انفتح الباب كانت عدهم خدامة بالبيت
دخلتنا للصالة
ورا شوية دخلت الي جايين علمودها
تفحصت شكلها جانت صاحبة شعر قصير نوعا ما
حاطة مكياج مع انو هي بالبيت واكيد مفاتني منظر رقبتها
سلمت على ريما اول وراها اجتي علية
سلمت عليها مصافحة فقط
ورا مكعدنا وجهت الكلام الي
_مجنت اعرف ريما عدها هيج صديقة جميلة
_من ذوقج حياتي
_ ها حتتغزلون ببعض كدامي
_ لا حياتي ريما شعدني غيرج
ضلينا نسولف سوة
إلا أن دخلت الخدامة جايبة الضيافة
من خلال الكلام حسيتها دلوعة كلش ومصطنعة نوعا ما
ورا مدة استأذنا اني وريما وطلعنا
اول مركبنا السيارة ريما كالت
_ شفتي منظر رقبتها
_ يي انتبهت على الرغم من المكياج القوي الي خالته ممفكرة تخفيهم
_ هم ياريت هو وياها كاطعين مهر مجرد خطوبة عادية
_ شتتأملين من هيج ناس
_ اخخخ تدرين وإني اشوف رقبتها تذكرت اياد المسكين من مرة بالجامعة حاول يلزم أيدي وركعتة ذاك الراشدي خطية ضل يومين دايخ منه
_ هههههههههههههههه طبعا لهسة أذكر شكله بهذاك اليوم خطية انصدم
_ احسن الوحدة ملازم تطي مجال زايد هيج
ورا شوية وصلنا لبيت ريما
نزلت ورحت لسيارتي
_ هاي شنو وين رايحة هسة امي تضوج كلش من تعرف رحتي بلا غدة
_ لا والله ريوم كلش تعبت اني اصلا من البارحة دايخة اريد ارجع انام من اكعد اتصل بيج
_ ماشي حياتي الله وياج
_مع السلامة
وصلت للبيت
اول مدخلت شفت ماما كاعدة بالصالة
_ ها ماماتي وين جنتي من الصبح
_ جنت يم ريما تريكنا ورا رحت لبيتهم
_ يلا تعاي للمطبخ خل نتغدا
_ لا مامي تغديت ببيت ريما
صعدت للغرفة بدلت بسرعة
ورحت لفراشي
كالعادة كلساع افز من نومي وأرجع أحاول انام
آخر شي كعدت شفت الساعة ب 7
غسلت وصليت ونزلت جوة
رحت للمطبخ
صبيت الباقي من الغدة
ورا رحت للصالة كعدت وخابرت ريما
_ هسة كمت من النوم وخابرتج
_ نوم العوافي
_ الله يعافيج
باجر حبدي انفذ اريد تعرفيلي بالضبط الوقت الي يجي بي لبيتها
_ يي هسة شوية واخابرها ماريدها كلش تحس
بس اني كلش خايفة عليج خاف يعرفج
_ لتخافين مرح يعرفني هم بهذاك اليوم مجانوا مباوعين على شكلي اصلا
_ الله يستر حاولي تديرين بالج
_ ماشي خابريني من تعرفين الوقت بالمضبوط
_ اوك حياتي
نهيت الاتصال ويا ريما
سرحت ياترى اني مستعدة للمواجهة مرة أخاف من حشوفه لو الخوف انتهى من حياتي ومضل الة وجود
قاطع سرحاني صوت الجرس
رحت فتحت الباب شفت مهند
_ شلونها خالتي حبيبتي
_ الله يستر خالتك ؟ وحبيبتك هم ؟
مبين الطلب ثكيل هالمرة
_ هو أني ليش احبج لأن تفهميني بس لا عبالج كتلج هيج مصلحة لا ابد
_ امشي خل نطب
_ شعدكم أكل جوعان
_ شنو أمك مجوعتكم
_ لا والله متغدي بس من اشوفج تنفتح نفسي
_ ياستار مو اكلك الطلب ثكيل هالمرة
_ هسة شسالفة محتوكليني
_ لا شلون تدلل شتريد
_ أريد من الكيك الي مسويتة
_ شعرفك مسوية كيك شنو خال كاميرات بيتنا
_ عندي عيون هنا
طلعتلة الكيك
_ ها شنو الموضوع الي عندك
_ أريد أسافر لتركيا ويا أصدقائي وأمي متقبل
_ وليش متقبل
_تخاف بإعتبار بنات تركيا حلوات خاف أرتكب الفاحشة هناك
_ هاي أمك هم بطرانة هم بنات تركيا بحال جهرتك
_لعد خابريها لاختج وكوليلها ترى جهرة ابنج ميكلبوهة بتركيا
_ شعجب اول مرة تعترف
بس ماشي حخابرلكياهة
_أحلى خالة بالدنيا
باوعت علي وضحكت جان وسيم اني بالشقة من اكلة محلو
ذكرياتي هواية وية مهند خصوصا فرق العمر بينا جان قليل فكان هو صديقي حتى من كنت طفلة لحد مصرت مراهقة وحتى ورا الي صار لهسة أذكر من جان يجي يمي ويكلي اني خايف أريد انام بصفج جنت ادري كان يعرف اني الخايفة كان يريدني أحس بالأمان
قاطعني صوته
_ شخبار صديقتج المخبلة
_ لتحجي على صديقتي
_ بلة بربج الناس عدها صديقات وانتي عندج بس هاي دصادقي بنات منا منا بلكي اكبل ويا وحدة منهم
_ يعني عساس هسة معندك وحدة
_ منيلي اني ولد فقير ترى
ورا شوية جتي ماما
_ هلو حبيبي دودي شلونك
_ هلو بيبي
بربج بيبي منا العالم الي يسمعج تكولين دودي شيكول عبالهم بعدني بالروضة
_ حفيدي وادلعه باليعجبني شعلية بالناس بعدين انت ابد متكبر بعيني بعدك ذاك الطفل نفسه
_ الله يسامحج على هالحجي
_ ليش ولك
_ كبرت بعد صرت بالجامعة وبعدج تشوفيني بالروضة
راح مهند
سألت ماما
_ شنو بابا بعده نايم
_ لا هسة كعد بس اليوم الظهر اجة وراج وتعبان فنام
كاعدة بفراشي دا أريد انام ماكدر خايفة ماعرف بالضبط منين من باجر لو من ذاك اليوم
بعدني أذكره بكل تفاصيله أذكر اشكالهم وشكد تعبت وإني أدورهم
شكد حاولت اتخطى الي صار مكدرت مو بيدي بعدني أذكر برودة ذاك اليوم كنت اصور يوم عادي ورح يعدي مثل كل الايام بس هذا اليوم معدا بعدني عايشة بذاك اليوم بعدني بنفس الخوف نفس الرجفة
جان يوم من أيام الشتا ومن ذاك اليوم وإني حياتي باردة مثل برودة ذاك اليوم
بعدني عايشة بشتا طويل مدام اشهر لا دام 6 سنين وهسة قررت انهي هالشتا وابدي فصل ثاني
الفصل الثاني متأكدة مرح يكون ربيع
لأن ربيع عمري انتهى بذاك اليوم ومرح يرجع ابد
حتى لو الفصل الجاي صيف اني راضية بي بس بشرط هم الي حيحتركون بشمس هذا الصيف الجاي
نمت واني كلي أمل بفصل جديد يذوب جليد قلبي