وردة
حاولت احضر فت شي مميز سالت رشا عن الاكلات اللي يحبها فاروق كالتلي هو يحب كل انواع الاكل بس الاكلة اللي يحبها كلش هي الشيخ محشي وخصوصا بالباذنجان . قررت اسوي اطيب شيخ محشي يضوكها بحياته لان اني اسويها بطريقة مميزة حتى الصلصة مالتها اخلي بيها انواع معينه من البهار تشمل الدارسين حتى اني اخلي بيها شويه شكر حتى تعادل حموظة الطماطة . وفعلا كملت كلشي حتى التمن كملته ورشا سوت الزلاطة ونوع من المقبلات وحظرنا كلشي . وراها صعدت لغرفتي استحميت وبدلت ملابسي لبست بنطلون كابوي ضيق وحصر وياه بدي قصير احمر وخليت شويه مكياج ورفعت نص شعري ليورا دااريد اطلع من الغرفة دخل فاروق وكف شويه بس يباوعلي شفت بعيونه الاعجاب استحيت هوايه من كال
فاروق _ يابه شنو هاي رحمينا شويه انتي ناويه تخبليني من صدك .
وردة _فاروق ......لاتخجلني ارجوك .
فاروق _ اني لحد ماتزوجتج ماعرفت اسمي هلكد حلو الا من سمعته منج . .
ردت اغير الموضوع
وردة _ اني حضرتلك الحمام والملابس متحضرة كمل حمامك وانزل نتعشي اروح ارتب كلشي لحد ماتنزل .
وفعلا نزلت ورتبنا اني ورشا الميز ويوسف وحنين دا يساعدونا
وماهي الالحظات وجهز كلشي ونزل فاروق وكعدنا كلنا
ام فاروق _ اليوم اصرت وردة تحضر العشا الصراحة تنكال ايديها وهي تطبخ ايدين شيف .
وردة _المهم طعم الاكل يعجبكم .
فاروق _عاشت ايدج حبيبتي .
وبدا فاروق يسكب التمن ويخلي فوكاه الشيخ محشي وبدا يتذوق الاكل حسيت اول لكمة خلاها بحلكه وهو مستمتع بيها
فاروق _ والله هاي اطيب شيخ محشي ضكته بحياتي ماما لاتزعلين مني بس احس هالمرة بغير طعم . واندار عليه
فاروق _ انتي شمخليه بيه
ام فاروق _ وليش ازعل ابني الحقيقة ماتزعل مو اني دااكولك شيفة .
وردة _ياجماعة صدك جذب انتو دا تحرجوني .
الف عافية على كلوبكم .
******************.
مرت الايام واني تعلقي يزيد بفاروق وعلى الرغم بانه صايرين اكثر من عشر ةايام متزوجين بس مثل مااحنا مايجمعنا فراش مثل كل متزوجين واني كلش مرتاحة بهذا الوضع بس دااحس اللي يجمعنا شي اكبر تعلق روحي ووجداني .حتى الاطفال تعلقت بيهم وحبيتهم ودااحس هم اطفالي من صدك لانهم قطعة من فاروق دااحسهم قطعة مني مرات بالليل اكوم اروح لغرفتهم اتفقدهم وخصوصا حنين لانها كلش صغيرة وماشافت حنان امها ومن اضمها لصدري واحظنها قوي اتذكر نفسي لمان انحرمت من امي واني صغيرة .
اليوم بابا خابرني ودايسال عني حجينا هوايه وبالاخير كال بانه اني وفاروق معزومين على العشا باجر وكاللي بانه راح يخابر فاروق ويكله .
اتفقنا اني وفاروق بان نروح سويه من يكمل شغله يمر عليه ونروح .
وفعلا رحنا سوية استقبلنا والدي بحفاوة ونورا هم رحبت بينا وكعدنا شويه بالصالة اني تركت والدي وفاروق ورحت اساعد نورا بتحضير الاكل
وتقريبا كملنا كلشي وراسا شفت فارس دخل علينا الظاهر جان بالبيت رحب بينا بهدوء وحسيت فاروق انزعج واتغير لونه
طلبت منهم ينتقلوا للطاولة حتى نتعشى كعدت يم فاروق راسا رفعت راسي شفت فارس كعد كدامي بالضبط . تمالكت اعصابي واني احاول اهدي نفسي هذا ليش دايسوي هيجي .ودايتحدى منو بتصرفاته حاولت ماشيل عيني عن الطبق والتفتت الفاروق واني احاول اتدلع
وردة _ فاروق حبيبي شتحب اصبلك الاول
فاروق _ خليلي شوية زلاطة اول شي .كمت اصبله واني احاول اغيض فارس .
ظليت اتجاهله لحد ماخلصنا العشا ابوية جان منهمك ويا فاروق يحجون بالشغل وفارس بس اشيل عيني اباوع يختلس النظر بعيونه الحادة ونورا تحاول تلهيه بالحجي . خلصنا العشا واني جنت عايفة موبايلي بالصالة وجنت اساعد نورا بالشغل ومن دخلت الجاي والحلويات للصالون جنت اسمع صوت موبايلي رسايل توصلني مااهتميت للموضوع رجعت للمطبخ وشفت فارس نزل من فوك ودخل للصالون .
واخيرا سمعت فاروق يصيحني حتى نطلع نروح ودعناهم وطلعنا .بس من ركبت السيارة وانداريت حسيت بملامح فاروق متغيرة وجهه جان ثكيل وطول ماهو سايق السيارة يباوع للطريق وساكت .
حاولت الطف الجو شويه واحاجيه .
وردة _شنو رايك باكل نور عجبك ؟
جاوبني بكلمة وحدة من دون مايندارلي
فاروق _ زين
حسيت بيه كلش عصبي .
مرة لاخ حاولت وياه
وردة _ اشبيك فاروق مضايقك شي ؟
جاوبني بكل عصبية
فاروق _ اشبيه يعني ماداتشوفيني دااسوق .
سكتت وبلعت المي ياريت اعرف اشبيه حتى ارتاح افكار هوايه جانت تدور بعقلي وظنيت
بانه فاروق ضاج من نظرات فارس .
وصلنا البيت دخل غرفة الاطفال دخلت وراه جانو نايمين الوكت متاخر ساعة ١١ رتب غطاهم وطلع فوك من دون حتى يلتفتلي .صعدت وراه
دخل الحمام ورا شويه طلع ودخل فراشه ونام
اني بقيت محتارة مااعرف شاسوي .
بدلت ملابسي ولبست بيجامتي ودخلت الفراش وانطيته ظهري على طرف السرير وحاولت انام .
