قلت ليها والله ماغلطانة يا نادية.. ومعذورة والله .. بس ما كان تشكيهو على الله .. انتي ماعارفة شكية ربنا مابتقع واطه؟.. شوفي الحصل عليهو ..
قالت لي بعدين ياسارة الكلام ما انتهى .. دقيقة اكمل ليك باقي القصة .. طبعا كان بتصل على بعد مشيت بيت اهلي . ومابرد ليهو نهائي ..
بضرب لي مرة واحدة . تاني مابكررها .. مرة رسل لي رسالة .. حسمتو فيها طوالي .. وهددتو بي ابوي واخواني .. تاني مارسل لي وماضرب لي الا مرة .. ضرب وابيت ارد تاني ضرب كم مرة امكن اكتر من عشرة مرات . وكت زهجني فتحت الخط .. كنت دايرة ازفتا معاهو .. قام قال لي القصة بتاعة يوم دايرين يدقوهو ويكتفوهو .. وكان هايج .. .. قال لي والله راجلك البتريديهو ده الا اقتلو الكلب والوسخ .. قلت ليهو بتتكلم عن منو انت ؟ قال لي بتكلم عن شمس الدين .. قلت ليهو مالو ؟.. قال لي حرض ابوي والطيب اخوي عشان يدقوني ويكتفوني .. اقسم بالله يانادية اليلة امشي البسي هدوم الحبس بس .. وطق قفل التلفون .. انا طبعا ياسارة خفت شديد والله .. خفت لامن حيلي مات .. وختيت طوالي انو المشكلة بي سببي .. طوالي مافكرت في حاجة غير ضربت لي شمس الدين احذره منو .. قلت ليهو اعمل حسابك من صالح ناوي عليك نية الشر وناوي يقتلك عديل ..
ده كل الحصل ياسارة.. وانا والله شايفة نفسي حقنت دم اخوانك.. وما مشكلة .. الطلاق ما اخطر من القتل .. الزول ده ماواعي وما طبيعي.. لو طبيعي ما كان اتصرف معاي كدا ..
وهسي انا اتاكدت من انو ما طبيعي .. بعد حكايتك الحكيتيها لي عنو دي ياسارة .. معقول ياسارة زول واعي يتصرف كدا مع اختو شقيقتو ؟ حسبي الله ونعم الوكيل . ..
قلت ليها اها يانادية.. المهم انتي كدا عرفتي كل الحقايق . المفروض بعد كدا تتراجعي من قرارك بتاع الطلاق ده .. خصوصا انو شمس الدين عارف تصرفات صالح معاك وعاذرو . لانو زول تحت تأثير المخدرات .. يعني حكاية مشكلة وقتل بي سببك دي مافي ليها اي احتمال .. ونحن ان شاء الله بعد يقوم بالسلامة .. طوالي بنبدأ ليهو علاج الادمان لو اصلا اكتشفو في ادمان .. اها انتي رايك شنو.. ؟ حتفضلي بعيدة من الزول البريدك اكتر من روحو ؟
قالت لي ياسارة انا كدا اتحلت عندي اكبر عقدة .. عقدة انو ماحتحصل مشكلة بي سببي .. وكدا بقدر اتصرف بي حرية ووضوح . لانو صالح اكتشفتو حقيقتو .. لكن في عقدتين تاني انتي ماخاتة ليهم بالك .. احتمال صالح متعلق بي.. تعلق روحي وعاطفي ماعندو علاقة بالمخدرات .. ويفضل حجر عثرة في حياتي.. وعاجلا او أجلا يحصل بينو وبين اخوه مشكلة .. لالالا .. انا احسن لي ابعد .. لو قعدت بدون زواج افضل لي يا ختي .. شمس الدين مابقدر يتخلا عن اخوهو .. انا الجاية دخيلة على بيتكم .. ما دام الحمد لله ماعندي جنى . دي ذاتها نعمة .. اخير لي انفد بي جلدي ..
مالي ومال القراية ام دق ..
والحاجة التانية ابوي ادى ود اختو كلمة .. وكلمة ابوي امضى من السيف .. يعني حتى لو انا وافقت بدخل ابوي في حتة ضيقة ..
قلت ليها يانادية كلامك كلو صاح .. بس انا طالبة منك طلب واحد .. لاقي سمش الدين اخوي.. ان شاء الله مرة واحدة بس.. واتفقو على حاجة لانو شمس الدين ده لو فقدك بجن .. ويلحق لينا صالح .. قالت لي لابجن ولاحاجة .. لانو اساسا انا بريدو اكتر من هو بريدني .. مادام انا صابرة ومتيقنة هو ذاتو بصبر وبتيقن ..
قلت ليها بس عشان خاطري يانادية لاقيهو مرة واحدة بس .. قالت لي خير يا سارة .. انا بكون معاك على اتصال .. لو لقيتي البيت وضعو بسمح اتكلم معاهو في بيتكم.. اديني تلفون انا بجيك في البيت وبقابل شمس الدين ..
وهسي يا شمس الدين اخوي الكورة بقت في ملعبك.. رايك شنو في الكلام السمعتو؟؟ ..
انا مسكت يدين سارة الاتنين.. وسلمت عليها في كفوفا .. قلت ليها تسلمي انتي يا اعز اخت في الكون .. انا الحمد لله ربنا اخد مني اخوي الكبير .. وعوضنيي بي اخت تساوي رجال .. الحمد لله .. مافي اي مشكلة ياسارة انتي العليك عملتيهو وزيادة .. والله القصة الحكتها ليك نادية دي .. خلتني احبها اكتر واكتر . وح اعمل المستحيل عشان ارجعها لي حياتي ..
وطبعا" بقيت اتكلم بيني وبين نفسي .قلتا عهد بيني وبين الله.. انا لو نادية رجعت لي.. تاني مابفكر في غيرها .. ولا عندي علاقة مع واحده من بنات حواء.. وربنا شاهد على كدا . سارة قالت لي سارح وين انت ياسمشي .. قلت ليها مافي شي في الاقدار البتمشي بينا يمين وشمال دي ياسارة ..
اسمعي ياسارة .. ماممكن تتصلي على نادية هسي ؟ البيت فاضي . وامي والطيب في المستشفى .. وسناء مقدور عليها ..
اتصلي عليها عليك الله .. شوفيها بس .. ايمكن تكون ظروفها كويسه ..
طوالي اتصلت عليها واتكلمت معاها .. نادية قالت ماعندها طريقة تجي هسي لانو ابوها في البيت .. اول ماتلقى فرصة بتتصل عليها تقول ليها جاهزة ..
قلت ليها ما مشكلة ياسارة .. كلو بي وقتو ..
خلاص كدي قومي سوي لي حاجة اكلها ..
المهم يازول انا بقيت منتظر اي اخطار من سارة عشان تتصل ..
اتصلت على ناس ابوي بسأل من صالح قال لي مافي جديد ..طبعا" مرت ايام على الحالة دي .. مافي جديد مافي جديد..
قلت ليهو خلاص يا ابوي خلي الطيب انا بجيهو هناك وتعال انت وامي . عشان تاخد راحتك شوية .. انت تعبت شديد من المحارسة .
قال لي لالالا .. انا مابتحرك من هنا الا صالح معاي ان شاء الله ..
قلت ليهو خلاص انا بجي . خليهم يجو ..
وبقيت كم يوم بمشي وبجي .. وناس الشركة اتصلو على تلات مرات وحكيت ليهم ظروفي ومشيت اخدت منهم اجازة بدون مرتب..
طبعا كم يوم نادية ماضربت وكل ما تتصل عليها سارة تعتذر . وانا عرفت انها مادايرة تقعد معاي مابية الحكاية دي كلو كلو ..
لكن انا بحاول المستحيل .
اها حصلت قصة غريبة وعجيبة ..
في الايام دي وانا منتظر نادية لمتين ظروفها تسمح وتجي اتكلم معاها .. في يوم طلعت العصر من المستشفى.. خليت ابوي قبلو .. ومشيت بي كرعي لغاية شارع الانقاذ قدام .. في محل زي منتزه اسمو الزوادة .. دخلت فيهو زهجان وقرفان.. وماعندي موضوع ..
لقيت بتين قاعدات بتونسن .. تتخيلو منو ومنو؟
آية ست الحكاية .. ومودة صاحبة نادية .. اعوذ بالله من الشيطان الرجيم .. طوالي اتخفيت كدا .. وبقيت اعاين ليهم من بعيد وهن ..
مندمجات في الونسة .. وشكلها ونسة سرية .. ياربي ديل هسي اللماهم مع بعض شنو؟.. بقيت بتزاوغ زي الحرامي .. وبراااحة لقيت لي طرف واتخارجت والله خفت خوف .. وفعلا حاجة تخوف يعني هسي ديل .. بتكلمن بقولن في شنو؟.. وياربي اية دي عارفة انو مودة صديقة نادية .. ياربي .. عارفة انو البتتونس معاها دي صحاحبة مرتي ؟ والله لو كان الموضوع ده زي مايتخيلي .. يبقى وطاتي اصبحت .. وموضوعي طرشق طرشق .. اول مرة اعرف طعم الخوف من المراة .. بسمع بالرجال البخافو من حريمهن .. والله ديل رجال بالجد .. الواحد بخاف من انو يفقدها .. زي حالتي دي .. مرة واحد كاتب في الركشة "المابخاف من مرتو الضحك شرطو" .. اول مرة احس بي كلمة الزول ده .. هه سبحان الله ..
يعني هسي الزول لو مشى في الدنيا دي صح .. ده كلو ماكان حصل ..
لكن بصراحة بقيت موسوس انا جني وسوسة .. لكن مرات وسوستي دي بتطلع صح .. واحساسي عمرو ما بخيب .. بس خاب يوم شكيت في ست الناس ندووو ..
اها يازول تاني يوم من ملاقاتي لي ناس مودة في الزوادة .. وانا اليوم داك كنت بايت في المستشفى مع ابوي ..
امي قالت لي تعال اقعد مع اخواتك ديل انا ماشة المستشفى .. والطيب مافي ..
قلت ليها حاضر .. ودي كانت فرصة .. على اني ارتب مع سارة ضربت ليها .. عشان تتصل على نادية تاخد منها مواعيد وماتوريها انا موجود ..
المهم يازول بي اختصار مشيت البيت وامي جات المستشفى .. وسالت سارة قلت ليها اتصلتي عليها ؟ قالت لي انا اختك ياشمسي .. اتصلت عليها وحنستها قلت ليها اناقاعدة براي امي ماشة المستشفى .. ومافي زول عيرنا انا وسناء . تعالي اتونسي معاي شوية .. وقالت لي بجيك بعد صلاة الضهر ..
قلت ليها والله ياسروو انتي الروعة مكملاها .. خلاص جدا انا بمشي لاقدام كدا .. اصرمح شوية واجيكم بعد الضهر مباشرة.. زي الجاي من المستشفى بدون سابق علم .. وزي الماعارفها قاعدة .. قالت لي ايوة كدا كويس .. يلا اتخارج ..
قلت ليها سوي لي فطور يابت.. الوكت بدري بسم الله هو شنوهو.. طارداني من البيت سريع كدي ..
قالت لي دقيقة دقيقة .. في زول جاء هنا قبل شوية بي موتر . دق الباب.. وانا طلعت ليهو وبسأل منك .. قال ليك كل ما اتصل عليك بلقى تلفونك مقفول .. داير يكفر ليك لي صالح .. ويسألك من مكانو مرقد وين . قلت ليها ماقال ليك اسمو منو .؟ قالت لي دقيقة نسيت اسمو . لكن زول مهذب شديد.. والله عينو مارفعها عاين لي مرتين .. قلت ليها قال ليك اسمو سالم .. قالت لي ايواااا بس ياهو .. قلت ليها ده شايقي من القرير .. زول صاحبي والله تختي في الجرح يبرا
اصحابي بتاعين الفرن كلهم مافي زول جاء كفر لي .. سبحان الله ..
ود اللبيب مرة قال ..
البختار صحاب عظما وكرام واجلا ..
مابخاف الضلام مادام معاهو اهله ..
الاخوان كتار لكن تضايقك علة ..
تلقى الشلة غابت والبساندو اقله..
ده الزول الوصلني بي موترو يوم صالح ضربك .. عندو اختو اسمها ربيعة .. زولة والله قمة الادب والاصالة .. جات قعدت مع نادية لغاية مارجعنا ..
سارة قالت لي والله ظاهر عليهو زول مقامو عالي وادبو ظاهر في وشو ..
المهم يازول مشيت اخدت لي لفات كدا.. وصليت وجيت بعد الضهر بي شوية دقيت الباب .. جاتني سارة فتحت لي الباب .. وبقت تتوسوس معاي .. قالت لي بختك بختك .. نادية يادوب جات .. العب لعب حرفا . ماتخلي الغزالة تفك من يدك تاني .. ادخل ادخل على الصالون النناديها ليك ..
الى اللقاء ..