وردة
الصبح غسلت وجههي وباوعت بالمراية ....ياربي شلون اروح للدوم ووجهي بيه كدمة زركة حاولت اغطيها بالمكياج مافاد كلش نزلت شعري عليها شوية ولبست نظارتي الشمسية .
رحت للشركة حاولت اتجنب كل شخص يمر من كدامي ودخلت غرفتي بهدوء وماهي الا دقائق رن التلفون شلته جان فاروق يطلب كهوته وبسرعة سويت الكهوة ووديته لغرفته نزلت شعري على وجههي واتجنبت اباوع بوجه فاروق وخليت الكهوة على الميز كدامه ردت اطلع صاحني
_ وردة ...دقيقة من فضلج تعاي كعدي .
انداريت مجبورة . كام من مكانه واقترب من عندي كسيت بخوف و انكسار لانه راح يدقق بوجههي اقترب هوايه مايفصلنا غير بضع سنتمترات رفع ايده وشال الشعرات الموجوده على عيني ورفع وجههي بيده رفعت عيني والتقت عيوننا
_ هاي اشبيه وجهج
ورده _ ماكو شي
فاروق _ خليني اخمن فارس ....ابوج ..ماتصور ابوج يسوي هيج شي ...الى متى تقبلين بهيج وليش هو ديسوي هالشي هذا مايتوب .....مو كافي اللي صاربيه صدكيني ذاك المرة من كالتلي رشا بانه داياذيج صممت اكسر له ايده اللي مدها عليج وفعلا بس هذا ماناوي يجيبها لبر .
بقيت دقايق مشدوهة ومصدومة لكلامه هو ضاربه وليش وعلمود شنو ؟
فاروق _ اعرفج مستغربه للامر
وردة _ انت اللي ضربته وليش ؟
فاروق _ مو اني اللي ضربته دزيتله جماعة حتى يربوه زين بس الظاهر مادايفيد . تسالين ليش ؟
لانه انسان حقير ويستاهل . واني مااقبل اي شخص بالعالم يأذيج ولا ينظر لج نظرة قذرة . اني بعد مااتحمل ياما اقتله لهذا الولد ياما اضطر احميج بنفسي .....اتزوجيني وردة حتى تحمين نفسج وتكدرين تحققين كل احلامج بعيد عنه . صدكي زواجي منج ماياثر على شي اذا تحبين يبقى زواج على ورق تكملين دراستج وطموحج وايمتى ماحبيتي تسوينه زواج حقيقي او اذا مااتوالمنا اوحسينا احنا ماراح نكون لبعض تكدرين تفترقين عني .
وردة _ وليش كل هذا الشي وشنو اللي اكدر اقدمه اللك اني .
فاروق _ تديرين بالج على اطفالي وترجعيلنا الجوالاسري اللي نفتقده اني وياهم لاتفتهميني غلط اني مااريد مربية اني اريد زوجة وعائلة ودفء اسري ومستعد انتظر العمر كله حتى تحبيني لانه اني حبيتج ومجرد وجودج الى جانبي وتكونين بامان ويايه كافي ترة اني اللي سويته بفارس مجرد قرصة اذن ومستعد اسوي الاسوء اذا مس شعرة منج .والوظيفة الي اتوظفتي بيها صح اني جنت محتاج موظفة بس اختاريتج انتي حتى اطمئن تكونين يمي وتنشغلين عن جو البيت واهم شي تبتعدين عن فارس . الصدمة جانت كبيرة وبفيت لحظات حسيت بيها راح ينغمي عليه ومعدتي كامت تلعب
وردة _ ممكن اترخص اليوم وارجع للبيت احس نفسي موتمام
فاروق _ ماشي اني اوصلج
وردة _ ماكو داعي تترك شغلك اني اروح وحدي
فاروق _ ماتروحين وحدج راح اخابر السايق حسن هو واكف جوا ماعنده شي يوصلج ولاتكوليلي تاكسي .
وردة _ ماشي
نزلت من البناية ولكيت السايق واكف ومنتظرني ركبت وكوة حابسة دموعي والطريق صار طويل اريد بس اوصل غرفتي .
واخيرا وصلنا نزلت ودخلت البيت تلكتني نورا بالمطبخ
نورا _ اشعجب رجعتي من وكت
ماجاوبتها وركضت على غرفتي ذبيت نفسي على الجرباية وشهكت بالبجي ومااترف ايمتى غفيت . كمت وجه الصبح واني بملابسي دخلت الحمام سبحت وطلعت شفت البيت كلش هادئ الكل نايمين صليت الفجر وكمت ادعي ربي ينور لي طريقي
الساعة بالسبعة رن تلفوني كان المتصل فاروق شلت التلفون وجاوبت
وردة _ الو
فاروق _ صباح الخير اشلونج ظل بالي يمج البارحة حسيت بيج موتمام
وردة _ الحمدالله زينه اشكرك على السؤال
فاروق _ اكدر اسالج سؤال
وردة _ اتفضل اسمعك
فاروق _ ليش تظايقتي البارحة ؟ اذا كان طلبي ظايقتج فاني اسحب طلبي واعتبريني ماكلت شي
حسيت بيه دايحاصرني بزاوية ضيقة
جاوبته بدون تردد
وردة _ لا لا تفهمني غلط طلبك ماضايقني بس اني محتاجة وكت افكر ممكن تنطيني وكتةحتى افكر حضرتك تعرف الزواج مسالة مصيرية
فاروق _ اه..... ريحتيني الج مطلق الحرية والوقت للتفكير بس لاتطولي عليه هواية واعتبري نفسج باجازة يومين .
