اها يازول وصلت البيت بي قدرة قادر .. وكت وصلت سارة قالت لي ناس امي والطيب طلعو قبل عشرة دقايق .. قلت ليها حلو شديد تعالي لي جاي .. سناء وين؟ قالت لي لسع ماصحت الكسلانة الخملة مسمعنها الحتالة . الحتالة .. ورامية حمولا فوقنا .
قلت ليها: سيبي النقنقة .. قولي لي الحصل شنو؟
قالت لي: قبل ما اقول ليك.. صالح كيف ؟
قلت ليها: كويس شديد.. ماعندو عوجة .. مغيب ..اهاااا قولي سليتي روحي ..
قالت لي: طيب ياسيدي .. سقتا سناء ومشيت ليهم.. دقيت الباب وفتحو لينا .. سألنا من نادية ..قالو في غرفتها ..
مشينا لقيناها بترسم في اشكال كدا .. قلت لي سناء خلينا برانا ياسناء ..امشي لي خالتي صفية . اتونسي معاها شوية ..لمن نخلص من اسرارنا بناديك .. سناء طلعت.. وانا بديت لي نادية بالكلام .. قلت ليها : طبعا" يا نادية.. نحن في البداية.. ما كنا عارفين سببك المرقك من بيتك.. وقدر ما سألناك ابيتي تكلمينا .. لكن الحمد لله ربنا براهو كشف لينا الحاصل .. وعرفنا انو سببك صالح اخوي .. لكن الشي الانت ماعارفاهو يا نادية ..انو صالح بشرب البنقو .. والبنقو لخبط ليهو مخو.. وبقى مافارز الصح من الغلط .. والبصلح من البضر .. عشان كدي عرفنا انو اذاك ..وبي سبب الاذى انتي خليتي بيتك.. قبل ما تتكلمي معاي اي كلمة ..ولا تقولي لي صح ولاغلط .. انا عايزة احكي ليك الحصل لي انا من صالح .. وحكيت ليها . كل الحصل بي تفاصيلو ..ونادية مطيرة عيونا من راسها.. وبتقول لي .. مستحيل!! مابصدق .. لالا مبالغة والله ..
وانا مواصلة بحكي ليها .. وقلت ليها الكلام ده سر .. مافي زول عارفو غيري انا وشمس الدين اخوي .. وشمس الدين عارف الحصل ليك .. وحاسي بيهو ..
طوالي نادية انقدت بالكلام . قالت لي: عارفة يا سارة؟ .. انا من اول يوم جا فيهو صالح البيت.. انا كنت متضايقة وما مرتاحة للحكاية دي .. بس سكت لاني بحترم راجلي.. وبحترم رغباتو وفي النهاية ده اخوهو .. وحاولت كم مرة المح لي شمس الدين ..بس شمس الدين مافهمني ..
يوم صالح وشمس الدين طالعين الصباح ..وانا جيت مارقة من المطبخ ماشة على الغرفة بتاعتي . ماكنت متوقعة انو صالح يشوفني .اها وكت شافني.. انا شفتو اندهش دهشة غريبة ..ونظر لي نظرة مخيفة .. شمس الدين مافكر ليها ولاخت بالو لي نظرتو .. لكن انا لاحظت ليهو وخفت شديد .. شمس الدين لما جا راجع لقاني برجف .. زي القصبة .. وانا خايفة من النظرة النظرها لي صالح .. انا كنت شايفاهو زي اخوي .. لكن الوكت داك شفتو زول تاني .. المهم ياسارة .. وشمس الدين قال لي.. ليه طلعتي كدا قداموك كدا؟ .. قلت ليهو ما كنت متوقعاهو طالع .. طوالي انا في اللحظة دي صرحت لي شمس الدين قلت ليهو .. انت ماشايف وضع البيت ده كيف؟ يعني ضيق.. شمس الدين قال لي نحن لازم نستحمل ونصبر يومين تلاتة.. لامن يشوف ليهو صرفة .. انا طبعا" سكتا لكن والله ما رضيانة .. لاني حسيت نظرة الخيانة من عيون صالح ماريحتني ..
اها انا هنا قاطعت سارة البتحكي لي ..قلت ليها: فعلا ياسارة نادية كلامها صح .. لانو اليوم داك نحن طالعين طول الشارع صالح مخلوع .. ويعرق ويطلع المنديل .. ينشف عرقو والواطة صباح .. انا شكيت ..في انو شوفة نادية اثرت جواهو .. لكن قلت يمكن تكون دي وسوسة ..
سارة قالت لي: دقيقة اكمل ليك ياشمسي .. قلت ليها كملي ..
قالت لي: عارف ياشمس الدين.. نادية دي انسانة صادقة وشفافة .. ومادست مني اي كلمة .. قالت لي: انا من اليوم داك ياسارة بقيت مامرتاحة في البيت .. ولامطمئنة .. تتذكري اليوم الجيتكم في البيت يومو الضربك وانتي جيتي من المستشفى ؟ وسألتك من ابوك.. قلتي لي طلع المسجد وانا انتظرته .. كنت ناوية اراضيهو من صالح عشان صالح يرجع البيت .. لاني ما مرتاحة ليهو نهائي ..
تتذكري قلت لي ابوك ياعمي انت كلك نظر.. عارف انو صالح ماكان قاصد يأذى اختو . بس ايدو فلتت .. انت لازم تبقى قلبك كبير ..وما تفقد ولدك الكبير بي سبب غلطة هو ما قاصدها .
ابوك قال لي ماقاصدها كيف يا نادية؟؟ الولد بضرب في البت قدام امها وابوها .. يعني انا ميت مثلا؟؟
وانا قلت ليهو بس ياعمي هو مازول غريب ..هو اخوها الكبير..
قال ليها اخوها الكبير لمن اكون انا مافي ..
قلت ليهو يعني ما حتخليهو يرجع ليك وللبيت ؟ قال لي السما قريب ..
تتذكري انا بتناقش معاهو ساعة ؟؟ .. مافكرتو لا انتي ولا اخوك ولا ابوك انا قاصدة شنو ومصرة كدا ليه ؟
وكت رجعنا منكم شمس الدين قال لي صالح.. مشى لاصحابو في جبرة .. ومابجي اقل من تلاتة يوم .. حسيت بي نفسي ارتحت شديد ..
واتفقنا على انو نخلي ليتنا ديك عامرة بالحب .. وانا اتزينت وادخنت واتعطرت وبخرت بيتي .. وعملت زي مابعملو النسوان . وانا كنت في غاية الحوجة لي خصوصياتي . فجأة يجي صالح ناطي ويدق الباب .. غايتو انا اليوم داك كرهت روحي ..واتضايقت من هدومي اللابساهن .. وكان لي مراد ارجع بالزمن ساعتين .. عشان امسح ريحة الدخان والخمــــــرة من البيت .. لاني اتحرجت شديد خلاص ..وماعرفت امشي وين .. لاني من الصباح انا حسيت نواياهو وشفت خيانتو في عيونو ..
بعداك قمت سويت ليهو العشا ..وانا بي مغستي .. وحسرة قلبي .. غايتو الحمد لله... اها يازولة .. الصباح طلعو الاتنين .. وانا بقيت ماخدة راحتي في بيتي .. كنس وطباخة . ورسم ونقش وكدا .. زي الساعة عشرة صباحا" كدا .. بابي دقا .. وشمس الدين في الشغل .. قلت ليهو منو ,, قال لي انا صالح يانادية افتحي الباب .. والله راتبكت ارتباك ..وخوفت خوف غريب. بس ماعندي حل عشان مااغلط مع شمس الدين . بدون سبب .. فتحت ليهو الباب .. اها دخل وبقى يتكلم معاي .. كيفك يانادية .. ؟ ممكن تسوي لي شاي ؟ والله راسي ده ما مظبوط .. قلت ليهو حاضر ياصالح اتفضل على الاوضة الشرقية .. هسي بظبطو وبجيبو ليك .. خليت خدمتي كلها ..وقمتا اعمل ليهو الشاي جا لاحقني في المطبخ .. وكت شفتو لامن اتخلعت ..ما متوقعاهو يجيني في المطبخ .. ووقف جمبي قدام البوتجاز .. وبتكلم معاي :(اها الاخبار شنو؟ يانادية بس انا دايرك تشوفي لي مراة بتشبهك كدي) .. وشوية شوية بهبش بي يدو في شعري .. انا ازح منو بي جاي يجيني بيجاي ازح منو بيجاي يجيني بي جاي .. خليت الشاي في النار .. وطلعت من المطبخ .. ومشيت قفلت علي غرفتي وخليتو واقف في محلو .. جا دقا لي الباب بتاع غرفتي .. نادية افتحي ماتخافي مني .. قلت ليهو والله ياصالح انا ماقايلاك كدا .. قال لي مالي يعني..؟ عشان مكسر فيك؟؟ .. قلت ليهو والله يا صالح انا بدخلك في مشكلة .. ده شنو الحركات البتعمل فيها دي؟ .. انت ما عارف انا مراة اخوك شقيقك؟؟ قال لي كلمة ماقادر انساها طول عمري .. قال لي (يا نادية جركانة العسل بتكفي البيت كلو) .. بالله شوفي التفكير الغريب ده .. قلت ليهو طيب اصبر بس اليجي شمس الدين.. والله احكي ليهو حركاتك دي كلها .. لو سمحتا اطلع من بيتي .. لمن قلت ليهو كدا حسيت بيهو طلع مشى .. وانا اليوم داك كلو بقيت متوترة وقلبي مقلوع .. اقول اكلم شمس الدين حتحصل مشكلة .. ولو سكت مشكلة.. ياربي اعمل شنو؟ في النهاية قررت قلت الزول ده لو . بطل حكاتو دي انا بسكت تفاديا" للمشاكل .. لكن لو كررها بكلم راجلي .. اها المساء في نفس اليوم ..جاء شمس الدين وماحكيت ليهو.. قلت اصبر شوية .. وشمس الدين طلع على اصحابو .. زي الساعة 9 صالح جاء .. قال لي شمس الدين جاء؟ . قلت ليهو جاء وطلع على اصحابو .. قال لي كلمتيهو بالحصل الصباح ؟ قلت ليهو ماكلمتو لكن بس يجي وبكلمو .. قام طلع لي حاجة من جيبو كدا.. زي خشبة تشبة يد الطوة .. قال لي عارفة دي شنو؟
قلت ليهو ماعارفه دي شنو؟؟ .. مسكها كدا .. وطلع من جواها حديدة .. اتاريها دي مطوه بتتقفل وتتفتح ..
قال لي دي مطوه (ابوخوجة) .. مشيت اشتريتها مخصوص لي راجلك .. عشان لو كلمتيهو .. وفتح خشمو معاي .. اوريهو البطن بشرطوها كيف؟
انتي عارفة ياسارة شمس الدين احمق .. ومابسكت .. فعلا انا لو كلمتو .. بمسكو يخنقو طوالي .. وده المجنون حيقتل لي راجلي المابستاهل .. خلاص من اللحظة ديك غيرت راي .. من اني اكلم شمس الدين ..
بقيت بحنس في صالح .. عليك الله ياصالح امشي مننا .. عليك الله ارجع بيتكم .. صالح طلبتك بي الله ماتخرب بيتي ..
قال لي وين يا؟؟ .. انا لو ما لقيت لي فيك فرصة.. مابمشي من هنا ..
بالجد انا بقيت بين نارين ياسارة .. كنت متأكدة لو كلمت شمس الدين واحد فيهم بقتل التاني .. وكل الناس تعرف السبب نادية .. اخرب سمعة اهلي وسمعتكم .. وكان سكت ياهو الحجيم المابقدر عليهو .. بقيت بس بحاول احمي نفسي منو بقدر المستطاع ..
بقى بطلع الصباح مع شمس الدين .. مرات يجي راجع في اثناء اليوم .. بالنهار .. انامرات بقفل الباب من جوة .. ومرات بمشي اقعد مع مودة .. لامن يجي شمس الدين .. عشان مايجي صالح يلقاني في البيت .. واكتر شي خايفة منو انو شمس الدين يكتشف خيانة اخوهو .. ويقوم يحصل الموت بي سببي ..
يوم جاني ما طبيعي .. ودق الباب وابيت افتح ليهو .. قعد يكورك في الشارع بي كلام فاضي والفاظ ما حلوة .. فتحت ليهو الباب .. بقى باريني زي الاهبل في الحوش.. اول ما دخلت غرفتي .. مسكني .. اتخلصتا منو بي ملاوه ..
طوالي جريت برة.. وضربت لي شمس الدين .. قلت ليهو تعال صالح ده شكلو عيان .. قال لي اعملي ليهو عصير ليمون ..
اها صالح وكت شافني اتصلت على شمس الدين .. خاف . وانا قلت ليه شمس الدين قال جاي في الشارع .. قررب ..
طوالي مشى غرفتو .. وانا ضربت لي مودة قلت ليها ياتجيني يا اجيك . عشان مودة تقعد معاي تحميني منو ... وجاتني وقعدنا وفترنا انا وموده .. شمس الدين ماجاء .. ومودة زهجت وقالت ماشة البيت .. ضربت لي شمس الدين ابا يرد .. وتاني وتالت مافي رد .. والله بتذكر ضربت ليهو 13 مرة مارد .. لاني موقفي بقى شين .. البت قالت ماشة .. وانا حامياها تمشي .. وخايفاها تسألني تقول لي انتي ليه ماسكاني شديد كدي؟؟ .. انا بس ماسكاها لامن يجيني شمس الدين .. تصدقي ياسارة ضربت لي شمس الدين 13 مرة وفي المرة ال 14 قفل التلفون ..
طبعا سبحان الله . سارة بتحكي لي ..اتذكرت.. ده اليوم الانا كنت قاعد مع آيه ..في الكافتيريا .. سبحان الله .. (افعل ماشئت كماتدين تدان) .. غايتو ماكنت مصدق الحكاية دي لكن . وقعت علي تب ..
اها سارة مازالت تنقل لي في حكاية نادية بي ضبانتها .. قالت لي ..عارف ياشمس الدين.. نادية دي بتحكي لي وتبكي في جنس بكا ..
قالت لي شفتي ياسارة شمس الدين جا . ولقى مودة قاعدة معاي.. وانا كنت خايفة يشك في حاجة .. انا متأكدة بقدر احمي نفسي من صالح .. والله لو بقى مصارع مايقدر يصل لي .. انا بقيت بكرهو بي الله واحد .. وكل مرة اتمنى انو يمشي مننا .. وهو كل مرة بقول لي
حتى لو ابوي خلاني رجعتا البيت .. انا مابخليك .. وبجيك في بيتك موش بيت اخوي؟ .
اها يوم من الايام كان حصل بيني وبين شمس الدين نقاش من الصباح .. وهو اتاريهو كان سامع .. بعد شمس الدين مشى الشغل صالح جاني راجع زي الساعة 3 وشوية عصر .. ودقا لي الباب .. ابيت افتح ليهو .. قال لي والله ماتفتحي .. اشوت الباب بي كراعي هسي .. والحلة دي كلها تسمع .. افتحي الباب ده انا بتكلم معاك ..
فتحت الباب .. قال لي ليه شمس الدين يتنهر فيك كدا وانتي ساكتة ؟ انا مابرضى فيك .. الزول ده والله مابستاهلك .. الزول ده والله انا بضربو .. الزول ده لو تاني كورك معاك انا بعوقو .. قلت ليهو ياصالح ده راجلي وانا قبلانة باي شي يحصل منو.. ارجوك ماتتدخل في حياتنا .. قال لي حياتكم دي بتهمني .. ومد يدو عايز يلمسني .. دفرتو بي يدي كدا .. طلعتو برة البيت وقفلت الباب .. وطبلت غرفتي علي .. وهو فات وكت شافني اتضايقت .. وقعدت ابكي بطول حسي .. بس اتخيلت انو في زول من ناس الشارع سمع بكاي وصوت كواريكي معاهو .. وخفت الكلام يصل لي شمس الدين.. اها شمس الدين لمن جا بالمساء .. سألني سؤال مفاجئ .. وقال لي الليلة صالح جا النهار هنا ؟؟
انا قلبي طار من مكانو من السؤال .. وقلت خلاص في زول سمع كواريكي قبيل .. وكلم شمس الدين .. والخلعة الحصلت لي في اللحظة ديك . شمس الدين حسا بيها .. طوالي ختيت يدي فوق قلبي وقلت بسم الله (شحة القلب) دي من شنو ياربي .. يالطيف ..
قال لي يابت انا بسأل فيك تقولي لي شحة . كدا اتاكدت انو عرف احسن ما اكذب ..
قولتا ليهو ايوة جا العصر وعملت ليهو شاي وطلع ..
وانا بي قلبي بقول ياربي تستر يارب تستر .. واكتر شي خايفة منو انو يعرف تصرفات اخوهو ..
شمس الدين بقى يعاين لي من راسي لي كرعيني .. وانا اتوترت شديد وخفت .. واتاكدت انو عرف اي حاجة .. واتخيلت المشكلة قدامي ومشهد الدم وشمس الدين مقتول قدام عيني ..
طوالي جريت على المطبخ زي المجنونة .. وغسلت .. وشي ومسحتو .. وقلت شكيتك على الله يا صالح .. خليتك لي الله ياصالح .. وجيت طالعة لي شمس الدين .. قلت ليهو لو سمحت ياشمس الدين طلقني .. عليك الله يا سارة انا معذورة ولا ما معذورة؟
الى اللقاء .. .. .