فارس
اني مااعرف لشوكت راح تتهرب وردة من عندي ومااعرف ليش ماتطيقني . بسيطة اني الج وردة وين ترحين من عندي من اخر مرة من رحنا للكلية واني ماشايفها يااما بالكلية ويااما بغرفتها . عزمت اليوم من انزل لازم اشوفها حتى لو اروحلها غرفتها .دخلت البيت شفت ماما بالمطبخ داتتريك واليوم هو الجمعة _صباح الخير يوم اشلونج .
_ هلا بيك ابني اشلونك تعال اتريك .
فارس _ مااشتهي هسة وينه رجلج ؟
نورا_ طلع يشتري سمج .
فارس _ وست الحسن وينها ؟
نورا _ الخاتون بعدها ماكايمة من النوم .
فارس _ يوم اني راح اروح لغرفتها اكعدها
نورا _ فارس الله عليك كافي استر علينا ترة لو ابوها عرف يكلب الدنيا علينا .
فارس _ صدكي ماسويلها شي بس احجي وياها ومن يرجع رجلج دكيلي رنه حتى بسرعة اطلع خوش .
طلعت الدرج سويته كله بايتين وعلى كيفي فتحت باب غرفتها وسديته بهدوء شفتها بالفراش بعدها نايمة ونص البطانية مغطيها و شعرها مغطي وجهها بقيت اراقبها واني واكف فوك راسها اقتربت اكثر وبهدوء شلت الخصلات اللي على وجهها وطبعت على خدها بوسة حسيت بيها تحركت وفتحت عيونها ومن شافتني فزت رادت تصرخ اني هجمت عليها وسديت حلكها بيدي وصارت هي جوايه مجتف ايديها ومكمم حلكها .
فارس _ اهدي شويه اني مااريد اذيج بس دقايق احجي وياج واطلع .
عيونها مشدوهة وبيها كل الخوف وهي ترجف مثل السعفة .
فارس _ اذا وعدتيني ماتصرخين راح اشيل ايدي واكوم حتى نحجي بهداوة . هزتلي براسها علامة الموافقة .
وبهدوء شلت ايدي وحاولت اكوم وجريت ايدها وياية حتى تكوم . حسيت بيها خجلت من عندي لان جانت لابسة بجامة نوم وبسرعة جرت ايدها وبحركة سريعة جرت روبها ولبسته وبعصبية كالت
_شتريد مني واشلون تدخل غرفتي هيج ؟ومنو سمحلك تدخل غرفتي ؟
فارس _ مو كلنا نهدى شوية حتى نحجي .
وردة _ ماعندي اي حجي وياك واذا عندك شي نحجي بالصالة مو هنا
فارس _ وداعة هالعيون الحلوة ما اطول . كلتلها هالكلمتين واني اقترب وهي تبتعد لحد ماوصلت للحايط خليت ايدي حاوطتها بايدي الاثنين واني لازم الحايط وراها
وردة _وخر مني لا اصيح . هو ولا اتاثر خلى شفته يم اذاني وهو يهمس
_ وداعتج مايهمني احد بس انتي صرت النفس اللي داتنفسه . حاولت تدفعني عنها بايديها
وردة _ واني اكرهك كره العمى ليش ماتفتهم
نزلت ايدي من الحايط وحاوطت خصرها وشديتها اليه ووخرت الشعر اللي على ركبتها وبديت ابوس بركبتها بلهفة _احبج موت ليش ماداتفتهمين .حسيت برجفتها ودموعها اللي نزلت وهي تدفع بيه حتى تبعدني عنها
_،اطلع برة وخر عني اني ماريدك اكرهك ومااريد اشوفك ترى وصلت حدها الا اليوم اخبر ابوية . من سمعت حجيها تركتها و ابتعدت عنها وبنبرة تهديد كلتلها
فارس _ راح تتندمين على كل كلمه كلتيها انتي ماتعرفيني زين من اريد شي لازم اوصل له .
طلعت من غرفتها وركعت الباب قوي واني النار شابه بصدري من العصبية .
وردة
ماادي اشلون جرأة عنده لفارس وباي صفة يدخل غرفتي ليش هيجي يسوي وشنو غايته مااعرف جنت باحلى نومه حسيت بايد تلعب بشعري وبوسه على خدي فتحت عيني وفزيت من شفت وجهه قريب مني حاولت اصرخ ذب روحه عليه وكتم حلكي بيده وبيده اللاخ جتف ايديه وطلب مني ان اهدا وافقته مرغمة بس حتى يعوفني بس مافادبدا يقرب ويحاول يبوس بركبتي اني تخبلت وكلتله واني ابجي وادفع بيه بقوة بانه اني اكرهه وبطريقته المعتادة كام يهدد ويتوعد بعدها طلع بره .اني بعد مااريد اسكت خلص بعد مااتحمل .بدلت ملابسي على السريع ونزلت جوة . شفتهم اثنيناتهم كاعدين يتريكون على طاولة المطبخ وكفت بباب المطبخ واني اوجه الحديث لاثنيناتهم .
_ سمعوني زين اثنيناتكم ترة تحملتكم هواية كافي ولحد هسة ماحجيت اي شي لبابا حتى مااثير اي مشاكل بس منا وغاد علي وعلى اعدائي ماكملت كلامي حسيت بفارس اتهجم ولزم خصل شعري وقربني عليه
_ والله وطلعلج لسان وتهددين اسمعيني زين انتي حاولي بس كوليله لابوج واني هم اكوله هي تتحارش بيه كوة ونورا شاهده على هالشي وراح اخليه يغصبج على الزواج مني ولو بعدني ما مستعد للزواج . دفعني دفع وهو يترك شعري .
حسيت بفشلة جبيرة وغضب ياربي هذولة من يا ملة لو هم اثنيناتهم صايرين عصابة ضدي ركضت واني ابجي ورحت لغرفتي وقفلت الباب حتى ماحاولت انزل على موعد الغدا .
نورا
رغم كوني زوجة اب لوردة وجنت احيانا اقسي عليها واذب عليها الشغل كله وحتى واجباتي تجاه اطفالي ودراستهم بس ولا يوم حسيت بيها تتجاوز عليه اوتغلط بحقي هي بنت مؤدبه الله الشاهد على كلامي ورغم هوايه جنت اقهرها وجنا اني وابوها والاطفال نسافر ونطلع ونتونس وماجنت اقبل اخذها ويانا بس جانت تلتزم الصمت وماتحجي حتى ماتثير المشاكل احيانا جنت اذب عليها اشغال مايتحمله البشر بس جانت تأديه وهي ساكته وبلا تذمر وهي طبيعتها خلوقة وماتحجي هواية بس من بدا ابني يجي علينه جنت احس عينه على وردة واني اعرف ابني مدلل ومو راحة وعنده علاقات هواية وجنت انصحه يبتعد عنها بس هو اني اعرف هو يتحرش بيها حتى جسديا وهو ابد ماجان يسمع كلامي وبدت هي تشتكيلي منه بس اني جنت الها بالمرصاد وماانطي بابني اللي جنت حارمته من عندي سنين وذاك اليوم من صعدلها فارس غرفتها عرفته مسويلها شي جبير ومأذيها من نزلت وهي بقمة غضبها وتهدد بينا اني ماحجيت بس فارس حسيته زودها هواية من ضربها وجر شعرها وحجا عليها ورا ماراحت .
الصراحة كلش ضجت بس مابيدي شي حجيت ويا فارس كلتله ليش ماتتزوجها ماطول رايدها جاوبني بانه مو مال زوج واصلا حاليا مادا يفكر بالزواج .
