ضَيعْتْنِي وكُمِتْ ما أعْرُفْ شَريدْ،
وماتَتْ أحْلامي الچبيرةَ وشَيَعِتْ گَلْبي شَهيدْ
حتى أهْلي اسْتَغربوني يَمُهمْ أكْعِدْ بَسْ بعيدْ.
ظلمات الرائد
الكاتبه:بنين أيتان
•~•~••~•~•~•~••~•~•~•~•~•~••~•~
ضي:
اجه بالي دعاء ماكو وراحت بأتجاه الحديقه اكيد
راحت يمه
طفرت من مكاني بسرعه رحتلهم
ونصدمت من شفتهم.
هي واكفه تتمايل وتسولف وتضحك وياه
وهو ايضاً مثلها يضحك من كل قلبه
وياي ماضاحك هيج
اجيت الهم بعصبيه؛
ضي:دعاء شعندج هنا متستحين انتِ
رجال مزوج شكو لاطشه يمه
امير:ضيييييي تأدبي ودخلي جوه لا...
ضي:لا شتسوي هسه اني رايحه لعمي
واكله اخلي يفضحكم فضيحه اليوم
رحت اركض لعمي ابو امير
دخلت عليه للغرفه لكيته نايم گعدته
گعد مفزوع
ابو امير:همزين گعدتيني يعمي جنت احلم حلم مو زين.
ضي:عمي مو وكت احلامك هسه
هاي دعاء تدحس يم امير
وتتمضحك وهو وياها فرحااان عادي عنده
ابو امير:هسه اني اخلي يفرح اكثر
طلع من غرفته متعصب وگف بنص الصاله وگال:
ابو امير:يلاااا الكل ياخذ عائلته ويروح لبيته
اني مافاتح جمعيه خيريه هنا
شعندي بويه عرس وخلص
عشه وغده وريوك هنا..لو بنك جا خلص
هو بس اني اشتغل امير مامحسوب زلمه
ويشتغل وينطي مصرف اني اصرف عليه
يلاااا الكلللل لبيته لا تجوني بعد ولا تشوفني خلقتكم
اكفوني شركم وخيركم.
اني طرت من الفرحه من طردهم
هن وجهن نگلب وامير أيضاً وجها نگلب
ومخنزر عليه يريد ياكلني
طلع لابو؛
امير:بويه شنو هل حجي عيب تطرد خطارنا
ابو امير:الخطار ع راسي بس هاي مگوده مو خطار
واذا تريدهم اطلع وياهم لا تراويني وجهك بعد
وان سمعت متعارك ويا ضي ماتلوم الا نفسك
يلااا ولييي ارجع نام هو انتَ بس اكل ونوم
يقصف قصف حار الحجي هههه برد گلبي
اني امشي بالبيت واضحك وعمتي متعصبه
عليه وزعلت ع زعل اختها لان طردها
اليوم التالي؛
عمي اجه گعد امير للشغل
هو مايريد يطلع يريد يضل نايم
بس عمي يجبره يشتغل
شنو ياخذ مصرف من ابو
حته اني اخذ من عمي الف او الفين اشتري جبس
وعصير
طلع امير وعمي للشغل ردت ارجع انام
سمعت عمتي شغلت الغساله
ضي:يبووو ماتنامين صل مشغله الغساله من صبح
رجعت نمت وره نص ساعه اسمعها تدردم
عليه،،جايفه نايمه للظهاري
الظهاري ساعه ب9:00
طلعت من الغرفه غسلت
اجيت يمها
ضي:صباح الخير يوم
ماردت عليه؛
رديت عليها بگلبي"عساج لا شفتي الخير"
ضي:اسوي ريوك نتريك؟
ام امير:اني تريگت ماريد
عفتها ورحت للمطبخ ادور ع بيض او الجاي ماكو
اجيتها
ضي:يوم شو ماكو بيضات جاي
ام امير:اي اني اتريكت وذبيته بالزباله الجاي
الينام ماله ريوك
ضي:ها يلا بالعافيه اهم شي انتِ تريگيتي
عفتها ورحت خابرت عمي؛
ضي:ها عمي اكلك جيبلي وياك ريوك اذا جيت
ابو امير:صار بعيوني
ساعه واجه عمي جايبلي كباب وياه
هي شافته تخبلت ضلت تحجي
وتعاركت وياه هو عافها وراح نام
ضي:تعاي اكلي وياي هذا هواي
ام امير:ماريد تزقنبي انتِ
اكلت وخلصت ضميت لامير من يجي ياكله
خطيه تعبان من الشغل
اجه امير طلعلته الكباب
وكعدت يمه ياكل ونسولف
هي شافتنه رادت تموت المرة من الغيره
اجت يمنه
ام امير:ماعرفت تصيح لامك تاكل وياك
امير:والله يمه مادري بيج هو بس شيشين عايفتلي ضي
هو انتِ دازته؟
ام امير:لا ضي خابرت ابوك جابه الها.واني ولا ضگته
امير:ضي ليش ماصحتي لامي تاكل وياج
ضي:خلي تمد ايدها ع النعمه وتكول ماصحتيني
صحتها كلتلي ماريد
ام امير:اي صح صاحتني جنت ماشتهي ليش ماضمتلي
ضي:زين انتِ من تريگتي وشربتي جاي وذبتي الباقي
ليش ماضميتيلي
امير:يمه صدك هيج مسويه
ع اساس بس جيبولي جنه اعتبرها بنتي
بنتج هيج تعاملينها
گامت تبجي هي تريد يتعاطف وياها
ام امير:حته انتَ صفيت ويا مرتك عليه
الله كريم.
خابرت ع ابنها ضرغام اجه اخذها يمه
لليل راح امير جابها واجه
امير:باجر اهلي يرحون للنجف يزورون
ترحين وياهم
ضي:ايييي ياريت
امير:ماشي تحضري يطلعون من صبح حته يوصلون من وقت
كعدنا الصبح ب5:30 سبحت وبدلت
امير نايم طلبت منه فلوس انطاني 25الف
وانطه لامه 25الف
عمتي أيضاً كعدت سبحت
وصلت بدلنا اجه ضرغام حماي بالسياره
مالته جبيره اخذنه ويانه مرته وبنته
وراحت ويانه ندى وبنتها
الطريق كله يحجن عليه
بكلام غير مباشر.بس اني ساكته ماحجي
اهم شي اروح ازور واتونس
معليه بيهن عندي ذنوب هواي خلي ياخذنها
بعد كم ساعه وصلنا للنجف
نزلنه من السياره قريب الامام
بس عمتي مانزلت
ندى:يلا يمه نزلي
ام امير:لا روحن انتن اني شويه واجي وارجن
ندى:شنو وين رايحه
ضرغام:تجيب علاج لرجليه روحن روحن
نكمل ونلحگجن
ندى:انتَ أيضاً رايح وياها
ضرغام:جا غير اوصلها منو ياخذها
اني ضليت صافنه
شبيها رجليها هيه وتجيبلهن علاج
وليش مانزلت ويانه وضرغام اخذها وراح بيها
رحنه للامام زرنه
وطلعنا رحنه نفتر بالسوك
تقريبا بالساعتين يله اجت عمتي
وضرغام شايله بأيدها علاگه بيها غراض
ماشفتهن شنو
ماكدرت اسألها اكيد متجاوبني
عفتها
راحت زارت هي وضرغام ورجعت
تغدينه وكملنا
ورجعنه...
من رجعنه للبيت الوضع طبيعي
مر اليوم ماكو شي بس اشتم ريحه حرمل
وبخور بالبيت.
اسكت ماحجي شعليه اني
اليوم التالي الظهر ساعه12:00
عمي اجه من الشغل هو عنده خط مال طالبات
يوديهن الصبح ويرجعهن الظهر يجي ينام
والعصر يطلع للكهوه
الظهر اجه صله وكمل
مستلم راتبه انطاني منه 50الف
وراح يريد ينام بعد دقايق قصيره
صاحني..
ضي:ها عمي
ابو امير:تعاي يبويه گعدي هنا بصفي
خلي اسولفلج شغله
ضي:اي سولف
ابو امير:هسه اني اجيت اريد انام
اجت امي فريده گعدت ع جربايه
بس اني بعدني مانايم شويه صاحي
اجت گعدت ع فراشي وتتسلم بي
وتباوع عليه...طفرت اجيت اريد اگعد يمها
فتحت عيوني لكيتها ماهيه
ماتعرفين شنو تفسيره
ضي:والله عمي خوفتني
اني ماعرف افسر احلام بس بيبتي تعرف
اخابرها تفسره النه
ابو امير:يلا خابريها
رحت جبت موبايل عمتي
وخابرتها ع تلفونها ردت عليه؛
ضي:ها بيبي شلونج
الجدة:هلا يبعد روحي توني صرت زينه
شلون انتِ اخبارج
ضي:مو وكتها هسه
بس اريدج تفسيريلي حلم.
الجدة: خير انشالله اي كولي
سولفتلها حلم عمي بالتفصيل
ردت عليه؛
الجدة:هذا حلمه مو زين
خلي يدفع صدقه وياخذ حذره
من كلشي موزين الميت يتخيله العدل
لو حلم كامل اي عادي بس متخيله تخيل مو زين
ضي:ها يلا هاي هيه
مع السلامه
سديته منها وخفت ع عمي
وهو ايضاً خاف
سولفت لعمتي مااهتمت
خابرو علمود فاتحه واحد اقاربهم ميت
بدلت وصاحني مسحت حذائه
لان عمتي متحجي وياه
دخل لغرفتي حط عطر
وطلع وصل للطارمه
كلتلي عمتي روحي اخذيلي منه فلوس اشتري جكاير
(هي تدخن)بس عمي وامير وضرغام مايدخنون
رحت صحت وراه
ضي:عمي نطيني فلوس اشتري
ابو امير:شنو تشترين؟مو جبتلكم مسواگ وردتي رمان
جبتلج
ضي:اريد اشتري جبس وعصير ونساتل
انطيني عمي شنو تحقيق
ابو امير:خلي اروح واجي ماعندي صرف
ضي:حته لو خمسه اضملك الباقي من تجي انطيك ياه
طلع خمسة انطاني وراح
انطيتها لعمتي اشترت بيها جكاير واخذت الباقي
للمغرب كاعدين اني وعمتي نفلس رمان ونأكل
ام امير:خابري عمج يجيبلنه عشه وياه
مادام مستلم راتبه مابينه حيل نطبخ
ضي:اي والله يلا رايحه اخابره
جبت الموبايل ودكيت عليه مارد عليه
دكيت مره ثانيه رد عليه زيد يبجي
ضي:زيد شبيك وين عمي
زيد:جدي ماات
نصدمت صدمه عمري الرجال الوحيد يلي
قدملي الحب والاحترام بحياتي مات
شلون راح اعيش ويا هذول الذيابه
كان هو حامي ظهري ومستقويه بي
ليش يربي استكثرت عليه هذا الشيء
نزلت دموعي تقربت عليه عمتي
ام امير:شبيج ولج احجييي
ضي:عمي مات
لطمت ع وجها وضلت تصرخ
رحت خابرت اهلي گتلهم حته يجون للفاتحه
خابرت بناته والكل گتلهم
خلو بالجامع حتى الصبح يدفنون
اجت بيبي يمنه تواسي عمتي
بعد ساعات..
اجه امير ملابسه كلها تراب
وعيونه حمر وحاله شلونه
على ابو
شاف بيبتي نوب زاد بالبجي
گطع روحه تگطع وبيبي تهدئ بي
وتبجي وياه واني ابجي
حظن بيبي ويبجي ويصيح:
امير:ولج عمه راااااح ابوي ماااات
وهو زعلان مني عمههه والله ماشبعت منه
بعدني
خلي يرجع يگعدني للشغل يحجي عليه
اني راضي بس خلييي يرجعععععع
انتهه امير من البواجي حاله يبجي الصخر
يدگ ع راسه وع وجهه ويحجي بحرقه قلب
اجو اخوته أيضاً يم بيبيتي يبجون
مو اقل منه
الصبح گعدو راحو للجامع جابو للبيت
دخلو للاستقبال
وبناته گطعن شعرهن ولطم ع وجهن
هدى:ليش هيج بويه منو النه بعد
جهزتلي بيت كله وكعدتني بي
شلون اجازيك بويه وانتَ متت شلوووون
ندى:يالحنين ماخليتنه بعازة شي
بعد وكت والله بعد وكت
امير يصرخ بعلو صوته ويشيل بروحه ويرگع بالكاع
يلطم على وجهه وحاظن التابوت
عمتي بس تبجي وتلطم
ولده الباقين يبجون بس مو مثل امير
امير يملخ بروحه
ماجنت متوقعته هيج يحب ابو
عمتي اغمى عليها
التمو عليها ولدها وبناتها تخبلو عبالهم ماتت
امير:ولججججج يمه لا تموتين وتعوفيني
لا تسوين بيه مثل ابو
حظن امه ع كلبه وضل يلطم ويصرخ
رج البيت رج
اجته بيبي..
الجدة:عمه اذكر الله شبيك مابيها شي بس اغمى عليها
من التعب
دخلها جوه ترتاح شويه
امير:ضرغام اعيني خلي اشيلها
ندخلها جوه
شالوها دخلوها للصاله وگعدوها شافوها مابيها
شي رجعو لابوهم
شالو التابوت طلعو من البيت
وهدى ملخت روحها شالت الطابوگه ودك ع صدرها
اني متعجبه عليهم شلون هيج يحبون ابوهم
ولو هو خوش رجال يستاهل المحبه
بس متعجبه لان ماشايفه فاتحه ابد هاي اول مرة
بجيت شويه اني وسكتت
اخذو يدفنو ورجعو يسون الفاتحه
خابرت امي دزتلي ملابس سود
كان الجو بارد شويه لبست الدشداشه سوده
وجواها بلوز ابيض
اخت عمي ابو امير شسوت بيه
من هسه لبستي ابيض فرحانه
الجدة:على كيفج عيني اهدئي بارده جا شلون
تضل مصلخه
سكتتها بيبي
اني متت تعب اركض وحدي اشتغل
كلهن كاعدات بالفاتحه بس اني وكم بنيه ماعرفهن
بيبي تلوب عليه تريدني اكعد
خلصت ايام الفاتحه 3 ايام بس اني صرت تراب
من التعب
باليوم الثالث بيبي بعدها يمنه
تشوف العالم كلها تطب لغرفتي مدري شتاخذ
وتطلع واني ماكدر احجي استحي
اجه امير يريد ينام تعبان صارله ايام مانايم
راح للغرفه
صاحتني بيبي
الجدة: روحي يم امير نامي انتِ تعبتي
وراج بعد كومه شغل..روحي
اني ماجذبت خبر..رحت نمت بصفه وتغطيت
بس كل شويه وتفتح الباب
وهو مصلخ اغطي النسوان تباوع النه
تالي بيبي ماسكتت
الجدة:اكلجن عيني انتن مسويات الغرفه باب خان
تطبن وتطلعن والرجال نايم مو عيب عليجن
حته احترام للنايم ويا مرته ماكو بعد
هنه ضاجن من بيبي اني طلعت اركض
اريدها تسكت ماكو
صاحتني عمتي للمطبخ
ام امير:كولي لبيبتج خلي تروح لبيتها خلصنه الفاتحه
بعد شكو
ضي:شلون اطرد بيبتي
ام امير:مشكلتج هاي لو نطردج انتِ وياها
لو تطرديها خلي تولي لبيتها
اجيت لبيبتي
ضي:بيبي روحي للبيت كافي انتِ تعبتي
صارلج 3 ايام هنا
الجدة:اني علمودج هنا وعلمود عمتج اواسيها
خطيه
ضي:لا ماكو داعي
كامت لبستها عباتها تريد تروح
اجه امير
امير:وين رايحه عمه ضلي يمنه
الجدة:لا يبعد عمتك اريد اروح لبيتنه ارتاح
اجيكم انشالله هل الايام
امير:لعد تعاي اوصلج اني للبيت
اخذها امير وطلع وياها يوصلها
وهن استلمني غلط ورزايل لان
بيبي حجت عليهن
اني سكتت ماحجيت شي خلصن
مني رزايل عفتهن ورحت للمطبخ
فيّ:
الدنيه ليل وبارده
گاعده بالحديقه أقرأ كتاب اسمه(الاسود يليق بكِ)
اجه يمي حسين؛
حسين:مامليتي من قرأه الكتب
فيّ:لعد وين اروح ضوجه
حسين:فيّ كولي لامي خلي اشتريلج موبايل
مادام عندج فلوس.
تتونسين عليه لا تطلعين ولا يجينه احد تسولفين وياه
راح تتعقدين
فيّ:مادري خاف متقبل تعرفها تخاف من ابوي
حسين:مايدري ابوي بس بغرفتج شوفي بي
من ينام من هو هنا نزلي جوه
وهو قليل يصعد فوگ تعرفي
فيّ:خوش فكره امشي نروح نكلها
رحنه لامي اني وحسين
بغرفتها دا تعزل
حسين:اكلج يمه ماتخليني اشتري موبايل لفيّ
نرجس:يااا وابوكم اذا شافه يذبحها شيخلصنه منه
حسين:لا مايدري بي هي تضمه
وماتنزله جوه ابد
فيّ:يمه شوفي هو بس الظهر من تنامون اشوف بي
وبليل من ننام أيضًا اشوف بي شويه وانام
ضوجه يمه وين اروح
نرجس:مو يمه اخاف عليج
تذكرين اخر مره لكه عدجن موبايلات شسوه؟
صفنت أتذكر الصار وياي قبل سنتين
بالماضي:
الصبح ساعه 11:00
اني فوگ بغرفتنا داكتب اشعار
وضي جوه بالمطبخ يم بيبي وامي
اجه ابوي شايل بأيده حديده مثل الصيخ البناء(بوري)
صاح لضي بصوت خافت
اجته ضي؛
ضي:ها بويه
كانت عند بيبي بوفيه بيها 6 ابواب
وحده من الابواب ماخذتها ضي يعني مخليه بيها
ملابسها ماتريد فوگ كل غراضها جوه
مع انو عدنه كنتور فوگ بس هي متريده
صاحلها اخذها لغرفه بيبي.
علي الدر:تعاي.وين بوفيتج؟
تقدمت ضي لبوفيتها
ضي: هاي
علي الدر:افتحيها وطلعي الموبايلات العدجن
ضي تغيرت ملامح وجها وردت عليه بخوف
ضي:ويه ياموبايلات ماعندي
رفع البوري كل قوته وضربها ع ظهرها بي
صرخت صرخه رجت البيت كله
اجت بيبي تركض واجت امي
واني طفرت من مكاني باوعت من الدرج سمعته
يصيح عليها وهي تحلف ماعدها موبايل
حرت مابين انزل ويا ضي تضامناً وياها
حته لا تنضرب وحدها اني أيضًا انضرب
لو اضل فوگ واسلم ع نفسي
تالي همست بيني وبين نفسي
افااا عليج تعوفين اختج تواجه الظالم
وحدها وانت خاتله فوگ لا اليصير عليها
يصير عليه قبلها
ضميت دفتر اشعاري ونزلت اركض
ع صوت ضي تبجي وتحلف
شافني ابوي صاح بعصبيه؛
علي الدر:تعاي فيييييّ نزلي هنا گبالي صيري
تقربت عليه دخلت للغرفه
بيبي واگفه بوجه تتوسل بي وضي وراها خاتله
اجيت وگفت بصف ضي
صرت وره بيبي
علي الدر:فيييّ عدجن موبايلات؟
فيّ:لا وحق هاذا الكاشي
اشرت ع الگاع
هو احنه صح عدنا بس صرصور مال بيبي نلعب بي العاب
شافته امي عدنا اخذته منا بيومها گالت ليشوفه ابوجن
ونبتلي
من حسن حظنا اخذته امي منا
بس ياترى منو گايله عدنه موبايلات هو شمدري
سمعني گتله لا وحق هذا الكاشي
هو تخبل
رفع ايده كل قوته وضل يضرب بعشوائيه
عليه وع ضي
وبيبي جوانه تصرخ لا بروح ابوك لا بروح عمك
هو ما مهتم لاحد يضرب بينه
كأنو دايضرب عدوه
اني لازمه بضي
لازمه بيبي كلش داخله بيها مامبينه
بس اني وره ضي صايره
اجت امي بعدته عنا
دفعها وخرت بعد ماتقربت
رجع يحقق ويانه
علي الدر:طلعن الموبايلات لا اليوم تموتن
هنا والله
الجدة:مو يكولن ماعدنا منين يطلعنهن روح
فتش غراضهن شبيك انجلبت
علي الدر:اليوم ماعوفهن اذا مااموتهن
ماااريدهم اذيه مو نفع
نوب يگلولي بناتك عدهن موبايلات
اذبحهن احسلي واخلص
احس حراره نزلت من رأسي
ع رگبتي وظهري؛وعيوني غوشن
لزمت ضي كل قوتي لان دخت
باوعتلي ضي وشهگت صاحت؛
ضي:بويه فيّ يطلع دم من رأسها
باوعلي ابوي تغيرت ملامحه
ماحس غير دارت الغرفه بيه وگعت بالگاع
بس اسمع صوتهم
ماكدر افتح عيوني ثگال
اسمع امي تصرخ
نرجس:والله الا اخذها اشتكي بيها
بليتهن بلوه شنو ذنبهن ماكالات شاربات من صبح
تفصخ بيهن ماتريدهن انطيني ياهن اخذهن
واطلع بيهن
صحيت شفت ضي تغسل بوجهي
وبيبي تبجي فوگ راسي
من فتحت عيوني تقرب ابوي باوعلي
يباوع لجرح البراسي
الجدة:اخذها للمستشفى نخيط راسها
يضل مفتوح
علي الدر بنتر:لاااا ممنوع تروح للمستشفى
هنا عقمو وينلحم وحده
گومي غسلي وبدلي وخلي معقم وتصيرين
زينه مابيج شي
نرجس:ها تخاف لا ياخذون اقوالها بالمستشفى
ونشتكي عليك
اذا تخاف شكوو تتقوه عليهن
طلع ابوي من الغرفه راح گعد ع الدرج
والبوري بأيده
خاف تاخذني بيبي للمستشفى
گمت اني راحت ضي جابتلي ملابس
دخلت للحمام اسبح وابجي من الوجع
المي يأذي رأسي احسه يدخل بدماغي
طول ما اني اسبح ابجي
والدم يجري ويا المي من راسي
كملت بواجي وسبح لبست ملابسي
شويه شويه وطلعت
لكيته گاعد ع الدرج باوع بوجهي
ورفع البوري بتهديد عليه وع ضي
علي الدر:والله والله وهذا يمين برگبتي
اذا سمعت لو شفت عدجن موبايلات
الا جنازتجن اطلعها من البيت وماعترف بيجن
ولا اكول عندي بنات اعتبرجن
"جلب سحگته السيارة ومات"
كمل كلامه وراح لغرفته وسد الباب عليه ونام
من بعدها صرنا نخاف من سيره الموبايلات
بس موبايل ضي الجابته علمود حبيبها
بس خلصنا منه ونفصلو ذبيناه بالمجاري
الوقت الحاضر؛
صحيت من افكاري حسين يحجي
حسين:ها يمه هسه شتكولين
نرجس: ماشي جيبو بس لتخلين احد يشوفه
حته بيبتج وانتبهي اذا لزمج تروحين بيها
فيّ: ماشي
حسين فرح من وافقت امي
اخذ مني فلوس وراح يجيبلي
اني عندي فلوس الحمد لله والشكر
معتمده ع نفسي ابد ماخلي امي تصرف عليه
عمري 10سنين وبديت اجمع ولحد الان عمري 15
سنه واني اجمع وبعدني مستمره
مع انو باليوم تنطيني امي 500دينار
وابوي نهائياً ماينطني ابد لو يشوفني اموت
ماينطني ربع دينار
بس بيبي كل شهر تنطيني خمسه الف
من راتبها واجمع من ال500 اسويهن
2500 انطيهن لبيبي تنطيني خمسه بدالهن
هيج جمعت فلوسي
اشتري لنفسي ملابس مدرسه كنت قبل
واشتري احتياجات الدوره الشهريه
وملابس الشتاء وملابس الصيف
وبيبي أيضاً تشتري النه كل صيف وكل شتاء
ملابس وجبه كاملة كلنا تشتريلنه
حته اولاد عمي مرتضى
اجه حسين جايب ايباد سعره 75 الف
انطاني ياه گلي خلي ع شحن ساعه كامله
لزمته بأيدي وكأني لازمه شي عظيم
حسيته مصير موتي وحياتي هذا
مصير حياتي لان راح اعيش واشوف واتونس من خلاله
ومصير موتي لان اذا شافه ابوي راح اروح بيها
صعدت فوگ شحنته اخذ شحن فتحته
مسويلي حساب بي
حسين: نزلي بي كلشي يعجبج العاب
برامج
وشتحتاجين اني موجود
اجت يمي امي تشوفه بس احسها متردده وخايفه
بس مارفضت لان ماتريد تزعلني
فيّ:شبيج يمه اذا مارايدته كولي ارجعه
والله عادي
نرجس:اني مو عن ابوج
اني خايفه من ولد هل وكت لا...
قاطعت كلامها
فيّ:هنا حقج انتِ ام وتخافين ع بنتج واني بعمر مراهقه وخطر هذا العمر كل بنيه تنجذب لعاطفتها بي
بس سمعيني يمه؛
(اني من كنا بالمدرسه وكل البنات حبن وعشقن
ومن ضمنهن اختي
اني ماغرت منهن ولا نزلت راسج وخذلتج
اهتميت لدراستج ولسمعتي ودست ع گلبي)
وهسه اني اوعدج..
وداعتج عندي يلي اعتبرتج انتِ والنفس
اني ماراح اخذلج وادنگ راسج
وتضيع ثقتج بيه طول ما اني عندي هذا الموبايل
گلبي ماراح يسيطر عليه
واتحداه لگلبي وگدامج راح اگله
كل بنيه بفتره مراهقه انتَ تتحكم بيها
بس اني ماراح تتحكم بيه
(انتَ موجود وعقلي موجود ونشوف منو اليفوز)
نرجس:اذا هيج تمام بارك الله بيج
اني من گلت هذا الكلام لامي كنت متأكده انو
گلبي ميت وكل عمري عقلي يتحكم بيه
لان اذا افكر بيها واريد اجي احب
ماراح احصل بس العذاب
اولاً لان اعرف ابوي شنو مثلا حبيت
واجه يريد يخطبني يگله منين تعرفها
شنو راح نكله ع طريق الموبايل يعرف انو
ماعدنه موبايلات
وثانياً الحب مو الحب حظ واني اعرف روحي ماعندي حظ
وثالثاً والاهم اليحب يريد اتصالات يريد
مسجات طول الوقت يريد كامره يفتح
واني هذني كلهن ماكدر اسويهن لان شمس وياي بالغرفه
وماراح طول الوقت ع الموبايل بس الظهر ساعتين
وبليل ساعتين
ف عليمن اعلق احد بيه واني مو گدها
تبعدت عن الحب
شغلته باليل وسويت حساب
فيسبوك كان اكثر موقع عليه ضجه
ب2016 سويته بأسم"سمو الامير"
ههههههه
ودخلت كروبات
هواي اجاني طلبات صداقه ومراسله
بس مارديت
تصفحت بي ساعتين ونعست
طفيت وشلعته من شحن ضميته
خفيته عن ابوي
ونمت...
مر تقريباً اسبوع...
تعلق بيه كلش
نزلت مزرعه وادمنتها صرت كل شوي
اورح احصد وازرع واحلب
الصبح ساعه ب11:00
اجه ابوي من شغل سمعته اجه نزلت طايره
گعدت جوه
شافني هو من نزلت
تغده وكمل
اني افتر بالبيت بعشوائيه بس اريد اصعد
العب بالموبايل
صار وقت الصلاه
صليت وهو راح صله
كملت صعدت اركض لفوك
دخلت للغرفه وقفلت الباب
اسمع صوته بالبيت يحجي ويا كرار
صار الصوت قريب ع الطابق الثاني
ماحس غير انفتح عليه الباب بقوه
اني هنا يبس الدم بعروقي
سرت رجفه بجسمي كله
اريد اسيطر اضم الموبايل ماكدر
انسحبت يده الباب بقوه
علي الدر:هاااااي ليش الباب مقفوله شكوووو
افتحيهااااا بسرعههه
ضربها برجله ويفتح بيها بقوه
من انفتح الباب اني انتهيت...
يتبع...
شنو تتوقعون راح يصير بفيّ..؟
~•~•~•~•~•~•~••~•~•~•~•~••~
البارت طويل لعيونكم
كثرتلكم مشاهد ضي لان حبيتوها🥰
ماريد منكم شي بس تنشرون مشاهد من القصه
وتعلقون بين الفقرات وتصويت للقصه فدون اروحلكم
الكاتبة بنين أيتان
ظلمات الرائد
دمتم في حفظ الله ورعايته❤️