتي الي احجيلكم هنا
سلمت على صديقاتها كانوا كلش لطيفات
_جوجو تدرين جوعانة كلش من الصبح لهسة مااكلت
_هسة شوية ويجهزون البنات البوفيه
واني ارتبلج ماعون
طكينا صور اني وعذراء
كانوا جايبين مصورة
وصحنا ماما وخالة وطكينا كلنا صورة
حطوا البوفيه
انتظرت شوية تخف واروح
رحت ورا شوية شفت مباقي اكل غير من شكم طبق
سويت ماعونين الي ولعذراء
ورجعت الهة
_هاي شنو
ضحكت _شسوي هذا الي باقي
اكلنا واحنا نحاول منخرب الحمرة
_جوجو تجين باجر للصالون
_لا ميحتاج احب اني اسوي مكياجي
بعد ماتقريبا خلصت الحفلة
صعدت بدلت مرة ثانية ونزلت
رجعنا للبيت اني وماما
صعدت فوك سبحت
وراها تمددت على فراشي
دك التلفون كان هو ديتصل
_هلو حياتي
وين مختفية اليوم
_هلو
كنت طالعة ويا ماما رايحين زيارة لصديقتها
_اشتاقيتلج كلش
_واني أكثر
_اذا صدك مشتاقتلي متحرميني من شوفتج أسبوع
_شسوي كتلك اخاف احد يشوفنا
_زين شوكت اشوفج مشتاقلج كلش
_قريبا
_بس على اتفاقنا مو
ظهرت على شفايفي ابتسامة شريرة
_اكيد على اتفاقنا
........
توقعاتكم للقادم
........
اريد دعمكم بالتصويت والمشاهدات خصوصا الي يتابعوني