بَعد بيّه حِزن يِنكتب مَا ينشَاف
حِزن محَد أضَن شافهَ حِزن شَفاف
وتعّب مستوطِن بِروحي
متلفّلف عليّه لفاف
حِزن مِثل الله مَا ينشاف .
_تصويت للقصة
_تعليق بين الفقرات
_متابعة للحساب
ظلمات الرائد
الكاتبة بنين أيتان
حساب الانستا baneen_etan
~•~•~•~•~••~•~•~•~•~•~•~•~•
أبرهان:
من بعد ماصارت بين خيارين صعبات
وضلت تباوعلي وتباوع لعمها
وعيونها تتوسل بينه ع أمل ماتكسر واحد منا
اني صعبه عليه اشوفها هيج
وصعب عليه اخيرها بيني وبين اهلها
بس ماكدر اثق بيهم
ابوها شيطان وكلشي يكدر يسوي.
لهذا اني ماريدها تروحله بعد مايخليها ترجع مستحيل
يريد ينتقم مني ع مهنته الي خسرها
قاطعت تفكيري فيّ وگالت وهي تباوع لابوي؛
فيّ:عمو يوسف من رخصتك اكدر احجي ويا عمي شويه
يوسف:اي بويه من حقج عزيزتي
أبرهان:فيّ!!!!
فيّ:شبيك هنا اكو باب ثاني نطلع منه
بس احجي ويا
يوسف:امشي اطلع عوفها ويا عمها
سحبني ابوي وطلعني ويا
اخذني للجوه ماقبلت ضليت واكف باب الاستقبال
وشوي مبتعد عنها
اجت يمي امي واديان
_ها شصار وياكم
_مادري
_يمه اذا ماتأمن بيهم روح وياها وجيبها بأيديك
باوعتلها وماحجيت شي وهي هم سكتت
بعد دقايق من الانتظار...
طلع عم فيه من الاستقبال هو واخوها وسلم ع ابوي
وباس فيّ من راسها هي هم باسته وحظنته
وحظنت اخوها وراحو
ضلت هي واكفه بالباب تودعهم اني مصدوم هاي شلون قنعته يروح بدونه كان قافل الرجال
شغل سيارته وراح
دخلت هي وابوي وسدو الباب
تقربت ع فيّ وحجيت وياها:
_شصار وراح هو راضي مو ع اساس اذا طلع بدونج يزعل عليج
ماباوعتلي ولا حجت شي عافتني وراحت دخلت
لزمت ايد ابوي وصارت تمشي ويا وتحجي بصوت ناصي
اجيت دخلت الكل محاوطينها وهي تسولفلهم
فيّ:ماكتله شي والله
بس وضحتله انو ماكدر اعوفكم واروح ماكدر بدونكم
تأبروني ان شاء الله هههههه
أديان:خرب عرضج حته بهاي حالتج تضحكين وتشاقين
هاي لو اني ادك والطم
وخاصة لو سمعت ابوي مريض
أبرهان:لعد تقارنين ابوج بأبوها والله يالله
اني حجيت هيج فيّ باوعتلي خزرتني عيونها حمرر صارن
هي واضح مقهوره وتريد تبجي بس ماتبين هل شي
عافتهم وراحت صعدت للغرفه
يوسف:انتَ شبيك ماتكلي اضربك ع حلگگ هسه
اخلي اسنانك تجري دم
أبرهان:شبيك يابه شگلت هسه اني سبيت العنب الاسود
يوسف:البنيه مقهوره لان عمها طلع بهاي الطريقه منا
وانتَ جاي تزيدها عليها
وحده غيرها ماتسكتلك روح راضيها يلا وجيبها خلي نتغده لاتنزلي لو ماهي وياك
رحت صعدت للغرفة فتحت الباب
ماكو بالغرفه فيّ
سمعت صوت مي يجري بالحمام عرفتها هي بي
ضليت واكف ع الميز اعدل بشعري
شويه وطلعت هي من الحمام
بس عيونها حمررر دم حته الجفن احمر وخشمها احمر
عرفتها كانت تبجي
نمرد گلبي من شفتها هيج
ماباوعتلي ولا حجت شي
تريد تمشي تطلع من الغرفه وگفت بطريقها:
أبرهان:فيه اني....
قاطعتني وگالت بعصبيه:
فيّ:وخر من خلقتي
أبرهان:ماوخررر
فيّ:أبرهان وخرررر من خلقتي ماريد احجي شي اندم عليه بعدين
أبرهان:احجي بله اسمعج
دگت رجلها بالارض واستغفرت وهي شويه وتنفجر بيه:
فيّ:شوف اني متعوده ع شي وقت مااكون ضايجه
ومتعصبه لاحد يحاجيني ولا احجي ويا بشر
حته لا تصير مذبحه بيناتنه وبعدين اتندم
فـ اكسر الشر وخر من خلقتي
أبرهان:ههههه فدوه للمعصب
اني اريدج تحجين عادي تحملج شعندي احبل اجيب
فيّ:طول فتره الي جنت احجي وياك بيها بالموبايل
اني ماجايبه طاري أبوي بالموزين
ولا حاجيه عليه كدامك كنت خايفه يجي يوم واتعير بي
وصار واجه هذا اليوم
ومن بس ع ابوي حجيت وحته ع عمي
اسلوبك مو زين ويا وهو بيتكم المفروض تحترمه
لخاطرييي
ممنوع ينحجي ع ابوي أبرهان ممنوع لا وحدنه ولا كدام اهلك ولا حته بينك وبين نفسك
مهما كان غلطان
غلطان وياي واني مسامحته
انتَ بصفتك منو تحجي عليه
أبرهان؛ها يعني هسه صار ابوج اعز مني
وداتتعاركين وياي بسببه
فيّ:ماكو احد اعز منك،،بس كلشي اله حدود
فضلتك عليه وفضلتك ع الاعز منه
اني عمي عندي يسوه الدنيه
وبحياتي مارافضتله طلب
بس لاجل عيونك رفضلته وانتَ ماكسرت بيك
هي تحجي واني اعدل بشعرها
ماخذ الموضوع بروح رياضيه لان هي ضايجه ع الي صار
وتريد تفضفض وتعاتب
واذا اني ماتحملها هسه شوكت اتحملها
وكل كلامها صحيح
وعجبتني بي يعني بالشخص الي معذبها ماتقبل
يحجون عليه
لعد الي الشخص التحبه شنو راح تسوي
نترت ايدي من شعرها:
أبرهان:يعني ع الشخص الي مأذيج هيج تدافعين
وماتقبلين ينحجي عليه
لعد ع الي تحبي شسوين؟
فيّ:أبرهان اني فراغ بداخلي كلش جبير
ومستحيل احد يملي
لو اشوف ابو ويا بنته يضحك ويتشاقه تصير يوجعني گلبي
وهل النقص راح يضل بيه طول العمر
مو انتَ تجي تقارن ابوك بأبوي وكدامي
انتَ ماتعرف شصار بيه
اليوم انتَ حجيتها باجر اخوتك وراها اهلك والكل
يضلون يعيروني بابوي
هو صح مو خوش انسان بس أثره يوجع بروحي
وهي تحجي هيج نزلت دموعها مسحتهن بسرعه
ورجعن نزلن
حطت ايدها ع وجها وصارت تبجي
تقربت عليها حظنتها ع گلبي
صار رأسها بصدري تناشغ وتبجي مردت روحي
كلش تندمت ع الي حجيته
والمصيبه كلشي حجته هي حقها بي
وماكدرت ارد عليها لان حقها
أبرهان:اني اسف اوعدج ماتنعاد
ولا احد يجيب اسم ابوج او اهلج بعد
تبعدت عني وهي منزله راسها تمسح بدموعها
سحبتها من ايدها دخلتها للحمام غسلت وجها
بمي بارد حته عيونها يروح الاحمرار منهن
أبرهان:ها تصافينه هاي هي
ماردت عليه نشفت وجها وطلعت من الحمام
راحت نامت ع الجربايه ودارت وجها ع الجهه الثانيه
أبرهان:امشي نتغده اهلي منتظرينه
ماردت عليه أيضاً تنرفزت اني:
أبرهان:صخاااام مو داحجي وياج
فيّ:مااريد
أبرهان:هم منتظريج امشي
فيّ:مااااريد
أبرهان:لا حول الله
درت وجهي طلعت وسديت الباب
نزلت جوه
يوسف:ها وين فيه
أبرهان:مطنگره متقبل تنزل اتغدو انتو
يوسف:وشكو نزلتلي انتَ اذا هي مااجت وياك
وخر هيج
دفعني ابوي وراح صعد فوگ لغرفتي
فيّ:
طلع أبرهان واني ضليت بفراشي
يمكن تفكرون زودتها شويه عليه
بس اذا اضل ساكته عنه يتعود
يضل بكل تجمع عائلي يحجي ع اهلي
وكلما راد يقارن احد يقارنه بابوي
هو صح مو شخص نزيه واني ادفعله
بس المفروض احتراماً الي مايحجي عليه
لان اني محترمه اهله ومقدرتهم
وامه شسوت بيه قبل ايام واني رحت تعتذرت منها
وصالحتها
ليششش مو لان ضعيفه او لان كاعده ببيتهم لا
من حبي لابرهان سويت هيج
واحترام اهله واجبي طول مااني احبه
تقاطعت افكاري من ندگ الباب
عبالي هو رجع اجه سكتت ماحجيت شي
بس بعد ثواني اجاني صوت عمي يوسف وطرقات باب خفيفه
يوسف:بويه فيه تكدرين تطلعلي احجي وياج
نهضت بسرعه من مكاني عدلت ملابسي
وفتحت الباب
فيّ:العفو عمو مادري بيك هاي انتَ
يوسف:ليش ماتجين تتغدين ويانه منتظرج اني
فيّ:مالي نفس والله اكلو انتو بالعافيه
يوسف:هاي شنو من شوكت ننجمع كلنا ونقص نفر
ماعندي هيج اني
لو مااشوفكم مجموعين كلكم حولي مااتغده
اليوم بالريوك انتِ ماكو وهسه هم شلون ترضيها
فيّ:هههههه لا طبعاً ماارضاها
يوسف:لعد يلا تعاي نزلي وياي وبعدين كملي زعلتج
من هذا الجلب أبرهان
فيّ:لا حشاه
يوسف:لا والله حشه الجلب
فيّ:ياااا عمو على بختك هههههه
گادني من ايدي ونزلنه
ابرهان واكف باب الصالة يستمعلنه
نزلت ويا عمي هو يباوعلنه
أبرهان:لعد ليش مانزلتي وياي شنو مااستاهل
يوسف:الناس مقامات
هو سكت نزلنه كعدنا بالصالة
السفرة محظره كعدت بصف بنص ايان واديان
أبرهان صار مقابيلي
كلش حلو جمعتنه ع الاكل هذا الشي كان بنفسي
ابوي يجمعنه ونكعد سوا بس ماصارت
كله يأكل وحده ع طاوله
بس هنا عمي يوسف عوضني صار مايكعد ع الاكل الا كلنه مجموعين
خلصنه الاكل ونتشرنه كل واحد بمكان
اني وعمتي بالمطبخ نعزل
أبرهان وعمي كاعدين يحسبون فلوس ويختارون بضاعة
رن تلفون عمتي راحت تجاوب عليه
اني سويت جاي واجيت قدمته
وكعدت يمهم
بعد دقايق اجت عمتي كعدت اخذت جايها وبدأت تسولف:
ام أبرهان:يوسف بيت اخوي عزمونه كلنه ع العشه
تأخذنه
يوسف:اي سهله
ام أبرهان:لعد فيّ وأديان تحضرن شويه ونروح
أبرهان:فيّ متروح
ام أبرهان:ليش شكو
ابرهان:روحي انتِ يمه فيّ ماتروح ماتقبل لاتحرجيها
فيّ:ههههه هاي منو كلك مااقبل
باوعلي وخنزر عيونه عليه:
يوسف:تريدين تروحين ويانه؟
أبرهان:بويه شو انتَ ماسحني بالارض شعجبب
يوسف:واطيح حظك شني البنيه تضل وحدها
احنه نتأخر وانتَ دايح
أبرهان:اني اضل يمها معليكم
يوسف:هسه منا ع مانروح تغير رأيك
غيرو الموضوع وصارو يحجون عن الذهب
اني رحت للسياره طلعت غراضنه الي اشتريناهن
اخذتهن وصعدت فوگ ارتبهن بالكنتور
طلعت ملابس أبرهان خليتهن بخانه وحده
وعلكت كم قطعه منهن
وباقي الخانات رتبت ملابسي وعطرتهن
طلعت ملابس رحت سبحت
وبدلت لبست من الملابس الي اشتريتهن جديدات
طلعت من الحمام وكفت ع المرايه امشط شعري
حطيت عطر
دخل أبرهان وسد الباب
وكف واستند ع الباب يباوعلي
أبرهان:هوَ التراك حلو لو انتِ محليته؟
اني بالگوه لازمه الضحكه ماريد اضحك واخرب الزعله
سكتت ماحجيت
أبرهان:تعاي امشطلج
فيّ:لا ماريد رايحه لامك تمشطلي
أبرهان:امي داتبدل تريد تروح للعزيمه
فيّ:حته لو تمشطلي وتكمل تبديل
اجيت تقربت للباب اريد اطلع هو صار بوجهي:
أبرهان:الله يگول وجعلنا بينكم موده ورحمة
ارحم بحالي خايب لاتضل زعلان موش لخاطري
لخاطر كلام الله..
گال هيج واني فهيت ضل يباوع عليه
دنگ بمستواي باسني بخدي
ونزل ع رگبتي مشى خشمه عليها وطبع بوسه خفيفه
ورفع راسه بسرعة
ماحسيت بس ع شواربه نغزتني
اني من قوة دگات گلبي حسيت عليه دايسمعهن
هاي كانت لاول مرة يبوسني بيها
غالباً يبوسني من راسي
تبعدت عنه رجعت ليوره
هو رفع راسه يباوعلي ومقلص عيونه
حط ايده ورا راسي يعدل بشعره
طلع باگيت الجكاير سحب منه جگاره حطها ع خشمه
شمها وبعدين ورثها وصار يسحب منها نفس
ويباوع عليه
اني توترت صرت افتر بمكاني ماعرف وين اروح
لان يباوع عليه
اجيت يمه وگلت:
فيّ:انتَ لزكت هنا وخر خلي اطلع
أبرهان:وين تطلعين ضلي هنا مسويلج شي
فيّ:هاا
أبرهان:ولهدا
فيّ:شنو يعني لهدا
صارت نظراته ع رگبتي لدقايق وكال:
أبرهان:بيج حساسيه؟
فيّ:هاا
أبرهان:هاي شبيها نثولت البت
بويه بيج حساسيه
فيّ:مادري
أبرهان:هاي رگبتج صار حمرة كلها.
لزمت رگبتي بايدي وحجيت بدون مبالاة:
فيّ: هاي من احد يلزمني او حته بس امشي اظفري ع جسمي يصير احمر
مدري ليش.
أبرهان:ترفه بويه ترفه ماتتحملين واني شلون بيه لعد
فيّ: ليش شبيك انتَ هم تصير احمر مثلي
لطم ع راسه وطفه الجگارة
وراح للكنتور فتحه لگه بس ملابسي
اندار عليه باوعلي وحجه:
أبرهان:هاي جرودي وين
فيّ:هههههه حطيتهن هنا ورتبتهن الك بعد شتريد
أبرهان: بس هنا جا وهذا الكنتور كله المن
فيّ:شوف مو اني راح ابدي اشتري اشيائات
مثلا هسه انتَ عندك بس فرشتين شنو ماتمل منهن
فرغت خانه احط بيها هواي فرشات لان راح اوصي
أبرهان:منج لو مني
فيّ:هههههه اكيد منك جا غير هي غرفتك
أبرهان؛بس اني ماباجيلج ع فرشه سوي معروف واشتريلي منج
فيّ:ولك عيني انتَ شكد بخيل يلا راح اشتري مني
لا تبجي بوجهي
أبرهان:عفيه بتي باقي الخانات شنو بيهن
فيّ:المفروض اليه بس اني ملابسي قليله
شو رجلي ماعنده احساس ويحس ويترسه الي
شسوي ع مااترسه ملابسه راح يضلن الي الخانات
أبرهان:جا واني كلهن جعصتيهن بخانه وحده
فيّ:اييي بس مرتبات افتح وشوف
فتح الخانه شافهن صدك مرتبات
هي خانه وحده بس بابين وحده تعلاگه وحده رفوف
شاف مال الطلعه معلگات والباقيات تصفيط
أبرهان:اصلا هسه احسن من قبل
فيّ:عفيه ابني هيج اريدك قنوع
باوعلي صفح وابتسم...
حسين:
كلنا منتظرين عمي خضر يجي ويا فيّ
بس من بعد الانتظار اجه وحده
دخل لابوي وهو ضايج
ابوي يباوع ورا عمي ع امل تدخل ورا فيّ
كعد عمي بصف ابوي:
علي الدر؛ماقبلت تجي وياك موو
خضر:علي صدكني...
قاطعه ابوي وگال بقهر:
علي الدر:حقها خويه حقها الشافته مني مو قليل
مو هينه عليها بيوم وليله تنسه
خضر:هي رادت تجي بس خافت تصير مشاكل
فد يوميه تهدئ الاوضاع وارجع اورحلها
سكت ابوي ماحجه
كان كلش متلهف انو تجي فيّ يعرفها حنينه وماتحقد
عباله راح تجي بس خاب امله من اجه عمي وحده
مرة الايام عاديه وابوي صحته ع حطتها ماتغير منه شي
هو يضوج من كعده البيت
فـ صار كلش متنرفز ومايحجي ويا احد
ولا ياكل ولا يشرب
ايده اليسار ثگيله مايگدر يحركها
ومادا يتجاوب ويا العلاج
لان متعصب ويحرگ بداخله
هي مايصير يضوج بعد لان مو زين ع گلبه
كلشي سوينه علمود نريحه بس مافاد
مايريد الا فيّ
هو صح بعد ماجاب طاريها بس واضحه
بيوم اني كاعد يم امي واسولف
صاحلي ابوي اني وامي
اجيتله وكفت بـ باب الغرفة:
حسين:ها بويه
علي الدر:تعال اكعد يمي
تقربت كعدت يمه بدأ يحجي:
علي الدر:البنيه التحبها بعدها موجوده؟
اني توترت ماعرفت شجاوبه
شافني خايف گال:
علي الدر:ليش خايف ماسويلها شي
ماكو بيدي سلطه بعد واكدر اسوي
بس دا اسالك جاوبني
حسين:اي بويه موجوده دا تدرس كل فتره اروح لامها اسال عليهم واتفقدهم واجي
هم عائله مگطوعه ماعدهم احد
فـ اسال عليهم من باب الانسانيه
علي الدر:عفيه احسن من ابوك ماعنده انسانيه
حسين:لا حشاك
علي الدر:گول لامها ابوي نطاج كلمه وكلمته تاخذيها عهد
بس تخلص السادس اروح اخطبها الك وشوكت ماتحب تزوجون
بعد الكليه قبل الكليه بكيفك
بس المهم اخطبها الك
اني نهضت من مكاني فرحان
رجعت كعدت حظنت ابوي
حسين:صدك بويه
علي الدر:مجذب عليك اني من قبل
حسين:خاف مايقبلون خوالها
علي الدر:اني ادخل بيها واكو احد مايقبل؟؟
معليك بالكل بس كول لامها تحجزها الك خاف يجون عليها ناس وتروح منك منا ع ماتخلص
حسين:ماشي بويه ماشي هسه راح اخابرها
لا شكو مخابرها رايحلهم واكللها
علي الدر:هناك وخابرني انطيني ياها اني احاجيها
دنگت عليه بسته من راسه وتشكرته هواي
واني گلبي طاير من الفرح احس الدنيه ماواسعتني
صح اني ابتعدت عنها لموده بس بعدني احبها
كل يوم اراقبها من تروح للمدرسة وتجي
واروح لامها اسال عليها اشوف اذا محتاجه شي
شكد حاولت انساها لان خفت عليها من ابوي يأذيها
وكنت گاطع الامل ننجمع سوا
بس ماكدرت انساها
الحب الاول صعب ينسي
عشگ الصباي هيَ.
بدلت ملابسي بسعره ورحت لامها
وصلت دگيت الباب طلعلتي اختها رحمه
_شلونج حبيبتي
_زينه
_صيحلي ماما
راحت تصيحها اجتي امها دخلتني ورحبت بيه
بعدها امها تحبني وتشوفني مثل ابن الها
_هلا يمه بيك نورت داري
_حبيبتي يمه منور بيج شلونج اخبارج
_زينه بعمه شعجب اليوم يمنه ماصارلك هواي من اجيتنه
_اي والله جايج بموضوع
_ابشر
_مو اني الاحجي بي ابوي راح يحجي
رفعت التلفون خابرت ابوي وانطيته الها
_السلام عليكم يمه
_وعليكم السلام يبعد امك كل الهلا بيك تفضل
_اني ابو حسين تعذريني احجي وياج بهذا الموضوع بالموبايل المفروض اجيج ع راسي
بس وضعي الصحي شوي تعبان
_سلامتك يمه لا العفو يسلم راسك تفضل
_من بعد أمرج وكلمتج رايد منج تحجزيلي المحروسه بنتج لابني حسين
وتاخذين مني كلمه زلم بس يخلص السنه سادس
اجي اخطبها واني الممنون
وبعد الكلام يمج
_يايمه يوم المنى
يوم المنى الي حسين يصير زوج بنتي
جا وين الكه احسن منه أدب واخلاق وثقافه بالعافيه عليك ع هيج تربيه ياخالة ونعم التربيه
_الله يسلمج ويحفظ بنياتج وليدج هذا بعد
_الله يخليك اله وبنتي من الساعه اعتبرها جنتك
وماتصير لغيركم بأذن الله
_اني اشكرج وممنون منج
ونطيتج كلمة والزلمه كلمته شرفه
اذا عندج شك او خايفه من الموضوع تكدرين تحطين شروط واحنه بخدمتج
_لا صدك جذب حسين وليدي احط عليه شروط
عمت عيني يگبعها ويأخذها
بدون شروط
خلصت كلامها ويا ابوي
كمت بستها من راسها ع كلامها عني
وتشكرتها
وطلعت من يمهم
وصلت لنهاية الشارع طلعت بوجهي موده
هي مدنگه من صرت بوجها رفعت عيونها باوعتلي
رجعت ليوره
صفنت عليها شويه اباوعلها
حسين:شلونج
موده:زينه وانتَ
حسين:من هذا اليوم اني بخير
هزت راسها بمعنى اي وعبرتني وراحت لبيتهم
ضليت واكف اباوعلها لحد مادخلت للبيت
مشيت رحت لبيتنه
دخلت لكيت عمي خضر والياس يمنه
سلمت عليهم وسألتهم:
حسين:خير ان شاء الله
الياس:كله خير،،حضر روحك تجي ويانه
عقدت حواجبي مستغرب مادري شكو:
حسين:شكوو
الياس:رايحين نجيب فيّ ونجي
حسين:شلون تجيبوها مو راح عمي خضر ماقبلت تجي
الياس:هل مرة مو برضاتها غصبن عنها راح تجي ويانه
امشي يلا تحرك حته نوصل بسرعه
باوعت لابوي ع وضعه كاعد ع جربايه وساكت
خفت لا يكون رجع مثل قبل شنو غصبن عنها
يمكن هو دازهم
حسين:بويه انتَ شنو رأيك
علي الدر:روح ويا عمامك جيبوها وتعالو
ماسميك زلمه وادخلك لبيتي اذا ماجبتها وياك
خضر:علي ع اتفاقنه اي غلط يصير اگلب الدنيا
هز براسه بمعنى اي
وطلعو عمامي كل واحد ركب سيارته
رحت صعدت ويا عمي خضر لان ماتراهم اني والياس طلع الياس اول شي وبعدين احنه
طلعنا من الشارعنه
التفتت طلعت ورانه ثلاث سيارات سود كبار
وثنين كدام سياره عمي الياس هم سيارات سود كبار
يعني خمس سيارات رايحه ويانه شكو
رايحين گوامه(نتعارك)؟؟
حسين: عمي هذول منو بالسيارات ورانه
خضر:عمامك
حسين:شني منيلي عمام هو مرتضى ومتربين منه
صارلي سنين ماشايفه
خضر:عمامك من العشيره قصدي
حسين:ليش شنو المناسبه ماخذينهم ويانه
خضر:نوصل وتعرف
اندار شوف اجو بعد لو بس هذني
انداريت شفت السيارات صارن اكثر
ماكدرت اعدهن لان اشكالهن تنوعت
ماعرف ياهي النه ياهي بالشارع غريبه
كلش خفت ع فيّ شنو راح يسون بيها
وليش كل هاي الزلم جايه ويانه
والموخوفني اكثر لا ابوي يرجع مثل قبل
فيّ:
الكل راحو بقينه بس اني وأبرهان بالبيت
هو راح سبح
وبدل لبس التراك الي جبته اله اني
طلع من الحمام ينشف بشعره
اني اباوعله بتركيز:
فيّ: خلي نشيل من المنطقة
عقد حواجبه وباوعلي بأستغراب؛
أبرهان:ليش ياستار
فيّ:جمالك جاي يفوحححح اخاف ع بنات المنطقه منك خاف يصير بيهن سكر من كثره الجمال هذا
ضحك بصوت عالي وتقرب عليه كرص خدودي وگال:
أبرهان؛هههههه ولج شنو انتِ تنوكلين
هذا جمالج بويه نعديت منج اني
فيّ:خرب شوف شلون خجلني
أبرهان:اطيح حظج بأخلاقي
فيّ:هوَ كلك ع بعضك مطيح حظي
أبرهان:ممنون
فيّ:حبيبي
راح ع المرايه يعدل بشعره
اجيت يمه اخذت مشط
فيّ:دنگ خلي امشطلك
دنگ عليه مشطتله ومشط لحيته
أبرهان:اكلج فيه
فيّ:گلي
أبرهان:شنو گلتي لعمج واقتنع يروح بدونج
فيّ:مادري ماتذكر
أبرهان:فيييي
فيّ:يابه صدكني ماتذكر شني اجذب عليك
أبرهان:صدگتي بانو ابوج مريض لو يجذب عليكم حته تتعاطفون ويا
فيّ:ابوي كلش يخاف ع نفسه ومايحب المرض
اصلا هو مايبين للناس انو مريض حته لا يتشمتون بي
او يتعاطفون ويا
أبرهان:يعني سالفه مرضه صح
فيّ:اي
أبرهان:لعد ليش شعجب مارحتي ويا عمج
لان تحبيني
فيّ:هي مال لان احبك هاي صح مايختلفون عليها ثنين
بس مارحت لان ماجنت مستعده للمواجهه ويا ابوي
بعدني احتاج وقت
اني مرة وعدته گتله راح يجي وتخسرني
بس من تخسرني اخليك حته بالحلم تحسر ع شوفتي
واخليك تترجاني بس اكلك كلمة بويه بس ماتسمعها مني
لان لمت گطعت هاي الكلمه عنه اني جنت بحالة يرثى لها
جنت احسد الميت وهو بقبره.
أبرهان:اي وحته لو رايحه جنتي خليتي هيج يتحسر ع هاي الأشياء
فيّ:لا يبويه اني ضعفيه گدام هيج امور
لاتشوفني هيج اكول خلي اروح يمه وشوفني شلون اصير
مثل الطير والوذ بحظنه
أبرهان:اويلي عليه غير لو اشوفج هيج اموت
واعرف تسويها لان گلبج طيب
فيّ:اي والله وشي ثاني اني جنت واعده نفسي
اصير شي جبير بالمجتمع وانسانه ناجحه يلا اروح
واوجهه اكله البنت الي ماخلتيها بيها تكمل دراستها
وحطمتها بسبب حقدك عليها كدرت تكملها بدونك
وصارت كذا شي
بس كلشي ماصرت.
أبرهان:الشي الي عشتي جهاد
واعظم واصعب من الدراسه
اصلا هسه انتِ شي جبير بالمجتمع انتِ فخر وقدوة
اولاً لان صبرتي كل هذا الوقت
وثانياً لان تحملتي مسؤوليه واشياء اكبر من عمرج
وثالثاً والاهم گدرتي تطلعين من تحت جناح قوي جداً وملتف عليج
بس كسرتي وطلعتي منه
ورابعاً يبويه غيرتي انسان طاغوت انسان قاسي
صعب يتغير وشايف كل شي يسوي صح رغم هو غلط
خليتي يعترف بغلطه ويتندم
ويطلب السماح لاول مرة بحياته
هذا شي عظيمممم من شخص عظيم مثلج گدر يسوي كل هذا ومامفتخره بنفسج
اتحده بنت هسه بعمرج تطلعلي وتكول اكدر اسوي كل هذني
وتعيش الي عشتي
هسه اتراجع عن كلامي
بعدين شسوين بالعالم يكفي اني فخور بيج.
دمعت عيوني من كلامه وشفت نفسي بعيونه شي جبير
فيّ:اخر شي كلته صح شسوي بالعالم
يكفيني انتَ وهذا كلامك وفخرك بيه يكبر الگلب
أبرهان:هذا كله حقيقه الي كلته مو حته اجاملج
لو اجبر خاطرج
بعدين اذا بيج مافتخر لعد بمنو افتخر
"ضنه روحي انتِ يبويه"
تقربت عليه لفيت ايدي حول ظهره وحطيت وجهي برگبته صرت اخذ نفس بهدوء واني حاظنته
وهو بأيده حاوطني
وصار يمسح ع ظهري ويعدل بشعري
صار الليل
هوَ يتعامل ويا تجار واني كاعده يمه اختار ذهب
وموديلات حلوه يريد يشتروهن للمحل
حسيت نفسي جعت رحت للمطبخ
طلعت اكلت وبديت اسوي
اني بالغده مااكلت هواي لان جانت صاعده عندي الحيوانيه ع گولت أبرهان
من يضوج يكول صاعده عندي الحيوانيه
خلصت الاكل رتبته بالصينيه وجبته
يم أبرهانه
اكلنه وخلصنه رجع يتشغل اني ضجت
فيّ:أبرهان
أبرهان:يروحه
فيّ:شوف شلون يخجلني ولك عيني اريد انكد عليك
ليش تكلي هيج
أبرهان:هههههه اعرفج تضعفين بسرعة بس انقذ نفسي
فيّ:ليش مخليتني اروح ويا اهلك شنو هاي ضوجه
أبرهان:اني هسه اونسج
فيّ:ماريد ونستك،،بس خلقتك داشوفها
الصبح وياك وبليل هم بس وياك
شني هاي اني بطبعي بسرعة امل تره
أبرهان:خوش يعني مليتي مني
فيّ:بديت امل فـ ديربالك مني
بصفه بطل مي اخذه وشمره ليفوك نزل البطل
وگع بالگاع
باوعلي وگال:
أبرهان:تلعبين
فيّ: اي شنو
صفط الاوراق وحطهن ع جنب وتقرب عليه
گعد مقابيلي
أبرهان:تذبين البطل ع خفه ايدج واذا وگف تفوزين
واذا لا تخسرين
فيّ:اذا فزت اضربك راشدي
أبرهان:هاي شمعرفج بيها
غمزتله وضحكت:
فيّ:ههههه اذا بيها ضرب اي العب
أبرهان:كلا للتعنيف حبيبتي
بدينه نلعب اول بدايه كله هوَ يفوزز
بس مايضربني
اني ضجت لان ولا مرة فزت
فيّ:أبرهان اخسر خلي افوز اني
أبرهان:مو تشمري بقوه ع كيفج بخفه ايدج
فيّ:هاا
أبرهان:اييي
شمرته بخفه اجه عدل
فرحت اني وتقربت عليه اريد اضربه هو رجع ليوره
أبرهان:هذا شنو الغدر،،
فيّ:غير قوانين اللعبه شبيك قابل راح اضربك طلقه
أبرهان:اني شكد فزت ماضربتج
فيّ:هم عازيك تضربني،اييي هو هذا حظي واعرفه
أبرهان: يبووو بجت يلا بويه اضربي أمري لله تورطت بيج بعد
صوجي ماخليتج ترحين ويا عمج
فيّ:ههههه اييي مو ردت تموتتت
بعدين اذا ماعاجبك حبيبي طلگني
طلگني اذا ماعاجبك
أبرهان:غير تكعد اميرة بنت طيبه
فيّ:هههههههه
قربلي وجهه ضربته راشدي بالجهه الي بين رگبته وخده
هنا الراشدي يصير قوي شويه
رجعنه لعبنه وفزت
هم ضربته
تقريباً 5 مرات خلصتها فوز واضرب بي
صار المكان احمر هو ساكت مايحجي
بس يخسر بكل مرة
اخر واحد تحلف بيه
أبرهان:يابويه ع هاي ضرباتي الي لو فزت شسوي بيج
فيّ:لعد خلي نبطل كافي
أبرهان:لا لا للصبح اليوم منتظرج ماعدنه شي
فيّ:يمةةةة
عدل كعب البطل وجهز نفسه ولعب
فاززز واني خرطت العافيه هذا لو سطرني راشدي
اگضي الليله بالانعاش
من فاز رفع عيونه يضحك باوعلي بمكر:
أبرهان:اليوم شسوي بيج اتفنن
فيّ:أبرهان والله ازعلك جسمي يتحسس بي تطخه
أبرهان:واني جلدي صلختي ماكلتي خطيه يتحسس
فيّ:تعال ابوسك
أبرهان:ماااريد لتقشمريني
طفرت من مكاني بسرعه هو نهض وراي
افتريت حول الجربايه وهو وراي
صعدت فوگ الجربايه ووگفت بنصها وصرت اروح ع يمين وع اليسار اريد ادوخه
هو بدون مايتحرك لايمين ولا يسار
سحبني من رجلي وگعني ع جربايه
واجه صار فوكاي واخذ اديه ثنينهن
رفعهن ليفوك لزمهن بأيد وحده
فيّ:أبرهان هذا تعذيب مو راشدي والله تره اصيح
وخررر عنييي
أبرهان:يلا بله صيحي
فيّ:اضربني يلا وخر عني راح امووت
أبرهان:بس اني ماريد اضربج راشدي عقابي يختلف
فتحت عيوني عليه وكلت:
فيّ:لعد شنو
ماحسيت غير اخذ شفايفي بين شفايفه
واني شاغت روحي
احرك براسي واريد افلت اديه ماكدر هو لازمها
يرخي ع شفتي شويه ويرجع يسحبها
اني ارافس جواه
بدأت ترخي ايده عن ايدي سحبت ايدي منه
ودفعته عني تمدد ع جهه الي بصفي وهو مغمض عيونه
مسحت شفايفي بأيدي واني لعبانه نفسي
ضربته ع صدره
ماحس ولا تحرك ضل جماد ع تغمضيه عيونه
فيّ:حقيرررر ولا أمن بيك بعد والعب وياك
عفته ورحت للحمام اغسل وجهي
لعبانه روحي
فتحت المي باوعت بالمرايه من بدايه شفايفي من فوگ ليجوه مطعون احمر
وشفتي السفليه بيها اثار صاير مثل لطمت الحمه
غسلت وجهي وفركت شفتي بالمي البارد
لحيت ع الاثر ماراح نوب زاد احمراره
صفنت شويه افكر بالي سواه:
فيّ:هاي شلون هيج سوه ماتلعب روحه
گلبت خلقتي وطلعت من الحمام
هو كعد حط ايده جوه راسه وصار يباوعلي ويضحك
أبرهان:اعصابج يابه شسويتلج بس اخذت ثاري بطريقتي
اني عافسه وجهي بقرف هو عقد حواجبه وسألني:
أبرهان:لعبانه نفسج مني
سكتت ماجاوبته رجع كرر سؤاله وهو مركز بوجهي:
أبرهان:فيّ تلعب نفسج مني اني بشكل عام
او من الي سويته ضجتي
ماكدرت اكسر بخاطره:
فيّ:لا ماتلعب نفسي منك بس ضجت
أبرهان:ليش يروحي تره والله عادي اصلا ....
سكت ماكمل صفگ ايده ببعض واخذ باكيت جكايره وطلع من الغرفه
رحت تمدد ع جربايه اخذت تلفوني
وخابرت ع عمتي سألتهم شوكت يجون
تصفحت شويه بالموبايل
دخلت للانستا شفت أبرهان نشط
دخلت ع الرسايل كتبتله رسالة وبعدين مسحتها
ماتجرأت ادزها
سديت موبايلي وتغطيت ونمت بس ماغفيت ضليت افكر
بعد ربع ساعة نفتحت الباب غمضت عيوني
سويت نفسي نايمه
دخل أبرهان
مشى بخطوات هادئه صعد ع جربايه
اني وجهه ع الجهه الثانيه يعني صاير ظهري عليه
تقرب عليه حط ايده جوه راسي
وسحبني من بطني عليه
ودفن وجهه بشعري
وبعد ماتحرك اني ضليت ع وضعي هم ماتحركت
ماعرف شوكت نمت
كعدت الصبح أبرهان ماكو
باوعت للساعه ب9:00
اخذت تلفوني دزيتله رسالة
فيّ:أبرهان؟؟
بعد دقايق شافها ورد عليه:
أبرهان:حياته
فيّ:تحبني؟
أبرهان:هواي احبج يشمعتي
بديت اضحك لاارداياً؛
فيّ:انتَ نفسي اليصعد وينزل يبويه
أبرهان:حبيبة گلبي
حطيت لايك ع رسالة ونزلت جوه
لكيت عمتي بالمطبخ تحضر للغده
رحت وياها ساعدتها
صار الظهر أذن الاذان رحت اصلي
بالاستقبال
اجو عمي وأبرهان سلمو
صعد أبرهان فوك لغرفتنه ونزل بسرعة
مايدري بيه بالاستقبال
أبرهان بلهفه:يمه فيه وين
ام أبرهان:راحت تصلي
أبرهان:ماكو فوگ شنوو تجذبين عليه
ام أبرهان:يااا شبيك يمه عليش اجذب بالاستقبال داتصلي البنيه
أبرهان:هاا العفوو
وگفت لميت السجادة وحطيتها ع جهه هو
دخل باوعلي واجه عليه باسني براسي وسحب نفس وزفره مثل الي كان حابس نفسه وتوه تنفس
فيّ:شبيك
أبرهان:نهد حيلي من دخلت للبيت وانتِ ماكو
نوب رحت للغرفة هم ماكو
عبالي اجو اهلج اخذوج
فيّ:ههههه فدوه لحيلك
كل عقلك اعوفك واروح يايمة عمت عيني
أبرهان؛كلشي اتقبل بحياتي بس فكرة تروحين يم لهلج لا
حته لو نضل بس اصدقاء وحته لو كل واحد بغرفة
بس المهم تضلين گبال عيني.
فيّ:انتَ اهلي اصلاً.
شنو هذا الجمال تعال ابوسك
ضحك ودنگ بمستواي لزمت وجهه بايدي ثنينهن
وبسته من خده ورجعت بسته من خده الثاني
طلعنه من الاستقبال دخلنه للصالة
سلمت ع عمي
وحضرنه الغده اجو إيان واديان من الدوام
كعدنا تغدينه وكملنه
سويت جاي واجيت قدمته وخلصت
اخذت جايي وكعدت يمهم
ايان ديسولف وياي ع مدرسته
قطع سالفته وسألني:
ايان:شبيها شفتج شنو مصخنه؟
حطيت ايدي ع الاثر وحجيت بدون مبالاة؛
فيّ:لا هاي أبرهان البارحة عضني
أبرهان غص بالجاي وصار يگح بصوت عالي
الكل صارو يباوعلي واني اباوعلهم مادري شكوو
وليش يباوعون
ابرهان ضل يكح ضربه ايان ع ضهره بقوه وگاله بضحك:
ايان؛شبيك خويه مجلوب
باوعله ابرهان بنظره تهديد وهو عيونه مدمعة من الغصه:
أبرهان:هسه اني اعلمك
ايان؛ههههههه
اي ماكتيلي ليش عضج هذا الجلب
فيّ:هاي لان....
قاطعني أبرهان صيح ع ايان ودفره برجله؛
أبرهان:اااااايان
وهاي الثوله تريد تسولفله التفاصيل
كووووم ولي لغرفتك
رجع دفره مرة ثانيه وايان ميت من الضحك
عمي وعمتي هم يضحكون بس مايبينون يستحون من أبرهان
ايان شبع دفرات وگام راح لغرفته وهو يضحك
يكلي بعدين سولفيلي
ابرهان راح غسل وصعد للغرفة
اني ضليت صافنه شويه ورحت صعدت وراه
فتحت الباب لكيته دايبدل بملابسه
نزع القميص واني احجي ويا
رفعت عيوني ليفوك:
فيّ:ليش ضربت ايان خطيه
أبرهان:ولج بابا عيب تحجين هيج امور
فيّ:ليش عيب داحجيلهم عن اللعبه وكذا
أبرهان:لا حول الله وهذا الكذا الي تريدين تحجي عيببب
فيّ:هااا
أبرهان:اييي ولهدا
فيّ:يلا لعد بعد ماحجي بس واذا سألوني
أبرهان:لا محد يسألج بس انتِ لاتندمجين بالسوالف
وتكعدين تشرحين تعبتيني وهذا الساقط اني اعلمه
فيّ:ههههههه
مرت يومين عاديات
أبرهان طول اليوم هو بالشغل
وبليل يطلع ويا اصدقائه
اني صرت اضوج لان ماشوفه هواي ولا اسولف ويا
من يجي بليل بسرعة ينام
حته شوف مااشبع منه
بحيث هلكد مااشتاقله بليل وهو نايم
اكعد اصفن عليه واركز بملامحة امشي اصبعي عليهن
ع عيونه ورموشه وحواجبه وخشمه
وكلشي بي حته بلحية ارتب بيها
وشعره اعدل بي
وابوسه بخده وهو نايم
وصورته اكثر من صوره
هذا كله لان مااشوفه باليوم هواي
الصبح كعدت هو ماكو كلش ضجت
خابرته رن شويه ورد عليه
في:أبرهان
أبرهان:ياراحته
فيّ:اني بعد ماحبك
أبرهان:يمه گلبي ليش يروحي
فيّ:مادري شو احس نفسي بعد ماحبك
لان ماشوفك هواي بناتك الذهبات ديشوفنك اكثر مني
أبرهان: حقج والله حقج
حته اني مشتاقلج يروحي بس والله تعرفين شغلي
فيّ:معليه اني المهم بعد ماحبك وانتَ بكيفك بعد
انتَ الخسران وحده مثلي ماتحبك
أبرهان:اموت ماضل انعل ابو الشغل
هسه شويه واجي واگبال عيونج الحلوه واكعد
فيّ: احلف
أبرهان:وداعت عيونج الاحبهن
فيّ:ولك حياتي انتَ حياتيي
سديته منه واني اضحك راحت الضوجة مني
يمكن اني افوووز بالاكثر شخص يتقشمر بكلمة
ع وجهه الارض
ماكو هيج اكعد ضايجه فول اكول راح اضل زعلانه يومين
بس خمس دقايق ماطول
بكلمة اتقشمر
صارت الساعه ب3:00 الظهر
اجه هو
دخل من الباب يباوعلي ويضحك
أبرهان:وعدتج اجي من وكت بس تاخرت شويه
لان جبتلج حاجة وياي
فيّ:صدك شنو هيه
طلع من ورا علاگه جبيرة بيها كارتونه
قدمها انطاني ياها وگال:
أبرهان:هاي هديه بسيطه عوضاً عن تقصيري
فيّ:هههههه دتخجلني بأخلاقك خرب
عفت الهديه ع جهه وايدي حاوطت ركبته حظنته
ودفنت راسي بركبته اشم بي
هو رفعني من الارض وبادلني الحضن؛
أبرهان؛مطيح حظج بأخلاقي وانتِ ماتعبيني بسرعة
تقتنعين
فيّ:هههههه هاي مشكله دا اعاني منها
نزلت من حظنه اخذت العلاگه
طلعت الكارتونه فتحتها طلع بيها بنطرون جينز لون ازرگ وقميص ارزگ هم جينز وبي شويه تزلاغات ابيض
وحذاء ابيض وجنطه جينز زرگه
بس شنو يخبلن بالجمال سيت كامل
كله يجنن
طلعت احطهن عليه واباوع بالمراية
طاير من الفرح بيهن
مو لان ماعندي ملابس لو شي بس اني احب احد يذكرني بهدايه حته لو كانت بسيطه وخاصه شخص احبه
بعدني دا اقيس بيهن ع المرايه وهو يباوعلي
ويضحك
صاحله ابو فتح الباب وطلع يشوفه شيريد
بعد مااجه
ورا شويه حطيتهن بالعلبه ونزلت اريد اشوف شكو
لان بعد ماصعد
دانزل بالدرج اسمع عمتي واديان يتهامسن بيناتهن
اجيت دخلت للصالة واكفات باب المطبخ ويباوعن
من الجام للشارع
وايان واكف بـ الباب ولازمها بأيده
اجيت تقربت يمهن وحجيت هن فزن
فيّ:ها عمه شكوو ليش واكفات هنا
التفتت عليه عمتي وحجت بتوتر:
_لا يمه ماكو شي روحي طبي جوه انتِ
هاي زلم برا مايقبل ابرهان نطلع
گلبي ماارتاح للموضوع فتحت الباب
وعتيتها من ايان لان هو لازمها
شافني اني رخه ايده
فتحتها وطلعت يمه:
_ايان شبيكم
_اااا روحي طبي جوه ماكو شي
_شني طبي جوه ابرهان وين صاير شي
سمعت صوت أبرهان يصيح ويحجي بعصبيه:
ردت اروح للباب الشارع اشوفه شبي ماخلاني ايان
دفعته عني ورحت امشي بأتجاه الباب
ايان صاح لابرهان فتح الباب ابرهان
ودخل شافني اجه يمشي بأتجاهي بسرعة
سحبني من ايدي دخلني للمطبخ ويريد يسد الباب
ويطلع ماخليته
_ابرهان شكو شبيك متوتر وتعت بيه
شني مقفلين البيبان علينه راح نهج
_طبي جوه لاتطلعين الا ندخل احنه
_بس فهمني
صاح بوجهي اني فزيت:
_فيييييّ دخلي جوه
بعدني توني اريد ادخل سمعت صوت عمي الياس
يصيح
_خلي يجيبها ويجي شكو ضام راسه
فتحت عيوني بصدمة:
_هذا صوت عمي الياس
_لا لا متوهمه طبي خلصيني
نترت ايده مني وحجيت:
_ابرهان شبيك بس همني هذول عمامي الي بره
_اي يردون ياخذوج
يريد يكمل كلامه نفتحت الباب ودخلو عمي الياس
واخوي حسين
شفته دخل يمشي باتجاهي اني خفت
اندار ابرهان عليه شافه دايجي عليه
وگف بسدي وفتح ايده يغطي عليه
ابرهان:ااااالكم حق تأخذوها عمي شنو انتو لزكه
الياس:گنالك البنيه بنتنه وعرضنه
مخليها يمك لا عرس ولا عقد ولا شي شنووو معناها
أبرهان:عاقد عليها اني شني بدون عقد
الياس:هذا العقد نگعه واشرب ميه مانصدك بي
تريدها صدك جيب اهلك وتعال اخطبها من ابوها وعمامها
غير هذا الكلام ماعندي
سحبني عمي الياس من ورا ابرهان
طلعني انطاني لحسين وگله:
اخذها خلي تلبس عبايتها وشالها وجيبها وياك
اخذني حسين يريد يدخل بيه جوه ماخلاه
ايان گله اهلي جوه شكو تطب
_خلي يسولنه مجال ندخل
راح ايان دخل امه واخته بغرفه وحسين اخذني
من ايدي يصعد بيه الدرج
اني مادري بروحي اصعد بس تفكيري مدري وين
ابرهان ضل يترادد هو وعمي الياس ويحجون بعصبيه ثنينهم
دخلني حسين للغرفة طلع جبتي وشالي
لبستهن واني ابجي
اخذ موبايلي حطه بجيبه
ولبست حذاء وطلعت
كلشي مااخذت وياي
ولا حجيت شي لان ماعرف شحجي
مصدومه من الي صار
نزلني حسين الدرج
وطلعنا وصلت للباب المطبخ سحبني عمي من ايدي
وطلعني واني عيني ع أبرهان
الي عيونه تجدح ناااار
اباوعله بنظره توسل وابجي
امشي الطارمة واباوعله هو يمشي وراي
ومايكدر يسوي شي
كأنو بحيرة من امره لاول مرة اشوفه عاجز هيج
كل مرة يصير مرادد وياهم ومايخليني اروح
بس هسه يمشي وراي ومهدود حيله
طلعنه من البيت عمي يوسف واكف يسولف ويا
عمي خضر ع جنب
باوعت سيارات سود تارسه الشارع
واكفه يمها زلم
ماعرفهم
شافني عمي خضر طلعت اجه باتجاهي هو وعمي يوسف
فيّ:عمو خضر حباب وين ماخذيني
الياس: اصعدي يلااا
باوعت لعمي يوسف واني ابجي:
فيّ:عمو ديربالك ع ابرهان لاتخلي يسوي شي يأذي
ابرهان بأمانتك عمي اذا تحبني ديربالك عليه
احجي هيج بسرعة وابجي لان عمي الياس يصعد بيه بالسيارة
صعدت بالسيارة واباوعلهم بنظره توسل وابجي
اريدهم ينزلوني
عمي يوسف دار وجهه ع الحايط وحط ايده ع وجهه
باوعت لابرهان مخنزر ع عيونه بس حمر دم
وايده مسويه ع شكل قبضه
اخو واكف بصفه حاط ايده ع ظهر أبرهان
مشت السياره واني اباوع لابرهان حسيتها هاي اخر
شوفه اله
راحت روحي من مشت السياره وعفته يباوع وراي
كل تفكيري بي هسه يتخبل هو كلشي ولا اروح ويا اهلي
كلش خفت عليه...
يتبع....
شاركوني برأيكم
1_شلون راح ترجع فيّ لابرهان؟
2_ابرهان شنو راح يسوي؟
كلش متحمسه لمواجهه فيّ وابوها
شاركوني برأيكم يروحي نتناقش سوا
~•~•~•~••~••~•~•~•~•~•~•
اعذروني يروحي تأخرت عليكم بالباارت
بس جان عيد ميلادي والتهيت ماكتبت الا البارحه بليل واليوم..
لاتنسون التصويت والتعليق بين الفقرات حبايب قلبي
ظلمات الرائد
الكاتبه بنين أيتان
دمتم في حفظ الله ورعايته ❤️