أنين الروح (رازبليتو)
...
بقلمي
الكاتبه غدير الحيدري
....
كمن يعلم ان بعد الحياة موت
كنت اكمل يومي
وانا اقول
ان بعد النهار ليل
وبعد الليل نهار
كنت ارسم لوحات الحزن
واضع عليها الابتسامه
كنت اروي حكايتي للخريف
فرحل وهبت عواصف الشتاء
الشتاء!
ماللذي يخيفني من الشتاء
انه برود روحي
وتصبح عيني تنظر للحبيب ببرود مميت
انه اشبه بلغة ال (رازبليتو)
التي تكونت من احرف روسيه
لتعبر عن الجفاء
كل شيئ بالشتاء يخيفني
كل قرعة ابواب واصوات الهواء تهيمني
حتى اصوات قطرات المطر
اصبحت تميتني
كم بداخلك انين ياروحي؟
كم ستحملي عقبات السنين؟
ماذا ستحملين وتحملين
كالحلم المنطفئ في موت الجنين
كالصرخه العارمه في احشاء الوهين
كالصوت الذي لايصدر منه سوى الانين
انينك ياروحي
انين الروح
اصعب انين
....
تيك توك
تيك توك
عقارب الساعه تمر!
زين لييش؟
هذا وقت يمر من حياتنا
هذي لحظات فاتت
وماترجع
ليش مخلصتهه دموع؟
زين هالدموع ليش تنزل!
معقوله اكو انين بداخلي مااكدر اضهره
معقوله الوجع مكتوم
ومالكه منفذ سوى الدموع
كم الحياة قاسيه
كم الايام مؤلمه
وجارحه
كم روحي عانت وعانت
ومازالت تعاااااني!!
عواصف!
وبرد ينخر العظام
مطر قوي
واصوات البيبان تقرع
والشبابيك كان اصواتهه مخيفه
احس البيت راح ينشلع من شدة العاصفه
واصوات البرق
هزت مسامعي
وجلست بالزاويه خائفه
كنت مخليه راسي بين رجلي
واباوع ع المكان حولي
الشباك مغلق
بس الجامه شوي مكسوره
وهذا اللي جعل الستاره تتحرك
وكأنهه وشاح عروسه
زينت وتجهزت لزفافها
زوليه كاشان قديمه هواي
ومدفأة قديمه ومتعبه
وعليهه قوري الجاي
يفور
والبخار مشكل شكل
وكأنه بخار يطلع من مصانع الحلويات الروسيه
سحبت نفس
اختي تكتم
نايمه بالارض
ومغطيه ببطانيه قديمه
كان وجهه احمر وترجف
واختي غزل
كانت كاعده وبيدهه اداة موسيقى صغيره
تلعب بيهه
وتتلمسهه
اجت امي
كأنهه ملاك
بملابس مترهله قديمه
وبيدهه طاسة المي
ووصله بيضاء
كعدت يم اختي تكتم
وبدت تعصر بالوصله
وخلتهه فوك راس تكتم
سمعت انينهه
احس روحي انشلعت من مكانهه
سحبت نفس بوجع
اخ يااختي
باوعتلي امي
زينب:ها قدر رجعنه لهالحاله
باوعتلهه بألم
وكفت
قدر:شنو اللي اكدر اسوي وماسويته
زينب:كومي لزمي كتبج وراجعي دروسج
قدر:تعبت يامي تعبت وماالي واهس الكلشي شوفي الجو شلونه شوفي حالة تكتم المشموره صارلهه 4 ايام والله اليعلم شنو حالة ابويه بهالعواصف والمطر يدور ع شغله اني دراستي مداتفيدكم بشي ياامي
زينب:قبل اسبوع كان الجو يخبل والشمس طالعه شوفي هسه شلونه الجو مغيم وعاصف ربج مثل ماغير احوال الجو راح يغير حالنه لتيأسين
ضحكت غزل
وهزت راسهه وهي مبتسمه
غزل:تخيلي ماما يصير عدنه فلوس هواي واسوي العمليه واصير مثلكم اشوف كولشي الله وابدي اعزف شكد احب الموسيقى
اباوع الأمي الدموع بعيونهه
باوعت للسما
ورفعت ايدهه
وهي تدعي
هالموقف قهرني
خلاني احتقر ضعفي
لكوني بنيه
تاركه كل حملي ع اهلي
للاسف
ماعدنه ولد يهتم بخواته
بأمه وابو
اندكت الباب
كامت امي فتحتهه
دخل ابوي
ملابسه مبلله
يفرك بأيده
ابتسملي
عمار:ها قدر بنوتي شلونج
وكعت دموعي
همست
قدر:خليني اترك الدراسه واساعدكم بأي شي
عمار:ششش فكري بدروسج انتي سادس اريد ارفع راسي بيج
سحبت نفس
تقرب بابا لتكتم
كانت ساكته وترجف
عمار:شلون يابنت الناس شنسويلهه
زينب:سوده بوجهي حتروح هالبنيه مني
عمار:راح اخابر صديقي راكان واداين منه فلوس والباجر ناخذهه للطبيب
وكف ابوي
وطلع موبايل الصرصور
القديم
صحت
قدر:باباا لتتصل
وكفت امي
وبعدتني وصاحت
زينب:انتي شسالفتج وي الرجال بكد ابوج مخليه نكرج من نكره
قدر:احنه مو مجادي حتى ناخذ فلوس من حظرته بابا كافي حملنا احنه نشيله وديونه كثرت
وكفت غزل
ومدت ايدهه
تتحسس المكان
همست
والدموع بعيونهه
غزل:قدر لازم نعيش وتكتم مااريد تضيع منه
قدر:نعيش بس مو ع احساب كرامتنا
زينب:اي كرامه واختج مريضه اتصل عمار معليك بيهه
قدر:اسوي كولشي بس كافي ديون كافي تعبت والعالم تستصغرنا
عمار:بنتي راكان مو غريب ابن عمي وصديقي وانا اداين بس من تجيني فلوس ارجعهن
ضحكت بوجع
وصفكت ايدي
هزيت راسي ودموعي تنزل
قدر:اي ايي من تجينه ننطي ههههه شننطي اي دين؟ زين اي فلوس راح توفي ماي وجهنه اللي وكع؟ مو كفايه عايشين ع بيت عمك خلفونه ونسونه لو شنووو
ضربتني امي راشدي
بلعت ريك واني ارجف
جرتني من زندي
زينب:لاتبقييين متمرده وقدري محاولات ابوج للعيش مابقه شي ماسوينااا عمج كلب باكنه وسافر شتردينه نسوييي
وكعت دموعي
ابويه يباوعلي بتعب
رفعت ايدي بمعنى الاستسلام
قدر:انااا تعبت من حالنه تعبت من نظرة الناس المستصغره النه شنو التردون تسوون سوو
مشيت وعفتهم
اسمع امي تكول لأبوي
زينب:معليك بيهه هاي طفله ماتفتهم
دخلت للغرفه
سديت الباب
وكعدت بالزاويه ابجي
مو ذنبي اذا رافضه رضوخي للواقع
مداتحمل كميات الالم
صعب تتحول حياتك
وتنكسر
صعب
غمضت عيوني
واني اتذكر الطفوله
والمراجيح
ايامنه الحلوه
ملابسي المرتبه النظيفه
ضحكة امي
ومسامر بابا
سوالفنه القديمه اللي الهه نكهه
وحبي وشغفي للسفر
للغات
للاجانب
كنت كل يوم اشوف فلم
واي مكان اروحله واشوف بي اجانب
اتخبل
ابقه اباوع واني كلي شغف ولهفه
اطيب الاكلات كنه ناكل
كل يوم حلويات شكل
عايشين بيتنه الراقي
الدافي الحنين
الى ان اجه ذاك اليوم
اللي تهدمت بي حياتنه
عمي الاصغر
داخل بمقاوله
وصفقات وهوسه
ومتعاقد مع مافيا
وشوي شوي
واصل للأختلاس
اختلس اموال الدوله
والمافيا هددته بالقتل
وهو سجل اموال العائله بأسمهم
وانهزم
كان الاموال مشركه
والثقه كبيره بين الاخوه
باع كلشي وانهزم
واجت الدوله حجزت بيتنه
صفينه بالشارع
وبدت المعاناة
تدخلو عمام بابا
ونطونه مشتمل صغير
كعدنه بي
وبدا بابا ينكسر شوي شوي
قل مقدارنه امام الناس
خصوصا ان عمي كان متقاول وي هواي
وسارق فلوسهم ومنهزم
بدو يطالبون بديون عمي
وبدت المشاكل والهوسات
واختزل واقعنا
الى الان بابا يتدين
بعد ماتم طرده من عمله
وماعدنه اي شي يورد بيتنه بالمال
وتحول الحال والاحوال
الى هالحياة البائسه
هواي احلام انكسرت
اولهه حلم غزل
اللي اول ماانخلقت
على عيونهه طبقة غشاوه
تمنع الرؤيه
كان مقرر ان بعد مايصير عمرهه
18 سنه نسويلهه عمليه
لان حالهه ضعيف وماتتحمل
لكن للاسف
راحت فلوسنه
وتكاليف العمليه كبيره
لذلك بقت ع حالها
عمياء ترتجي من الله ان تنظر؟
...
اني قدر
وعمري 18 سنه
سادس اعدادي
اكره الدراسه
بس احب الانكليزي هواي
احب اتكلم اكثر من لغة
احلامي هواي
لكن تحطمت
اني قدر
كبيرة خواتي
اللي واجهت المصاعب من طفولتي
مابقت مصيبه ماوكعت ع راسي
عائلتنه تتكون من امي وبابا
واني
ومن بعدي اختي غزل
عمرهه 17 سنه كانت تدرس معهد موسيقى
بس الان تركته
والاصغر هي تكتم
عمرهه 16 وهي رابع علمي
الان تكتم مريضه
مشموره بالفراش
ماعدنه فلوس نداويهه
تكاليف الدكتور هواي
واحنه بالعاصمه بغداد
اللي بعض الدكاتره بيهه يبيعون الضمير بفلوس
وحالنه انكسر
مااكدر اتقبل المساعده من احد
خاصه راكان
اموت منه
بالرغم عمره 42
اصغر من بابا ب5 سنين بس صحبتهم قويه
اصيحله عمو
بالرغم اني لو بيدي اذب نفط عليه واحركه
كان متعجرف
شايف نفسه
بارد حيييل
وبنفس الوقت يكشخ ويحب نفسه
مدلل روحه
وكل يوم دوله
وزي شكل وحياة شكل
تعاقد وشركات ومشاريع
اشعر وكأن
حياته عباره عن حرام بحرام
هيج نوعيه من الرجال كره اعمى تجاههم
احس نظراته الي مو قانونيه
مو نظرة عم بحسبه مثل عمي
احس نظراته تتوزع ع شكلي وع جسمي
خاصه ان اني مو محجبه
ومااهتم للبس
همي الوحيد اعيش
وابتعد عن ازقة الظلم
بس شكل الظلم ملاحقني
اجه الصبح
واني ليلي مانمته
بيتنه يخر مي
بسبب المطر
هسه عرفتو ليش الفقير يكره الشته؟
لان ماله حياة
ولا عنده مأوى
طلعت برا
امي تحظر الريوك
وغزل لازمه التهه الموسيقيه
تتلمس بيهه
قهرتني
وكرهت ظروفنه
اللي ماتسمح النه نعالجهه
تكتم نايمه
وبابا كاعد وصافن
شافني دار وجهه
زعلان لان البارحه حجيت ع صديق عمره
رحت يمه
قدر:صباح الخير
ماردلي
بست راسه
ولزمت ايده
قدر:بعدك زعلان
عمار:اي زعلان منج انتي شلون تتجاوزين وتكولين احنه موكعين كرامتنه وتحجين ع صديقي هاي فوك مايساعدنه
قدر:بابا اني هذا راكان من الله ماحبه
عمار:كولي عمو عيب
قدر:بابا اني ضايجه بس لان احنه زادت ديونه
عمار:يعني شسوي اعوف اختج تموت البارحه بالمطر تبهذلت يادوب حصلت كم فلس
سحبت نفس
اجت امي
وجايبه الاكل
كعدتهه لتكتم بالكوه
وجريت غزل
وكعدنه ناكل
امي هم ضايجه من كلامي
حالتنه دومهه هيج
اباوع لتكتم مصفره
ومانطقت ولا حرف
وبالكوه تفتح عيونهه
ضغطت ع نفسي
همست
قدر:تكدر تتدين بابا ممن ع. عمو راكان
زينب:اي مو احنه كاعدين ع امرج لو هواج
عمار:زينبببب كافي
سكتت امي
واني تركت الاكل وكمت
للعصر
كنت ادرس
سمعت صوت جدو جابر (ابو راكان)
وصوت المزعج راكان
يسولفون وي بابا
دخلت امي
زينب:كومي بدلي وطلعي سلمي عيب
قدر:وابوس رجل راكان حتى يحن علينه بكم فلس
زينب:ولج انتي شكد متستحين
قدر:الشي الدايصير كله ممقتنعه بيييي
زينب:اروح ابيع نفسي واجيبلكم فلوس شلووون
طلعت وعافتني
وكفت
لزمت وجهي
احس بحرارة غضب
سمعت راكان يحجي
راكان:هلا غزوله لعد قدر وين شو ماكو
قتلوك وتطلع قدر توكف ع كبرك
ياحقير
جريت كلينكس
كنت مخليه حمره
احب الحمر هواي
مسحتهه
بقت شوي منهه
خرب
هسه عباله محمره وطالعتله
رفعت شعري كعكه
عدلت الثوب
كان كصيف شوي وطوله ميدي
طلعت برا
صار راكان بوجهي
باوعلي بدهشه
كان كاعد ورافع راسه بتكبر
وكاشخ فول
عيونه فتحهه
وصار يوزع نظراته
وكالعاده عيونه صارت تريد تاكلني
تقربت يم جدو جابر
بسته براسه
قدر:شلونك جدو
جابر:هلا هلا بقدر شلونج
قدر:تمام
باوعتله لراكان
كان صافن ع شفتي
استغفر الله
هالنظرات الوسخه ميبطلهه
وهو شايب
كبر
قدر:شلونك عمو
راكان:هاا
لا هذا رايح زياده
عمار:هههه داتسلم عليك
راكان:لا يمعودين اني شباب بعدني شنو عمو
عمار:استحي شوي واعقل شوف الشيب
راكان:اصبغه ويرجع هههه
يباوعلي ويضحك
جكمت بحلكي
وتركتهم ودخلت
هيج واحد
مايستاهل نظره مني
عجوز
قلدت كدام المرايه
قدر:لا يمعودين اني شاب بعدني نننننن شاب بعده لعد كبر
كعدت اكمل دراستي
اختفت اصواتهم
واجت غزل تتكئ
قدر:وين راحو؟
غزل:يودون تكتم للدكتور
سحبت نفس
هففف
تقربت ع كيف
وكعدت غزل يمي
غزل:قبل لا يروحون اتصلت خاله هاله بماما
عقدت حاجبي
قدر:وهاي الثانيه شتريد ناويه تذلنه مثلا
غزل:مااعرف تكول معزومين ع غدا بسبب تخرج ايمن من جامعه الامريكيه
قدر:هه همه وين واحنه وين واستاذ ايمن رجع لو بعده
غزل:الفهمته داخل بمشروع ومو هسه يرجع
قدر:اوووف تعرفين امنيتي اتخرج وادرس لغات واكون الي مكانه بالمجتمع اخ
غزل:امنيتي افتح واشوف العالم واعزف اووف
تعددت امنياتنا
والحزن مستمر
وقد تحطمت امالنا
برجوع اهلي
مع اخذ المعلومات الكافيه
وتشخيص تكتم بالكامل
تبين ان تكتم متعرضه لحصبه قويه
ولتأخر بالعلاج
تبطئ النطق
واصبحت خرسه!
والقدر
رسملي ان اكون اخت
لعمياء
وخرساء
ماذا سيحدث بحياتنااااا!
...
صباح الكاكاو
حبابي
مشتاقتلكم كوماتتتت😍😍😍
ورجعت وياكم بقصه جديده
تحمل في طياتها مواضيع
وانين ارواح اشخاص قد اهملهم المجتمع
القصه في بدايتها
ترقبو المزيد من الاحداث
والبداية اساس النهايه
والاحداث بعدهه
راح يكون نشر البارت حسب التفاعل
تابعو حسابي
ليصلكم كل جديد
وتاكات للمتابعين الاخرين
انتظرووووونا
ولتنسون التصويت
انزل حسب التفاعل
رأيكم؟