#أمانة حيدر
#بقلم:الراويه
#الفصل "٢٤"
بسم الله ❤
.
سلام..
گاعد گدام الباب بسيارتي انتظرها تطلع
ادحگ للشارع و اني احس نار بگلبي، انتظرها تجي حتى نروح ل بغداد لأن طلعوا جمال
مادري ليش طلع قبل يومين من الموعد من رحت جبتوا بعد ما اتصل بيه رقم غريب و طلع هو متصل
من تلفون شخص
فرحت و البسمه شگت ملامحي و من رحت جبتو شبكتو و هو گام يدحگ يدور گلتلو ما اجت
روحتي ل بغداد كلها بس حتى ما اشوفها ل يُسر
حتى ابتعد عنها و حتى اتعود على فراگها..
گلت هي رايحه رايحه ليش اظل و احرگ بنفسي بالزايد
شگد تمنيت تگول طريقنا واحد اني اظل وياك
بس شنو جوابها ؟ كسر گلبي و خلاني احس نفسي انسان بلا كرامه
اطلب منها بس كلمه وحده و هي بخيله
طلعت من افكاري على صوت باب السيارة الي انفتح
عبالي هي بس طلعت امي تنهدت لمن گالت
- ول يابه صحيح جمال طلع
هزيت راسي ب نعم و رجعت گالت
- عجل ما تنزل ؟ ليش گاعد
- يمه وين يُسر ؟ خلي تجي تأخرنا
هي طبت للسيارة و دحگتلي و اني انداريت عنها
- سويلم شكو بينكم ؟ ها اسألها تگول ماكو شي
و انته مشيت و لا گلت لاحد شبيكم ؟
- يمه ما بينا شي هسا روحي صيحيلها
- سلام !!
انداريت عليها و گلت بعصبيه
- يمه رحمه لابيچ ماكوو شي لا تلحين
- و وجع بگلب العدو، لا تصيح ولك
زفرت و گوه سيطرة على اعصابي
- صيحيلها
- ما اشتغل عند الخلفك تريدها تجي انته انزل صيحها
و نزلت من السيارة و طبگت الباب وراها بقوة
و صحت أني بعصبيه
- الباب
دحگت عليه ز خي تهز ايدها و فاتت
استغفر الله استغفر الله، والله النسوان انخلقن بس حتى يرفعن ضغطنا و يشعلن گلوبنا
دقائق و طلعت و هي شايله جنطتها و ابنها ما طلعت اساعدها فتحت الباب الورا و ذبت الجنط بيه و صعدت و كلمة ما نطقت
و اني بس اريد اصيح ب
- ترا السلام لله مو لعبدو
اندارت عليه و گالت
- السلام عليكم
ما جاوبتها و اني اشغل السيارة و هي بسخرية گالت
- و رد السلام واجب
انداريت عليه و گلت بابتسامه صفراء
- و عليكم السلام و رحمة الله و بركاته
تأففت و اندارت للشباك، ربي والله ما سويت شي بدنيتي ليش هيچ تعذبني بيها
لو بيدي والله ما اخليها بگلبي لو ثانيه، بس مو بيدي
الطريق كلو ساكته هي و اني همين، ما اريد احچي وياها بلكي تصحى على نفسها
وصلنا لبيتهم و چان بس جمال بي
جمال الي طلع و رحت جبتو و اخذت رقمها منو، هو استغرب لحد هسا ما عندي رقمها بس ما حچيت شي
حدرت من السيارة و عافت الجنط
ظلت ادحگ للباب و اندارت عليه و گالت
- هو هنا ؟
هزيت راسي ب اي و رحت فتحت الباب
فتت اني و هي ورايه و صحت
- جمال يلا الشباب ينتظرونا نلعب طوبه
طلع من باب المطبخ و هو لابس صدرية الطبخ من شافنا ضحك و تقدم النا
انداريت ل يُسر الي شهگت و هي تركض الو وحظنتو
و گامت تبچي و ابنها ضاج انقهرت على الطفل و رحت اخذتو منها و هي شبكت جمال باثنين ايدها و تبچي و تنوح
يمكن خمس دقايق ظلوا هيچ جمال يسكت بيها و هي قافله
اخر شي سحبها جمال و فوتها جوهو اني انطيتها حيدر يدون ما ادحگ الها
رحت جبت الجنط چانوا اثگال، اكيد خلت كل هدومها بيهن لأن ما راح ترجع
فتت وراهم و خليت الجنط عند باب الصاله الي هما گاعدين بيها
گعدت على القنفه و اني ادحگ ل جمال الي يحظن ب حيدر و يبوس بي و حيدر يضحكلو
اخر شي رفع جمال راسو الي و گال
- سلام
- ها
- ما انسى وگفتك
- ما سويت شي
حچيتها و گمت من مكاني و گلتلوا
- تغديت لو بعد ؟
- والله جبت من المحل الي هنا لحم مفروم بس حرگته
ضحكت يُسر و هي تمسح بدموعها و اني گلبي رف عليها دحگتلها و ابتسمت بس من رفعت راسها و شافتني انداريت ل جمال و گلت
- اروح اني اجيب غدا لا تكمل الحريق مالتك
- مو انته ما تاكل اكل جاهز
حچتها يُسؤ و اني دحگتلها باستغراب هزيت راسي و گلت
- اني انجاز بنفسي
و طلعت سمعت جمال يصيحلي بس ما رجعتلو
جريت حسرة و اني بالسيارة، وين تريدين توصلين يُسر ؟ لا انتي دايره بال الي و تحبيني و لا كارهتيني و تنفرين مني
مره اشوف اهتمام بعيونچ و مره عدمو
رحت جبت الهم دجاجه مشويه، و عصائر لان اكيد راح يجون ناس تسلم عليه
رجعت للبيت و هما تغدوا و اني ما تغديت
العصر بدوا ناس تجي و حتى عمامو اجوا و ربعوا بالمنطقه
البيت انگلب و يُسر تسوي چاي و اني اوزع
والله لو مشتغل عماله و لا هاي الشغله
بعضهم بقوا للعشا، و همين رحت جبت مسواگ و سمچ و مقبلات
لل١٠ و نص حتى الناس فضت
مددت على القنفه و يم راسي جمال الي يبلعب بتلفونو و يُسر تنظف بالمطبخ و راحت نظفت الطابق الفوگ
و حيدر ويانا چان گاعد بالگاع و هو يلعب بسيارة صغيره
عافها و گام يزحف ناحيتي و من صار يمه القنفه وگف و هو يصيح أبه أبه
ترك جمال الموبايل و گام يدحگ عليه و يبتسم
و گال
- يناديك؟
- اي
حچيتها و اني اشيلو و اگعدو على بطني و هو يضحك
- و الله يحبك اكثر مني
- هو مگبالني چان ف اكيد حبني
- باع خالو
حچاها بضحكه و اني ابتسمتلو
و سكتنا و را لحظات گال
- سلام
- ها
- شنو راح تسوي
- على شنو ؟
جر حسرة و گال
- موضوعك انته و يُسر
هنا گعدت على حيلي و سندت ظهري على القنفه و حيدر بعدو بحظني
- أسالها
- منو
- يُسر
دحگلي باستغراب و گال
- يعني ؟
- تعرف شنو يعني
- يعني هي ما تريد تبقى وياك ؟
دحگت عليه و گلت واني ارفعلو حاجبي
- اي
تنهد و هو يهز راسو بلا و رجع گال
- ما توقعت الوضع هيچ
- اني وعدتها ما اتقرب الها و هي رادت هيچ اكثر مني
و هي گالت بعظمة السانها ما ابقى يوم واحد عن الستة الاشهر و هيانك جيت و هي جابت كل هدومها
- لا حول و لا قوة الا بالله
فرك وجهو و گال بتردد ورا لحظات
- عبالي تقبلت الامر و تقبلتك
- جمال شكلك من الضوجه بالسجن گعدت تتخيل
- سلام انته تريدها مو ؟
انداريت عليه و هو يدحگلي بتساؤل ظليت ساكت لحظات گبل لا ابتسم و اگول بهدوء
- و الي ما يريدنا خوما نظل متمسكين بي ؟
- سلام باوع انته رجلها و الك حق بكلشي يخصها
والله اذا تريدها اخذها و اني اعرف اتصرف وياها اذا رفضت
- لاا جمال على بختك هو اني بلا شي ما تريدني و ما صدگت على الله تطلع انته تا ترجع و كل واحد يروح بطريقو
- سلام هي مرتك
- مو مرتي شريكة سكن چانت و بس
حچيتها و هو ظل يدحگلي قبل لا يزفر و هو يستغفر ربه
ظليت ساكت و اني ادحگ ل حيدر الي يلعب ب دگمة قميصي اجا يخليه بحلگو بس وخرتو و گام يبچي ما تحملت بچي و گلت
- هاك الزمها بس لا تبچي
رجع يسحب بيها و يضحك و الدمعه بعينو
يشبه امو بهاي اللحظة بالذات
تنهدت و گلت و اني امسح على راسو
- جمال
حسبالك اني فرحان لأن رجعت ؟ لا والله بس شنو بيدي ؟ ما اگدر اجبرها على شي هذا قرارها و هي حرة بيه
تنهد و گال
- ما اعرف شحچي، بس الي انتوا بي و خصوصاً انته بسببي
- لا يمعود لا بسببك و لا بسببي هذا امر رب العالمين
ما جاوبني بس حسيتو ضاج، حقو يضوج من الي يسمعو مني
والله لو اني بمكانو ما چان عرفت شحچي او شنو اسوي و اني اشوف اختي بهل الموقف
بال١١ و ربع طلع و جابلي فراش ضحكت و اني اتذكر ايام زمان من چنه انام اني وياه و حيدر بالصاله و نظل للصبح نسولف و نضحك
اخذتو منو و هو رجع جاب فراش اخر
دحگتلو و هو بضحكه گال
- نعيد الماضي
مدد بفراشو و اني همين و بيناتنا حيدر الي گعد و يدحگ مره الي ومره ل جمال
اخر شي اجا عليه و نام بحظني، حظنتو اني همين و هو يصيح ابه ابه و جمال يدحگلنت و يبتسم سند نفسو على ايدو و گال
- سلام راهملك دور الاب
- لا عاد مو هيچ
- لا والله دباوعله شلون اجا ختل بحظنك، عبالك ابوه
نزلت عيني عليه و هو يرفع راسو و ينزلو يعني گاعد يلعب وياي
بستو من خدو و گلت
- بس هو عندو اب واحد
دحگت ل جمال و كملت
- و اني ما اريد اخليه ينسى ابوه الحقيقي، لأن مهما اهتميت يبقى مو ابني
- سلام ترا الاهل الي يربون مو الي يخلفون
- اعرف..بس اني ما اريدو يتعلق بيه
تعرف ليش ؟
- اعرف لأن يُسر ما تريد ترجعلك
رجع مدد و هو يدحگ للسگف ثواني و گال
- بس ودعاتك سلام، يُسر راح ترجعلك
گمت اضحك و اني ادحگلو و هو يبستم
شكلو حسبالو يُسر حبتني لو تقبلتني
ستة اشهر چانت تعد الايام حتى ترجع، تا برجليها ترجعلي ؟
فاتت هي و اني سكتت و ظلت ادحگلنا و بنبرة تردد
گالت
- اجيت اخذ حيدر
- اي اخذيه
حچيتها و گعدت شلتو و ناوشتو اياها و هو گبل گام يبچي و يمد ايدو الي يريدني
هي دحگت ل جمال و رجعت دحگتلي قبل لا تطلع
- ليش ما خليتو عندك ؟ گام يبچي يريدك
- لا هو من زمان گاعد و شو ضايج
خلي بلكي يبزعها
حچيتها و گام يضحك جمال و گال
- سلام بله من چنت تشاقيها شنو چانت تسوي
لامن اعرفها مرارتها صغيره و گوه تتحمل شقه
- چانت مدها تلگحني من الشباك
بس والله صحيح ما تتحمل شقه
- هي نفسيه و انته شقاوچي راهمين لبعض كلش
- جمال
حچيتها و اني ارفعلو تك حاجب و هو گال
يغير الموضوع
- الله سلام الفراش شگد مريح، هناك عبالك نايم على صخرة
- اي والله نومة الگاع عبالك صخرة
گام يضحك و گال
- يعني انته مثلي ؟
جريت حسرة و اني ارجع امدد
- و يمكن ازود منك
سكت هو و اني همين، و صار هدوء قبل لا يگول جمال قاطع الصمت
- اني بالسجن قطعت الامل گلت راح اظل هنا سنين ، ابقى سنين بين
ناس ما تعرفهم نايم وياهم بغرفة واحد قاتل و واحد حرامي
واحد ويانا كاتل اخته لأن لاگي رسايل من حبيبها بموبايله، و الاخر بايگ فلوس من مدير عمله
و ناس ابرياء انحبسو ظلم، و هواي مثلي كتلو عن طريق الخطا
تنهد و گال و اني ادحگلو بانصات
- اثنين تعاركوا ثاني يوم لگينا واحد منهم مضروب برجله بالحمامات و كاتله النزيف
- و الي كتلو وين ؟
اندار عليه و گال
- انعدم، هو منا كاتل و مسجون مؤبد و رجع كتل شخص انكتب عليه اعدام
تنهد و هو صافن على السگف و كمل
- اني بالسجن، گمت اشوف مشاكلي الي مريت بيها تافهه
چنت انام و اني مخلي ايدي على گلبي لأن ناس ما تتأمن بيهم
من چنت اسمع قصص الي وياي يوگف شعر راسي، اگول مشكلتي اني لعد شگد بسيطه مقارنة بيهم ؟
سكت و اني ما جاوبتو شويه و گال
- اني منعس اريد انام
- نام اني همين نعست
- لعد تصبح على خير
اندار للجهة الثانيه و گال
- عود طفي الضو
گمت اضحك و اني اتذكر من چنا اني و يُسر كل واحد يگول انته طفي
- و انته من اهلو
گمت طفيت الضو ومددت و گلتلو
- للعلم ترا اني خطار
- مو خطار انته من اهل البيت
.
يُسر..
گعدت الصبح و باوعت للأثاث هاي مو غرفة سلام
گعدت على حيلي و اني اتذكر هاي غرفتي
غرفتي بيتنا
هسا اني بيتنا
بين جدران البيت الي ولدت و كبرت بي، باوعت ل حيدر نايم نزلت من الجربايه و طلعت للحمام غسلت و نزلت جوه
و اني على الدرج توصلني اصواتهم و هما يحچون بصوت عالي
فتت للمطبخ و لگيتهم عند الطباخ يمكن ديسون ريوگ
- صباح الخير
حچيتها و التفتوا عليه جمال جاوبني و سلام لا
حسيت بقهر من بروده الي استحله
حتى من چان عدنا خطار يجي ياخذ الضيافه و وجهه بارد و ما باوعلي
تقدمت و گلتلهم
- چان گعدتوني اسويلكم ريوگ
- لا ما حاجه اصلاً اني تعودت اطبخ لان بالسجن
احنا نطبخ لنفسنا بس هما يجيبون النا المسواگ
ابتسمت ل جمال و اني اباوعله شلون گام يطگ بيض
وحده اثنين تلاثه و طگ اربع وحديات، معقوله كلهن ل سلام ؟
- زين بشنو اساعدكم
- امشي نزلي ابنچ احنا نكمل الريوگ
هزيت راسي ل جمال و صعدت فوگ گعدت حيدر گوه
و نزلته وياي
لگيتهم توي گاعدين على السفره و گالي جمال
- يلا صبينا چاي
- بس من هسا لحد يقلد لأن اني سويتو
حچاها سلام و هو يبستم و جاوبه جمال
- لا سلام انته محد يجي وراك بسوايت الجاي
صبيتلهم و اني اخذت گلاصي
و گمت اكل و اطعم ب حيدر، باوعت ل جمال الي ياكل بيض استغربت و گلت
- جمال شعجب تاكل بيض ؟؟
- غير من ورا السجن ؟ والله بزعونا من البيض و الروبه
گام يضحك سلام و گال
- و صرت مدمن بيض
- ايي والله اخويه، وين چنت عنه
گعدوا ياكلون و اني بس اباوعلهم اخر شي ابتسمت و كملت ريوگي
ورا الريوگ و اني داغسل بالمواعين، اندگ الباب و طلعوا جوارينا يسلمون على جمال
شويه و دخل سلام گال حظري ضيافه
خدرت چاي و هو شويه و اجا اخذ الصينيه بس بعده ما طالع الباب گلتله
- سلام
التفتت عليه و گال
- ها ؟
- شنو راح تسوي
- بخصوص شنو
تعلثمت و اني اگول
- بخصوصنا
- لا تخافين تخلصين مني مو اليوم باچر
حچه كلمته و طلع و اني بقيت واگفه بمكاني، جريت حسرة و سحبت الكرسي و گعدت
اني ما چان قصدي هيچ، بس سألت شنو راح نسوي ؟
ضربت راسي و اني اتمتم
- طاح حظچ يُسر طاح حظچ
راحوا ورا ساعة تقريباً
راح جمال للسوگ يريد يجيب مسواگ
لأن گال اصدقاءه من الدوام راح يجون عليه، چنت فوگ اعزل بملابسي بالكنتور بتعب
مره اخلي قطعة و مره ارجعها
تركت الملابس و گعدت على الگاع و اني استند على الچربايه اباوع لأيدي بعد الخاتم مالته بيها
زفرت و حسيت الدمعه وگعت على خدي، حسيت بوجع بگلبي
دمعتي صارت دموع و اني احس ما اعرف شنو اريد ؟
اريد ابقى هنا لأن هنا مكاني و هذا بيتي، و اريد ارجع هناك لأن احس روحي ظلت هناك
لميت رجليه و سندت راسي عليهن و اني ابچي، والله تعبت اريد اعرف اني شنو اريد ؟
اريد سلام ؟ شي يگولي اي و شي يگول لا انتي تعودتي عليه
بقيت ابچي اني عذبت نفسي و عذبته ل سلام وياي، لا اني الي بعدته عني من الاول او انطيته فرصه و لا اني الي عشت وياه حياة طبيعيه
فزيت من انفتح الباب و فات سلام وگفت على طولي و هو اتجهه للتخت و دنگ على حيدر و باسه و حيدر چلب بيه
وگف سلام و هو حاضن حيدر و هو يبوس بيه من خدوده و يضحكله
رجعه للتخت و باوع عليه و گال
- لازم نحچي
هزيت راسي و گعدت هو على التخت و اني بقيت بمكاني باوعلي و گال
- انتي تريدين تظلين هين ؟
ترددت بالكلام و اني اباوع للجديه الي بعيونه، اريد ابقى هسا هنا لأن اخويه توي اجا و بعد ما شبعت منه
هزيت راسي و گلت
- اي
- و لشگد ؟ يعني لمتى اسبوع اسبوعين ؟
ابتسمت و گلت اني اتقدم اله
- سلام خلصت الستة اشهر
- ما عليه بالصخمان
اني اسألچ اذا رحت هسا و ورا اسبوع اجي عليچ ترجعين وياي ؟
بقيت ساكته و اني مصدومه من سؤاله، هو يباوعلي ينتظر جواب و اني اباوعله ما اعرف شنو اجاوب
ارجع وياه ؟ گلبي گام يدگ بسرعة و يگلي وافقي ترا فرصتچ
ما عرفت شحچي و هو و گف و تقدم عليه و گال بنبرة هادئه
- يُسر شنو تگولين ؟
- مادري
- شنو ما تدرين ؟ ترجعين وياي لو لا
رجعت ابچي و هو تنهد رجع شعره ليورا و گال
- هسا ليش البچي
- انته گلت ستة اشهر و هياتها خلصت
سكت و اني مسحت دموعي و هو بقى يباوعلي و عيونه لمعت بطبقة دمع خفيفه
تقرب عليه و اني رجعت ليورا و گلت
- لا تقترب
رجع ليورا و هو يستغفر ربه بنبرة ناصيه
امسح بدموعي و گلتله
- طريقنا مو واحد
- اعرف
- لعد ليش تطلب مني ؟
- گلت يمكن تغير رأيها
حچاها و هو يرفع اكتافه و بسمه ناعمه على وجهه
ظليت ابچي و گال
- ول يابه كافي دموعچ خلصت
- سلام اني ما اعرف شنو اريد والله
تقرب عليه و حاوط وجهي بيديه و گال
- دحگي عليه
رفعت راسي و باوعت بعيونه و گال
- اني شنو بالنسبة الچ
بقيت اباوع و اني افكر هو شنو بالنسبه الي، ما لگيت جواب ل سؤاله و سؤالي
ابتسم و گال بصوت ناصي
- ما تعرفين، بس اني اعرف انتي شنو بالنسبة الي
شوفي شنو الفرق بينا ؟
رمشت عيني و نزلت دمعتي الي بمحجرهن
هو تقرب اكثر و اني دگات گلبي علت بالاكثر
- انتي تعرفين شنو بالنسبه الي ؟
انتي بغلاة امي، و بمعزة رشا و مثل ضحكات دلال على گلبي ومثل مشاكسات عثمان تثير جنوني
يُسر انتي اهلي، اهلي كلهم مجتميعن بيچ
كمل كلامه و اني ما كملت دموعي
هذا كلام هواي على گلبي يعرف شلون يخليني اضعف شلون يخليني اگول بداخلي يُسر ذبي كلشي وراچ و تمسكي بي
دنگ شويه و سند جبينه على جبيني و كمل بنبرة ناصيه
- والله و روح ابويه ما حبيت غيرچ، كل الي مروا بحياتي ما زرعوا الي زرعتي بگلبي، يُسر مره گلتي اني بلا جمال اضيع
و گلتلچ اني ما اخليچ تضيعين، و هسا اگلچ بكل ما عندي من ضعف اني بلايچ والله اضيع
غمضت عيوني و اني احس بكل خلية بجسمي تنتفض و تگول عوفي كلشي لاجل سلام
لاجله هو و بس
- يُسر
- ها
گوه نطقتها و هو گال بنفس نبرة صوتي
- اني اذب كل شي ورايه علمودچ و اجيت لطريقچ
حتى يصير طريقنا واحد
- سلام
- يا عمر و روح و گلب سلام
- گلبي والله يوجعني
بلحظات قليله سحبني ل حظنه و غرقت بي بقى شابكني و اني ابچي حسيت نفسي اذا يتركني الگاع تستقبلني و اوگع
جسمي كله رخى و بقى هو ساندني، حسيت بانفسه على شعري و كل لحظه يطبع بوسه صغيره
- يُسر ترجعين وياي
- ما اگدر..
قاطعني و هو يبعدني عنه و اني احس فجاة بشي نقص مني حسيت گلبي تعلق بجيب قميصه اباوعله و اني اترجاه بداخلي انو يرجعني لحظنه
لأن ما اگدر اني اتقدم و ابادر
- مو هسا والله مو هسا
دحگي اني اروح اليوم و اسبوع و ادگ عليچ
اذا جاوبتيني ف معناها يا سلام تعال و اجي اخذچ و نرجع لبيتنا
سكت و بلع ريگه و كمل بصوت متردد
- و اذا ما جاوبتيني، ف يعني لا..
اوعدچ وعد ايام قليله و ورقة الطلاگ توصلچ
بقيت اباوعله و اني احاول افهم شنو گال
عيونه چان بعيوني حسيت صار خلل بگلبي تمنيت لو اگدر انسى و هيا بوجهي اجمع غراضي و امشي وياه
بس ما اگدر شي يمنعني
غمضت عيوني من تقرب عليه حسيت بكلشي توقف فجاة من صار بيني و بينه و لا شي، من طبع بوسه على شفتي
حسيت نفسي انقطع حسيت بيديه ورا ظهري و هو يقربني اله اكثر
ايديه ' الخاينات ' طاوقن رقبته بلحظه وحده
نسيت كلشي، حيدر، جمال ، ابني اني وين
و شنو الي صار و الي وصلنا لهنا، حسيت شي بداخلي انبعث من جديد، شي كانو كان ميت من سنوات و هسا افاق من قبره
زاد احتظانه و اني حسيت بعد ما اگدر اتنفس
نزلت ايديه على صدره و بديت ابعده عني
رافض انو يبتعد و رافض انو يتركني، فتحت عيوني و اباوعله من وخر شويه شويه بس لازمني من خصري و عيوني بعيوني ما فكني من قيدي
حسيت رمشي طخ برمشه من قربنا
گمت اتنفس بصوت عالي و هو هماتين اجا ياخذ جوله جديده بس ايدي منعته من رفعته لحد كتفه و گلت بصوت ما اعرف شلون طلع
- سلام لا
- يُسر تعالي وياي
اني اريدچ
- سلام الاتفاق
- طز بالإنفاق، اني اريدچ ! انتي مرتي
- سلام
- ولچ حرگتي عشيرة سلام انتي
اگلچ انتي مرتي تگوليلي سلام
ما گدرت اكتم بسمتي، يا ربي بعده مثل ما هو ما يتغير
بلعت ريگي حاوط وجهي و گال
- اسبوع، اريدچ تشوفين تگدرين تتحملين فراگي لو لا ؟
اجيت احچي بس رفع اصبعه و خله على شفتي و گال
- اشش ما اريدچ تحچين هسا لان تخربين كلشي
اسبوع اتصل و تجاوبيني زين
وخر ايده و رجع يتكلم
- خسرتچ مره اي، بس اخسرچ مرة الخ ؟ اكيد لا
و طلع و اني ظليت بمكاني مصنمه، اروح اركض اله و اگول اله ارجع ؟
لو اسكت احسن، خارت قواي و وگعدت على التخت باوعت ل حيدر چان يباوعلي و بسمه صغيره على وجهه
شلته و حضنته و اني اشم ريحته و ابوس بي و هو تمسك بيه
من اجا جمال و سأل عن سلام حچيتله و حسيته زعل
گمت اسوي بالغدا و كملته و اجوا اصدقاءه
لل٢ و نص تقريباً يلا راحوا
التهيت بالشغل كل شويه ناس جايه، و گدرت اضيع و لو شويه من تفكيري ب سلام بسبب الشغل
مرت يومين على هاي الحاله شغل و خطار رايحه و خطار جايه حتى خوالي اجوا بوقتها اجوا بس الزلم
اني بغرفتي و اسمع صياحهم و كانهم تعاركوا وي جمال
سندت نفسي على تاج التخت و اني اسد اذاناتي لأن
بعد ما اتحمل اي شي
احس راسي صار طبل و عيوني راح توگع ، يومين صحيح مرت بس ما گدرت اغفى بيهم
كل ما اريد انام طيف سلام ينرسم گدامي
اضحكله و يختفي، گمت اتخيل صوته بالبيت و هو يصيحلي لو يصيح ل عثمان
صوته بعده يرت باذاني
راحوا خوالي و نزلت و لگيت جمال گاعد يفشر و يسب
بقيت ساكته الا ان هدأ من حاله
لأن هو مثل سلام ينسى منو گدامه من يعصب، و للمرة العاشره بعد الالف ارجع اتذكر شي يخصه
تقربت ل جمال و گلتله بصوت خافت
- جمال
- يُسر رحمه لربچ اسكتي، اني طالعه روحي و اجوا خوالچ زادوها عليه
- شبيهم ؟ و ليش هيچ يصحيون وحتى ما بقوا
- حسبالهم طفل و يريدون يتحكمون بينا
تعالوا امشوا ويانا للبصره و تگعد هناك و تسكت، جايين هسا يعاتبون و يحچون
رفع راسها و كمل
- ستة اشهر احد اتصل عليچ ؟
- اني ما عندي ارقامهم
- حتلو ما عندچ ! چانو باي طريقة يگدرون يتواصلون وياچ
بس هو هذا حظي ، لا عمام بيهم خير و الا خوال، اني اريد اعرف شنو مسوي بحياتي حتى رب العالمين هيچ بلاني
گعدت گدامه و لزمت ايده و گلت
- لا تحچي هيچ جمال ! اني هنا يمك
و انته يمي ما اريد احد غيرك
- و سلام ؟
نطقها و رفع حاجبه و كمل
- شو سكتي ؟ ما تريدينه ؟
- جمال اترك موضوع سلام
- لا ما اتركه، صارلي يومين ساكت و بعد ما اكدر اسكت اكثر ، شنو السبب الي يخليچ ما تريدينه اسالچ سؤال و جاوبي حظچ و بختچ
هزيت راسي و اني احبس دموعي و هو گال بعصبيه
- طول بقائچ هناك رفع ايده عليچ ؟
قلل من قيمتچ گدام احد ؟ لو رفض طلب الچ
هزيت راسي بلا و گمت ابچي و هو گام يعاتبني
- لعد ليش ما تريدينه ؟ ولچ مثل سلام ينترك ؟
لازم تحمدين الله و تشكرينه لان الله كتبالچ هيچ انسان
يُسر الي راح مات، و انتي صغيره بعدچ لا تظلين هيچ لخاطري
ادري بحيدر غالي عليچ و هو شخص ما ينسي
بس گوليلي اذا بقيتي هيچ شنو راح تستفادين ها ؟
دفنتي نفسچ و عمرچ كله وي حيدر
- و گلبي دفنته ويااه
حچيتها و اني انزل راسي و ابچي
صعبة انساه والله، اذا گدرت انسى و لو القليل منه بحظور سلام
بس ما ان يغيب عني سلام حتى يرجع حيدر ل ذاكرتي و گلبي
خلى ايديه جوه حنچي و رفع راسي باوعلي و گال
- يُسر
- هاا
- سؤال و جاوبيني عليه بصراحه
من انتي هناك حسيتي گلبچ دگ لو رجف من كلمة لو موقف من سلام ؟
سكتت و اني اتذكر اكثر من موقف او كلمه حچاها الي و گلبي حسيته مو بس دگ انما اضطربت دگاته
بلعت ريگي و هزيت راسي بس اي و هو گال و بسمه خفيف ترنسم على وجهه
- باعي گلبچ بعده موجود، الي دگ ل كلمه ل سلام
يجي يوم يدگ اله كامل، يُسر انتي تريده لسلام و يمكن حتى تحبيه
سكت لحظات و كمل بنفس النبرة و اني صافنه على كلامه و حسيت بمعدتي مغصتني من گال تحبيه
- بس حيدر واگف بطريقچ، تحسين نفسچ تخونين حيدر مع انچ لا ما تخونينه انما انتي دتخونين سلام لأن هو زوجچ
و انتي حلاله و مانعته عنچ، تعرفين الي تهجر زوجها الملائكة تلعنها، و اذا لعنتچ ف يعني هذا انو رب العالمين مو راضي عليچ
اعرف موضوع حساس الچ بس اني اخوچ لو ما اريد مصلحتچ ما كان حجيت هيچ وياچ
تقرب و طبع بوسه على گصتي و كمل و اني احس بمنطقية كلامه بس ما اگدر اتقبله و خصوصاً بهاي الفترة
- يُسر اني مو دايم الچ، يمكن يجي يوم و أبني حياتي الخاصه و المسوؤليه تخليني انساچ و انسى ابنچ
بس صدگيني اني انساچ و سلام لا، اني اعرف سلام اعرفه حق المعرفه
و اعرف انو يحبچ و رايدچ قبل لا تتزوجينه
شوكت و متى ما ادري.. بس هاي الحقيقيه، سلام يحبچ و يريدچ
ابتعدت عنه مثل الي منتوله باوعتله و هزيت راسي بلا و گلتله
- لا جمال شهل الحچي ؟
سلام چان يحب وحده و حتى بعد زواجنا حچه الي عنها
عگد حاجبه و باستغراب گال
- هو گال
- ايي و حتى هي من منطقته
لأن من سألته وين گال بتكريت
تنهد جمال و هز راسه باي و اني گمت من مكاني و گلت
- عفيه جمال لا بعد تحچي هيچ، اني تعبانه من التفكير لا تزودها عليه
و طلعت و تركته و اني امسح بدموعي، يحبني قبل الزواج ؟ شبي جمال تخبل و هيچ گال ؟
ميعرف انو اني و هي كسرنا گلبه، و يمكن خلينا يكره جنس النساء بسببنا
.
سلام..
حدرت من الدرج
و تلگتني امي تصيح
- حدر المعرس طشو جكليت
دحگتلها و حدرت و اني افوت للمطبخ بدون ما احچي وهي لحگتني لگيت رواء تسوي عشا و امي گالت
- المفروض نسوي اهازيج و نغني لو نباركلك عن الافراج عن الحبس
انداريت عليها و گلت
- شبيچ يمه
- ما بيه شي يوليدي يا شمعة بيتي، بس گاعد نبارك الك افراجك من السجن بعد يومين
زفرت و ما جاوبتها دحگت رواء و گلت
- رواء اي شي جوعان
- يول مو گاعد احچي وياك ؟
شبيك ساجن نفسك صارلك يومين
انداريت لأمي و گلتلها
- يمه رحمه لابيچ، لعبانه نفسي من الدنيا و ما بيها
ف لا تزيدينها عليه
حچيتها و دحگت ل رواء الي طلعت ٢ كبايات من الزيت و خلتهن بماعون و ناوشتني اياهن و گالت
- هاك خويه بالعافيه
- الله يعافيچ
اخذتهن و طلعت من المطبخ و امي لحگتني و هي تگول
- يعني اظل اركض وراك ؟
فتت لغرفة الگعده و بس شافني عثمان گال بصوت عالي
- هلا والله و حيله الله يا عگيد يا ك....
- انچب
سكتو و گعدت على التخت و گمت اكل و امي گعدت بصفي و گالت
- شعجب شعتب حدرت
- حسيت وجهي صار شاحب ما شايف شمس
- سويلم
- هاي يمه
- مرتك شو ما جتي و انته حابس نفسك بالغرفة
- ما يتحمل يشوف البيت و هي ماكو
حچاها عثمان و گام يهز بحواجبو و گلتلو
- ممكن تنچب
سكت و گال ورا شويه
- اووي ميتحمل شقه صدقه
- عثمان اقسم بالله اذا ما تسكت اطلع قهري و قهر عشيرتي كلو بصفحتك ف اسكت احسن
- عثمان كافي عوف اخوك!!
صاحت بي امي و هو گام من مكانو و گال
- اروح اگابل مرتي احسن و لا هاي النفسيه
- لا هسا غصباً عنك انچب
طلع و من سمعني صحت رجع فات و گالت
- مو چثير گلت انچب ؟
اجيت اگوم بس امي لزمتني من ايدي تا اطيح حظو اني نفسيتي صايره زفت و هو يجي يضحك فوگ راسي
گعدت و اني اتنهد و افرك وجهي، صار يومين و اني ما حدرت من الغرفة كلها گاعد بيها حتى دوامي ما رحت الو كل شويه واحد متصل و انطيه رفض
اتصالات چثير اجتني، بس الاتصال الي انتظرو ما وصلني..
حسيت نفسي مضيع شي مني ادورلها بالغرفة بعيوني ماكو
گمت اخر شي اتخيلها
بالليل اتخيلها تفتح الباب و تفوت و بسمه على وجهها، التخت ما نمت عليه انام على الگاع بمكاني
اخاف تجي و تلگاني نايم بمكانها
رفعت راسي لأمي الي گالت
- يمه وليدي شبيك
صوتها چان مليان قلق و خوف اني جريت نفس و گلت
- يمه ضايج و تعبان
- علمود يُسر ؟
ما رديتلها و اني اندار ليغاد
- ولك يابه اذا علمود مرتك هسا اروح لبغداد و اجيبها سحل
ضحكت و انداريت عليها و گلتلها
- مو هي طلي تروحين تسحلينها
- لا والله هايشه و حماره
عايفه ابني صار يومين و هو العاشگ الولهان النفسيه تعبت عندو
- يمهه
- يمه خايفه عليك شبيك يول ؟
و بدون ما اجاوبها مددت و خليت راسي بحضنها
و هي گامت تمسح على شعري و تگول
- علمودها مو ؟ ولك والله ادري بيك تحبها و عاشگها
بس يا يمه شنو بينكم ؟ انته مشيت گبل لا يطلع اخوها و اجيت و هي ظلت
سلام يمه ليش تحرگ گلبي عليك ؟
- ما عاش الي يحرگ گلبچ حتلو اني
يمه ما بينه شي، بس خلافات تصير، و اني راضيتها هناك
بس هي ظلت لأن مشتاگه لاخوها خوما اغصبها تجي
- حتلو حلفت ما اصدگك يول، ولك اني اعرفك من نظراتك ليش تچذب عليها ها ؟
دحگت عليها و ابتسمت و بنبرة حاولت تكون طبيعيه گلت
- اكذب اصدگ ، نفس الشي يمه والله ماكو شي
بالايام الجايه تعرفين
- يعني اكو شي بينكم ؟
- يمه اكيد غير هي مرتي و اكيد اكو شي بينا
- استغفر الله استغفر الله
گامت تستغفر ربها و اني تعدلت بگعدتي و گلتلها
- اربعة ايام و تجي يا يمه اني گلتلها ظلي عند اخوچ
هزت راسها و تنهدت و گالت
- خوش خوش
و طلعت و قبلها شالت ماعون و گالت
- ما تاكل شي هسا ظل اصبر للعشا
تمددت على التخت و اني ادحگ للسگف
و اني اتمنى لو كلامي لأمي صحيح، انو اني گايل الها ظلي و انو اسبوع و ترجع
بعد اربعة ايام و اتصل بيها و اريد اشوف جوابها لو رفضها
و على طاري الإتصالات، اتصل ابو ياسر مرتين و ما جاوبتو و اخر شي سويتو وضع طيران تا اخلص منو
اني بيا حال و هو يتصل، يمكن يريد يعتذر لو يشوف رايي
انداريت للباب من فاتت دلال و گبل اجت عليه و بوستني من خدودي و گالت
- الله بالخير الحمد لله على السلامه
- دلال
- نشاقيك
حچتها و گعدت يمي و گالت بضحكه
- البارحه طلعوني وي الشطار برفعة العلم
- عفيه بالسبعه مالتنا
- سلام شو ما اجت يُسر ؟
تنهدت و خليت ايدي على خدها و گلت
- كم يوم و ترجع، مشتاگه لاخوها و ظلت عندو
- بس اني همين مشتاگ الها و ل حيدوري
- يرجعون و تشبعين منهم
حسيتها مثل ابرة التخدير الي، اطمن گلبي و ابتسمت و هي گامت صاحت الها دلال
ورا شويه صبن العشا و اني تعشيت وياهم و نفسيتي مفتوحه على الاكل
يمكن لان چنت اكل شويه من يدزولي بصينيه ارجعها مثل ما هي
رفعت راسي ل عمثان الي گال
- سلام ترا بس الطيور عدها اجنحه الاكل ما عندو
و حتى اعاندو اخذت كبايه و اكلت نصها و النص الثاني جبت خضروات و خليت بيها و اكلتها و اني امضغ بالگلمه و هو يدحگلي و گال
- بالعافيه اذا اظل ادحگ عليك راح تغص
- لان تعرف نفسك اطگ عيون
حچيتها ورا ما بلعت الگلمه و گلتلو
- بس اريد افتهم ماكل من لحمك حتى هيچ ضجت
گام يضحك و ضربني على كتفي و گال
- يمعود تأكدت انو نفسيتك صايره زفت من ما تحملت الشقه
دحگتلو بطارف عيني و كملت اكلي
و هو يضحك و امي تتنهد كل شويه، والله يا يمه لو تعرفين ابنچ شبي چان گعدتي گدامي و تبچين لان جرت حسرتچ و لا تنهيدتچ كافيه
.
يُسر..
چنت واگفه بالمطبخ و اني اغسل بمواعين الريوگ
اغسل بالمواعين منا و امسح دموعي الي توگع منا
موبايلي بجيبي و اني انتظر الاتصال، انتظره يدگ
يمكن حتى ارفضه او يمكن حتى اجاوبه
او يمكن اعاتبه، لأن خلى النوم يفارقني لمدة اسبوع
انام ربع ساعة و افز من نومتي
مره اشوفه و مره اشوف حيدري يعاتبني و يگلي ارحمي نفسچ
الساعة بال١٠ عدل
تأخر جمال بالگعده اليوم، من بين ادموعي ابتسمت و اني اتذكر من چنت هناك اگعد من ال٧ بال١٠ احنا حتى غدا مسويات
يا الله شگد مشتاقه لهذاك البيت، و مشتاقه الهم ل رواء و ل عمتي و رزايلها و عثمان و دلال
و اهمهم.. الي ضوگني لوعت الفراق مرة الخ
كملت غسل المواعين و طلعت التلفون و اباوعله و اني انتظر انو يدگ
و بدل لا يجيني رنه من التلفون و صلني صوت الباب يندگ
مسحت دمعتي و صحت ل جمال انو يفتح الباب و ما جاوبني
صعدت عند الدرج و صحت اله و جاني صوته انو هو بالحمام
اخذت حجابي و لبسته و شي بداخلي يتأمن انو يكون سلام، يا رب كون هيچ و افتح الباب و يكون هو..
صحت منو و اجاني صوت بنيه
استغربت من صوتها لأن اول مره اسمعه، فتحت الباب و تفاجئت من بنيه بعيون زرگ و بيضه و لابسه حجاب
تنوره سوده لجوه الركبه و قميص عسكري
- مرحبا
سلمت و اني جاوبتها ب
- اهلاً بيچ
سكتت ثواني و گالت
- بيت جمال عبدالله
- اي نعم
طولت بالاجابه و شكلها متردده
من سكتت گلتلها اني
- تفضلي
فاتت و طبگت الباب ورايه وگفت بالحديقه و اني بسمه اشرت الها على باب الكيليدور
- تفضلي عزيزتي
فاتت و رمت حذاها عند الباب گعدت على القنفه و هي گامت تباوع ل حيدر الي واگف بالعربانه و هو يروح و يرجع بيها
- ما عرفتني بالاسم الكريم
كانها فزت و باوعتلي و ثواني گالت
- ايلاف زميلة جمال
بقست اباوعلها و حسيتها توترت من امتى جمال عنده زميلات شغل " حلوات "
توترت و گالت ورا ثواني
- زوجته ؟
- اخته
زفرت و حسيتها ارتاحت انرسمت بسمه خفيفه على وجهها و گالت
- اجيت اتحمد اله بالسلامه
- الله يسلمچ هو هنا، هسا اناديه
اتجهت للباب و فتحته و هو صادفني عند الدرج و گال
- شبيچ تصيحين
ابتسمت اله و اني اقترب منه و گلت بمكر
- وحده اسمها ايلاف بالصاله، منوو ؟
شحب وجهه فجاة و شفت ايده گام يضغط عليها بقوة قبل لا يكز على اسنانه و يگول
- و فوتيها للبيت
- غير ضيف !!
دفعني عني الطريق بسرعة و فات گبل للصاله لحگته و بعدني توي خطيت العتبه ارتفع صوته و هو يصيح
- شعندچ هناا
تزامن صياحه و هي دگت الموبايل و بدون ادراك مني رفعت و انطيت رفض بدون حتى ما اقرا الاسم، الموقف هزني اول مره اشوف جمال بهذا الموقف
واگف گدامها و يصيح بعصبيه و هي گامت تبچي
كلشي ما فهمت وگفت گدامها حاجز بينه و بينها و اني اصيح
- جماال شبيك
- امشي اطلعي برا، ولچ الچ عين تجين هااا
- جمال والله اسفه
وخرني عن گدامها و اجيت اوگع لو ما لزما بالقنفه لزمها من زندها بقوه و مشى بيها ناحية باب الكيليدور و دفعها و صاح
- برا رگعة وجهج الخايسه ما اريد اشوفها
- جمال بس اشرح الك فدوه
- ما تشرحين كلشي، امشي منا، حذرتچ مره ما اكررها مرة ثانيه
من عصبيتي من جمال و اني اشوفه يهين امراة داخل بيتنا خلتني اتقدم الها و اني اسحبه من كتفه و اصرخ بي
- جمال تخبلتتت ؟
اترك البنيه شجاك ؟؟
باوعلي و حسيت عيونه راح تنفجر من العصبيه و هنّ يكتسحهن الون الاحمر
لزمني من كتفي و خلاني اندار عليها هي الي لزمت الحايط سانده نفسها عليه و تبچي
و بصوت عصبيه گال و هو يهز بيه بقوة
- الي ادافعين عنها، بااعت اخوچ و حبه الها
علمود الفلوس
.
سلام..
طلعت من شقتي و اني اطبگ الباب وراي بكل قوتي
حدرت جوه و اخذت سيارتي و طلعت لوجهتي الجديده
تأملت و تأملت و بالاخر يطلع كله كذب، اني الي تخيلت انها راح تجاوب
و بالاخير ترفضني من ثاني رنه ؟؟
بس والله العظيم لأحرگ گلبچ يا يُسر مثل ما حرگتي گلبي، اني سلام الي ضحيت علمودها هواي
نزلت كرامتي علمودها، كذبت على اهلي علمودها
صبرت و صبرت و بالاخر ترفض اتصالي و تنهي كل الي بينا
نص ساعة تقريباً و طبگت سيارتي گدام فيلا ابو ياسر
ادحگ لأيدي الي ترجف من عصبيتي، انتي رفضتيني صح يا يُسر بس اموت وراچ ؟ لا محد مات ورا احد چان انتي متي ورا حيدر
و محد يموت بسبب فراق احد، چان اني متت من زمان
حدرت و دگيت الباب، انتي قررتي تبنين حياتچ بعيداً عني و اني كذلك، اعرف راح اندم على هذا القرار عاجلاً ام اجلاً بس ما بيدي غير هالشي
طلعلي الشاب الي چان بالمحل سلمت عليه و سألت عن والده و گال موجود
بالتأكيد موجود ف اليوم جمعة، شويه طلع و هو يرحب بيه سلمت عليه و لمحاتها واگفه بشباك المطبخ تبتسم
فتنا للصاله و گعدت و ضيفوني، و بعد السؤال عن الحال
گلت افوت بالموضوع بلا اخذ و عطا مثل ما هو سوه هيچ
تحممت و گلت و اني احس گلبي تخف نبضاتو مع كل حرف انطقو
- عمي اني بصراحه جايك بطلب
- غالي و الطلب رخيص
ابتسمت بمجامله و شبكت ايديه
رفعت راسي اله و اجيت احچي بس تلفوني دگ
طلعتو و لگيتو رقم امي گال ابو ياسر
- جاوب ابني
- لا مو هسا
انطيتو رفض و اني اخليه گدامي على الطاوله
نزلت راسي و اني اهز برجلي بتوتر، احچي سلام انته ذبيت نص الحچي و سكتت ؟؟
بللت شفتي و گلبي احسو گام ما يدگ اصلاً
يا رب اني اعرف گاعد أذي نفسي بهاي الفعله بس تعبت
- عمي اني جاي اطلب ايد بنتك جنه
توسعت ابتسامتو و هز راسو باي و تلفوني رجع دگ
و هو گال
- رد على الاتصال بالاول
هزيت راسي و ما عارضت سحبت الموبايل و رديت على امي
چنت اتوقع صوت امي راح يوصلني، بس الي وصلني صوت دلال و هي تبچي بكاء حاد
گلبي حرفياً وگع و اني احس اكو مصيبه جايه على الطريق
عيوني غوشت و جفوني ثقلت و حتى ايدي گمت اگدر اسيطر عليها بعد ما سمعت صوتها ل دلال
وگع الموبايل من ايدي على الگاع و ظليت بمكاني متصنم شفت ابو ياسر يهز بيه و يحچي وياي بس ما افتهم عليه
ما چنت اسمع صوته
انما صوت دلال و هي تردد
- عثمان راح يموت
.
السلام عليكم🌹❤
شلونكم ان شاء الله الكل بخير
اتمنى البارت عجبكم ☻☻
و اني متأكده عجبكم و خصوصاً يُسر حبيتوها كلش مو ☻💔
شنو رائيكم و توقعاتكم
اني هسا بعدني مصدومه بالقفله، ف انتوا الله يعينكم صراحه 🌚💔☻
و بس والله
( اذا كملت قرا ، فضلاً قراءة سورة الفاتحه على ارواح الشهداء 🙏💔 )