وردة
جنت دااتحظر الصبح علمود اليوم موعدي ويا استاذ فاروق حتى ابدي اول يوم دوام بالشركه حسيت بابا مامقتنع وخصوصا لمن اتذمرت نورا علمود الشغل وابنها واكع بالفراش لكن اني قنعت بابا و كلتله خلي تعوف كل الشغل وخلي تهتم بابنها اني من ارجع اسوي كلشي . من لبست ملابسي حسبت حساب اني رايحة للشغل لبست شي رسمي تنورة ضيقة ومو كلش طويلة سودة وقميص ابيض وسترة سودة وحذاء وجنطة احمر لونه حتى يكسر السواد مكياج خفيف وشعري لميته ليورا . وصلني بابا لباب الشركة وراح دخلت على الاستعلامات انطيتهم اسمي الموظف دلاني على غرفة المدير بالطابق الثاني .
صعدت المصعد ونزلت بالطابق الثاني ودلوني على غرفته .ودخلت اولا على السكرتيرة ابنية حلوة ومرتبة بس مبينةعليها حامل ابتسمتلي وخبرتني استاذ فاروق ينتظرج اتفضلي فتحت الباب
قبلي ودخلتني . ودخلت على مكتب كبير وفخم وصالة للجلوس وميز للاجتماعات واكو جانب من الغرفة عبارة عن جام يطل على الحديقة منظر يجنن . من شافني كام من مكانه ومد لي ايده حتى يصافحني اني عادة مااحب المصافحة مااحب اي تلامس بس ماردت احرجه صافحته باطراف اصابعي بخفة وطلب مني ان اجلس امامه على الكرسي وهو كاعد على المكتب .
فاروق _ اهلا وسهلا بيج وردة اول شي شتشربين تحبين شي معين ؟
وردة _ اي شي مايهم .
خابر السكرتيرة وطلب اثنين كهوة مضبوط وماي . والتفت لي
فاروق _ فاضل بعده ماجاي على ماتشربين الكهوة يكون جاي . على فكرة هاي شغلج يم فاضل بصورة مؤقته سحر سكرتيرتي راح تاخذ اجازة ولادة وراح اخليج مكانها انشالله . استغربت الثقة الكبيرة اللي دا ينطيها الي هذا الرجل بس اكو احساس وشعور داخلي مايطمنني . ابتسمت وجاوبته
وردة _ انشالله اكون عند حسن ظنك .
دخلت السكرتيرة وجابت الكهوة وخلته على الميز كدام فاروق وبعدين خلته على الطبلة كدامي وطلعت . رن موبايل فاروق وجاوب
فاروق _ هلو فاضل اشلونك اي اي اني بمكتبي تعال يمي ووردة هم جاية ننتظرك اوكي مع السلامة .
ارتشفت الكهوة بهدوء . باوعلي بهدوء وكال وهو ينطيني الورقة .
فاروق _ اريدج على مايجي فاضل تترسين كل هاي المعلومات اسمج الكامل ومواليدج ورقم تلفونج والكليه اللي تدرسين بيه وكل المعلومات المطلوبة وبعدها انطاني قلم وبديت اكتب المعلومات .
بعدني مامكملة دك الباب ودخل فاضل اكيد هو اني مااعرفه بس خمنت ودخل شفته كان رجال مبين عليه بالاربيعينات سلم علي وكعد مقابيلي وعرفنا فاروق على بعض . واخيرا خلصت الاجراءات وطلعنا اني واستاذ فاضل للمكتب مالتي واللي راح يكون قرب مكتب استاذ فاضل .
بديت الشغل اول يوم ماكو شي مهم الاستاذ فاضل كاللي اليوم بس اتعودي على المكان واطلعي على تعليمات الشغل من الحاسبة وروحي للبيت من وكت .
وصارت الساعة تقريبا بالوحدة طلب مني فاضل انه اني اكدر اطلع للبيت . اتذكرت بانه اني ماتشكرته للاستاذ فاروق .طلعت كبل على المكتب ماله وبعد ماترخصت من السكرتيرة دخلت استغرب هو وجودي يمه .
استاذ فاروق اريد اتشكرك هواية عاى اللي سويته اللي فعلا انت انسان راقي بمعنى الكلمه .
فاروق _ اني ماسويت شي وبعدين اني جنت محتاج موظفة
قاطعته _ بس حظرتك ماجنت مجبور توظف طالبه ببداية حياتها .
فاروق _ ماكو داعي لهذا الحجي اريدج تشكريني بطريقتج بان تبيضين وجههي بالشغل .
وردة _ انشالله استاذ وابد ماتتندم واشكرك مرة ثانية واترخص منك .
رجعت البيت واول مادخلت المطبخ شفت فارس كاعد على الميز ونورا داتصبله غدا
نورا _ اهلا بالبرنسيسة نورتي .
وردة _ اهلا بيكم حمدالله على سلامتك يابطل .
خزرني بنظرة وضغط على كف ايده
فارس _ اضحكي خاتون بس خو مابقى طول عمري هيج
وردة _ واني شكلت حتى تزعل من عندي غير تحمدت على سلامتك وبعدين لا تنسى اني يتيمة وحوبة اليتيم دايما رب العالمين يطلعها بالظالم شوف حالك ودير بالك حتى لا ادعي عليك .
نورا _،كافي وردة ترة مسختيها طلعي لغرفتج يلة بلا لغوة. طلعت واني ازهو بالنصر بعدما شفت
النظرات اللي بعيونهم .
