وردة
البيت اللي دانعيش بيه اقصد بيت فاروق كلش حلو وكلش جبير والاثاث الموجود بيه فاخر وراقي بعمري ماشفت هيجي غراض كلها مبينه استيراد حتى التحفيات الطابق الاول بيها استقبال كبير وصالون كبير كلش وياه ركن لميز الطعام وتجهيزاته وبيها المطبخ وثلاث غرف نوم وحدة لوالدة فاروق ووحدة لرشا ووحدة للاطفال وفوك الطابق الثاني اكو الجناح اللي دانعيش بيه بيها غرفة نوم وصالون داخل بعض اضافة للحمام الطابق الثاني مااعرف عدد الغرف بيه بس يمكن خمسة اوسته .
نزلت ورا مابدلت ولبست كلابية مغربية باللون الاخضر كلش حلو نقوشاته . نزلت شفت ام فاروق اقتربت مني وهي مبتسمه باستني واني لزمت ايدها وبست ايدها احتراما الها هي انسانه كلش طيبه وراقية . وبوستني رشا وهي تباركلي شفت الطفلين لازمين ايد رشا جريتهم من ايدها وبوست بيهم وسالتهم _اكيد جوعانين تحبون تاكلون ويايا جاوبني يوسف وهو يهز براسه علامة الموافقة اما حنين اكتفت بالابتسام
اخذتهم من ايديهم وتوجهنا لميز الطعام كعدت يوسف على يساري وحنين ناعمة وصغيرة بحظني وفاروق كعد على يميني اني بطبيعتي كلش احب الاطفال اتذكرت مريومة اختي واشتاقيتلها .خليت الاكل كدام يوسف وبدا ياكل وحنين ااكلها بيدي حسيت فاروق دا يراقبني
فاروق _حبيبتي وردة خلي حنين على كرسيها وانت اتريكي اخاف داتزعجج
وردة _، لا ابد ماتزعجني احب اكل وياها .
الصراحة جنت محرجه وخجلانه ومااكدر اكل ردت من الله انشغل بهاي المخلوقة الحلوة .
كانت حنين مستسلمة الي بشكل غير طبيعي واني اخلي اللكمة بحلكها حبيت هدوءها .
ورا ماتريكنا وكعدنا بالصالون حتى نشرب جاي
اقترب فاروق من عندي ولزم ايدي ووكفني كدامه وطلع علبه من جيبة وفتحها جانت كلادة ذهب ناعمة وحلوة همس باذني
هاي عاداتنا الزوج يهدي زوجته صباحية العرس هدية شيلي شعرج حتى البسها الج.
لميت شعري واقترب مني كلش هوايه انفاسه تمر على عنقي وريحة عطره سطرتني . مرت تلك اللحظات كانها سنه اخيرا انتهى ولزمني من كتفي وباس جبيني . كعدت وكعد بصفي وخلى ايده ع كتفي جان محاوطني بيها حسيت بخجل واول مرة هيج احس كلبي يدك سريع والعرق تارس جبيني .
اني جان محور تفكيري هالليلة وين انام البارحه ماحد جان موجود بالبيت فاروق نام بالصالون هالليلة شلون ادبرها فكرت هواية اكو قنفة بالصالة داخل جناحنا خوش فكرة اكدر انام عليها. فزيت على همس يم اذاني
فاروق _بس لو اعرف على شنو هالصفنات جان ارتاحيت .
ابتسمت واني اجاوبه
وردة _ ها ...لا ماكو شي
فاروق _ مايخالف ماالح عليج بس انتي كلش طالعة حلوة الجلابيه لايكتلج ولو انتي شتلبسين يلوكلج .
كلمات الغزل البسيطة اللي كالها احرجتني وحسيت بالحرارة يمكن وجهي صار احمر من الخجل
التفتلي مرة ثانية
فاروق _شنو رايج قبل ماتخلص العطلة مالتج وقبل ماترجعين للكلية نسافر لتركيا اسبوع نغير جو . استغربت فكرته اني بحياتي ماطالعة خارج البلد ولا راكبه طيارة ومااتصور نفسي لوحدي وياه بغير بلد وبغرفة وحدة الخوف دخل كلبي جاوبته .
وردة _ بشرط ناخذ يوسف وحنين ويانا .
فاروق _ اشمعنى يوسف وحنين المفروض انتي بشهر العسل .
وردة _ خلي هما هم يغيرون جو ويانا .
مااعرف طكها ضحكة وبعدين اتمالك نفسه وكال
فاروق _ خلي يجي وكتها والله كريم .
وردة _ليش ضحكت الله عليك ؟
فاروق _ ماكو شي اتذكرت فد شغلة
&&&&&&&&&&
وبوكت الليل ورا العشا خلينا الجهال بفراشهم وماعافو ابوهم الا ورا ما قرالهم قصة وبعدين عفناهم وصعدنا لغرفتنا اخذت مخدة وبطانية حطيتها على القنفة
فاروق _القنفة مو مريحة نامي على صفحة السرير واخذي راحتج
وردة _ عادي اني مايهمني باي مكان اكدر انام
فاروق _زين انتي نامي على السرير واني على القنفة .
ورده _ لا مايصير صدكني اني على القنفة ارتاح اكثر .
فاروق _ مايصير ياعمري هاي موليلة واثنين وثلاثة لازم تتعودين تنامين على السرير وصدكي اني ملتزم بوعدي وماراح اجبرج على
شي ماتريدينه .الا اذا انتي ماكنتي ضامنه نفسج انه تتقربيلي .
ضحكت من كل كلبي على حجيه
وردة _مادام المسالة صارت تحدي راح انام على السرير . هالمرة هو ضحك
فاروق _اها هسة تمام .
رجعت المخدة والبطانية وخليتها على السرير حتى انام .