وردة
احيانا الظروف تجبرنا انه نسوي شغلات احنا مامقتنعين بيها بس تفرض علينا ومانعرف شنو اللي راح يضمها النا مستقبلنا ياتري يكون القرار اللي اتخذناه لصالحنا لو لا اني حاليا واكعة بهاي الحيرة وماهي ايام وخطوبتي على فاروق راح تتم . بابا كان متصرف ويا فارس وحاجي ويا نورا ومهددهم اثنيناتهم بس اني الخوف بعده مسيطر عليه .
وبيوم الخطوبه جنت مشترية فستان اسود واحمر كلش جان حلو وقصير عجبني حيل مارحت للصالون ماحبيت اني رتبت شعري وخليت مكياج خفيف ونازك مااحب المكياج الطوخ . وورا ماعقدالنا السيد اجا فاروق يمي وجايب النيشان (الذهب ) يريد يلبسني اياه . المعازيم ماجانو هواية بس فاروق وامه وارشا واخته المتزوجه واني وبابا ونورا وبيبيتي وعمي وزوجته وبعد ماكملنا المراسيم كلها راحو كلهم وبعدين راح فاروق ويا امه ورشا
جنت احس نفسي هلكانه تعب سبحت وبدلت ملابسي ودخلت بفراشي سمعت رنة تلفوني اباوع على الرقم غريب ماجاوبت رن مرة ثانية هم ماجاوبت رن مرة ثالثة جاوبت واجاني صوته مثل الرعد
وردة _،الو
فارس _ الف مبروك على الخطوبه . واخيرا فضلتيه عليه هالشايب اللي بلا شرف عليه شنو االي عجبج بيه بس كوليلي اخاف لاعب بيج قبلي علمود هاي اضطريتي تقبلين بيه ايا ادب سز يا ساق.........اني اعلمج .....سديت التلفون بوجهه بسرعة ماريد ارد عليه مااريد اسمع صوته واهاناته وتهديده . رجع رن مرة ثانية ماجاوبت قفلت الموبايل وحاولت انام .
الصبح كمت جسمي متكسر وراسي يوجعني من التفكير نزلت جوا شفت نورا وجهها كلش تكيل عليه صبحت عليها وجاوبتني من ورا خشمها .مادرت بال حضرت الريوك وبابا نزل وكعدنا تريكنا طلع بابا للشغل لملمت المواعين ودااغسلهم دخل دك الباب نورا فتحته دخل فارس الظاهر ماباقي يمه مفتاح ردت اصعد لغرفتي بس كلت لا لازم اواجهه مايصير كل مرة اهرب .
دخل المطبخ وسلم وكعد على الميز واني جنت مشغوله بالمواعين حضرتله امه الريوك وخلته كدامه . داياكل ودايحجي ويايه
_ اذا جنتي مشتهيه رجال وزواج ليش ماكلتيلي اني بالخدمه زواج من دون زواج ليش تورطين روحج ويا هذا الرجال الكبير .
وردة _ احترم نفسك من تحجي وياية شنو مشتهية شنو هالالفاظ بعدين فاروق صدك رجال ويحترمني .كام من الاكل وتوجه صوبي وراد يضربني
_ يعني اني مو رجال ومامالي عينج امه لزمت ايده .
وردة _ تتقرب عليه هسة اخابر بابا واخابر فاروق يجنزوك .
نورا _ يمه جفي الشر هو قحط بنات مالكيت بس هاي تتزوجها يمعود اذا تريد تتزوج ازوجك اللي احسن منها.
فارس _ كوليلها خلي تختار الفاظها من تحجي ورحمة ابويه اموتها ومايهمني احد .
كمل كلامه وصعد لغرفته ورا شويه صاح امه
وبعدين شفته نازل ووياه جنطه جاي ماخذ غراضه ودايريد يطلع الظاهر بابا حاجي وياه
لمان طلع اشكد ارتاحيت وكانه هظ وانزاحةعن كلبي
قفلت نورا الباب وراه ورجعتلي وهي تكوللي
نورا _ هسة ارناحيتي طفشتي للولد
وردة _ اني اللي طفشته لو عمايلة السودة تحبين اذكرج وبعدين كلها جم اسبوع واني اللي اعوفلكم البيت اخذي راحتج بعد
ورجعي ابنج اللحظنج . بعدما كلت الها الحجي سكتت والتهت بشغلها واني التهيت بشعلي .
مرت الايام واني كل يوم يمر علي ويقترب بيها الزواج يزداد خوفي وقلقي قلت شهيتي للاكل وحتى نومي صار قليل
وفاروق يوميه يخابرني مرتين ثلاثه حتى يطمئن عليه ويطمئن بانه فارس مادايزورنا ومااذا يضايقنيلولا بس هو دايما يعتذر لانه مادايكدر يزورني او نطلع سوية لانه هاي الفترة كلش مشغول ومادا يرجع للبيت الاوكت النوم قدرت وضعه واني اصلا مايهمني ان طلعت وياه لوولا بس مرات اخته رشا واخته المتزوجه ندي يمرولي ونطلع للسوك علمود تجهيزات العرس نشتري غراض و ملابس ومستلزمات الزواج
اني ابد ماجنت احس بفرحةةايةةعروس لم تتزوج بالعكس جان مرات كلبي ينقبض واني داامثل باني فرحانه . بس شي واحد بكل هاي التمثيلية جان يفرحني هو اختفاء فارس من حياتي .
اليوم هو الخميس وخابرني فاروق بانه راح يجي عليه حتى نطلع نتعشى برة اني بعدني كلش اخجل من عنده استحيت ارفض طلبه كاللي راح يجي علية ساعة سبعة اترخصت من بابا لان جان بالبيت ورحتحتى ابدل ملابسي بديت ادور بالكانتور محتارة شنو البس فستان او بنطلون وقميص ........بالخير استقريت على فستان شيفون سماوي جنت مشتريته وما لابسته جان مو كلش قصير جوا الركبه لبسته ورفعت نص شعري ونزلت الباقي وخليت عطر ومكياج خفيف واخيرا لبست اكسسواراتي اني الصراحة مو محجبه ومؤمنه بانه مو الحجاب اليستر المرأة وانما اخلاقها وتصرفاتها .
جنت مخلصة ودا انتظر فاروق سمعت صوت الهورن فتحت شباك المطبخ لمحت سيارته طلعت ورحنا على المطعم وهناك جانت طاولته محجوزة كعدنا واني كلش خجلانه هاي اول مرة اطلع ويا رجال وللمطعم وبوحدنا كعد كدامي وبالبدايه جان بس يباوعلي ومبتسم احرجنتني نظراته دنكت راسي وكمت العب باصابيعي محتارة شاسوي
فاروق _ اني بحياتي ماشايف هيجي خجل حلو انتي شايفة روحج من تخجلين خدودج تصير حمر وعيونج تكوم تلمع .
وردة _ انت اللي داتخجلني من دتباوعلي هيجي
فاروق _اوكي ماشي شتحبين تاكلين
وردة _ اي شي مايهم
فاروق _ باوعي المنيو كدامج واختاري اني راح اخذ كباب
وردة _ اني هم مثلك راح اخذ كباب
بعدما طلب الاكل وجابو المقبلات بدينا ناكل
فاروق _ ترة اني احب الاكل هواية تعرفين تطبخين لولا ؟
وردة _ اني من صغري اعرف اطبخ كل شي واتفنن بيها بس اني وياىالاكل مو كلش صحبه
احب اطبخ بس مااحب اكل هوايه
فاروق _ واضح ماتحبين تاكلين علمود هاي انتي هلكد رشيقة .
جابو الاكل بدينا ناكل وطلب مني احجيله عن نفسي حجيتله عن طفولتي وحجيتله عن سبب انفصال بابا وماما وعن وفاة والدتي حسيت بيه وهو مستمتع وهو يسمعني
خلص العشا ورجعني للبيت .