دخلت للمطعم
شفته كاعد على وحدة من الطاولات
اول مشافني
كام من الكرسي وابتسملي
_نور المكان بوجودج
اكتفيت بابتسامة وكعدت
_تدرين انو احنا مرتين التقينا ومتعرفنا على بعض
اني أحمد مدير التنفيذي لشركة .....
ضحكت بداخلي الاستهزاء هاي تكون شركة ابو خطيبته وهو حلمه يصير بيوم من الايام المالك لهاي الشركة
_تشرفنا
اني سحر خريجة جامعة
_تشتغلين لو لا
_لا ماشتغل
_شعجب
_تدري بالعراق ماكو تعين واكو شغل اهلي
فدورت بس ملكيت
هو هنا معرض علية انو اشتغل يمهم بالشركة لان حسب معرفت من ريما عن خطيبته انو معينة صديقاتها موظفات بالشركة وينقلون الها تحركاته اول بأول
_حضرتج مرتبطة
_لا مافكر حاليا بالارتباط
_اني هم أعزب
اكيد جنت متوقعة منه هذا الكلام
شنو ممكن يطلع من هيج شخص غير الكذب والخداع
بدأ يسألني عن حياتي اطيتة اجوبة مختصرة واكيد كلها خطأ
وهو هم بقى يحجي عن نفسه وحياته
اجى النادل علمود يشوف شنو نطلب
_عاجبني اطلبلج على ذوقي ممكن
_اكيد
وصل الاكل ورا شوية
اول ماحطيت لكمة بحلكي حسيتها مرة ماادري اني فمي مر لو من هاي الخلقة الحكومي نفسي انسدت
فمااكلت غير كم لكمة
_ليش متأكلين ليكون معجبج ذوقي
_لا كلش لذيذ بس اكلت قبل مااطلع من البيت
بعد ماانتهينا من الاكل
_اتمنى دائما نكرر طلعتنا سوة
الكعدة برفقتج جدا ممتعة
طبعا بداخلي ضحكت علي لان اني اصلا اطيته الوجه العكر واجاوب يادوب على كد السؤال ماعرف وين المتعة بالكعدة وياية
بس جاوبته
_ان شاءالله ليش لا
_واتمنى نبقى على اتصال احب اتعرف عليج أكثر
مجاوبته اكتفيت بابتسامة
اجة النادل جاب الحساب
اخذتة اني بس خطفة من ايدي
_الحساب علية
يكفي حضرتج اطيتيني شرف انو نكعد سوة
كلش سعيد بمعرفتج
بقلبي كلت (واني ابد ممشرفني اكعد وية شخص مثلك)
جاوبته
_بس احنا متفقين العزيمة علية
_اني او انتي متفرق
مجادلته
بعدها طلعنا سوة وكل واحد ركب سيارته
رجعت للبيت
شفت ماما مبدلة ومتحضرة تريد تطلع
_ماما وين رايحة
_رايحة لخالتج صارلها شكم يوم تعبانة
_زين سلميلي عليها
_لا شسلملج عليها تجين وياية صار كم مرة تسألني عليج هي وعذراء
يلا كدامي هم علمود انتي توصيليني
_لعد كولي هيج من البداية تردين توصيلة
ضحكت _لا ولج والله اريدج تغيرين جو شوية وية بنات خالتج
_زين انزع العدسات واجي
توجهنا لبيت خالتي
فتحتها الباب عذراء بنت خالتي الكبيرة مخطوبة
راسا حضنتني
_ها ياكاطعة شلونج
_شلونج حبيبي عذورة
مشتاقتلج
_لو مشتاقتلي صدك تجين تشوفيني او حتى تتصلين علية
_والله دايخة دا اجهز للدوام هالايام
دخلنا الصالة
كانت خالتي موجودة وبناتها اثنين وابنها
_سلامتج خالتو متشوفين شر ان شاءالله
_حبيبة خالتج شلونج
_الحمدلله بخير
_شلونج جمانة
عاش من شافج
_بخير أكرم
انت شخبارك
_زين بشوفتج اكيد
غلست على هالجملة
بوست ربى بنت خالتي الصغيرة
واكتفينا بالسلام
حجت ماما وية خالتي
_ظل بالي يمج خوما بعدج تعبانة
_لا الحمدلله صرت بخير
_دربالج على نفسج حياتي ترة اهم شي الصحة
_يي والله هي يومين تعبت بيهم حسيت حيلي انهد
_ها خالة عذورة شوكت حددتوا العرس
_بعد أسبوعين ان شاءالله
_بيها الخير ان شاءالله
جهزتي كلشي لو بعدج
_بقى شغلات قليلة دنكملها
خالتو حجت وياية
_جمانة حبيبتي بديتي بالشغل لو لا
_لا خالة ان شاءالله هالايام
كعدت يمي عذراء وشوفتني الصور لشقتها الي دتجهزها والأشياء الي مشتريتها وضلينا نسولف سوة
عذراء دائما تتصل بية وتسأل علية بس اني ماحب اقوي علاقتي وية احد
من كنا صغار ومراهقات كانت جدا صديقتي بعدها اني بديت اسحب نفسي من كل الي حوالية
اما ربى فعلاقتنا من احنا صغار مو كلش ممتفاهمين ومن كبرنا زاد هالشي ميجمعنا اني وياها غير السلام وبعض الكلام الي تحجي علمود تضوجني احيانا
اكرم ابن خالتي من كعدت لحد مطلعنا نظراته مشالها عني كنت كلش اضوج من نظراته مع انو ادري هي مو نظرات رغبة انما اعجاب
رجعنا للبيت
بعد ماسبحت وبدلت
فتحت جهازي الثاني شفت أحمد دازلي مسج
( اليوم من اجمل ايام حياتي لان كنت كاعد وية القمر شخصيا )
اتصلت بريما من جهازي الاول وكلتلها الي صار اليوم وعلى الرسالة هم
_اخ خطية هسة القمر المسكين تلكي يعيط ويكول ترى أني ساكت ومتحمل بس لهنا وكافي
_لا ياحيوانة على هالكلام
شبية اني
_تخبلين بس عاد مو القمر قوية شوية
_لج مدا اطيق الكعدة ويا
هيج احس اكو احد ديخنكني
_شسوين حياتي اتحملي
رن جهازي الثاني
_هذا ديدك علية
_ردي شوفي شيريد
_لا خل يولي مالي خلكه
_لا ردي خل نشوف شعدنا بلة
دك علية مرة ثانية شلته
_مساء النور
خاف ازعجتج
_مساء الخير
يي جنت احجي وية صديقتي وقاطعتني
سمعت صوت ضحكته
_صريحة كلش
_لعد تريد اكذب عليك
_لا لا خليج هيج صريحة
سكتت
_تدرين احس بنفسي مشتاقلج مادري ليش
_شكرا
_بس شكرا
_ لعد شتريدني اكول اكذب واكلك يي اني هم
ضحك مرة ثانية
_لا هيج احسن تكولين الصدك
شنو رأيج نتشاوف باجر هم
_لا ماكدر
_يعني باجر ماشوفج شلون حيمر علية اليوم
_عادي مثل كل يوم
_بس الايام الفاتت مجنت شايف هالوجه الحلو
اي وقت فارغ عندج كوليلي علمود نطلع
_اني لازم اروح صديقتي تتصل علية
_تصبحين على خير سحورتي
بقلبي كلت بسرعة صرت سحورتك عابت لهالوجه
_وانت بخير
حاولت انام لان باجر لازم أراجع علمود شغلي
بس بقيت افكر بهذا الحقير وشنو حسوي بيه بالأيام الجاية
......
مثل ماكتلكم البطلة اسمها الحقيقي بين بالبارت
اما الاسم الي تستخدمه وية أحمد فهو وهمي
علمود متدوخون
اتمنى تدعموني بتصويتكم وتعليقاتكم وتشجعوني
لان البارتات الجاية الاحداث تصير اقوى
واريد حماس علمود اكتبها