وردة
حاولت مرات هواية اشكي لنورا على تصرفات ابنها وانبهها بس جانت هي على طول تغالطني وتكذبني وتهددني اذا حجيت يم بابا تخليه يطردني من البيت لان البيت الجديد مسجل باسمها .مابقت بايدي حيلة غير اني اقاومه وحدي لازم اخليله حد لتصرفاته .
ورا فترة مضت انتقلنا للبيت الجديد والبيت الجديد مكون من طابقين الطابق الاول غرفة نوم وحدة لبابا ونورا وصالون واستقبال ومطبخ والطابق الثاني مكون من ثلاث غرف وحدة اليه ووحده للولد التوم والثالثه هم اثثوها لفارس بهاي اللحظة عرفت راح تزيد معاناتي بهذا البيت
وجنت دايما اخاف من يرجع فراس ايام العطل وجنت احاول ابد ماابقى وحدي من يكون موجود او اذا خلصت شغلي ابقى بغرفتي واقفل بابي عليه واقرا هالسنة اني سادس وصممت على النجاح وان اجيب معدل يأهلني ادخل كلية
زينه .وبالمدرسة مستواي اتحسن عن الاول شوية وعندي صديقة وحدة وياية اسمها زهراءجنت احبها كلش ومااخفي عليها شي وجانت ماتقصر ويايا وتسمعني وتنصحني كاخت هي هم جانت يتيمة بس يتيمة الاب .
اليوم رجعت من المدرسة وجانت نورا دا تحضر اكل اشكال الوان دجاج على فاصوليا على تمن والحشوة ويا سالتها مستغربه _شنو نورا عدنا ضيوف لو شنو ؟جاوبتني وهي مشغولة ويا الطبخ مالتها _لا ماكو ضيوف بس فارس ابني راح يجي شتقصدين بحجيك .انقبض صدري من انذكر اسمه سالتها
وردة_ اشعجب يجي اليوم مو خميس ولا جمعة
نورا _وانتي اشعليج ياهو مالتج ؟
وردة _ماعليه بس عفية خليه بعيد عني كوليله يفك ياخة من عندي ترة مايلوم غير نفسه افتهمتي
نورا _ هم رجعتي اشو صايرة وكحة وتتراددين اني مو كتلج كبل ليش داتركزين ويا ابني كل هاي التمثيليات علمود تخلين ابوج يطرده من بيت امه تحلمين يلة وولي من كدامي روحي
بدلي وتعاي ساعديني بلا لغوة زايدة .
اني اعرف شمااسوي مايفيد فلازم احاول احمي نفسي من عدهم اثنيناتهم .ورا ما بدلت نزلت حتى اساعدها اعرف بيها اذا اتاخرت عليها تكوم تصيح .دخلت المطبخ مريم اختي الصغيرة جانت كاعدة على الميز هي حلوة ودبدوبه كلش احبها بستها من خدها ورحت على الثلاجه اطلع غراض الزلاطة حتى اسويها .ورا ماكملت الزلاطة رحت على السنك اللي جان متروس مواعين وبديت اغسل بالمواعين ونورا مشغولة تاكل بنتها مريم واني وكفتي صايرة بصف الشباك رفعت راسي شفته لفارس دخل من الباب الخارجي وك
بل على المطبخ .
فارس _السلام عليكم . جاوبته امه وكامت باسته وهي تحظنه
نورا _اشلونك ابني حبييبي ليش هيجي ضعفان ؟ هو ماجاوبها ووجه كلامه اليه
فارس _اشو اكو ناس حتى السلام ماترده ،؟
جاوبته امه _ماعليك بيها هاي خبلة خليك ويايه
_ليش هلكد ضعفان ؟؟-
فارس _ عدنا تدريبات مكثفة مانلحك نرتاح شطابخة اليوم ؟
نورا _طابخة دجاج وتمن ويابسة ادري بيك تحبه هواي
فارس _عاشت ايدج يوم .
اني جنت مشغولة ومتجاهلته وبطرف عيني شفته كعد على الميز ودا يراقبني حاولت اكمل بسرعة حتى اطلع من المطبخ .
اني جنت كلش حريصة بالاوقات اللي يكون بيها فارس بالبيت ومن اكون بغرفتي اتاكد من قفل الباب ومن اكون اشتغل بالمطبخ او الصالة كنت احرص ان لا اكون بوحدي حتى اتاكد انه مايكدر يتقربلي جنت خايفة منه كلش لان جنت احس هو وامه دا يخططون لشي كبير ويريدون ياذوني بيه .
ومن يكون هو موجود وامه كاعدة يحاول يبسمر لي بالحجي ويذب حجي اليه يضايقني بيه واني ابد مااحاول اجاوبه حتى ماانطيهم فرصة يغثوني بيه .
مرت الايام وموعد الامتحانات النهائية اقتربت واني اريد اقرا ونورا ابد ماتنطيني مجال هي ملتهية بالطلعات والونسة واني ابتلي بالشغل والطبخ ومالكي وكت وكت للقراية اضطر اسهر الليل كله اقرا .
اني تعبت ومابقت عندي طاقة للتحمل وفكرت لازم الكه حل .وفكرت احجي ويا بابا حتى يخليني هالفترة اروح بيت بيبي واتفرغ للقراية وفعلا حاولت ويا بابا وعلى الرغم من معارضة نورا واخيرا وافق .
فرحت هواية ولملمت ملابسي وكتبي وغراضي ورحت بيت بيبي وفرحت لسببين اول سبب اني راح اخلص من فارس ولو بشكل مؤقت والثاني انه راح اكدراتفرغ لدراستي .
وعلا ببيت بيبي رحبو بيه وعمي فرحان اللي يسكن وياهم وزوجته رحبوا بيه وعلى الرغم من انه بيتهم هوسة وكله خطار وعدهم جهال صغار بس جنت احبس نفسي بغرفة بيبي واكعد اقرا ووكت الغدا او العشا انزل فت ساعة اساعدهم بالصب واكل وياهم .مرة عمي ليلى كلش حبابة ماجانت تخليني اشتغل ومرات من يصير كلش هوسة جنت اصعد للسطح وافرش لي حصيرة واكعد اقرا .وجنت اقرا بتصميم وعزم ماجنت اريد اطلع معدل كلش جبير يكفيني اطلع معدل يدخلني تربية او علوم اي شي بس يصير عندي شهادة واكدر اشتغل بيها واخذ استقلاليتي .وفعلا بدت الامتحانات وكل امتحان يخلص احس هم وانزاح من على صدري .
واخيرا خلصت كل الامتحانات ورجعت للبيت .
