انه لو خربت لعبة طفل ما نام
شلون تنام يـ المستقبلي مخربه
#ظلمات_الرائد
الكاتبه بنين أيتان
لاتنسون التصويت والتعليق بين الفقرات.
~•~••~•~•~•~••~•~•~•~•~•~•~
فيّ:
فيّ:شكو شبيكم وجوهكم صفره
باوعت ع الطاوله علاليگ بيها مسواگ
وبيهن طين
مرتضى:ابوج تعرض لحادث سياره وهسه
هوا بالمستشفى..
كأنو نضربت صاقعه برأسي
تذكرت من دعيت عليه
ماجنت متوقعه هيج يصير بي
اني ماريده يتأذه ولا يموت
ضميري يعذبني..والاضرب من هذا كله
بيبي أم...والام اصعب شي عدها فراق ابنها
كلش تأذيت ضل الندم يأكل بيه أكل
الافكار دمرتني
فيّ:متأذي هواي،،يعني راح يموت
مرتضى:لا الله لا يقدر بس رجله مكسوره
الساق كله مكسور
ويكولون الدكاتره صعب كسر الساق
لان عظم قوي راح يتأذه هواي بسببه.
فيّ:الحمدلله بهاي ولا بغيرها
كعدت بيبي اجت للمطبخ؛
الجدة:ها يمه مرتضى شلونك
مرتضى:هلا يمه شلونج
الجدة:شبيك شعجب اليوم يمنه من الصبح
مرتضى:يمه علي تعرض لحادث
لطمت ع وجها وعيونها تحولن حمر دم؛
الجدة:يايمه صدك تحجي شلون صار الحادث
مرتضى:هو بالماطور ديجي للبيت طلعتله سياره من
الدربونه ولطمته
بس والله مابي شي
الجدة:سوده بوجهج يانجاة (اسمها)
اخذني اله اشوفه
الله عليك صدك مابي شي
مرتضى: وداعتج مابي شي
حطت شيلتها ع وجها وگامت تبجي
اني من شفتها تبجي ماتحملت
بجيت وياها..
لبست عباتها وراحت ويا عمي
وراح وياهم كرار
كرار يحب ابوي هواي
بحيث من سمع دخل للغرفه وضل يبجي
ضلينا اني وامي وحسين
حسين:خطيه ابوي الكسر ماينحمل
نرجس:الله يشافي ويرجعه سالم لبيته
راح حسين يلعب بلي
نرجس:هاي حوبت حسين ضربه وكسر جمجمته
وهو كلشي مامسوي
رب العالمين يمهل ولا يهمل.
اني ساكته ماحجيت؛
نرجس:فيّ شبيج؟
فيّ:مابيه ضايجه ع ابوي
مرت الايام وابوي بالمستشفى
تجي بيبي تسولفنه عن وضعه
يكسر الخاطر
يصيح بعلو صوته ويضرب بروحه مم الألم
هو روحه عزيزه ويخاف ع نفسه كلش
راسه لو وجعه يتخبل مايطلع للشغل
ويروح للدكتور يسوي فحص عام
مهتم بنفسه وبصحته
المغرب صليت واجيت يم بيبي
شفتها گاعده تبجي ع ابوي
فيّ:دموعج غاليه يروحي وجعن گلبي
الجدة:تحبيني؟
فيّ:اعز من النفس يلي اشمه
الجدة:اذا تحبيني تدعين لابوج يصير زين
اني روحي معلگه بيهم هو ومرتضى ماحلصت
بدنيا غيرهم
فيّ:اويلي عليه..انشالله اندعيله
والله مابي شي الحمدلله بهاي ولا بغيرها
الجدة:اي والله
الجدة:لو شايفته شلون يلوب
ويصيح يابويه
واني گتله صيح ياعلي ياحاضر الشِدات
احضرني لا تصيح يابويه
يجون يضربو ابر ينام
تخلص مفعول الابر يگعد يصيح
بأعلى صوته..
مرت 5 ايام وابوي بالمستشفى
مسويله عمليه حاطين اله بلاتين
حته يلحم العظم بس المفروض مايدوس عليها
يمشي ع العكازات
اليوم يطلع من المستشفى للبيت
اجت ضي يمنه وبيت بيبي ام خضر
دخلت السياره للبيت نزلو عمامي منها
عمي خضر شال ابوي بين اديه ودخله للبيت
ابوي كلش ضعفان ومتغير شكله
نصبو اله جربايه بالاستقبال علمود الخطار اليجي
وهو ميكدر يگعد الا ينام
دخله للاستقبال نيمه ع جربايه
اجو الكل سلمو عليه امي واخوتي
وضي
صار دوري اجي اسلم عليه
دخلت للاستقبال،وگفت بالباب
فيّ:الحمد لله ع سلامتك
باوع بوجهي صفن لحضات واردف بحنيه؛
علي الدر:الله يسلمج يبويه
اني رف گلبي لكلمه يبويه
لاول مرة اسمعها بحنيه منه
لو يكولها الي العالم كله
مو مثل اليكولها اليه هو..
طلعت من الاستقبال
دخلت للمطبخ امي ونسوان عمامي وضي كاعدات
اجيت يمهن
اجه وراي عمي خضر
خضر:السلام عليكم..
الكل:وعليكم السلام
خضر:ضي عمي ليش تحجين ع مرتي گدام عيالج
ضي:يمته حاجيه
خضر:هم كلولي زوجج امير وحماج الكبير ابو زيد
گالو ضي تحجي ع مرتك تكول كل يوم يم اهلها
وعمي يموت عليها ويخاف منها
ضي وجها صار أصفر واستحت من عمي
هو كلشي ولا واحد يجيب طاري مرته
ضل يتجادل ويا ضي ويحرج بيها
هي راحت دخلت جوه وهو طلع
احو خطار لابوي لان مسوي حادث
وكل يوم جاي ومي واني وحدي
اشتغل واسوي جاي
الالف الخطار يجون يوميه
من ال6 المغرب لل12بليل
واني ع فرد وگفه بالمطبخ وحدي
وشمس متساعدني
انتهيت رجليه تكسرن
ابوي من بعد مافك التجبيس من رجله
ضل يمشي ع عكازه وحده من جهه رجله المكسوره
وايده الثانيه يستند ع امي وحسين وعمي مرتضى
يمشي غير هيج ميكدر يمشي
وغير ع هذول الثلاثه مايستند
يحسها اهانه اله يستنقص من نفسه
واكثر شي امي يستند عليها من يمشي
بعد تقريباً15يوم...
اني ماشايفه ابوي كل هذا الوقت
لان هو بالاستقبال مااوصل للاستقبال ابد
امي وضي اتفقن يروحن
للصالون يحفن
راحن وبقيت بس اني وابوي وكرار بالبيت
بيبي راحت لبيبي ام خضر
اني كاعده اشوف بموبايلي
اسمع ابوي يصيح..
علي الدر:نرجسسس
نزلت اركض البيت فارغ هاي شكو
خاف شصار بي
دخلت للاستقبال لكيته محاول يريد
يوكف وحده ويروح للتواليت بس مامسيطر
واگع بالكاع بعد مايكدر يگوم..
تقدمت عليه بلهفه؛
فيّ:هاي شبيك شلون وكعت
باوع عليه بنظره ضعف
علي الدر:ردت اروح للتواليت
ووگعت.
فيّ:ليش هيج تگوم وحدك لو طاگ البلاتين
علي الدر:امج مااجت
فيّ:لا بعدها
علي الدر:حسين وين بيبتج وين؟
فيّ:ماكو احد
تعال انه اوديك استند عليه
علي الدر:لا متكدريلي
فيّ:تضل هيج گاعد بالگاع ع ماتجي امي لعد
باوع بعيوني أيضاً بنضره ضعف؛
دنگت عليه حولت ايده ع رگبتي من وره
انطيته عكازته،لزمته بقوه واردفت؛
فيّ:يلا انهض روحك وياي وگول ياعلي
علي الدر:ياعلي
نهضته بقوه من الگاع وگلت؛
فيّ:يابو الحسن يابويه
لف وجهه عليه من گلت هيج
اني باوعت عليه دنگ راسه بالأرض
اخذته للصحيات دخل وحده
بعد لحضات طلع تقدمت عليه استند عليه
تقرب للمغسله غسل وتوضه حته يصلي
استند عليه ومشينه للاستقبال
دخلته گعدته ع التخم وحطيت مقابيله طبله صغيره
يصلي عليها
لان مايكدر يصلي بالگاع
حطيت الطبله والتربه والسبحه
فيّ:ها بعد شنو عايز
علي الدر:اني اشكرج يبويه ع وگفتج وياي.
فيّ:لا العفو الشكر لله،هذا واجبي
طلعت وخليته يصلي
اني سويت هيج حته يعرف البنيه التبرأ منها
يجي يوم ويحتاجها
وماكو بشر يضل ع حاله وع جبروته
اكو الله ع ساعه ومتعرف شوكت
يخليك تحتاج لاكثر بشر استهانيت بي
هو كان مفكر انو ماراح يحتاجنه طول العمر
ولا راح يصير بي شي
راح يضل ع حاله،ماكو بشر يضل ع حاله
كلنا نمر بأختبارات.
صفنت واخذتني ذاكرتي لموقف جداً صعب بالنسبه الي
بالماضي؛
اني صغيره عمري 14 سنه تقريبا
تمرضت ونمت بالفراش
بيبي كانت بأيران تزور
احنه متعودين اذا تمرض احد بينه
هي تاخذنا للدكتور
هسه هي ماكو ماعدنا احد ياخذنا
تأزمت حالتي وانتهيت بالمرض (مرض كلى)
راحت امي لابوي تگله ع وضعي
هو گاعد بالصاله واني نايمه بغرفه بيبي
نرجس:فيّ مريضه راح تموت بس من الوجع
اخذها للطبيب لو امك هنا تاخذها
علي الدر:انيييي اخذها
يأشر ع نفسه
نرجس:اي لعد ليش مو ابوها
علي الدر:اخذيها قاعده عليه
مو بس فيّ اي واحد من جهالي يتمرض
ماخذه للطبيب انتظره يموت اروح ادفنه واجي
للطبيب ماااااروح
نرجس:جا انتَ من تتمرض متروح للطبيب
علي الدر:اني ماتمرض..
الواقع:
صحيت من افكاري ع امي وضي اجن من صالون
نرجس:ابوج سأل عليه
فيّ:اي روحي شوفي
بدأت حالت ابوي تتحسن
وصار يمشي ع رجليه عادي بدون عكازه
يريد يرد جميل امي اله كاعدين بغرفه بيبي
لاول مرة يگعد يمنه ويسولف
علي الدر:حجزت نروح لأيران نتونس
قبل عيد الاضحى بيوم نطلع
امي وبيبي فرحن عبالهن كلنا
نرجس:منو ومنو
علي الدر:اني وانتِ وحسين وكرار
نرجس:والبنات
علي الدر:يضلن يم امي وخضر وخالتي ام خضر يباتون يمهن
بيبي ضاجت؛عبالها هي ايضاً تروح
اني كنت اعرف احنه مو وياهم
لان مستحيل تنزل هاي المعجزه وابوي ياخذنا كلنا
امي حضرت الجنط
حسين وكرار أيضاً تحضرو
اجه ابوي طلع فلوس لبيبي مصرف
ع مايروح ويجي
طلعو..طلعنا وراهم ذبينا مي
بقينا بس اني وشمس وبيبي
نضفنا تنظيف العيد
لان باجر عيد الأضحى
وسبحنا سويت اني عشه
كملنا اجت يمنه بيبي ام خضر تبات
ضي:
عيد والعالم فرحانه اني عمتي شافتني حفيت
گلبت الدنيه عليه
ام امير:مو عمج ميت شكو تحفين
لو بعد ماكو احترام للميت
ضي:هسه اني شسويت بس حفيت وجهي
متروس شعر
هاي لابسه اسود وياكم صارلي 4 اشهر واني عروس
ام امير:اي عروس تموتين ع العرس
رحت لغرفتي عفتها تحجي وحدها
بليل اجن هدى وندى وبناتهن
واجه ضرغام وعائلته وبيت خالة امير وبنتها دعاء
طلعت من غرفتي سلمت عليهم
وگعت
مروه(زوجه ضرغام):هاي شنو ضي حافه وجهج
جا احنه غير حزنانين ع عمي
سكتت ماحجيت اني
ضرغام:هي الاسود لابسته غصبن عنها
شبيجن انتن
ضي:ابو اسيل عيب هذا الحجي
انتَ رجال وهاي سوالف نسوان
ام امير:ادب سزز امشي ولي لغرفتج
لا تگعدين يمنه
گمت من يمهم رحت لغرفتي
ضوجه شلون بيه
اجت يمي حماتي هدى
هدى:لاتضوجين من كلام امي ضي
محروك گلبها ع ابوي تحجي هيج
ضي:لا تعودت عليها
اكلج هدى اني غايبتلي الشهريه صارلها من اربعين عمي
للان ليش
هدى:عزه بعنيج ليش ماكلتي
ولج خاف حامل
ضي:يااا وهسه شلون اعرف
هدى:امشي ندز زيد ع اختبار حمل
ونشوف
راحت لزيد نايم بالاستقبال
دزته ع الاختبار
شويه واجه زيد جابه
علمتني عليه
وسويته بالتواليت
طلعت انطيته الها،شافته خطين يعني حامل
فرحت وحظنتني وراحت بشرت عمتي
والكل
رجعت لغرفتي..اجن كلهن باركلي وباوسني
بس عمتي مااجت
اجه امير..طفرت مروه كلتله
اني ردت اخليها مفاجأة،اجاني للغرفه
تقدم عليه اني وگفت بوجهه
دنگ عليه باسني من راسي ونزل ع عيوني
باسهن ورفعني لحظنه وضل حاظني ودافن راسه برگبتي،بعد دقيقتين
سمعت شهكاته يبجي وهو حاظني
اردفت بهمس؛
ضي:امير...ليش تبجي
رفع راسه من رگبتي،عيونه حمر
امير:لو ابوي هنا كان كملت فرحتي
ضي:يحبيبي هسه هو اكيد فرحان النه
ماريد شي يزعلك اليوم
امير:بعد هذا الخبر ماكو شي يزعلني
شالني بحضنه واخذني للجربايه و....
الصبح گعدت ع صوت اهله يمنه كلهم
گعدت وگعدت امير ماقبل يگعد
رحت سبحت وبدلت وتمكيجت
حطيت عطر فتح عيونه باوعلي
ضي:صباح الخير حبيبي
امير:صباح النور،،هاي شنو ماكلتها الحمره شدعوه هلكد
حاطه
ضي:عيدك مبارك كل عام وانت بخير
تقربت عليه ابوسه،سحبني عليه
امير:كل عام وجمالج يزيد
كل عام وانتِ وياي وتصبحين عليه
باسني بشفتي بوسه سريعه
ونهض راح للحمام يسبح ويبدل
كمل وطلعنا سوا نعايد اهله..
عايدهم هو وكمل،اجيت اني دنگت ع عمتي
اباوسها دارت وجها عني ودفعتني
ام امير:انتِ لا تراويني وجهج
ماريد معايدتج
امير خنزر عليه وباوع لامه اردف؛
امير:ليش يمه شمسويتلج
ام امير:سنه ابوك للان ماطالع وراحت حفت
اكلها ليش حفيتي تكلي تحبي انتِ حزني عليه
اني مرة عندي رجال
اني نصدمت من حجيها لان كذب ماحجيت هيج شي
ضي:والله ماكلت هيج
امير بعصبيه:ضييييي تحجين ع امي هيج
اليوم انعل البزرج(الخلفج)
ماسمع مني شي ابد ولا خلاني اجاوبه
ضربني راشدي وجرني من شعري.
امير: احمدي ربج ابني بطنج جا هسه
خليت الطبيب يحير منين يداويج
دفعته عني وحجيت بعصبيه واني ابجي
ضي:انتَ واحد عربانه بحجايه دفعتك عليه
حته ماسمعت مني
امك جذابه اني ماحجيت هيج.
نهض بكل حيله عليه اجه يضربني
بس تراجع
كسر جام المطبخ كله بأيده وصيح
وكفر وطلع گعد بالشارع
حته مايضربني ويصير شي بالطفل
اجيت لعمتي وگفت ع راسها وحجيت بصياح؛
ضي:هسه ارتاحيتي من گلبت العيد
عزا علينا
ماتخافين من الله خلي احترام لكبرتج
ماحس غير بناتها ندى وهدى
وابنها ضرغام ومرته مروه الكل دارو عليه
وگطعوني تگطع بالضرب وگطعو شعري
شلعو التراجي من اذاني خلو اذاني تجري دم
مروه تخرمش بيه من رگبتي وصدري
واني نار اشتعلت بوجهي كأنو محروگ
اصيح اريد احد ينقذني منهم ماكو
اجه امير صاح عليهم
امير:وخرررو عنها هسه اخذها
لابوها هو الوحيد يعرف دواها
مايدرون بأبوي مسافر ولا اني ادري عبالي هنا
محد گلي
واگعه اني بالگاع وهم جانو دايرين عليه يضربون بيه
رفعت راسي ابجي وامسح بوجهي
ضي:ماروح لبيت اهلي
اذبحوني هنا وخلصوني ماروووح لابوي
امير:ماريدج هنا تروحين لاهلج لا انهيج
ضي:مااااااروح اكتلوني خلي اخلص من
هاي العيشه اكتلونييييي
رفعني من الگاع لبسني عباتي
وسحبني من ايدي طلعني من البيت
يعت بيه واني ماريد اطلع اروح لابوي
بعد يضربني اكثر منهم
شغل ضرغام السياره وراح ويانه
صعدني بالسياره غصبن عني
اجينه لبيت اهلي دگينا الباب ماكو احد
مافتحو
ضرغام:امشي لبيت خضر هسه هم هناك
ضي:لا ماكو احد رجعوني للبيت
امير:مااطب للبيت اذا انتِ بي
رحنا لبيت بيبي ام خضر نزل أمير
اجه عليه؛
امير:يلااا نزلي
ضي:ماااااانزل اذبحني هنا مانزل
امير:انزززززززلي اكلج ماطب للبيت والله
ضي:لتطب مو ضروري رجعني لهناك
امير:خرب****
راح گعد ع رصيف وحط ايده ع راسه
راح ضرغام دگ الباب
طلعتله فيّ
ضرغام:صيحي ابوج،عمج
راحت فيّ تصيحهم
طلعن نسوان عمامي مكياجات ولابسات ملابس
عيد تجنن
بس اني دمي يجري
تمنيت بهذيج اللحظه لو ميته ولا بين أيديهم
ولا جايه لهنا وخلاني فرجه للنسوان
هن صح يباوعن عليه بزعل
وماقبلن ضاجن بس اني صعبه عليه
من دون النسوان هيج حالي
طلعو عمامي وبيبي وبيبي ام خضر
خضر:ها شكو خير
امير:عمي ترضاها مرتك تغلط ع امك
وتعيرها تكلها انتِ ماعندج رجال
خضر:لا مارضه اكص لسانها
امير:هاي ضي گايله لامي هيج
وامي مقهوره منها وتبجي وهذا صباح عيد
خضر:ليش هيج عمي مو عيب عليج
انتِ شوكت تتعدل اسلوبج وتندگرين
مو كان علي يضرب بيج ويأذب وهسه عيالج
شبيج عمي مجلوبه
ضي:عمي والله جذب ماكلت هيج
ضرغام:انزلي من سياره نريد نرجع
ضي:ماااانزل انتَ معليك
ضرغام:شوف اسلوبها
خضر:تعاي نزلي
ضي:مانزل ابوي يذبحني
خضر:ابوج مو هنا بأيران هو وامج
الجدة:تعاي يعمري نزلي الج الله
هاي العشيره بس الله يگدرلها
اكو مرة صباح العيد هيج مكتوله
وجايه زعلانه
هسه امك خلي تغض نضر سمع تحسبها
طفله وحجتها بالغلط
نزلتني بيبي ودخلتني جوه ضل امير
وعمامي برا
دخلت سلمن عليه اجت فيّ حضنتني
فيّ:هاي اذانج تجري دم ومشگوگه
ماجاوبتها دخلت جوا
اجو عمامي ضلو يحجون عليه
ويذموني وانتِ وكحه زين العيال حاملتج
انفجرت وحجيت كلشي صاير وياي
كلشي
نومتهم يمي بالغرفه
علاقته ويا بنت خالته
عمتي شلون تكعدني من صبح
واذا ماگعد تذب الريوك بالزباله
باعو ذهبي واكلو كله ولا ربع شفت منه
كصت شعري بالعناد
حسره عليه الربع دينار اشتري بي
والخطار يوميه
حجيت كلشي بحرقه قلب
كلهم تعجبو ع يلي عايشته
خضر:والله ياعمي احنه ماردانهم نعرف هاي العشيره
كلش زين بس ابوج مايتعاند
ضي:لو يدري بيه هنا يگلب الدنيه
ويضربني فوگ هاذا الضرب
خضر:لا معليج مايشوفج هنا
ضي:طگت روحي عمي مليت
منو يقبل ع بنته هيج وابوي لو سمع هسه
بيه ضاربيني يفرح والله
ليشش شنو الذنب يلي ارتكتبه
الياس:طولي بالج عمي مايكون خاطرج الا طيب
مرتضى:خلي يولون يحلمون ترجعين الهم بعد
حوراء(زوجه خضر):همزين ماعندج جهال
وماحبلتي للان.
ضي:هسه اني حامل
بهت وجه عمامي ضلو واحد يباوع للثاني
خضر: يلا يصير خير صبو الغده
كافي بواجي وزعل
صبو الغده تغدينه وكملنا
شربنا جاي
دك تلفون عمي خضر
خضر:هذا علي الدر
اني نخطف لوني ودگات كلبي تسارعت
رد عليه عمي بهدوء عادي
سلم عليه وعايده
سلم ع بيبي وبيبي ام خضر
ماسأل ع فيّ وشمس ابد
هن يباوعن بالوجوه ع أمل ابوي او امي
يسألون عليهن بس ماكو
خضر:شلونه السفر حلوه الاجواء
نگطع نفسي من سمعت ابوي سأل عمي خضر؛
علي الدر:ضي يمكم؟
يتبع...
•~•~••~•~••~•~•~•~••~•~•~•~••~
حبايبي اسفه ع تأخير والله مريضه
افلاونزا الله يبعد عنكم الشر
انشالله اعوضكم
لاتنسون التصويت والتعليق بين الفقرات تشجيع حته استمر
الكاتبه بنين أيتان
ظلمات الرائد
دمتم في حفظ الله ورعايته ❤️