وردة
رجعت من يم اهلي للبيت وعلاوي جان نايم بحظني ردت اصعد فوك حتى اخليه بفراشه صاحلي ليث
ليث _ اخذي علاوي فوك وتعال للصالون اني واحمد نريد نحجي وياج بموضوع .
وردة _ عفية ليث بس لا نفس الموضوع
ليث _ هاي انتي شبيج صدكي اني ماميت عليج
اني لوماجهال المرحوم . ترة اني هم ماريد اتزوج . على العموم اخذي علاوي وتعالي .
صعدت فوك واعصابي تلفانه خليت علاوي بفراشه ونزلت شفت احمد وليث بالصالة كاعدين
رحت كعدت يمهم .
وردة _ اتفضلو اسمعكم بس اذا على موضوع الزواج بلاها لاتتعبون حالكم هو مو غصب اني مااريد اتزوج .
باوعت على ليث ونظراته كلها غضب ودايفرك ايديه بقوة
احمد _ استهدي بالرحمن وردة الموضوع هو ادارة الشركة انتي ماتكدرين اتديريها وحدج والشركه حاليا ماعاجبني وضعها هيج .
وردة هاي سهلة ماكو اسهل منها
احمد _اسمعج
وردة _ اني واثقة منكم انتو كدها اسوي وكاله لواحد من عدكم يديرها
احمد _ والايراد
وردة _، اول شي شهريا نطلع من الايراد مصاريف البيت والشركه وبعدين الباقي نطلع حصة الاطفال ونسوي حساب بالبنك باسمهم وليث راح يكون له حصة منةالارباح او راتب وحصة ماما تستلمه وحصتي تكدرون تخلوها بالبنك لو باسم الجهال لو باسمي ماتفرق عندي وهذا الوضع لحد مااتخرج من الكليه ورا مااتخرج راح اساعد ليث بالشغل .
اشوف هذوله كل واحد يباوع على الثاني
احمد _ والله مااعرف شااكولج صدك ماجان غلطان المرحوم من اصر انه يتزوجج .
شفت بعيونهم اثنيناتهم الاعجاب والفخر
وردة _ هسة خلصت مشكلتكم .
احمد _ بس لو ترضين بالزواج يابنت الناس حتى ارتاح .
كمت من مكاني واني دااحجي وياهم
وردة _ اني اسفة اترخص من عدكم اذا مابقا شي
احمد _ اتفضلي اخذي راحتج .
وردة _ ليث باجر الصبح انشالله ماراح اروح للكليه ومن الصبح اروح اني وياك لكاتب العدل نكمل الوكالة وبعدين نروح الشركه ونجتمع ويا استاذ فاضل نتفق على صيغة الادارة .
كملت كلامي وطلعت لغرفتي .
الصبح لبست كوستم اسود بنطلون وسترة سودة وربطت شعري ذيل حصان وخليت علاوي يم سارة ونزلت شفت ليث كاعد يتريبك ويا امه صبحت عليهم ._صباح الخير
ليث _، صباح الخير ،
ام فاروق _ صبحج الله بالخير بنتي
وردة _ اني جاهزة
ام فاروق _ دعدي بنيتي اتريكي
وردة _ مااشتهي عمة
ليث كام واخذ سويج السيارة وطلع واني طلعت وراه
رحنا لكاتب العدل كملنا الوكالة وراها طلعنا للشركة . ومن دخلنا مكتب فاروق اجتي ببالي كل الذكريات اللي جنت احاول انساها او اتناساها حتى اكدر اعيش غوركت عيوني بالدموع عفت ليث وطلعت للحمام .بجيت هوايه
كلبي انمرد وروحي فرفحت .
ورا لحظات مسحت دموعي وغسلت وجههي وطلعت .
اجتي عيني بعيون ليث ......شاف عيوني مورمه سالني
ليث _ اكو شي وردة ؟ شبيج عيونج حمرة ؟
وردة _ لا ماكو شي . هسة اخابر استاذ فاضل يجي .
كملنا كلشي ورجعنا وبالطريق عرض ليث نروح لمطعم حتى نتغدى رفضت لان علاوي عايفته وفكري مشغول .
وبمرور الايام بدا ليث يدير الشغل بالشركه بمساعدة فاضل طبعا واني اداوم الصبح بالكلية ومن ارجع اساعد عمتي و اهتم بعلاوي وحنين واراجع الدروس ويا يوسف استقر ليث بالطابق الارضي وبغرفة رشا القديمة حتى اخذ راحتي بالطابق الثاني . مرات يوسف وحنين يعجبهم ينامون ويانا بغرفتي ويا علاوي واحيانا لايبقون جوا بغرفتهم .
فد يوم الصبح جنا نايمين الصبح علاوي بسريره الصغير وحنين نايمه بحظني ويوسف بصفها
اندك باب الغرفة جنت نعسانه وبالفراش مافتحت عيوني عبالي سارةىالمربية وكلتلها ادخلي .
فتحت عيوني واشوف ليث فوك راسي جنت لابسة بيجاما مال نوم خفيفة وبسرعة جريتىالجرجف عليه
وردة _ خير ليث اكو شي ؟
ليث _ العفو جنت اريد احجي وياج عندي شغلة.
وردة _ المفروض مو راسا تدخل
ليث _ دكيت الباب وكتيلي اتفضل
وردة _ اني عبالي سارة اتفضل للصالة العفو على ماابدل واجي
ليث _ خوش لعد انتظرج .
نزلت ورا مابدلت وكلت لسارة تصعد فوك يم الجهال .
دخلتةالصالة لكيته كاعد منتظرني اشر لي اكعد
وكعدت مقابيله جت عيني بعيه نفس عيون فاروق مرسومه رسم ونفس اللون عيونه شدتني بس نظراته مو مريحة .
ليث _ اشعجب يوسف وحنين ينامون يمح .
وردة _ متعودين حتى من جان فاروق الله يرحمه جانو ينامون يمي . هم محتاجيني بس الصراحة اني محتاجتهم اكثر محتاجه لهفتهم وحبهم وحظنهم .
ليث _ اني محتار بيج صدك انتي لغز وكل يوم اكتشف شي جديد بيج .
وردة _ هسة المهم شنو الموضوع اللي جنت رايدني بيه .
ليث _ فاضل خابرني اليوم اكو اجتماع ومحتاجينج اكو اوراق لازم توقيعج شخصيا
وردة _ ماشي ساعة بيش الاجتماع
ليث _ ساعة ١٢
وردة _ هسة ساعة عشرة على مااتريك اني والجهال احضر روحي ونروح.
وفعلا رحنا اثنيننا للشرعة وكملنا الاجتماع وخلصنا كلشي صارت الساعة ٣ رجعنا للبيت .
*************
مرت الايام وتخرجت اخيرا من الكليه وخلصت من الدراسه . ماحضرت حفلة التخرج لانه جان امنيتي بوكتها احضرها ويا فاروق .
فاروق صارله تقريبا سنه ونص متوفي وابني صار عمره سنه وست اشهر وبدا يمشي خطواته الاولى اخته واخوه يحبوه كلش . وليث صار ياخذه مرات وياه ويطلعون وحدهم ومرات ياخذهم ثلاتهم اتعودا على ليث وصارو مايفاركونه .
اني صايرة ماافتهم على ليث مرات اشوفه عصبي نا ر وما يتحاجي ويصير عصبي على اتفه الشغلات ومرات حنون وحساس .
وبعض المرات يتاخر برة ومن يرجع احسه مو طبيعي وكانه سكران لان هو ماخذ على جو برا هناك يمكن جان متعود على الشرب .
اني احس هو يميل اليه ويباوعلي بنظرات وقحة بس ماشفت منه اي تصرف يسيئ اليه .
