#أمانة حيدر
#بقلم:الراويه
#البارت"٢١"
بسم الله 🌹..
.
سلام..
چنت راجع للبيت وكت الظهر امشي بالسيارة و انتبهت ل رائد و دلال، طبگت السيارة و شفتو دفعها و فوتها للبيت
ضجت من حركتو و باي حق يدفعها هيچ ، حدرت من سيارتي و هو من انتبهلي دحگ عليه و توتر
تقربت عليه و گلت
- شكو ؟
- ماكو شي
- ليش دفعتها و فوتتها للبيت
هو سكت و خلى ايديه بجيوبو عگدت حاجبي و تقدمت عليه و گات بصوت ناصي
- احچي رائد ! شبيها دلال
- والله ماكو شي
- لا تحلف، شفتك بعيني من دفعتها شصاير ؟
تنهد و گال بهدوء
- گلتلها ليش ما لابسه حجاب و گامت تحچي و فوتتها
ظليت ادحگ عليه ثواني و هو گام يبعثر نظراته بس حتى ما يدحگ عليه
- هي تقنع و تلبسو ما اريد اجبرها
- بس سلام هي چبيره !
- شكبرها؟ توي فاتت ال١٣
زفر و شكلو عصب من حچايتي، اي مفروض عليها الحجاب بس هي ما مقتنعه بي، مره امي گالت الها و رفضت و گامت تبچي و گالت اني البسو
اريدعدها تتحجب اي بس ما اريد افرضو عليها، لأن تبدي تكرهو مو كلشي بالغصب
- ١٣ سنه يعني مفروض عليها الحجاب، سلام اني خفت عليها و گلت البسي بس هيه عنوديه
- رائد !
گام يزفر و رجع خطوة ليورا و گال
- دلال صارت چبيره و عيب ما تتحجب و الناس ادحگ
- و الله عاد الناس ما تسد عيونها ؟ ليش ادحگ
- سلام يعني ما تغار عليها ؟
- رائد شهل الحچي ؟ يعني برائيك ما اغار عليها ؟ بس شبيدي عليها اذا هي رافضه
- اذا رافضه غصباً عنها خليها تتحجب هي حلوه و الشباب ادحگ ما عدهم صغيره لو چبيره
تقدمت عليه و گلت
- من الاخر شتريد ؟ احجبها غصباً عنها و امنعها من طلعة البيت والله شنو ؟ انته ما ترضى
- سلام ليش ما تفهمني
- هو انته تخلي احد يفهمك ؟ گول من الاخير
سكتت لحظات و نزل راسه للگاع، زفرت و اجيت افوت بس هو گال بصوت ناصي خلاني افتح عيوني بصدمه و اندار عليه
- من الاخير اني احب دلال
ضحكت بسخرية حسبالي يستهزئ لو يضحك عليه
بس من شفت الجديه على ملامح وجهه عرفت انو ما يشاقه
تقدمت عليه و گلت
- شنو عيد ما سمعت ؟
- اي سلام اني احبها ل دلال، و اغار عليها و اريدها تتحجب
هزيت راسي باي و حسيت الدم صعد لراسي، حاولت اكتم عصبيتي بس ما گدرت طول عمري اعتبر رائد اخويه و اخونا كلنا و هسا بكل صلافة يگول احب دلال
دلال ؟ الي عمرها ١٣ سنه و حماره كلشي ما تفهم يحبها
سحبتو من ياخة قمصيو و گلت بعصبيه
- من كل عقلك ؟؟
- سلام گتلك احبها
ضربتو على وجهو براشدي بس ما تحرك من مكانو دحگت شفت طلاب گامت تحل من المدارس، اسمع صوت دلال تبچي و تصيح، ما لگيت غير انو ادفعو للبيت و هجمت عليه ضربتو ضربتين و هو ما ردهن الي و اني اصيح بي
حسبت بيدين اثنين تبعدني عنو دحگت لگيتها امي و هي تصيح علمود اعوفو
ما افتهمت نص كلامها لأن صرت عصبي
و كلشي گمت ما اسمع دحگت عليه وجهو صار احمر و خشمو طگ دم
سحبتني امي عنو مرة الخ و راحت عليه و هي توگف بي، دحگت ل يُسر الي لازمتني من ايدي و تحچي
- شبيك سلام تخبلت
من حچت هيچ كزيت على اسناني و دفعتها عني اجت توگع بس لزمتها رواء
وخرت امي و رجعت ل رائد لزمتو من ياخة قميصو و صحت بي
- بس اريد افتهم شهل العين الصلفه عندك ؟ تحب زعطوطه و خال عينك عليها
شهگت امي و ضربت على صدرها، و دلال واگف يم باب المطبخ تبچي من شافتني ادحگ عليها طبت و سدت الباب و هي ادحگلنا من ورا جام الشباك
- اعتبرها وقاحه صلافه الي تعتبرو، اني احبها ل دلال و ما اچذب
رگعتو ابوكس على خشمو و لزگتو بالگاع نزلت عليه و اجيت اضرب مره ثانيه بس امي وخرتني و لزمتني من اكتافي و تصيح
- ولك كاافي سويلم عوفو راح تموتو
- يمه انتي تسمعينو شنو گال ؟ ولچ يحبها يحب زعطوطه و اني الغشيم واثق منو و مفوتو للبيت
- انچب كافي، ولك شويه احترم شيباتي و لا تصيح بوجهي
- يمه
- و وجع بگلب العدو، كافي يا امي انته
اندارت ل يُسر و گالت
- شو اخذيه من هين
تقدمت يُسر و اني نترت بيها بعصبيه
- وخري انتي الثانيه لا تجين صوبي
انداريت ل رائد الي وگفتو امي و هو گام يمسح بخشمو
مو اعتبرك اخ و اكثر هيچ جزاتنا ؟ هو من شافني ادحگ عليه نزل راسو يمكن استحى على سالفتو
شنو يحبها ل دلال ؟ ما لگه غيرها ؟ جاهل بعدها تصرفات ما تعرف تتصرف
- اسمع رائد تطلع من هين و تشوفني عرض اكتافك، و هذا البيت بعد ما طبو افتهمت
- لا ما افتهم ! البيت مو بيتك حتى تطرد بكيفك
رائد يظل يفوت ل هذا البيت و غصباً عنك
حچتها امي بنتر دحگتلها و هزيت راسي و گلت
- خوش يمه
و عفتهم و طبيت جوه
صعدت للغرفتي و سديت الباب گعدت على التخت و اني اضغط على ايديه بقوة
يا رب صبرني والله شغله ما تفوت للعقل ! غمضت عيوني و اني اسند راسي على أيدي
سمعت صوت الباب ينفتح شفت رجليها عرفتها يُسر و بدون ما اتحرك گلت برود
- اذا تريدين تحچين و تغثيني ف رجاءاً اسكتي نفسي ما متحملها
ما جاوبتني بس حسيتها گعدت بسدي، ما حچت و لا اني حچيت
ظليت ساكت و اني ازفر بعصبيه اخر شي طلعت باكيت الجگاير و گمت ادخن و هي على گعدتها بسدي حسيتها تمثال و بس ادحگ عليه
يمكن مرت ربع ساعة و احنا على هذا الوضع، شويه هدأت و بردت اعصابي انداريت عليها من گالت
- ها ؟
- شنو ها ؟
- هدأت
هزيت راسي ب اي و رجعت لمكاني تنهدت و گلت
- وين وله ؟
- راح
- و دلال
انداريت عليها من گالت بهدوء
- چانت تبچي خايفه
- من شنو خايفه
سكتت لحظات قبل لا تزفر و تگول
- خايفه منك
ضحكت باستهزاء و گلت
- اشايفتني بعبع تخاف مني
- انته ما شفت نفسك شلون هجمت على رائد ف هيچ تگول، اني بطولي خفت منك و من عصبيتك
ابتسمت و اني اهز براسي هيچ و خافت مني عجل لو شافتني من كتلك ياسر لو ابو وائل و الاخير ابو نبراس
- البنيه ترجف من الخوف حسبالها راح تضربها
تبچي و تگول والله ما عليه هو دفعني
- هي حچتلچ ؟
هزت راسها ب اي و تنهدت و گالت
- اي حچتلنا
- اي شگالت
- انته روح اسألها
رفعت حاجبي و گلت
- شحچت يُسر ؟
- ما عليه اني، روح اسألها و هي تجاوبك
دحگتلها و هزيت راسي و گلت
- خوش يُسر خوش
- سلام دلال طفله بعدها و اني اگلك مو فاهمه الي ديصير، لا تعصب عليها ل شي هي ما الها دخل بي
- ترا افتهم شنو شايفتني همجي اروح اضربها ل شي هي ما مسويتو !
- هسا لا تصيح ترا اسمع
حچتها و هي تبعتد ضحكت على ملامحها و هي ترجع تحچي
- عبالك طرشه ترا اسمع والله
- اهووو عاد شجاج
سكتت و هي تكتف ايديها گدام صدرها، اني تنهدت و گلت بهدوء
- اني ما معصب منها انما من رائد
شلون هيچ يحبها
- يعني تتوقع بايده هذا الشي ؟ اكيد لا ف ليش تلومه
- يُسر هو وين و دلال وين ؟ هو راح يطب ال٢٢ و هي توي ب١٣ سنه، و فوگاها جاهل
- سلام
حچتها و التفتت عليها و هي گالت بنبرة خافته
- هاي مو حجه اقصد العمر
انته مو رافض انو اكبر منها لو هو ابن عمك و باوع لاختك لأن تصير هواي ابن العم يحب بنت عمه، انته رافض الموضوع و اعتراف رائد لغير شي مو ؟
سكتت اني و ظليت ادحگلها يمكن صح كلامها
العمر مو مشكله بس هي بعدها ما تفتهم شنو حب و شنو مشاعر
- يُسر بربچ دلال مالت حب بهالعمر
- اكيد لا
- عجل لا تلوميني اني ما اريد اختي تنجرف ورا هالشي، هي من سمعت اعتراف رائد حتلو ما افتهمت شنو يقصد بي بس راح يظل مطبوع بذهنها
- و الحل ؟ تگدر تغير مشاعر رائد ناحيتها ؟ لا
سلام الموضوع انته كبرته
الولد حاله حال هواي گالوا نحب بنت عمنا، يمكن هو كم شهر و ينساها يجوز هو تعلق بيها لأن انته تشوفهم هواي يتناگرون و هو حسباله حبها خلاص
- يعني تعتقدين ينساها
- ان شاء الله، هو شاب و من راح يشوف ماكو تبادل بالمشاعر و من يصفن و يشوف نفسه حاب شخص بعيد عن الحب اكيد راح يگول اني شنو الي جابرني
و يحاول ينساها
سكتت و ما حچيت رغم كلام يُسر صحيح بس بعدني مو راضي، اصلاً رائد غلط من حچه المفروض يظل ساكت بس هو السانو ما يگدرلو
رفعت راسي الها من گامت على حيلها و گالت
- گوم احچي وياها ترا خايفه هسا منك
- اريد انام من اگعد أراضيها
- ما تتغدا
- تؤ
تنهدت و طلعت سدت الباب وراه، و اني نزعت حذائي و مددت على التخت
ظليت ادحگ للسگف و افكر بالي صار، رائد غلطان من حب دلال بس مو بيده
بس بيده يگدر يحاول انو ينساها، خلي يشوف ابن عمه و يتعض
و اني ليش الومه و اني سويت نفسه؟ مو همين حبيتها ل يُسر و هي بعدها ١٥ سنه
اي صح واعيه و تفهم، بس شنو صار ؟ تعلقت بيها بالزايد و اكثر و محد طاح حظو غيري
نمت يمكن نص ساعة گعدت و توضيت و صليت الظهر
نزلت جوه لگيت يُسر و رواء بالمطبخ سألتهن عن دلال و گالن بغرفة عمتي
دحگت لغرفة الگعده لگيت امي گاعده بيها، تنهدت و فتت لغرفة امي
چانت متمدده على صفحتها على التخت و الكتاب گدامها
من شافتني گبل فزت من مكانها شفت بعيونها شگد خايفه مني، ابتسمت الها و هي صنمت بمكانها
گعدت يمها و اخذت كتابها و گلت
- شگد چنت اكره الانگليزي، و استاذ عباس يلزمني دگ على راسي و من اسأله ليش تضربني بي ؟ يگول حتى تفوت الجمل براسك
گامت تضحك و هي تخلي ايديها على وجهها، ابتسمتلها و اخذتها لحظني، و صار ضحكها بچي، و هي تحظني اكثر
بستها من راسها و گلت
- گالوا خايفه مني
- سلام والله ما عليه اني
- اعرف دلول انتي ما عليچ، زين انتي عليش خايفه مني ؟ تخافين اضربچ
هزت راسها ب نعم، وخرتها و حاوطت وجهها بيديه اثنين و گلت
- انتي تعرفين ما يهون عليه اصيح عليچ شلون اضربچ
- مو انته عصبت و ضربت رائد
- بس ما عصبت عليچ
نزلت راسها و گامت تمسح بدموعها
- دلال اني ضجت من رائد مو منچ
بس هسا اريد منچ تحچيلي ليش دفعچ ؟
سكتت و هي اطگطگ باصابعها
- دلال
- هو لگاني عند الباب و گال ليش مو لابسه حجاب و گتلو ما اريد و رجع گال البسي من تطلعين و دفعتو و گلتلو انته مو اخويه حتى تحاسبي، و دفعني هو حتى افوت للبيت
سكتت لحظات و رجعت گالت بهدوء
- و انته جيت
جريت حسرة و هزيت راسي ب اي، نفس كلامه يعني صدگ علمود الحجاب
دحگت ل دلال الي ادحگلي منتظره كلامي، گوه ابتسمت الها و بستها من راسها و گلت
- رائد ضوجني، بس المفروض ما تدفعينو
- مو هو يظل يحچي عليه من يشوفني بالطريق، عدلي مشيتچ لا تضحكين بصوت عالي، و ذاك اليوم يگول بعد لا تروحين للمحلات الي يم الشارع
و هسا اخر شي يگول البسي حجاب، هذا شعليه بيه ؟؟
ابتسمتلها و اني اشوفها ضايجه من رائد، لو غيرچ و مو بهذا العمر چان فرحت على هذا الكلام الي يسمونه " غيره "
- هسا انسي سالفة رائد و اگعدي اقري
- بس سلام انته ضربتو، هسا عمي خليل يزعل
- اني اروح و ابوس راسو و اخليه يرضى
ابتسملتي و اني عفتها و طلعت رحت لامي لگيتها ادحگلي بعصبيه
گعدت بصفها و بستها من راسها
- خوما حچيت على اختك
- يمه سويلم على گولتچ يگدر لو يهون عليه گلبو يحچي على دلوله ؟
ضحكت و هي تحرك بشعري بفوضويه و گالت
- يمه من اروح فدوه لوليدي الحنين
سحبت ايدها و بستها و اني اگول
- غير انتي حنينه و طلعنا عليچ
دحگت للباب لگيت يُسر واگفه عندو و هي تبتسم
و ادحگلنا، خليت راسي بحظن امي و گامت تمسح على شعري و غمضت عيوني و اني اسمعها تقرا المعوذات على راسي بصوت يا دوب ينسمع
فتحت عيوني من گالت يُسر
- اصبلك غدا
- علواه شو جعت
- من الصياح غير
حچتها امي بضحكه طلعت يُسر و اني ظليت ادحگ لمكانها شگد احبها و شگد احب اهتمامها الي يجي فجاة
.
يُسر..
دخلت للمطبخ و حضرت اله الغدا و روحت خليته گدامه
هو تعدل بگعدته و گام يتغدا
شويع و دخلت دلال و هي شايله الكتاب بيدها گعدت بصف سلام و گالت
- سلام هاي القطعه ما گاعد اعرف اقراها
باوعلها بتك حاجب و گال
- دلوله تعرفيني اني و الانگليزي مو اصدقاء
بس لخاطرچ جيبي اقراها الچ بس بالاول اكمل الغدا
هي بقت تنتظره يكمل و اني اباوعلهم و بسمه على وجهي، الي يشوفه هسا ما يگول الي چان يريد يموت واحد من الضرب
هادئ و مبتسم و الاهم مسالم
كمل اكل و گمت شلت الصينيه و صبيت اله چاي
انطيته اله و رجعت غسلتهن
و هو گعد يشرح ل دلال و هي تسمع اله باصغاء
عمتي سحبت مخده و نامت
و اني بقيت گاعده وياهم حيدر نايم على التخت و الغرفة دافيه و الدنيا گامت تمطر
من كمل شرح سد الكتاب و هي گالت بضحكه
- ولك يابه والله تشرح احسن من المعلمه الي ما تعرف غير كوود مورنغ
- عجل غير اني سلام مكاني مو هنا مكاني بالسفارة الامريكيه
گامت تضحك عليه و هو يبتسملها باوعلي و اني بادلته الابتسامه، شو هذا تعدل بمكانه و گال
- و ها للعلم ترا اعرف احچي تركي
- والله ؟
حچتها دلال باندهاش و هو هز راسه و گال
- ايي طبعاً
اني صدگت گلت يمكن صحيح يعرف او متعلم على النت او اي شي
- عجل احچي بله
- ولك شو في شو في ليش بصلتك محروه
هاي لهجة انقرة و هاي لهجة اسطنبول، معلم شو بدنا نعمل هلأ ؟ نهجم ميماتي شبك !!
گمت اضحك بصوت عالي و اني اخلي ايدي على حلگي حتى اسكت، دلال تباوعلي باستغراب و جتى ابتسامه ما ابتسمت و سلام يباوعلي نفس نظراتها
مادري شبيه بس گمت اضحك من كل گلبي، عمتي گعدت على ضحكتي و هي تباوعلي و حواجبها عاگدتهن
عيوني دمعت من الضحك، والله اكتشفت انو اني انسانه تافه شي ما يضحك ليش اضحك عليه
اخر شي شهگت الهوا من گد ما ضحكت و ضربتني دلال على ظهري و هي تگول
- شجاج يمعوده
گوه سكتت و اني امسح دموعي الي نزلت، عمتي انطتني نظرة اللهم ثبت العقل و الدين و رجعت مددت
گمت و اني مستحيه من نظرات سلام و دلال الي بس يباوعلولي
بس طلعت من الغرفة رجعت اضحك بس بصوت ناصي التفتت ل سلام الي طلع و هو يگول
- خرب شگد فطيره
- اني ؟
- لا دلال
رفع تك حاجب و ضحك و اني عرفت يقصدني، خزرته و مشيت اريد اصعد فوگ و اني ادردم لأن هو الي ضحكني و هسا يگول فطيره
من العصبيه مشفت الزوليه الي عند الدرجه تعثرت بيها و اجيت اوگع بس باخر لحظه لزمت الدرج و هو گام يضحك و يگول
- زائد ثوله
التفتت عليه و اني ارفع حاجبي باعتراض و هو گام يضحك و رجع للغرفة
زفرت و اني اصعد الدرجات و بسمه خفيفه انرسمت على وجهي و اني اتذكر كلامه
بالليل خليت حيدر بمكانه و هو نايم بسته من راسه و التفتت للباب من فات سلام
گعد على التخت و اني غطيت حيدر و شغلت الصوبه لأن الجو برد
التفتت عليه من گال بهدوء
- يُسر
- همم
- اني اسف لأن صحت عليچ من چنا برا
باوعتله و اني ابتسم على خفيف، ما نسى ؟ و اني اصلاً و لا درت بال صح بالاول انزعجت بس هو چان عصبي و ما شايف شي گدامه
- خوما زعلتي
- تؤ
ابتسم من جاوبته هذا الجواب البسيط و رجع گال
حتى يتأكد
- يعني انام مرتاح الضمير ؟
هزيت راسي باي و اني ابتسم
- نام اني مو زعلانه لأن انته چنت عصبي كُلش
و اكيد ما تقصد
- يعني مرة الخ من اعصب لا تجين يمي، يمكن اضربچ لو اكفخچ براشدي
- و اطير سنوني لو تسوي تشوه بخشمي
- عاد تلگينها حجه حتى تسوين عملية تجميل و تصغرينو
لزمت خشمي و گلت
- لا مو لهاي الدرجه خشمي مو چبير
- غير انتي ما شايفتو محتل نص وجهج
رحت عند المرايه و گمت اباوع لوجهي و الله خشمي صغير، شفته المرايه تقدم و صار قريب مني
الا ان وگف ورايه و هو يضحك عليه، بلعت ريگي و التفتت حتى اوخر و اني اگول
- غيران من خشمي لأن صغير و تقلد
ما حچه بس يبتسم و اجيت اوخر بس هو خلى ايدي على المرايه منا و منا، توترت و اني و اشوفه يبتسم و هو مركز بوجهي
- ممكن شويه اريد اوخر
ما جاوبني بس تقرب شويه و اني حسيت گلبي طلع من مكانه، نزلت راسي و اني احس نفسي گام يعلى
قربه مني خلاني اتوتر و اني ضاغطه على ايديه بقوة حسيت اضفري نبت بكف ايدي
- سلام وخر
گوه گدرت انطق و هو وخر ؟ لا تقدم الا ان ما يفلصنا شي چنت اقصر منه و اوصل لحد كتفه بشويه، طارف انفي طخ بصدره و هو بعده على حاله
- سلام
- ها
- وخر
سمعت تنهيدته و گلت هسا يوخر بس تيبست بمكاني
من انحنى لمستوايه سديت عيوني و حسيت بمعدتي توجعني شگد ما توترت
حسيت ايده يخليها على خدي، بلحظتها يمكن نسيت اني وين و هو شنو
كفه مستقر على خدي بترافه، گلت هسا اوگع لأن احس جسمي كله استرخه حسيت بانفاسه تلفح وجهي و هو يتقرب اكثر لحظه اجيت اسند نفسي عليه لأن ما بقت عندي طاقة اوگف
اجاني صوته ورا ثواني من الصمت المطبق بنبرة خافته
- گاعد اشاقيچ، انتي بكلشي حلوه
ما فتحت عيوني، لأن حسيت نفسي راح اخرب بين ايديه و كلامه خلى گلبي يدگ على السريع
بقى يمشي بيده لعيوني و هو يحچي بنفس النبرة
- عيونچ حلوات حيل احبهن
فتحت عيوني على كيفي، باوعتله چان يباوعلي و بسمه خفيفه سند جبينه على جبيني، حسيت بدگات گلبه علت اكثر و كأنه فقد السيطرة عليه
چان يباوع بعيوني و اني هماتين، اول مره من زواجنا احس نفسي مو ضايجه منه او من كلامه
غزل صريح رماه گدامي و ما عصبت، و اني الي چنت كلمة " شلونچ " تستفزني
- يُسر
همس بيها و ما جاوبته
حسيت ايده على شفتي و هو يگول بصوت خافت
- تحسين بالنار الي بگلبي مو ؟
شفت بعيونه نظرة تساؤل، احس ؟ والله حاسه بيك
و حاسه بگلبك
ما گدرت احچي غير هزيت راسي ب اي، و هو تنهد و گال بنفس تبرة الصوت
- عجل ليش ما اطفينها ؟
يولي والله اموت باليوم الف موته
- شنو بيدي ؟ شنو اگدر اسوي
نطقتها بصوت ناصي و اني انزل راسي و هو خلى ايده جوه حنچي و گال و عيونه بعيوني
- بس ابقي هين، كلشي ما اريد
غمضت عيوني و نزلت دموعي فزيت من قربني اله و باسني من خدي بالتحديد جوه عيني وخر ورا ثواني قليله حسيت بشعور غريب
شعور اول مره احسه ' هنا ' بهذا البيت و بهاي الغرفة
شعور اگدر اوصفه ب الحلو شي ب قلبي انتفض فجاة سلام يمكن گدر يغير بيه شي
شيء چنت و ما زلت ما اريده
- هاي الدموع ما اريد اشوفها، لأن والله غاليات
فجاة طفت الكهرباء و صارت الدنيا ظلمه هندس فكرت بيني و بين نفسي، يُسر وخري عنه راح تمشين للتهلكه لو لشي مجهول
- دحگي حتى الكهرباء تأيدني الراي
حچاها بسمه و اني بقيت اباوع لوجه الي يا دوب المحه، و بدون تردد منه حسيت بيديه اطاوق خصري باحكام هنا عرفت لازم ابتعد
لأن حسيت نفسي اذا ابقى دقيقه بعد افقد السيطرة على گلبي و عيوني الي تعلقت بوجهه
- طفت الكهرباء راح تصير بارده
- سلام وخر
ضحك ضحكه بسيطه و تقرب اكثر الا ان لامس طارف انفه انفي، غمضت عيوني من تقرب لشفتي
يمكن صرت جبانه او حابه هذا الشعور، و شي بداخلي يگلي ابدأي يُسر حياتچ، ابتداً من هاي اللحظه
بس الي اعرفه ان كنت رايده هالشعور او لا.. ف اني ما بقت عندي سلطة على قلبي و نفسي الي ضعفت بين ايديه
حسيت بنفسه قريب عليه لدرجه ما صار يفصلنا غير شعرايه وحده غمضت عيوني و اني اسمع همسه
- يُسر هذيچ الكلمه الي يگولوها الي يحبون بعض، اني صعبة احچياها
- يمه سويلم شو تعال القوة طفت
زفرت براحه من وصلني صوت عمتي فز سلام بس بقى بمكانه حسيت بي راح ينفجر و يگوم يصيح، كز على أسنانه و گال
- هااا يمه
- القوة طفت، و المحوله طگت
- من دنعل ابو القوة و المحوله و حتى وزير الكهرباء
حچاها و وخر عني و اني تنفست الصعداء گبل وخرت عنه و رحت لفراشي حسيته بقى واگف بمكانه، ابتسمت و اني اشكر ربي انو دزلي عمتي بهاي اللحظه
- تصبحين على خير، چان گلتي نعسانه اخاف طولنا عليچ بالتعليله
خليت ايدي على حلگي و اني اكتم ضحكتي سمعته يستغفر ربه و يطلع و هو يصيح
- ها ها الناس تريد تنخمد و هي ادور كهرباء
- ما تنام احد لازمك ؟ لو عندك شغل
عضيت شفتي و اني اسمع جواب عمتي، خرب بحظي ما عدها شي ما ينحچي، غطيت حتى راسي و بسمتي الي چانت مرسومه راحت
خليت ايدي على گلبي الي لحد هسا يدگ بقوة و اني اتذكر كلامه و قربه مني
- كافي يُسر اهدأي، شبيچ هيچ گبل ضعفتي گدامه ؟ ترا مدا اعرفچ !! هلگد تتأثرين من قربه و من كلمته
ظليت اعاتب نفسي لان ضعفت بلحظه و بعد محاولات هواي گدرت اغمض عيوني و انام بس كل شويه افتحهن من ينرسم طيفه گدامي
نمت و هو بعده مو جاي و الكهرباء بعدها طافيه تغطيت زين بس بالاول شفت حيدر و غطيته لأن موخر الغطا عن نفسه
الصبح چان نفس الروتين الي يومياً نصبح عليه، طبيت للمطبخ و گعدت و اني اباوع لنار الطباخ الي جوه الجدر
تفكيري تلقائياً راح ل سلام و موقف البارحه، اني لو ادري بالموضوع راح يطور هيچ چان ما وافقت عليه اصلاً و لا اخلي بنفسي بهيچ موقف، و لا اخليه هو
شنو ذنبه ؟ حب وحده و تركته و هسا اني ؟ و هسا عنده مشاعر اتجاهي الي يمكن ما اگدر او بالاحرى نو يمكن اكيد ما اگدر ابادلهن اياها
زفرت و اني اسند راسي على الميز، شنو چان صار لو رايحه لبيت عمي !
هه اني من كل عقلي احچي ؟ بيت عمي الي اصلاً ما رفعوا تلفون عليه لحد هسا ؟ مره وحده عمي رايح ل جمال و سأل عنه و رحمه والديه تذكره
بس اني شنو ؟ لا متزوجه ما عليها شي، شگد تمنيت و احنا بالشقه يجي عمي و يگول امشي بنتي بيتي بيتچ لحد ما يطلع جمال
التفتت ل رواء الي وگفه يم راسي و هي تگول
- يُسر الو وين وصلتي؟
- هنا هنا
- لا مبين هين، صارلي ساعة اسألچ و ما تجاوبين
تعدلت بگعدتي و گلت
- على شنو تسأليني ؟
- اگول شبيچ صافنه
باوعتلها و هي ابتسمت و سحبت كرسي و گعدت بصفي
- ولچ شبيچ شو صاير تصفنين چثير
- مادري ما منتبهه ل نفسي
- يُسر اني خيتچ گوليلي شبيچ فضفضيلي
هسا اني مو افضفض الچ ؟
لزمت ايدها و گلتلها بسمه
- لو بيه شي چان اجيت و حچيت الچ بس ماكو
يا ريت اگدر احچيلها، يا ريت..احچيلها عن وجع گلبي لو القهر الي بيه علمود جمال
لو التفكير الي ياكل راسي كل ما اباوع ل سلام.
- براحتچ يسوره ما اضغط عليچ، بس اني اعرف بيچ شي و كاتمه بگلبچ حچي
- ماكو شخص ما كاتم بگلبه
- بس لازم يحچيه مو ؟ لأن ياذيه
- بس تبقى بلگب احسن مو
- همين صح
حچتعا و تنهد و ظلت تباوعلي، ابتسمتلها و گلتلها
- گومي شوفي جدريتچ
- هو احنا شعدنا غير شيلي الجدريه نزلي الجدريه
بالليل واگفه عند الطباخ انتظر الچاي يخدر، التفتت ل سلام الي فات و هو يگول
- وين الچاي ؟
- لحظات و يكمل
هو بقى واگف ينتظرني اكمل يباوعلي و يبتسم، الابتسامه الي ما فارقت وجهه من اجا من الدوام كانو يذكرني بالي صار البارحه بس اني اتجاهل الموضوع لأن ما اريد اخوض بي
طفيت النار و اتجهت للستكانات و هو لحگني و گال
- وحده لا تحطين بيها شكر ل عمي خليل
هزيت راسي ب اي و گمت اصب
خليل ابو رائد اجا قبل شويه و لحد هسا ما اعرف فتح موضوع رائد و الي صار لو لا ؟ بس مو وحده وياهم عمهم احمد الي اول مره اشوفه يجي عليهم هو و ابنه الي سمعت سلام يگول عليه " الميدالية " ما افتهمت شنو يقصد بس وضحتلي رواء انو وين ميروح ابوه هو وياه
انطيته الصينيه و گلت بفضول
- جايين علمود السالفه ؟
- يا سالفه ؟
- مالت البارحه
شو هو ابتسم بمكر و تقرب و گال
- هنّ سالفتين اي وحده بالضبط
تنهدت و كتفت ايديه و اني افهم شيقصد، والله صوجي اني ليش اسأل ؟ و اني اعرف راح يفرها عليه
- الچاي برد
گام يضحك و طلع و اني عصبت هيچ فجاة يمكن طگت فيوزاتي، سحبت الكرسي و گعدت عليه و اني اسمعهم يسولفون بصوت عالي و يرجعون يضحكون
شبيهم ميگدرون الا يحچون هيچ ؟
گمت و رحت لغرفة الگعده يم عمتي، لگيتها مخليه حيدر بحظنها و هي تلاعب بي گعدت بصفها و اني اباوع لحيدر الي يضحكلها و بسمه على وجهي
و الله يا ابني مادري شلون راح تتعود على فراقهم ؟ هماتين راح تشتاق الهم و يمكن تبچ دي ادور الهم ؟
بقينا گاعدين وي عمتي اني و رواء الي جاب سلام صينية الچاي و راحت جددتها
بال١٠ و نص تقريباً راحوا اخذت حيدر و صعدنا فوگ بس بالاول سلام صعد
من فتت لگيته عند باب الكنتور و هو يطلع بملفات من الدرج طلعهن و خلاهن على الگاع و گام يقرا بيهن و حواجبه معگوده
نومت حيدر على التخت گلت اليوم اخلي ينام بصفي و هو يحوص يريد يروح للتخت مالته
گوه نومته و غطيته و التفتت ل سلام الي لم الاوراق و گام اخذ تلفونه و طلع
اظليت اباوع كل شويه للباب انتظره يفوت و ماكو اخر شي أجيت انام گمت حتى انزل اله فراشه و اني امد بي شفت مفتاح صغير شكله واگع من واحد من الملفات بقيت اباوعله شكله مو مال باب او حتى باب كنتور
باوعت للباب الغرفة و رجعت لباب الكنتور الوسطاني فتحته و اني اتذكر الصندق يمكن اله !
دنگت و باوعت للمفتاح و للقفل والله يرهم اله شكله
بس گلت مو هسا اتركها غير مره
خليت المفتاح بالمجر حتى اگدر الگاها بسهوله
رجعت مددت بمكاني و اني اباوع للباب بربج يُسر شبيچ ؟ هلگد صايره فضوليه ؟
بس والله احس اكو بالصندوق هذا والا ليش هيچ ظامه و مخليه وحده و مفتاحه وحده ؟
شويه و دخل و هو شكله مزعوج تمدد بفراشه و باوعتله شلون يهز رجله
عبالك متوتر لو عنده سالفه براسه
گمت طفيت الضو و نمت و حتى تصبح على خير الي يوميه يگولها الي ما گالها.
.
سلام..
من هين و رايح راح اسمي امي " قاطعة الارزاق "
ما اجت الا بالدقيقة البدل ضائع
چانت اقرب من روحي بهذيچ اللحظه، گلت ها سلام راح تفطر ورا صيام طويل
بس اجت و خربت الاول و الاخر، و يُسر همين لگتها فرصه انهزمت و سوت نفسها تريد تنام
كملنا المحوله تصليح فوگ الساعة اني و عثمان و شباب المنطقه و الي ما عرفت الا على حظي تعطل
گلت ميخالف سلام اليوم ما هجمت و لا عصبت يعني تقبلتك و مثل ما يگولون العافيه درجات
بالليل من اجا عمي خليل گلت يمكن علمود سالفة رائد الي استغربت ما فتح موضوعو يمكن رائد على سواد وجهو ما حاچي
بس الي استغربتو اكثر جيت عمي احمد و ابنو يزن
الي بلحظه اجيت اگوم اكفخو براشدي لو اكسرلو خشمو هذا الي رافعو مادري على شنو
گاعد و هو عاگد حواجبو و الوضع مو عاجبو، و حتى چاي ما شرب يريد گهوه تركيه
هو انته شكلك مال گهوه ؟ شكلك مال شربت برتقال ابو الچيسين بربع
عرفت عمي احمد الا عندو شغله عدنا و جاي و بالاخير، تأكدت شكوكي من فتح موضوع بيت الورث
الي ساكن بي عمي خليل
گال اني ما اريد البيت بس اريد ابيعلكم حصتيلو نبيعو و كل واحد ياخذ حصتو
عمي خليل شفتو مو قابل بالموضوع بس ما حچه
دحگت ل عثمان الي يدحگ ل عمي احمد و هو معصب و همين مو قابل، هاي السنين كلها ما تذكر ال هسا انو اكو بيت ورث
اخر شي گال اذا ما تشترون حصتي اروح اعرض البيت للبيع و انتوا تنجازون اني اريد حصتي من الورث
دحگت ل يزن و هو يبتسم عرفت هاي سالفتو لأن مبين فرحان بالموضوع و الله طلعت منو سوالف ابو خشم
راح عمي احمد و عمي خليل و صعدت فوگ و اني حسبه تجيبني و حسبه توديني
طلعت الطابوات الي عندي، مالت بيتنا هذا و بيت الاعظميه گلت بلكي الگه نسخه من الطابو مالت بيت جدي لان عمي سألني عنو اذا چان موجود عندي
نزلت جوه و گعدت ادور وي الاوراق الي بغرفة امي خابرت عمي وگلتلو مو عدنا ورا شويه خابرني گال اكو نسخه عندو
الصبح رحت للدوام بس ظل فكري يم سالفة عمي و مليون فكرة خطرت ابالي، البيت غالي يجوز يجيب فوگ ال٨٠ مليون لان على شارع عام و ركن
من رجعت من الدوام
صعدت فوگ لغرفتي و لگيت جمارة گلبي گاعده على التخت و هي تلاعب ب حيدر الي بس شافني گام يضحك و يمد ايدو عليه
ضحكتلو و اخذتو بحظني و هو شبكني بستو من خدو
دحگت ل يُسر الي تبتسم و ادحگلنا
تنهدت و اني ادحگ ل حيدر، و احچي بگلبي لو امك مو عنيده و شويه تشوف حالتي و تعطف على هالگلب
چان هسا اول ما فتت للغرفة او للبيت تلگتني بالله يساعدك و تناوشنياك و ابوسك و اهم شي ابوسها هي
هزبت راسي و اني ابعد هاي الافكار عني، مددت على التخت و رجليه بعدها اطخ بالگاع و گعدت حيدر على بطني ولازمه من ايديه و اني اگول
- شگد حقير انته ! ما تگول شلونك و لا تسلم ها !
دحگت ل يُسر الي رفعت تك حاجب و هي فهمت قصدي انو گاعد اقصدها بالحچي
رجعت ادحگ ل حيدر و بضحكه گلت
- عاد تعرف اليوم شنو صار ؟ چنت يم الاشاعات يم ولد رفيچي
اجان شايب يريد ياخذ اشاعة ل صدرو و لابس دشداشه گالو صديقي حجي طلع المفتاح الي بجيبك الفوگ لان يأثر على الاشاعة
الحچي ما قبل يگول والله اخاف يضيع و هذا مفتاح القاصه مالت الفلوس وين انطي وجهي وراها
گامت تضحك و اني انداريت عليها و نزلت حيدر على التخت بس هو رجع عليه و يضربني على خاصرتي يعني اريد اگعد
- ولك اگعد
مد بوزه من حچيتها الو، والله ما صحت عليك ليش برطمت هسا !!
- من طاح حظي عجل، تعال يابه تعال
رجعت مددت و گعدتو و هو گام يضحك و يصفگ بيدو
ما تحملت شكلو و اني اسحبو عليه و ابوس بي بقوة من خدودو و هو يضحك و لا ضاج مني
تنهدت و اخلي ايديه حول وجهو المدبدب
- ول يابه اروحلك فدوه اني و عشيرتي شلع قلع و اولهم يزن ابو خشم
هو دحگلي ثواني و گام يضحك و هو ينزل راسو يمكن فهم الي حچيتو
- ولك لا تحجل يول، ترا اموتك كزكزت عليك
گمت ادغدغ بي و هو يضحك من كل گلبه و شويه و اعوفو جتى ياخذ نفس و ارجع نفس الحاله
الا ان تعب من الضحك تا عفتو
حسيت بنظرات يُسر علينا بس ما رفعت راسي عليها ردت اعرف شنو شعورها راضيه لو زعلانه لو فرحانه على ضحكات
بنتها بالاخير ما گدرت رفعت راسي و دحگت عليها لگيتها ادحگلنا و بسمه على وجهها
الحمدلله و الشكره لله انها ما عصبت لو وجهها متعكر
شافتني تحركت اريد امدد حتى انام و چان تگوم اجت تاخذ حيدر من حظني بس گلتلها
- عوفيه اريدو يمي
و بدون ما اغير حتى ملابسي تمددت و اخذت الغطا و حيدر خليتو على ايدي و نمت و شفتها ل يُسر طلعت من الغرفه
گعدت المغرب و ما لگيت حيدر يمي، گمت سبحت و نزلت جوه لگيتهم كلهم ملتمين بغرفة الگعده
گعدت على القنفه و دحگت ل عثمان الي گاعد يشرح ل دلال بكتاب الرياضيات
و يُسر بحضنها حيدر و رواء تحچي وي عثمان الي كل شويه يرفع راسو و يگول الها اسكتي
ضحكت عليهم و اخر شي امي الي گاعده و مخليه السبحه بيدها و تستغفر
گمت من مكاني و رحت گعدت بسدها و مثل كل مره خليت راسي بحظنها و باستني من راسي
و گالت
- يول شعرك مبلل
- توي سبحت
- و ما تنشفو ها ؟
- يمه نشفتو هسا يبس
- لباچر ما يبس صايره كفشه شكبرها
صارلك شگد ما مزين
- يمه مو گبال عيد تا ازين
ضحكت و هي خزرتني و گالت
- گوم گوم تضحك عليه
گعدت على حيلي و سحبت ايدها و بستها و اني اگول
- يمه حاشاچ بس والله ما الي واهس، هو لحيتي گوه گاعد احددها تا شعري و اگعد نص ساعة يم الحلاق انتظر السره
بعدين الجو بارد ادفي
- استغفر الله استغفر الله
گامت تستغفر و اني ابتسم عليها خليت ايدي على شعري و الله مو طويل بس هي تحب الشعر الناصي تگول حلو
انداريت ل عثمان الي عاف الكتاب و گال
- سلام تعال اني ازينك بالبيت
- لا لا خويه رحمه لأبيك اگعد، خليني ساتر على نفسي اروح اصير مضحكه
- ليش ولك ؟ كم مره زينتك ها ؟ لو تنسى فضلي
- ايي هيه مرتين يحياتي و طلعتني اشبه كلشي الا البشر
- له له عاد مو هيچ
دحگت ل يُسر الي ضحكت و اني لگيتها فرصه حتى احچي
- والله يا يُسر لو شايفه حلاقتو الي تگولين عوف المكينه اجرمت بشي اسمو حلاقه
- يُسر لا تصدگينو هي صح خربت التسريحه بس مو لهل الدرجه
هي گالت بضحكه
- و شنو جبرك تحلق اله ؟
تعدل بگعدتو وگال
- والله غدر الزمن يا اختي، خلاني انحبس بالبيت اسبوعين ورا ما كسرت رجلي و من ضوجتي گلتلوا تعال احلق الك شعرك
- يا و بشنو انكسرت ؟
دحگلب عثمان و گال
- اگول لو لا ؟
اني رفعتلو حاجبي يعني اسكت لا تحچي لأن انفضح اذا حچه، بس هو لگاها فرصه و گال
- هاي مره من چان بالمتوسطه سويتلو عملية هروب، چنت اني وياه بنفس المدرسه و اجيت اهزمو
السياج عالي حيل ف هو شسوه گالي عثمان اوگف و اني اصعد على اكتافك و انهزم
سكت و دحگلي و اني ابتسمتلو بمجامله دحگت للبنات يستمعن كلش زين ل عثمان و كانو لازمات لزمه عليه
- ف الاخ صعد على كتفي و احا يتسلق الحايط اني اختل توازني و طب وگعت و هو فوگايه
انكسرت قدمي و هو خدش ما انخدش
گامن يضحكن و اني هزيت الو راسي ب توعد
لو اريد اطلع فضايحو چان حچيت بس اخاف على سمعتو
انداريت ل يُسر الي گالتلي بضحكه و هي ما مصدگه
- و الله ما متخليه سلام يسوي هيچ
- يمعوده لو احچيلچ سوالفو تگولين هذا سلام ؟ الهادئ المتواضع الاسم على مسمئ
زفرت و دحگاي عثمان و گلتلو
- عثمان مو لحيت ؟
- لا عفيه عثمان احچي خلي نسمع مغامرات سلومه
حچتها دلال و هي تحظن ايد عثمان
الله و اكبر هاي من شوكت صاروا حبايب
عثمان رجع يحچي و هو يلتفت على يُسر
- خلي اكمل الچ يُسر، هذا الي گدامچ لو تشوفينو قبل الا تگولين سبحان مغير الأحوال
چان كل يومين و الثالث دازين المدرسه استدعاء ولي امر و من غير العركات الي بالفرع وي الشباب، و يظل ينهزم من المدرسه و يروح يلعب طوبه، و يجي المغرب و ابويه يلزمو دگ و رزايل و هذا يتوب ؟ لا والله يرجع نفس ما هوه، و اتذكر مره راح المغرب يشتري صعاده و من اجا ابويه كسرها گدام الباب و هو ظل يدحگ و شكلو گام يسب بابويه
- و ربطه بالنطاق ؟
دحگت ل يُسر الي تضحك و ادحگلي، عاد هاي شكلها تحب تلزگ بالسالفه و تظل تذكرني بيها و بذكرتها المصخمه دحگت ل عثمان الي اهز راسو باي و يضحك
- عثمان خلصت ؟
- هسا احچيلهن شويه، عود باچر نتعلل بالمواقف الباقيه
- حلو من تحچي بس سكوتك احلى
- اووه شهل الاطراء شكراً
گمت من عدهم لان لو اظل بعد شويه اگوم اكتل عثمان و اسكتو
فتت من يم رواء و گلتلها
- رواء
- ها خويه
- عود بس شوفي الماسنجر مال عثمان، و بالتحديد محادثه وي شخص اسمو " عاشقة الشمس "
هو التفت عليه و گال
- يول مو هيچ
گامت رواء و گالت
- عثمااان تخوني ؟؟
- اي والله عثمان تخونها ؟ و وي منو عاشقة الشمس
و لك يابه حتى الاسم كانسر مادري شلونو
- رواء چذب
- وين چذب يول ؟ مو شفت المحادثه بعيني تگوللها اني ارمل مرتي ماتت قبل سنتين انضربت بطلقه براسها من ورا دگه عشائريه
- فوگ ما تخوني موتتني ؟
و اني بتأثر گلت
- تؤ تؤ هيچ تبيع الخمسه ؟ اقصد العشره علمود منو ؟ عاشقة الشمس ؟
- ولك سويلم لا تگبب النار اهجد
صاحت بيه امي الي هسا ادافع عن عثمان و اني من سحل سمعتي بالگاع ما حچت انداريت على رواء و گلتلها و عيني على عثمان الي وجهو گام يذب الوان
- و حتى هو منتسب بالجيش، و راتبو مليونين و عندو سيارة كمارو و بيت طابقين بالجادريه
حچيت و دحگت ل عثمان و گلت
- ولك عاشقة الشمس ؟ لو رحيق الورد احسن چان گلنا بعد فترة تصير عسل، بس عاشقة ؟ والله كانسر حييل
طلعت و عفتهم و اني اسمع عثمان يريد يبرر و امي تصيح عليهم، العين بالعين و السن بالسن و البادي اظلم عبالو بس هو يگدر يحچي عليه
بهذيچ الليله رواء ما تعشت ' مثل ما گالت النا ' بس اني شفت يُسر حدرت شايله صينيه مواعينها تلمع من فوگ و من سألتها گالت عشاء ل رواء و من تا انام انطرد الاخ الى الصاله و نام هناك و حتى تلفونو سحبتو امي منو ، بالليل رحت عليه و گلتلو و اني واگف بالباب
- احذر من عدوك مره و من اخوك سلام الف مره
- طاح حظك امشي من هين
- يمعود لا تزعل هاك تلفوني و طلع اشعار حزينه و الاغنية التي ابكت الملايين علمود حالتك
- و روح ابويه اذا ما رحت من هين الا اگوم اطلع قهري كلو بيك
سكت شويه و گال
- فوگاها امي وگفت وياها و حرضتها عليه انو انام هين
- والله لو ساكت يا عثومي حبيبي، چان مو هاي حالتك
دحگلي بطارف عيني و گال و هو يرفع ايديه اثنيهن
- يا رب دعاء عبد مظلوم، يجي يوم و سلام يكون مثل حالتي و اضرب و مرتو طاردتو من الغرفه
رفعت ايديه و اني اگول
- ولك امين امين من حلگك لباب السما
- و ربي دعاء عبد مغلوب على امره، سلام يصادق عشره و كلهن يطلعن ولد يا رب
- لاا عاد مو لهاي الدرجه، اثنين تلاثه عادي مو مال عشره احنا همين مغلوب على أمرنا
تنهد و گال و هو يأشر على الضو
- يلا اريد انام
- مو وجه نعمه و وأحد يگعد يواسيك
- تقتل و تمشي بالجنازه
گمت اضحك عليه و طفيت الضو و سديت الباب
من صعدت فوگ لگيت يُسر تمد بالفراش، وگفت انتظرها تكمل
هسا عليش كل هذا ؟ انام على الچربايه بصفچ و نفضها لا مد فراش و لا شيل فراش
وخرت واني مددت و بعدني احچي بگلبي
هي طفت الضو و مددت بفراشها، و اني ظليت گاعد
تذكرت من چنت مريض و حلمت ب حيدر، تنهدت و اني اتذكر انو گلت الها بس اطيب نروح
و هسا تشافيت يعني لازم اوفي بوعدي
گعدت على حيلي و گلتلها
- يُسر نايمه ؟
- لا
وصلني الجواب ورا ثواني، تردد بالكلام اني اريد اروحلو و ما اريد اعوفها لأن هي مره وحده راحتلو
بس جهة من گلبي ما يريدها تروح يخاف يشوفها شلون راح تكون حالتها و هي عند گبرو و شلون تبچي و هو ما بيدو شي، هه و يمكن اكو سبب ثاني
يمكن تكون غيره ؟
استغفر الله سلام شهل الحچي ؟ تغار ؟ من منو حيدر ؟ غمضت عيوني و رجعت مددت شبيك سلام حيدر مات خلاص ليش تحس بالغيره من تفكر انو لهاي اللحظه يُسر تحبو
اتمنى لو اعرف شنو الي زرعو حيدر بگلب يُسر خلاها توفي الو لهاي اللحظه و حتى تفكير بغير شخص ما تفكر لدرجه الخاتم ما نزعتو
الله لو عندي هيچ شخص يوفيلي، ما ينساني بسهولة، بس يمكن هاي الاشياء نادره و كلش..
- سلام شنو تريد تگول ؟
- باچر جمعة و ما عندي دوام
- اي ؟
- گلت اروح انزور حيدر
گعدت على حيلها و ثواني و وصلني صوتها بي عبره
- والله ؟
ابتسمت بقهر و اني اگول
- والله
- باچر ؟
- ان شاء الله، ما نطلع من الصبح
بالعشره هيچ
- خوش
رجعت مددت و اني ظليت ساكت ، ثواني قليله و سمعت صوت بكاءها الخافت الي يدگ بگلبي مثل البسمار
يا ريت اگدر اگوم هسا و اخذها بحظني و اگول الها لا تبچين، بس اكيد هسا الگه رفض..
خليت ايدي على عيوني و اني اردد بداخلي
يا رب صبر صبر لمواجهة باچر
.
السلام عليكم ❤
شلونكم حبايبي ان شاء الله بخير
اتمنى البارت عجبكم ❤
و شنو ارائكم 🌹
اني گلتلكم بهذاك البارت يجوز باجر ما انشر و ما نشرت بس اليوم هياتني نشرتلكم 🙊🌹
باچر ان شاء الله اكو بارت و نرجع للنظام يوميه بارت ❤
( اذا كملتوا البارت رجاءاً اقروا الفاتحه و اهدوها ل ارواح الشهداء الي سقطوا بالتظاهرات 💔🤲 )