راشد طبعا نكرني حطب . قال لي .. موضوع نادية ياتو ؟.. انت الظاهر ماعايز تجيبها معاي البر ياشمس الدين .. يا اما انت عبيط او بتستعبط .. يلا سلام .. وقفل الخط ..
عمك عمر قعد يعاين لي كدا .. بي كل غضب وغيظ .. وقال لي .. اسمع ياشمشدس الدين .. انا رعاية للجيرة ..ولي العشرة الكانت بينا .. ومعزتي لابوك . .ح أسكت وما ح أسمعك اي كلمة ماترضيك .. بس لو سمحت تاني ماتجيني حايم بي جاي ..
قلت ليهو طيب بس دقيقة اديني فرصة ياعم عمر ..
قال لي معليش يا شمس الدين.. انا مشغول شديد .. مع السلامة ..
طبعا انا والله بقيت في موقف !!.. ما تتخيلو احساسي في اللحظة ديك .. اتمنيت الواطة تنشق وتبلعني .. بس (قلت حسبي الله ونعم الوكيل) ....
لامن قلت الكلمة دي .حسيت بي راحة .. وحسيت انو ربنا ح يقيف معاي ..
وكت طلعت منو.. اتصلت علي نادية طوالي .. قالت لي ياشمس الدين انت كلمت ابوي بموضوع العشرة مليون؟
قلت ليها .. ايوة كلمتو .. ولازم كنت اكلمو . لاني ما قبلان تكوني مع الزول الحقير ده .. بس ياريتني لو ما كلمتو .. وحكيت ليها تفاصيل الحصل مع ابوها .. وماقدرت ليها اتم الكلام .. حسيت بي حاجة وقفت لي في حلقي ..
ونادية حست بي انا مضايق قدر كيف .. قالت لي اسمع ياشمس الدين ولايهمك .. انت وقفت معاي كتير .. انا ح أقيف معاك هسع
واليحصل يحصل ..
طبعا يا شمس الدين ..انت لمن طلبت التلفون من ابوي في بيتكم .. ابوي جا قال شمس الدين طلب تلفوني .. وماعارف طالبو ليه ..
وابوي وكت كان بتكلم راشد كان قاعد في بيتنا .. وسمع الكلام .. وعرف انك ناوي تكلم ابوي بموضوع القروش .. وانا اتصلت عليك البارح ..عشان احكي ليك ..بس لقيت تلفونك مقفول .. بس كنت مستبعدة انك تحكي لي ابوي .. بعد العهد العاهدتني ليهو ..
اها هسي اتصل علي راشد .. قبل شوية قال لي انا كنت ماشي على ابوك في المكتب .. شفت شمس الدين الاهبل دخل عليهو .. وقفت في اخر الشارع .. وااتصل علي من جمب ابوك وفتح السماعة الخارية عشان يسمع ابوك المكالمة .. والله ركبتو ليك جنس مقلب .. يشرب مايروى .
ويضحك في جنس ضحك ..
قلت ليها والله يانادية ده الحصل فعلا ,, وانا هسي والله بقيت اقل من سمسمة ..
قالت لي هسي انت وين؟ . قلت ليها انا في الشارع .. داير اركب ماشي بحري .. قالت بس دقيقة ماتركب .. خليك ما تتحرك من الحتة الانت فيها دي .. قلت ليها في شنو يانادية؟ .. قالت لي انا قلت ليك دقيقة ..
اقرب نيمة جمبي قعدت فيها .. فوق حجر اسمنتية كدي .. وختيت فوق راسي متمحن في الحصل علي ..
بعد عشرة دقايق ربع ساعة اتصل علي ابوها .. قال لي شمس الدين انت وين؟؟
قلت ليهو انا في الشارع عايز اركب امشي بحري .. قال لي تعال لي راجع ..
اتصلت على نادية تاني .. قلت ليها في شنو يا نادية؟؟
ابوك داير بي شنو تاني .. قال لي تعال..
قالت لي سبحان الله .. انا قبيل كنت دايرة اتصل على ابوي عشان اعترف ليهو .. هو اتصل علي براهو .. انت امشي ليهو ياشمس الدين .. بعدين بحكي ليك .. امشي شوفو ح يقول ليك شنو ؟؟
وصلت طلعت ليهو في الطابق الاول ..
قال لي شمس الدين ياخي انا اولا اسف على الموقف البايخ القبل شوية ده .. لاني كنت ظاني انك عايز تتحصل على نادية باي تمن .. وممكن تكذب ..
بس بس انت بعد طلعت مني انا بديت اتشكك .. وخصوصا انو راشد ما استفسر منك كتير من القروش .. لو ماعندو سابق علم عن المبلغ .. كان اخد وادا معاك في الكلام ..
قلت ياخي انا اتصل على بتي .. واسألها .. اتصلت على نادية وقلت ليها .. انا عايز اسألك سؤال .. والله لو كذبتي على .. تاني انتي لابتي ولابعرفك .. قلت ليها قصة العشرة مليون دي شنو؟ حكت لي الحصل بالتفصيل .. نفس الكلام القلتو لي انت بالكربون .. وأصلا" نادية ماعندها مصلحة تكذب .. وقالت لي انا الشي المنعني اكلمك هو الخوف من راشد ..
وانا كدا صدقتك ياشمس الدين وبعتذر ..فيا خي ماتزعل مني .. انت راجل صادق وراعيت لي سمعت بتي .. وضحيت بي بيتك عشان كدا .. انا ما ح انسا ليك الحتة دي .. وانت راجل يشتروك بالدهب .. ربنا يكرمك .. واكيد بيناتنا تلفون .. ودعتك الله .. انا مشغول بس ناديتك اقول ليك الكلمتين ديل بس .. وطلعت منو .. ..
سبحان الله .. انا غايتو ربنا بقيف معاي مواقف عجيبة احمدو هو .. والله حاجات تزيد الايمان
قبيل انا طالع منو قلت حسبي الله ونعم الوكيل .. حسيت انو ربنا ح يقيف معاي .. والحمد لله .. راشد داير يركبني مقلب .. ربنا ركبو التايتنك .. وهسي شكلو في المحيط الاطلنطي ..
دقيت لي نادية تلفون .. والله البت دي انا اتكيفت منها كيف .. قربت ابكي .. قلت ليها الله ينصرك زي مانصرتيني يانادية ..
قالت لي انت حبيبي ياشمسي .. احسن اموت ولا انت تتذلا وتتهان .. انت عارف ابوي قال لي شنو؟ ابوي قال لي انت لو ماغبية شمس الدين ده راجل بطلبو منو الطلاق؟
وقال لي انتي لو خايفة من راشد يعمل ليك فضيحة .. انا راشد بخليهو هو براهو يطلب مني ..اعفاهو من الزواج ده .. اصلك ماتشيلي هم .. انا عمر تبلدي .. انتي بتلعبي ولاشنو؟..
بس ياشمسي في موضوع تاني شاغلني وعايزة اسألك منو .. .. امس جاتني مودة .. قالت لي في واحدة اسمها اية حكت ليها .. انك انت عندك بيها علاقة .. صحي الكلام ده ؟
قلت ليها . بس كان زمان قبل ما اعرفك انتي .. موش حكيت ليك . انك مسحتي من جواي اي اثر لاي انسانة تانية في الدنيا ..
انتي قلتي ليها شنو يانادية ؟؟
قالت لي .. قلت ليها .. هي عملت علاقة لكن انا عرستو عديل .. وهسي لا أنا ولا اية مالمينا فيهو .. انا اساسا ياشمسي ماحصل شكيت فيك ..
لكن ياشمس الدين انت حصل قعدت مع آية دي بعد ما عرستني؟
قلت ليها لالا ابدا .. ماحصل .. قالت لي ياشمس الدين انشاء الله مايجي اليوم الاتخذل فيك . واكتشف انك عملت كدا ..
طبعا انا قلبي ده عمل شحححححححححح .. والله خوفت عديل ان شاء الله يارب ماتكشفني في يوم ياربي تسترني انا تبت التوبة عديل.
قلت ليها انا يا نادية مستحيل ابدلك بعد لقيتك .. وطوالي غيرت ليها الموضوع . قلت ليها صالح قال عايز يتكلم معاك مالك ماجيتيهو؟ .. قالت لي مشيت ليهو البارح انت وين ماكلموك .. ؟؟
قلت ليها مافي زول كلمني .. قالت لي والله مشيت احمدل ليهم السلامة وناداني مخصوص .. وقال لي انا ماعندي وشي اتكلم معاك .. وماعندي وشي اقابل بيهو نفسي .. لاني محتقر نفسي شديد .. اناقلت ليهو ياصالح ديك فترة مرضية كلنا عارفنها وعدت الحمد لله .. ولايهمك يا اخوي الغالي .. ربنا يتم ليك الشفاء..
قال لي اوعك تعرسي زول غير شمس الدين اخوي .. انا بكره نفسي لامن اموت لو اتفارقتو والله .. يا شمسي والله كلام صالح بكاني عديل ..
والله وكت قلت ليهو عرسي البعد الجمعة الجاية.. اكان داير يقوم على حيلو .. وبكا جنس بكا ..
اها انا قلت ليها الحمد لله يانادية .. الظاهر انو ربنا ما داير يخذلنا ولايخذل صالح .. الحمد لله .. وقفلت منها ومشيت ..
وماعارف الح يحصل تاني بعد كدا شنو ؟ وماعارف عمك عمر تبلدي ح يتصرف مع ود اختو كيف .. العر الخنيت الاسمو راشد ده .. اها يازول مشيت على شغلي عادي زي المافي شي بس عندي خوفة شديدة في قلبي ..
خايف انو نادية تكتشف اني كذبت عليها .. لكن انا كذبت عشان ما افقدها .. متأكد لو قلتا ليها قعدت مع اية يوم صالح كان بضايق فيك تاني ما ح ترجع لي لي يوم القيامة ..
المهم ادعيت الفرح وحاولت اتناسى الخوف .. وياخوفي من يوم بكرة ..
مشيت بشرت سرورة بالكلام الحصل مع نادية وابوها .. وسارة اليومين ديل عايشة الريدة بكل الوانها الزاهية مع الود سالم .. وبتحكي لي بي ادق التفاصيل .. البينها وبينو .. اصلا انا وسارة اصحاب شديد .. وما بتدس على اي حاجة .. مرات تكتب ليهو رسالة بتناديني .. تقول لي شوقف الرسالة دي كويسة ولا ماكويسة .. يعني انا بشوف الصراحة بين الاخو واختو والله مافي زيها .. بدل من القهر والبونية والكف بتاعة صالح البترقد الزول في المستشفى .. وسارة اختي زاتها ماها البت البتعمل حاجات تخلي الزول يعوقها ..
طبعا صالح سواهو افرش وتخين.. مع البت الممرضة الاسمها اسماء
وبقى متعلق بيها لدرجة الهبل .. كانت اتاخرت ساي بتوتر .. ويقعد يهضرب ..
قمنا اتكلمنا معاها انا وابوي .. وقلنا ليها انت عارفة الزول ده وظروفو الصحية .. واحتمال كبير مايقدر يتحرك .. قالت انا حبيت صالح في روحو .. من غير ما احس اتعلقت بيهو .. وبقيت ما بقدر اعيش من دونو .. حتى لو فضل طول عمرو راقد في السرير .. انا عايزاهو ..
غايتو سبحان الله في ناس في الدنيا دي مخلوقين من طينة نقية والله .. البت اسماء كلمت اهلها اساسا عندها امها واختها الاصغر بس . وهي قايمة بي كفالتهم .. ابوهم متوفى وهم صغار . وافقو ليها .
امها قالت ليها انا واثقة فيك وواثقة في اهل صالح .. ربنا يستر عليك ..
المهم .. سارة اختي وصالح اخوي الاتنين امورهم وضحت .. وما كان فيها اي عراقيل .. بس انا مامعروف مصيري شنو لا هسع .. ربنا يجيب العواقب سليمة .. لسع باقي تقريبا تسعة يوم لي مواعيد لاعرس بتاعة .. راشد المزعومة ..
وكل يم انا بتصل على نادية عشان توريني .. الحصل شنو بس بتقول لي لسع مافي شي .. لسع مافي شي ..
طيب يابت ابوك قال ليك شنو ؟ وراشد لسع بجي في البيت؟ بتقول لي ابوي ماقال اي حاجة وراشد لسع بجي في البيت .. ابوي قال لي خليك عادية معاهو ..
يوم من الايام في نص الاسبوع ده ذاتو اتصلو علي ناس الشرطة
وقالو لي مطلوب حضورك لمركز الشرطة فورا .. سقت معاي ابوي ومشينا ليهم ..
قالو التحقيقات اسفرت عن حاجات عجيبة .. الناس القاتلين اولاد عم القتيل تلاتة .. كانو طالبين منو قروش .. وهو كان عندو امانات .و قروش .. قتلوه واستولو عليها . المهم القضية كانت فيها ملابسات طويلة وعريضة .. ما كشفوها لينا كلها . المهم من ضمن الحاجات القبضوها عند المجرمين .. ظرف فيهو اسم صالح اخوي وناس الشرطة لموهو لينا بعد عرفو محتوياتو ..
وهو ظرف من الكفيل السعودي بتاع صالح .. ومرسل اقامة جديدة لي صالح
ومعاها خطاب كاتب فيهو انو عاهد الله في الكعبة يرجع اي حقوق لي اصحابها.. وانو رجع لي محي الدين حقوقو ..
وكاتب لي صالح رسلت ليك حق الاجراءات والتذاكر .. مع محي الدين .. بس انت تجي المملكة وتستلم حقوقك وتباشر شغلك .. وخاتي ليهو رقم التلفون ..
ناس الشرطة قالو بي سبب رقم التلفون ده نحن اتكشفت لينا حقايق.. وعرفنا المبلغ المسروق مع الجريمة . بس الحمد لله قروش صالح لسع في السعودية ..
اها صالح وقت قرينا ليهو الجواب قال الزول السعودي ده كذاب وما مضمون .. الزول انا كرهتو بي الله واحد ..
قلنا ليهو انت ماخسران حاجة .. اتصل عليهو واسمع كلامو .. اها بالليل كدا شحنا الرصيد وضربنا ليهو انا وابوي وصالح .. رقد على قفاهو ..
والزول ده بتكلم مع صالح وببكي شكلو ..وبطلب في العفو ..
انا اتكلمت قلت ليهو يا مطوع في مشكلة كبيرة والله .. طبعا صالح بي سببك
دخل في حالة نفسية .. واتعرض لي حادث .. ولازم السرير شهور عديده .. وهسي قدامو وكت طويل عشان يقدر يقوم فنحن الان محتاجين لحقوقو .. عشان العلاج .. ولغاية مايقوم على حيلو تاني ممكن يجيك ..
قال لي اكتبو لي العنوان انا جاييكم في السودان انا جاي لصالح زيارة .. ملوني العنوان بالضبط .. واعطوني رقم الجوال تبعكم ..
صالح بقى يهز في راسو قال ماتدوهو العنوان .. اصبرو . بس انا اديتو العنوان وخلصت ..
صالح قال لي كان تصبر نشوف هل فعلا" سلم محي الدين حقوقو؟ لانو محي الدين داير منو قريب الــ17 الف ريال .. وخلاهن ليهو ونقل منو الكفالة .. انا كنت عايز اتأكد انو فعلا سلمو ..
قال لي فتش في تلفوني عن زول اسمو نصر الدين التوم النور
اتصل عليهو اساله عشان نتاكد ..
وفعلا اتصلنا عليهو وهو في السعودية . قال هو صاحبو وصاحب محي الدين . ساكن في جدة في باب شريف . وحتما حيكون محي الدين كلمو ..
فعلا سالناهو وقال الكفيل القديم سلم محي الدين حقوقو كاملة . واداهو فيزة اقامة لي صالح .. كدا اتاكدنا .. وكت كلمتا نصر الدين بوفاة محي الدين قعد يجوعر زي الشافع والله .. يا الله ..
المهم السعودي ده ح يجي السودان مخصوص بعد يومين ..
اها يازول باكر الصباح طوالي .. حصل ماليس في الحسبان .. نادية اتصلت علي وبتبكي شديد ..
لدرجة ماسمعت مكالمتها في التلفون كويس من شدة البكاء.. بس الفهمتو منها قالت لي تعال في بيتنا هسي ..
الى اللقاء ...