#أمانة حيدر
#بقلم:الراويه
#الفصل"٢٠"
بسم الله ❤🌹
.
سلام..
تقدم ياسر و اني تحظرت حتى اواجهو بس وگفو ابوه من صاح بي
- ياسر !!
اندار عليه و صاح بي
- روح لمحلك
- يابه
- و لا كلمة روح
طلع و هو يدحگ عليه و يتوعد بيه، دحگت لابوه الي گال
- نعم شنو تريد
هسا اني الي اريد لو انته ؟ بس شكلة ما عرفني
تحممت
- اعتقد انته انطيت عنوانك لابو زيد حتى اذا ردنا نقابلك
ظل ساكت لحظات و هو يدحگلي بتمعن قبل لا يگول و هو يتقرب كم خطوة
- انته ابن طالب
هزيت راسي ب نعم و گلت
- اي نعم طالب ايوب ال.... و انته ؟
انشرح وجهو و گال
- تفضل ابني اتفضل
اندار للشاب و گال
- مصطفى جيب چاي
اجيت احچي و اگول كافي رحمه لربكم والله متت من الچاي
گعد ورا المكتب و اني گعدت گدامو هو چان يشتغل بالعقارات
شويه و جاب مصطفى چاي دحگت عليه و هو ابتسم
- نسيت اعرفك عن نفسي، اني مهيمن ابراهيم ابو ياسر
- على راسي عمي
ورجعت تحممت و گلت
- تقابلنا قبل احنا
ذب السبحه على الميز و گال
- تذكرتك اول ما شفتك
ابتسمت الو و هو گال
- انصدمت بيك مثل ما انصدمت بي
- كلش بصراحه
جر حسرة و گال
- انته ابن طالب مو ؟
- اي نعم
- و النعم منك
ظل يدحگلي ثواني قبل لا يردف
- اني و ابوك چنا بنفس العمل
- بالاستخبارات ؟
هز راسو ب اي و گال بتنهيده
- بال٩٨ تقاعدت و انقطعت كل الاخبار عنه
- تقاعد وراك بال٢٠٠٠
سند ايدو على الميز و گال بسمه و عيونو غورقت
- چان اغلى من اخويه، اعرفو من ال١٩٨٨ و ما تركنا بعض وين ما نروح سويه
تقاعدت اني و انتقلت لغير منطقه و انقطعت الأخبار
سكت شويه و رجع گال
- بفاتحة ابني عامر الله يرحمه
- الله يرحمو
- و يرحم موتاك، اجا عزاني واحد من الي اشتغلنا وياهم
گعدما نتذكر قبل، و گال طالب ايوب شخباره و تذكرته
- توفى والدي بال٢٠٠٦
- شلون ؟
- بانفجار
- الى رحمة الله
جر حسرة و ظل ساكت حسيتو صدگ زعلان و حتى وجهو بين عليه الحزن
- زين عمي شلون وصلت النا ؟
فز هو و تعدل بگعدتو و گال
- ورا ما انتهت الفاتحه تقريباً بشهر، گمت افتر و ادور
اتذكر والدك گال سكنت الكاظميه
رحت هناك ما خليت شخص ما سألته عنه و الاغلب ما عرفوه
اخر شي رحت للمختار و گال ماكو هيچ اسم هنا
قطعت الامل و رجعت لبيتي و قبل شهرين
مريت على گرايب زوجتي سكنوا جديد هناك، جيرانهم تلگانه بالباب گلت خلي اسأله و من سالته گال هذا چان جيران بيت اهل زوجتي و يسموهم حجي طالب بس هسا مو هنا انتقلوا للاعظميه
- اي
- رحت للاعظميه و بقيت اسال، و انته تعرف الاعظميه مو صغير حتى الگاه
بقيت ادور سألت اكثر من مختار منطقه و ما عرفوه و يگولون ماكو اسم اله
اخر شي رحت للمنطقه و من سألت المختار گعد يدور، لگه اسم مشابه بس بالاول سلام بس نفس العشيره
گال هاي هي هذا ابنه
و گمت اروح و ارجع لبيتكم گلت بلكتن موجودين و من شفت الرجال ابو زيد انته تعرف الباقي
طول ما يحچي اني ظليت صافن عليه، ورا ١٤ سنه ما ناسي صديقو، ابتسمت و اني اتخيل انو لو باقين سويه چان هسا اني و ياسر بست فريند
ضحكت و هو دحگلي باستغراب و اني سكتت
- اعتذر مو قصدي، بس صدگ يا نيال ابويه على هيچ رفيج
- اني يا نيالي، بس هسا ما نگول غير الله يرحمه
اني من گلت لابو زيد ردت اتاكد من الخبر
چانت عندي ذرة امل انو طالب بعده عايش
- يا ريت
حچيتها و جريت حسرة و هو دحگلي و گال بسم
- انته سلام، و الاصغر عثمان صح ؟
- صح
- اتذكر چان دائماً يحچيلي عن عثمان اصغر واحد
- هسا هو مو الصغير عندي اخت اصغر منه
- الله يحفظهم و يستر عليهم
- تسلم
- اي سلام وين هسا انتوا ؟
- رجعنا ل تكريت بال٢٠١٠ و هناك ساكنين بين أهلنا
- الواحد بدون اهل ما يعني شي
- اي والله
دحگت للباب الكزاز شفت ياسر يدحگلي بعصبيه و هو مكتف ايديه ل صدرو، ابتسم الو و هو زفر و دحگ للشارع
انداريت لابوه الي گال
- شلون صدفه ؟ غريبه كلش
- اي والله غريبه، الدنيا صغيره
- حچه الي ياسر انو متهجم على جمال
عصبت بس ما گدرت اسوي شي، ابني دمه حار على اخوه المرحوم
- جمال بالسجن و گاعد ياخذ جزاءة شهرين بالچثير و يطلع
هز راسو و ما جاوب، تنهد ورا شويه گال
- و عرفت انو انته ماخذ ثار جمال و هجمت على ياسر
- عمي جمال مو صديق انما اغلى، هو وحيد ما عندو بس اخت وحده اعتذر منك بس تصرف ياسر مو حلو بحقه تهجم داخل السجن و ضرب بسجينه بخاصرته و كسر قدمو
ما گدرت اشوف هاي حالتو بدون ما اسوي شي، تهجمت على ياسر لأن كلش قهرني
- ما الومك
حچه هالكلمه و سكت لحظات حسيتو مثل الضاج
بس هاي كلمة الحق ما تضوج
- بس هسا تصافيتوا، مع اني اشوف نظراتكم لبعض تريدون تاكلون بعضكم
- لا عمي شهل الحچي ان شاء الله ماكو الا كل خير
انداريت ل ياسر و رفعتلو تك حاجب و هو اجا يكسر الجام و يهجم عليه
دحگت لابوه الي گال
- هسا صرنا اهل و حبايب، و اني اوعدك من جمال يعبر باب السجن محد يتقرب اله لا اني و لا اولادي، و مو عليه هاي الشوارب اذا احد تعرض اله من جماعتي
- شكراً عمي ما تقصر، و هذا من طيب اصلك
احنا كلشي ما نريد بس يكون جمال بخير، هو ما كان يتقصد قتل ابنكم الله يرحمه
- هذا قضاء و قدر وليدي
حچينا شويه و استأذنت منو اصر انو ابقى على الغدا كلش و ما گدرت اعترض
طلعت من المحل بعد ما انطيتو موافقتي
من طلعت طلع گدامي ياسر و بسمه خفيفه و اني ارفعلو حاجبي
- يخويه طلعنا اهل و حبايبي
- يا.....
- تؤ تؤ هسا ابوك يسمعك و يرزلك لأن تحچي عن ابن صاحبه
صعدت بالسيارة وي ابو ياسر و تركت سيارتي عند المحل
وصلنا لبيتهم او للقصر انبهرت بجمالو و خصوصاً الحديقه الواسعه
فتنا للصاله و رحب بيه وگف ياسر عند الباب و گال
- يابه عندي شغل استاذن
- روح ابني
راح و اني دحگت لابوه و ابتسمت، ما چنت اريد اجي بس هو اصر
گلت يلا بس هسا و بعدين اطنش و اسوي نفسي نسيتو، صح هو مبين عليه انسان زين بس اولاده ما موثوق منهم
من خلو الغدا تغدينا بس اني وياه و الولد الصغير الي لگيتو بالمحل و الي هو ابنو من زوجتو الصغير
دحگت عليه كل هاي الإمكانية الي عدهم و الخير مشغل ابنو الي عمرو١٧ سنه بمحل
كملنا غدا و اني گلت هسا استأذن و اروح لان تاخرت صارت الساعة بال١ و نص
اندگ الباب و اني چنت ادحگ لموبايلي علمود الساعة گال ابو ياسر تفضل
و انفتح الباب رفعت راسي للي دخل و ظليت صافن من كل عقلي على الي گدامي، يا سبحان الله على هيچ بشر شعرها اشگر نازل لحد خصرها و الوجه جمار من البياض و عيونها زرگ فاتحات
نزلت بصري عنها و اني استغفر ربي بداخلي، شجاك سويلم ما شايف نسوان ؟
بس شنو هاي من مره يا سبحان الله
قدمت الچاي الي و بعدين لابوها الي گال بسمه
- بنتي جنه
والله اسم على مسمى
انزعجت من نفسي و انبتها و استغفرت ربي و گلت
- الله يحفظها
هي ظلت واگفه و تبتسم و اني ما رفعت راسي عليها و لا دحگت، شيطاني اضعفني بلحظه بس مو معناتها يسطير عليه
مثل ما ادحگ لأعراض الناس يجي يوم و الناس ادحگ لعراضي ف كما تدين تدان
بعدين طلعت و سدت الباب وراها
شويه و استاذنت منو و هو تعهد يوصلني للسيارتي لمحلو
من طلعت شفتها واگفه عند باب يطلع على الحديقه و ابتسمت الي، اني تجاهلتها و صعدت بالسيارة
اخذت سيارتي و هو ودعني و گال كل ما تجي ل بغداد تعال عليه گلت اله ان شاء الله
هو اني ابنك يطير عقلي منو و هسا طلعتلي بنتك من جهه شو ما حسيت براحه من ضحكاتها الي
بس اريد افتهم شلون هاي اختك ياسر ؟
فرق شاسع بينهم الي يشوفهم يگول مو اخوه، بس شكلها من زوجتو الصغيره لان تشبه الولد
وصلت هناك بحدود ال٤ سلمت على امي و تحججت انو صار شغل عندي
صعدت فوگ و اول ما فتحت الباب صادفتني متمدده على التخت و نايمه و حيدر ليغاد عنها خليت السويچ و المحفظه على ميز المرايه
تقربت وگرفصت يم راسها ادحگ الها بعين باسمه، تذكرت البنيه جنه
يمكن احلى منها بهولي اشياء بس ما حسيت بيها شي حلو من اتذكر يُسر
يُسر مادري الي حلوه زياده عن الزوم لو هي عمت عيني و گمت ما اشوف احد بجمالها
چانت نايمه مثل الملاك شعرها على المخده نص و نص مغطي عيونها الاحبهن، جريت حسرة و وخرت الخصلات الي على عيونها
اوف يا يُسر شوكت تنتبهين للگلب الي محترگ علمودچ و بحبچ
جريت حسرة و گمت من يمها تمددت على فراشي و ظليت صافن بالسگف اخر شي سحبت الغطا و نمت
.
يُسر..
حسيت بي من گعد عند راسي و لمن وخر شعري عن عيوني، بصعوبة گدرت ابقى مغمضه حتى ما افتحهن و اباوعله
وجعني گلبي من سمعته يجر حسرة و هو يوخر من عندي
من تأكدت انو تمدد بمكانه فتحت عيوني و نزلت دموعي، گبل مسحتهن اني ما اگدر اتحمل وجع گلبي بسبب انو يحبني و اني ما ابادله المشاعر
مشاعري الي ماتت من يوم الي توفى حيدر
على العشا گاعدين يتعشون ما خليت لگمه بحلگي حسيت نفسي مسدوده و مالي نفس، باوعت ل سلام الي بصفي و هو يگول بصوت ناصي
- ما تاكلين
- مو جوعانه
باوعلي و ترك الي بيده و گال
- بيچ شي ؟
هزيت راسي بلا و گمت باوعت ل عمتي الي گالت
- يُسر شو گمتي ؟
- عمه مو جوعانه
طلعت و فتت للمطبخ خليت القوري على الطباخ و گعدت على الميز و نزلت راسي و اني اتنهد
كلمة احبچ لحد هسا تتردد باذني و لمسته من وخر شعري احس بيها على وجهي، يُسر شبيچ ؟ غمضت عيني و اني اجر حسرة احس اكو شي غريب بيه
شي ما اريد احس بي، من اباوعله احس اكو شي جديد طره عليه
مع انو هو ما تغير بعده نفس ضحكته و مداهرته و عصبيته
فزيت من رفعت راسي اله لمن گال
- شنو نايمه ؟
- لا انتظر الچاي
بقى يباوعلي و اني نزلت راسي و اني اعدل حجابي، طلع هو ورا شويه كملوا عشا اخذت الچاي حتى اصبلهم و رواء غسلت المواعين
گعدت و اخذت بحظني حيدر، و بصفي دلال الي تلاعب بيه اخر شي اخذته لحظنها
رفعت راسي ل سلام الي گال
- يمه، تتذكرين من گتلچ اكو واحد يحوم حول البيت ؟
- اي يمه
- اليوم رحت شفتو
- اي ؟؟
- ورا السؤال و الجواب طلع رفيج ابويه من چان بالاستخبارات
- زين شنو اسمو ؟ و منين و اصلاً شلون عرفك
گعد يحچيلنا عن مقابلته اله و حتى من راح للبيتهم
اخر شي التفتت عليه و گال
- من شفتو تذكرتو انو هذا ابنو عامر الي دعمو جمال
- اي و شگالك ؟
حچاها عثمان و جاوبه هو و اني بعدني اباوعله بتعجب
- ما گال شي گال هذا قضاء و قدر
الرجال مبين صبور و مؤمن
ما حچيت وراها اخذت ابني و صعدت فوگ
شهل الصدفه هاي ؟ الي كتله اخويه يطلع معارف ابو سلام
مددت على التخت و گمت ابچي و اني اتذكر جمال
مشتاقه اله هواي و اعد الايام حتى يطلع
انفتح الباب و بسرعة مسحت دموعي
باوعلي سلام لحظات قبل لا يگول
- يُسر ..
- ما بيه شي، بس تذكرت جمال
قاطعته و اني اعدل بشعري، هو تنهد و سحب الطابوريه و گعد عليها و گال ورا لحظات
- لا تبچين، ما بقى شي و يطلع
من حچه هيچ گمت ابچي اكثر نزلت راسي و حاوطت وجهي و اني ابچي و اتذكر كلشي مر بينا
من وفاة امي احد بيبيتي و اخر شي من انسجن
گعد بصفي و بقى ساكت و اني لحظات و مسحت دموعي و تعدلت بگعدتي باوعتله و گلت
- اي صح ما بقى شي و يرجع كلشي مثل ما كان
- منتظره هذا اليوم ؟
بقيت ساكته و اني اشوفه منتظر جوابي
منتظرته ؟ اي و ميته شوكت يجي
و من جهة احس شي بداخلي يتمنى يطول
- كلش
ابتسم هو و گلت هسا يگوم و يوخر بس ما گام انما رجع يحچي
- ان شاء الله، صبرتي هواي و بقت شهرين اصبريهن
- و انته ؟
- اتمنى يطول و اتمنى يجي
حچاها و ضحك ضحكة قصيره قبل لا يگول
- يُسر
- ها
- شلون اقتنع انو ها هي خلاص بقت شهرين و تروحين
دمعتي وگعت على خدي و مسحتها بسرعة، باوعت بعيونه شفت شگد بيهن حزن بس مع هذا بسمته على وجهه من گال
- بعد ماكو كواناتچ و لا نرفزتچ، و بعد ماكو كلمة اكرهك
ما جاوبته لأن حسيت بغصة واگفه و اذا حچيت راح تفضحني
هو جر حسرة و گام و اني عيوني متعلقه بي
اتجهه للباب و بقى واگف ثواني قليله قبل لا يگول بصوت ناصي
- اتمنى الزمن يوگف هنا و ما يمشي
فتح الباب و طلع و اني سمحت لنفسي بالبچي
سحبت الغطا و تغطيت و اني گمت احاول اكتم شهگاتي
بصعوبة نمت بال١ و هو ما اجا، يمكن يتهرب مني مثل ما اني داحاول
الصبح گعدت و احس بضوجه مو طبيعيه، گوه كملت شغلي و صعدت فوگ
على الغدا اجت دلال گالتلي تعالي تغدي، و گلت الها ما اريد
العصر اجا سلام سبح و من طلع من الحمام باوعلي
و گال و هو يعدل شعره گدام المرايه
- بيچ شي ؟
- تؤ
- عجل ليش ضايجه
تنهد و گعدت على حيلي و گلت
- منو گالك ؟
التفت عليه و گال هو مبتسم
- عيونچ
اخذ السويچ و المحفظه و طلع
و اني بقيت گاعده زفرت و اجيت ارجع امدد، اليوم ما الي واهس اگوم من الفراش
سمعت صوت تلفون يدگ باوعت ما كان تلفوني، گمت و بديت ادور لگيت تلفون سلام على الميز ديدگ
اخذته و شفته رقم مو مسجل
انقطع الاتصال و طلعت الخلفيه للتلفون چانت صورة حيدر
صار عندي فضول اباوع شكو بجهازه، باوعت للباب و رحت قفلته و گعدت على التخت
مادري شنو معنى الي سويته و ليش اريد افتش بتلفونه، بالاول دخلت للرسائل و ما چانت موجوده رسائل هواي اغلبها من الشركه لو من عثمان ما فتحتهن لأن گلت هاي خصوصيات، تنهدت و اجيت اترك الموبايل و گلت عيب يُسر شنو هاي الحركات
شفت تطبيق الفيس دخلت اله و گمت اقلب بالصفحه مالته ما ناشر بيها هواي اغلبها تغيير الصوره الشخصيه فقط
خرجت و دخلت للماسنجر گلت هسا اكيد الگاه محادثات وي اصدقاء او يمكن " صديقات " و مثل الرسائل ما لگيت محادثات هواي اغلبها من گرايبه
بس الي جذبني گروب اسمه " عليه الطلاق بحبكم "
من شفت الاعضاء چانو هو و رائد و عثمان و اثنين ما اعرفهم
گمت اضحك و اندگ الباب گبل قفلت التلفون بدون ما اخرج من التطبيق و رجعته لمكانه، فتحت الباب چانت رواء
زفرت براحه من گالت
- اجيت اشوف شبيچ
- ما بيه فوتي
فاتت و گعدت على التخت باوعت ل حيدر الي نايم و ابتسمت و اندارت عليه و گالت
- اليوم انتي مو على بعضچ، بيچ شي
- لا رواء بس شويه تعبانه
- اخاف حامل
- لا لا مو حامل
اجيت اضحك بس كتمت ضحكتي بصعوبة و هي تنهدت و گالت
- عجل شبيچ البيت كلو منتبه الچ
-والله ما بيه شي، بس ما اعرف شبيه تعبانه و ضايجه
- ضايجه على اخوچ
هزيت راسي ب اي، اي اني ضايجه على جمال مو علمود غير شي
- دحگي اني زفت بالمواساة، بس اخوچ ما بقى الا شهرين و يطلع
- الحمدلله الله يفرج عنه
- آمين ان شاء الله
شويه بقت گاعده و گامت نزلت جوه
و اني نزلت وراها گعدت يم عمتي و حچت وياي و هي تحچيلي انو اصبر، لأن حسبالها ضايجه علمود جمال بس..
بال خمسه تقريباً دخل سلام و هو شايل كارتونه چبيره و وراه دلال تسأل شنو هذا و شنو هذا و هو ما يجاوبها
خلاه عند الباب و سألته امه
- شنو هذا ؟
- البنت طالعه لامها
- انچب و شنو هذا ؟
- يمه هذا تخت صغير ل حيدر، لان الليل كلو يشبعني دفرات
فتحت عيوني و باوعتله و هو ابتسم و يرفع حواجبه
تنهد و گال
- من هين امو و من هين هو، ف اني اگول الام ما اگدر اطردها ف شنو؟ جبت تخت لحيدر دفرات من شخص احسن من شخصين
ضغطت على اسناني و اني اكتم غضبي منه بهاي اللحظه تمنيت انقض عليه امه و رواء و حتى عثمان گاموا يضحكون و استحيت منهم
باوعت ل سلام و اني اتوعد بي
هو اخذ الصندوق و گام صعد فوگ و اني تركت حيدر يم عمتي و صعدت وراه
فتح الكارتون و تربع بالگاع و گام يطلع باغراض التخت و الكتلوك و البسامير مالته
گعدت على التخت گدامه و گلت
- شنو هذا ؟
- بربچن ما عدچن غير هاي الكلمه ؟ شنو تتوارثنها لو عدوه
- اعرف شنو هذا بس شنو اله داعي
- هديه مني ل حيدوري اكو اعتراض
- لا ماكو، بس ما چان اكو داعي تگول انو اني و حيدر ندفر بيك
- والله تدفرون بيه النهار كلو
- فوگاه يحلف ؟
هو گام يضحك و مره يباوعلي و مره يباوع للكولاج قبل لا يگول
- ادفرون بگلبي
بلعت ريگي و هو سكت و باوعلي و ضحك، استحيت من كلامه
هو رجع يكمل شغله، سكتت لحظات قبل لا اگول
- ترا ما اله داعي، ما راح ينام بيه
- ليش بله ؟
- متعود ينام بصفي
رفع راسه و گال
- يوم يومين و يتعود
- سلام ترا والله ما حاجه اله، هو شيسوي بي
- هسا بس اريد افتهم اني جبتو الچ ؟ لا عجل اسكتي لان اني جايبو ل حيدر
زفرت و غثني بكلامه گمت على حيلي و گلت
- لا تحچي وياي هيچ
- ول يابه عجل شلون احچي وياچ ؟
- احچي بس مو هيچ
ضحك و گال و هو يرفع تك حاجب
- يعني ما تريدني اعصب عليچ ؟ و احچي وياچ برقه و حذر
ما جاوبته لأن اعرف ما راح يسكت و يبقى يحچي و بالاخير اكون بفشله من اجوبته
طلعت من الغرفة و اني اسمع ضحكاته و هو يحس انو انتصر عليه و نزلت جوه، و گمنا اني و رواء نحظر بالعشا
چنت واگفه عند الطباخ و رواء على السنگ تغسل خضروات
لمحته دخل و انتجى على الكاونتر گلت هسا يحچي وياي و يا يُسر لا تعصبين لأن رواء موجوده
بس هو فاجئني من گال
- رواء
- هلا خويه
- اگول شو صاير انسى چثير، يعني اخلي ملابسي بالحمام اريد اسبح انسى
اطلع مي من البراد تا اشرب انسى، و هسا اخر شي ناسي تطبيقات التلفون مفتوحه و الشحن خلصان
التفتت عليه و هو گام يضحك، رجعت اباوع للطباخ و اني اعض على شفتي طاح حظچ يُسر، ها ارتاحيني كشفچ و هسا شلون تخلصين من السانه
ضحكت رواء و شكلها فهمت قصده باوعتلي، و اني رفعتلها تاك حاجب و گال
- يصير خويه يصير عثمان نفس حالتك
حچتها و طلعت و هي تضحك، غمضت عيوني و اني ازفر بعصبيه
التفتت ل سلام الي بعده على وگفته و هو يباوعلي و يضحك
رجعت ل شغلي و هو تقرب و گال
- يُسر انتي همين تنسين ؟
التفتت عليه و گلت
- من الاخر اي نعم اني لعبت بتلفونك، و اسفه اذا ازعجتك
- تؤ ما انزعجت، اصلاً هو ما بي اشياء ما اريد احد يشوفها
- شي مثل شنو ؟
حچيتها و اني اعگد حواجبي و هو تقدم شويه و گال بضحكه
- يعني محادثات او فضايح، مع انو الگروب بي كلام يخلي امي تطردني من البيت
انتي خوما قريتي الرسايل مالتو ؟
هزيت راسي بلا و هو گال
- عفيه لأن والله سمعتنا تصير بالحضيض
ابتسمت و رجعت اكمل شغلي، و هو شويه و طلع
ورا العشا راح سلام و عثمان ل بيت عمهم خليل
و بقيت گاعده وي عمتي لل١٠ و نص اجوا و كل واحد صعد للغرفة بس قبلها اخذ سلام حيدر مني و صعد و اني بقيت
باوعت ل عمتي الي گالت
- رجلچ صعد الحگيه
هزيت راسي ب اي و مسيت عليها و صعدت
لگيته گاعد عن التخت و مخلي حيدر بي، چان اقرب للكاروك من التخت
و اني اباوع ل حيدر الي يضحك من سلام يحرك اله العابات الي فوگ راسه، گلت هسا يبچي و اخذه بس هذا شو فرح بي
گعدت على التخت و بقيت اباوع ل سلام الي بقى عند حيدر الا ان نام
زفرت و مددت بالفراش و اني احس بالضوجه
ما متعوده اخلي ينام بوحده
باوعت ل سلام الي گال
- سبحان الله شلون گبل نام، و اكو ناس گالت متعود ينام بصفي
- سلام
- ها
جريت حسرة وگلت
- هيچ
سكتت احسن الي و اله حتى لا تصير عركه جديده
بس هو گال
- اذا تريدين رجعيه للچربايه، بس اني شفت التخت و عجبني يعني ما چنت مفكر اشتري الو
- اني ما اگدر الا ينام بصفي، تعودت عليه
- عادي اني انام بصفچ
باوعتله و رفعت تك حاجب بعصبيه
و هو گام يضحك، وگع گلبي من هاي الحچايه بس ارتاحيت من اردف
- يمعوده اشاقه، شنو شايفتني بايع روحي
حچاها و راح مدد بفراشه، و اني بقيت اباوع ل حيدر الي نايم و بسمه خفيفه على وجهي، باوعت ل سلام من رفع راسه و گال
- يُسر خوما صدگتي ؟ و تگعدين بالليل و تتخيلين اني نايم بصفچ
- سلام تصبح على خير
- بربچ جاوبيني صدگتي لو لا
گعدت و ذبيت الفراش عني هذا شبيه اليوم ؟
اعرف يجب يتشاقه بس مو هيچ !!
- لا ما صدگت
- ايي عفيه حتى تقطعين الامل
گمت اتلفت ادور شي اضربه بي ، هو مدد و گام يضحك
تنهدت يا ربي شلون وياه؟ تمددت اني و ذبيت الغطا على راسي و هو صاح
- طفي الضو
- عادي اني انام بالضو ما يهمني
حسيته گام من مكانه و راح طفه الضو، ضحكت و اني اغمض عيوني شگد احب استفزه سكتت گبل من رفع الغطا عن راسي و هو يگول
- شگد خبيثه
ابتسمت و رفعتلو حواجبي بخباثه
هو رجع الغطا بقوة على وجهي و گال
- نامي
- تصبح على خير
حچيتها باستفزاز و اني اضحك، سمعت تنهيدته و هو يگول
- و انتي من اهلو
بقيت مبستمه و اني اتذكر شلون ضاج ، والله يصير يضحك من يعصب، لا لا والله يخوف وقت الصدگ
فتحت عيوني بصعوبة و اني اسمع صوت ضرب على باب خفيف گعدت على حيلي و باوعت للشباك الدنيا بعدها ظلمه
سحبت تلفوني من فوگ الميز چانت بال٥
اجيت ارجع انام گلت اني داتخيل بس الصوت بعده و يا دوب ينسمع
خفت و اني اسمع الصوت تعوذت من الشيطان و اجيت اگوم اروح اشوف شكو، بس تراجعت
باوعت ل سلام الي غاط بالنوم ماكو غيره يگوم يشوف شكو
گمت و على كيفي مشيت باتجاهه ناديته و ما سمعني
تأففت و گعدت بصفه على الگاع و گلت
- سلام اگعد
و هماتين نفس الحاله ما گعد شگد نومه ثگيل؟
هسا اذا ابقى اگعد بي على كيفي يطلع الصبح و هو مو گاعد
رجعت سمعت الصوت وفزيت ، عضت على شفتي و باوعت للباب و رجعت باوعت اله
و اني اهز بي من كتفه و اگول بصوت عالي شويه
- سلام سلام گوم
.
سلام..
على صوتها فزيت مرعوبه دحگتلها چانت گاعده بسدي
گعدت على حيلي و گلت
- شبيچ ؟
- اكو صوت برا
رجعت مددت و اني اريد ارجع انام
- الهوى
- والله مو هوى شي يدگ اباب السطح
زفرت و رجعت گعدت ظليت ادحگ الها و هي شكلها خايفه
گمت على حيلي و اني اگول
- استغفر الله
شلون نايم نومه و ما احس الا فوگايه تصيح، الحمدلله ما صابتني جلطه
فتحت باب الغرفة و دحگت بالممر و اجيت افوت طخيت بيها و هي رجعت ليورا و ابتسمت و اني گلت
- ماكو شي ارجعي نامي تتخيلين
- لا والله اباب السطح شي يضرب
تأفف و طلعت فتحت باب السطح و دحگت ماكو شي اجيت ارجع بس حسيت شي چلب برجليه
نزلت عيوني و ابتسمت من لگيتها بزونه صغيره بيضه لافه ايديها على رجلي
دنگت عليها و شلتها انداريت ل يُسر الي گالت
- عزا هاي شنو
- اعتقد مبين شنو
دحگتلي بطرف عينها و فتت و سديت الباب، رجعنا للغرفة و هي بس ادحگ عليها و وراها گالت
- بس لا تريد تخليها هنا ؟
- اي،ما تشوفيها ميته من البرد حرام نعوفها برا
و اتجهت للصوبه و شغلتها، انقهرت عليها شلون ترجف و هي بعدها صغير يمكن عمرها شهر لو اقل
خليتها گدام الصوبه و هي گامت تتقرب الها ظليت امسح على ظهرها على الخفيف
دحگت ل يُسر الي گعدت على التخت قريب منا و گالت
- شلون صعدت للسطح ؟
- مادري
- زين شوصلها ؟؟
-اعتقد هجين بين طير و بزون ف اكيد عدها جناحات و طارت هين
يُسر شمدريني شوصلها للسطح، بس خطيه دحگيلها شلون ترجف من البرد
- اووي حياتي صغيرونه
ضحكت و اني ادحگ الها شلون مدت بوزها و حسيتها صدگ زعلت عليها
و هي من شافتني ابتسم گالت
- ماكو شي يضحك
- اييي حياتي ما يضحك
تأففت و هي ما عاجبها كلامي
انداريت عليها و گلت
- شكلها جوعانه روحي جيبي حليب مخفف بمي
- عادي من حليب حيدر
- اخاف يسوي بيها مغص
حچيتها بشقه و هي شكلها صدگت لمن گالت
- زين يصير اسويلها لبن اذا هذا يسوي مغص
- ولچ گاعد اضحك عليج عادي ما عليها شي
- استغفر الله
حچتها و طلعت و اني ظليت امسح على ظهر البزونه، فكرت صحيح شجابها للسطح ؟
بس طخت ابالي اكيد هاي سوالف دلال محد غيرها
شويه و فاتت يُسر و هي مخليه حليب بماعون صغير
خليته گدام البزونه و گعدت تشرب بي
انداريت عليها و گلت
- عرفت شلون وصلت
- شلون
- ماكو غيرها دلال مخليتها بالسطح هاي سوالفها
- ليش متأكد ؟
ضحكت و اني ارجع لمكاني
- اول ما سكنا هين باگت من طيور بيت جيرانه حمامتين، و ظمتهن بالمخزن جوه و لگيناهن و امي رزلتها لأن ما تحب الحيوانات
دحگت للبزونه و رجعت دحگتلي و گالت
- يعني اذا تعرف بهاي البزونه راح تگوم تحچي
هزيت راسي ب اي و هي گالت
- خطيه والله
- ترا اني الخطيه نعسان و عندي باچر دوام
- نام محد لازمك
حچتها هي و راحت طفت الضوه دحگت للبزونه نامت والله اذا صدگ دلال جايبتها الا ارزلها خطيه ماخذتها من امها و تلعب بيها
الصبح رحت للدوام و عفت البزونه نايمه جوه المرايه بمكان الطابوريه
من رجعت الظهر و صعدت فوگ لگيت باب السطح مفتوح رحت حتى اشوف منو برا
دحگت لگيتها دلال ورا الغراض ادور على شي
تقربت عليها و گلت
- شگاعد تسوين
هي جفلت و دحگتلي و ابتسمت گبل
- ما ادور شي
- ادورين شي بفرو كثيفاً ابيض لديه عينين بلون الزمرد و عدها اذانات طوال
حچيتها و اني الف حواليها و هي گالت
- سلام وينها
- بغرفتي
اجت تروح بس لزمتها و گلتلها
- اواش اواش، بالاول تگوليلي شلون صعديتها للسطح و انتي تعرفين امي تكره الحيوانات، و شي اخر مو خطيه تاخذينها من امها
- والله ما اخذتها من امها ! لگيتها بعرج الحايط نايمه من اجيت من المدرسه و شلتها و ظميتها بالجنطه و خليت الها اكل و شرب هين
- ولچ مو خطيه السطح بارد ليش تعوفينها فوگ
- جيت اخليها بالمخزن بس گلت رواء من تخبز تفوف و تشوفها
- فوتي يلا تا تشوفينها
فتنا جوه و سديت الباب و فتحت باب الغرفة دحگت لگيت يُسر گاعده يمها و بحظنها حيدر
گبل راحت دلال الها و گعدت تحظن بيها و اني اضحك عليهم
گلت الها بقيها هين و اني اقنع امي تحتفظين بيها
دگ تلفوني و من شفتو طلع رقم غريب، جاوبتو و طلع برا لأن هوسة دلال ما تخلي احد يسمع شي
من جاوبتو طلع ايو ياسر مهيمن استغربت منين الو رقمي
سألني شلوني و شلون احوالي و الاهل
حاولت اختصر المكالمه هسا اني شورطني و رحت الو
بس هو طول اخر شي گال
- شكلك مشغول
- لا عمي شهل الحچي
- اني استأذن عود ان شاء الله بغير يوم اتصل بيك
- اذنك وياك عمي، سلمنا و شكراً على الاتصال
ودعتو و زفرت و اني اگعد على التخت بغرفة الگعده دحگلي عثمان و هو ملتهي بتلفونو
- شبيك
- ابو ياسر اتصل
- عااد استلم دگ مكالمات
- مو ضايج من والله، بس اني اريد اظل مبتعد عنهم، و خصوصاً ياسر اشوف ابليس و لا اشوفو
- والله ورطت نفسك بروحتك الو
- قابل ادري راح يطلع ابو ياسر نفسيتو ؟ لو ادري چان انهزمت بكل ما لدي من قوة
گام عثمان يضحك و فاتت امي و هي ادحگلي و مخصوره، گلت الله يستر
- سويلم
- ها يمه
- شنو هاي البزونه الجايبها للبيت
حچت حچايتها و فاتت وراها دلال و هي حاظنه البزونه، تنهدت استغفر الله هسا اني متأكد دلال ذابتها براسي
- يعني تعرف اكره الحيوانات تروح تجيب بزونه و تگول ل دلال ديري بالچ عليها شنو هذا بله ؟
دحگت ل دلال بعصبيه، مو مال واحد يسويلها خير
هي من شافتني ختلت ورا امي
- يمه مو اني الي جبتها
- عجل منو ؟ ها و مخليها على السطح تا محد يشوفها همزين دلوله صعدت و شافتها
- غدرتك و اني اخوك
حچاها عثمان الي افتهم الموضوع و دحگ هو الاخر ل دلال
- بس اريد افتهم منين جبتها
- يمه والله مو اني بنتچ هي الي جابتها اني شدخلني و لگيتها بالسطح و فوتتها للغرفة
- دحگ دحگ شلون يبري نفسو، سلام ترا ما راح احچي عليك بس هسا تشيلها و ترجعها منين ما جبتها
زفرت و دحگت ل دلال و اني اهز راسي اتوعد بيها
فاتت يُسر و لزمتها امي و گالت
- تعاي ولچ رجلچ جاب البزونه مو ؟
دحگتلي يُسر و رجعت دحگت ل دلال الي بعيونها نظرة رجاء
- يُسر انتي مو گعدتيني گلتي اكو صوت برا ؟
هزت راسها ب اي و حمدت الله انها ما كذبتني، رجعت امي سألتها
- دحگي هين و لا ادافعين عن رجلچ، احچي الحق و لا غير الحق
سكتت يُسر و دحگتلي و اني رفعت الها حاجبي
و هي تحممت و گالت بهدوء
- عمه الصبح بال٥ گعدت على صوت ضرب بالباب
- بدون تفاصيل يلا احچي
تنهدت و ابتسمت عليها و اني اشوفها ضاجت من امي قاطعتها
- عمه دلال هي الي مخليتها بالسطح و سلام فوتها للغرفة لأن لگاها بردان
اندارت ل دلال و كملت
- و انتي مو گلتيلي لگيتها يم حايط ؟ و خليتها بالجنطه
ضحكت و صاح عثمان
- ظهر الحق و زهق الباطل، سلام بريئ بريئ
- انچب
حچتها امي و لوت شفايفها و سحبت دلال وياها و هي تگول الها
- والله ثمَ والله اذا شفتها بغرفتي اله اشنقچ انتي واياها
دحگت ل يُسر و گلت بضحكه
- لو ما الله ثمَ انتي چان رحت بداهيه
ابتسمت هي و طلعت، و اني ظلت بسمتي على وجهي انداريت ل عثمان لمن گال
- تطورات ما شاء الله
- نعم ؟
- اقصد تطورات عمرانيه صاير چثيره
- اي صح
هو گوه كتم ضحكته و اني همين، بس بالاخير ضحكنا و على ضحكتنا فاتت دلال تريد تاخذ تلفون امي تمشي بحذر و نظراتها عليه
و اني بعدني گاعد بمكاني و ادحگلها گلت
- عثمان تعرف شنو يگولون ؟
- شنو يگولون ؟
- يگولون درب الكلب على القصاب
هي اندارت عليه و گالت بزعل
- يعني اني چلب
- عثمان
- ها خويه
- و يگولون الي بعبه معزه شنو تسوي ؟
- تثغي
و دحگتلها و اني ارفع تك حاجب هي زفرت و ضربت الگاع برجلها و طلعت
- سلام هلمره شد عليها، ترا عينها طالعه
- هو منو طلع عينها غير امي
- و انته
حچاها و گمت اضحك، والله يمكن او مو يمكن اكيد
دللتها چثير ف گامت ما تخاف منا
مرت الايام الجايه بهدوء نسبي بيني و بين يُسر، اني من جهتي حاولت شويه اخفف من مداهرتي وياها بس مو بيدي من اشوفها ما اگدر الا احچي
و هي شكلها فهمت و عرفت طبعي ف گامت تتقبل الشقه و اذا ما تتقبلو تسكت و اني بدوري اسكت همين
فرحت بهذا الشي، لأن ما تعاركنا لو احد غث احد بحچايه، گلت ما طول ما تعاركني لو تزعجني خليها تتصرف شلون ما تريد بس بحدود اكيد
الي جانب هالشي اتصالات ابو ياسر ما انقطعت يظل يتصل بيه بين كل تلاث ايام لو يومين يسأل و يتطمن و بهاي الاسبوعين رحت زرت جمال مره وحده و اخذت الو غراض و ما گدرت اخذ يُسر بس حملت سلامها الو بنفس اليوم رجعت بس متأخر قبالت المغرب وصلت البيت
بعد ما الح عليه ابو ياسر انو اجي عليه للبيت شربت استكانة چاي و الي قدمتها الي بنتو
و بس كملتها استأذنت و طلعت
طبيت للغرفة بال١٠ و نص بالليل بعد ما چنت احاچي ابو ياسر الي اتصل بيه
خليت تلفوني على الشحن و لگيتها ماده الي فراشي
طلعت الي ملابس و بدلت حتى انام، دحگت ل يُسر و كانها تريد تنام اجيت امدد بفراشي بس وگفتني من گالت
- سلام
- ها
- شو ابو ياسر هواي يدگ عليك..
.
يُسر..
سألته و هو بقى يباوعلي باستغراب
ما اعرف ليش ما حبيت هذا ابو ياسر مو قصة انو ابنه الي دعمه جمال و اخاف يأذيه
بس احس اكو وراه شي، اوكي هو ابن صديقه بس حسيت اتصالاته هواي و يبقى يسأله عن الاهل و اوضاعه
تحمم و تعدل بگعدته و گال
- يعني عادي صديق الوالد، و صار بمثابة معارف النا
- ما ادري بس ما حبيته
ضحك هو و گال
- اصلاً انتي ما تحبين احد بقت على ابو ياسر
باوعتله بعتب، والله صوچي اني الي فتحت موضوع وياك
هزيت راسي ب اي و گلت
- رحمه الله والديك
هو سكت و باوعلي و عرفني زعلت من حچايته
اني ما اكره احد والله، بس ابو ياسر ما ادري ليش بديت اضوج منه
باوعتله و تنهدت يعني سلام هيچ يشوفني ؟ اكره و ما احب احد ؟ زين اني شوكت گايله اله اكره فلان ؟
اي صح مرات اگولها اله بس من يقهرني لو يضوجني
نزلت دمعتي و مسحتها بسرعة، انقهرت كلش و اني منا صايره على اي شي ابچي
انداريت عليه لمن گال بخفوت
- خوما زعلتي؟
ما جاوبته و اني التهيت امسح بدموعي الي ما اعرف هيچ صارن رخيصات عندي و ينزلن بسهوله
گام هو و گعد بصفي على الچربايه وخرت شوي و سحبت نفس حتى ابطل ابچي
- يُسر صدگ چذب ؟ والله ما عبالي تزعلين من هيچ حچايه
التفتت عليه و اني اريد احچي بس سكتت من صار وجه مقابل وجهي و ما يفصل بينا الا سينتمرات قليله يلعت ريگي و هو ابتسم عيونه مثل ذاك اليوم صارت عسليات كلش، حسيت گلبي راح يطلع من مكانه من گد ما يدگ، لدرجه سمعت نبضاته باذاناتي
مادري شگد بقينا على هذا الوضع، الي انقسم عقلي و گلبي ل حزبين واحد رافض و يريدين اوخر و الاخر لا، نظرات عيونه و لمعتهن و الي چنت حايره وين شايفه مثلهن، هسا تذكرت بعيون حيدر
نفس النظره الي چات يباوعلي بيها و نفس المعه
بس هسا.. احس نظرات سلام اعمق و اقوى احس راح تدمع عينه مو لمعه بسيطه، حسيت نفسي راح اضعف گدام نظراته الي چنت اتجاهلهن
لذلك وخرت و هو مثل الفز و رجع ليورا، بس عيونه بقت مركزه بملامح وجهي
شويه و گال بصوت ناصي
- اكو شي جوه عينچ
صدگته و اجيت اوخره بس هو لزم ايدي و گال
- عوفي
غمضت عيوني من هو وخره و گال بخفوت
- تمني
فتحت عيوني و گلت
- شتمنى
زفر و هو يخلي گدامي شعرايه من رموشي الي چانت على خدي و گال
- خربتي الموضوع
- اي موضوع ؟
- شفت فلم هندي ياخذون رمش الشخص و يگولوا تمنى و گبل يتمنى و تتحقق الأمنيه بس انتي شسويتي ؟ خربت
- و انته مصدگ هاي الخرافه ؟
- بصراحه؟ لا
ضحكت و اني اباوعله و هو فرك رقبته من ورا
عرفته حچه هيچ حتى يضيع الخجل و الاحراج بسبب المواقف الي صار، عرفت اطباعه و عرفت انو اكو اشياء يسويها بس حتى يضيع شغلة اخرى حتلو ما متوقعه مثل هسا
- بعدچ زعلانه ؟
سألني و اني هزيت راسي بلا و جاوبته بصراحه
- لا مو زعلانه
- والله
- والله مو زعلانه
زفر براحه و گام من مكانه و تمدد بفراشه و اني ابتسمت و تمددت بمكاني حيدروي چان نايم بالتخت الي صار شي ما يگدر يستغني عنه و اذا مرات اشتاق اله و اريد انومه بحظني يگوم يبچي
گمت طفيت الضو و رجعت لمكاني، غمضت عيوني حتى انام بس گال سلام
- يُسر
- همم
- اريد كعك مثل الي سويتي ذاك اليوم
تنهدت و بسمه گلت
- ان شاء الله
- اذا سويتي باچر ف يعني انتي مو زعلانه
- گول من البدايه سويلي باچر
- اي
- ان شاء الله اسويه
رجعت تعدلت بمكاني و بقيت گاعده و اني ابتسم عبالك ثوله قبل لا اضرب نفسي على خدي بخفه و اگول بگلبي
- كافي تضحكين نامي
نمت هذيچ و بسمه مرسومه على وجهي، سببها الي نايم و مغطي راسه الحركه الي خلاني اسويها رغماً عني، و كانو عداني بيها
الظهر تقريباً بال١٢ و بعد ما كملنا كل الشغل و بقى بس نصب الغدا و احنا ننتظر ب دلال تجي من المدرسه
بديت اشوي بالكعك و ساعدتني رواء، گلت احسن من انو اگعد اشوي ورا الغدا هسا اكملهن على السريع
فزينا على صوت الباب الي انفتح و دلال الي فاتت و اجت توگع بالگاع لو ما تتماسك طلعت رواء تركض الها و لزمتها من اكتافها و گالت الها
- شبيچ ولچ ؟
طلعت اني هماتين و باوعت ل دلال الي گامت تبچي بصياح
- صخام رائد الله يكتله ضربني و دفعني
اجت تفلت نفسها من ايد رواء و تريد ترجع تطلع برا
لمحت رائد و سلام برا، حسيت راح تصير مشكله بينهم لأن وجه سلام ابداً ما يطمئن
- رائد حقير تفو عليك شگد اكرهك
گامت تصيح دلال و فلتت من ايد رواء و ركضت للباب بس لزمتها اني و هي گامت تدفر تريد تطلع و تصيح
- والله العظيم اكرهك، انته منو حتى تضربني
- و قز القرط كاافي
صحت بيها و هي التفتت عليه و دموعها گامت تنزل على صياحها طلعت عمتي و هي تصيح شكو شكو
تركت ايديها و حاوطت وجهها بيدي اثنيهن و اني احچي وياها بصوت ناصي
- اشش لا تبچين
- الحقير ضربني و اني ما مسويه شي
بس حچت كلمتها اندفع الباب و وگع رائد على الگاع
فات سلام و طبگ الباب بعصبيه و نزل عليه، گامت دلال تبچي و تصيح و عمتي اتجهت الهم حتى تفك رائد من ايد سلام
الي رفعه من ياخة قميصه الاسود و هو يضربه بوجه و خلاني اني ارجع خطوات ليورا، سلام الي چان البارحه گدام عيني و كله هدوء و سلام على على اسمه
صار هسا عباره عن بركان عيونه الي طغت بيهن لمعة غريبه عليه منه، صارت حمر و وجه البيضاني صار كانو حمر مقتد
سلام.. صح مرات اسم على مسمى بس وقت الغضبه احسه يصير شيطان
رجع هزه بعصبيه و هذا ساكت و كانو جماد بدون روح و بغضب و صوت عالي خلاني ارجف بمكاني و اني احس ب رواء ورايه الي خوفها ما چان اقل من خوفي
- يا ساقط يا ادب سزز حاط عينك على طفله
.
السلام عليكم ورحمة الله وبركاته
شلونكم
اتمنى البارت عجبكم، مع اني گوه كتبته والله..
كلش ضايجه بسبب الاوضاع الي دتصير
و بلحظه گلت ما انشر و لا اكمله بس تذكرتكم و كلت عيب بحقي انو اتركم بدون بارت
باچر ما اعتقد اگدر انزل بارت..
و الله يرحم الشهداء و يصبر ذويهم، اذكروهم بقراءة الفاتحه على ارواحهم الاطهار 💔
و الله يفرج عن كل اسير و ينصر كل مظلوم 💔..