أجِي عَايف الدِنيا مَن الألِف لليَاء
وأتبَدة علىٰ عِتبة حضنَك بهمّي .
ظلمات الرائد
الكاتبة بنين أيتان
•~•~•~•~•~•~•~••~•~•~•~•~•~•~
الدنيا مغرب اجه عمي الياس
بسياره بسرعه وكف ببانه وصاح
فيّ بسرعه انطيني ملابس لحسين نظيفه بسرعه
طلعت امي تركض كالت صاير شي
نرجس:ها الياس ابني وين شبي
الياس:مابي شي انطيني ملابس اله بسرعه
نرجس:بروح ابوك ابني شبي؟
ياس:علي ضربة بالبوري ع راسه وصار عنده فطر بالجمجمة
لو يعيش لو يموت اندعيله
هنا احنه انتهينه امي صارت مثل المخبله
تفتر بمكانها
بيبي ماموجوده بيت بيبي ام خضر
نرجس:هسه يرتاح علي كتل ابني
هو يحومي عليه الا يكتله ياله يرتاح
هسه يضل وحده مثل البومه بالبيت
انطيني جواريبي وعباتي خلي اروح
اشوف ابني ماضل هنا بعد اخذه واشرد بي
اني بس ابجي مابيدي شي
دزينه كرار لبيبي جابها واجه
اجت تمشي بشارع طلعلتها امي
نرجس:ابنج كتل ابني كليله لا يضل هنا
والله اشتكي عليه واسجنه
لطمت بيبي ع وجها وصاحت
الجدة:شنو كتله شلون
نرجس:ضربه بالبوري براسه وفاتح راسه
الجدة:يايمه عمت عيني سوده بوجهي
يبيبي يعلش
دارت وجها ورجعت للشارع تركض وتبجي
وتصيح والله الا اسجنه ماريده
لو جايبتلي جلب مايسوي سوايته
ضلينه بس اني وامي بالبيت
اني توضيت وفرشت سجادتي
اصلي واندعي لحسين
فيّ:اللهي لا تفجعني بحسين اللهي هذا اخوي
وسندي وحمايتي هذا يربي
انه ماعندي والي بس حسين
ماريد اضل وحيده يالله
يامن تحيي العظام وهي رميم
تحيي حسين وتمد ايدك ع راسه وتگومه بسلامه
ضي:
نايمه بغرفتي واسمع امير يحجي ويا
امه وابو بصوت ناصي
امير: شلون راح نكول لضي
طلعت من غرفتي يباوعون بوجهي
ابو امير:عمي حضري روحج نوديج لاهلج
تذكرت من اخر مره رحت ابوي شسوه بيه
كلت بعد ماروح
قبل3 ايام
اني وامير وحدنه بالبيت امه وابو راحو واجبه،
امير:شبيج ضايجة
ضي: مابيه
امير:اوديج لهلج شويه وترجعين
ضي:اي والله ياريت
امير:يلا بدلي
رحت بدلت ورحنه لبيت اهلي
امير:يلا روحي فد ساعتين واجي عليج
ضي: تمام حبيبي
نزلت اركض عبالك ماشايفه اهلي سنين
تلگتني بيبي حضنتها باوستها
وامي وفيّ طارت بيه من فرح
گعدت داسولف وياهم طلع ابوي من غرفته
مخنزر
ضي:شونك بويه
علي الدر:هاي اجيتي وهيج وجهج كله مكياج
ضي:اااااا لا بويه رجلي جابني
علي الدر:بعد اذا جيتي هيج رجلج اكسرها
اني هنا ضعت بثيابي تمنيت لو ماجايه
لا والله تمنيت لو ميته احسلي شوكت راح
يحبني ويحترمني شوكت مو صرت مرة متزوجه
خربت فرحتي وفرحه اهلي
خابرت أمير اجه اخذني
الواقع:
فزيت من صوت عمي ابو امير يحجي وياي
ابو امير:عمي مو ابوج مضروب وهسه بمستشفى
حسيت بشعور فرح عظيم يعني راح نخلص منه
ونعيش براحة الله ضحكت
ضي بفرح:صدك!!
امير:شبيج ضي اخوج اخوج
ابو ضاربه وهسه بالمستشفى
ضي:نزلت دموعي لا ارادياً شنوووو
حسين لاااا حسينن ماتتت
لطمت ع وجهي لزمتني عمتي
امير:لا ما مات بالمستشفى امشي يم امج
لبست شلون ماجان وطلعت
يعني ضحيه الرائد (حسين)
ليش يربي حسين كلشي ماشاف بحياته
كضاها شغل وتعب وضرب
فيّ:
گاعدين نبجي ومنتظرين اي خبر يخص حسين
دخلت علينه ضي تبجي
وياها عمتها
گعدت گبالنه وصارت تبجي مثلنه مابيدنا شي نسوي
اجت بيبي عيونها حمر دم من البواجي
طفرت امي واني وضي بوجها
نرجس:هاااا يمه بشري ابني وين
الجدة:رحت دورت بالمستشفى كلولي
اخذو لمستشفى خاص حالته صعبه
كعدت امي بالكاع ودك ولطم وبواجي
گابلتها بيبي أيضاً مثلها واحنه نبجي اني وضي
اجت بيبي ام خضر يمنه
بعد 4 ساعات تقريباً
اجه عمي خضر وعمي مرتضى
ملابس مرتضى كلها دم
وايد خضر كلها دم
نهضت امي ع سريع بوجهم تريد تعرف شصار
نرجس:ها خويه احجو ابني مات
دنگ راسه عمي مرتضى يبجي عيونه حمر
خضر:اذكري الله انشالله مابي شي
الجدة:بروح ابوك
خضر:حالته صعبه اذا مايموت لو ينشل لو يعمى
گال هيج ودنك راسه يبجي
فيّ:عمي هاي ملابسك بيها دم حسين
تقرب گعد ع تخم وفتح عيونه خضر مخلوط بأحمر من البواجي،،ويحجي بعشوائيه
مرتضى:جنت بسوگ رجعت شفت ضوه مال سياره
يطلع من گراج علي گلت هاي اكيد علي ديفرغ نفط
قربت ماطوري من يمهم شفت بس باب الگراج مفتوح
والسياره اضويتها مفتوحة وعلي ماكو
نزلت من الماطور تقربتلهم..
لگيت علي الدر يريد يشيل حسين يحطه ع الماطور
بس حسين واكع كل جسمه بالگاع منتهي شلون الميت
شافني صاح..
علي الدر:تعااال صعده وراي بسرعه راح يموت
من سمعته گال راح يموت اجيته اركض
شبي شسويتله
دنگت على حسين لكيته يشخر والدم تارس المكان
مرتضى:هااااااااي شمسويله واگع من السيارة
علي الدر:لا اني ضربته بالبوري
هسه عوف السوالف صعده اليه بالماطور خلي اخذه
للمستشفى راح يموت
مرتضى:شلون تصعده بالماطور متشوفه منتهي يوگع بشارع،،،وخرررر
دفعته وفتحت باب السياره شلت حسين
بس كأنو شايل ريشه يمكن ولا قطره دم باقيه بجسمه
صعدته بالسياره
وصعدت اني صاح علي الدر وراي
علي الدر:اكفلي اروح وياك
مرتضى:امشي ولي*****
لاول مرة بحياتي اغلط على علي واعامله هيج
بس من شفت حسين انتهيت
وصلت للمستشفى نزلته شايله بين اديه
هو سابل ايده كأنو ميت
دخلته للطورائ
اجه دكتور قبل لا يسويله كلشي سألني
الدكتور:شبي؟
مرتضى:وگع من السياره حمل للگاع ع صخره وبراسه
شاف الجرح الدكتور
فتحته ع شكل دائره⭕
دخل اصبعه بيها يطلع منها عظام ناعم
الجدة:الله اكبر سوده بوجهي
مرتضى: لفها ع سريع وگال:
الدكتور:بسرعه اخذو لمستشفى خاص بالاسعاف
الولد منتهي لو تلحكون عليه لو لا
حطوله دم وشالو حطو بسديه اخذو للاسعاف
دخل علي ورانا
علي الدر:هااا شصار شكلك الدكتور
مرتضى:شعندك لحكتنه
علي الدر:احجييي
مرتضى:راح ينقلو لمستشفى خاص منتهي لو يوصل لو لا
ضل متصنم بمكانه، اني صعدت ويا الاسعاف
صعد ماطوره ولحكنه
أثناء ما احنه بالاسعاف فتح عيونه حسين
مرتضى:ها حسين عمي تسمعني
مايحجي بس يون ويهز براسه بمعنى اي
تقربت عليه همست بأذنه
مرتضى:اذا سألوك شلون نفشخت
كلهم وگعت من فوگ السياره للكاع ع صخره وطبت الصخره براسي،،خوش
غمض عيونه،،،وصلنا للمستشفى****
دخلته قسم الطوارئ اجو اكثر من دكتور فوك راسه
وضباط أيضاً اجو
الضابط:هاي شلون نضرب؟
مرتضى:وكع من السياره للكاع ع صخره
دخل الياس وخضر مفزوعين
خضر:ها موته علي هسه يرتاح
ندسته بأيده وأشرتله ع الضابط
سكت بعد ماحجه
ضل الضابط عنده شك
الدكتور:هذا عنده فطر وتهشم بالجمجمه
وهسه نسويله عمليه نرمم التهشم
اذا يضل مفتوح يأثر ع النطق والسمع
والذاكرة
الضربه صاير مكانها،وره اذانه اليسار بأصبعين
يعني لو جايه شويه بنص جا نشل
بس لحسن حضكم وحضه هوا جايه
صفح
الضابط:تكدر تكعده نأخذ افادته ونروح
الدكتور:هوا اساساً ضروري نگعده حته نشوف
النظر والسمع والنطق والحركه والذاكرة يشتغل عنده لو لا قبل لا نسوي العملية
ضربو ابره كعدو
الدكتور:حسين تسمعني؟
حسين گعد يون:ااااني شسوي هنا،راسي يوجعني
الدكتور:منو سوه بيك هيج
مرتضى:حسين عمي تكدر تحجي
الضابط:شلون نضربت؟
حسين:وگعت من فوك السياره على صخره
الضابط: منو جان هناك وياك
حسين: ابوي
الضابط:تحس اكو شخص دفعك لو وحدك وگعت
حسين:اخخخخخ راسي
الضابط:هذا آخر سؤال جاوب عليه،
حسين:وحدي وگعت
الضابط:تمام عندك العافية
راح الضابط
الدكتور فحص حسين تأكد منه
وصاح للمرضين حته يجهزو للعمليه
احنه طلعنه من الغرفه لكيت علي گاعد يبجي
والياس فوك راسه يهدئ بي
نرجس:ليش عفته واجيت،يطلع من العمليه محد يمه
مرتضى:اريد اسبح وابدل ملابسي وراجع يمه
ماعوفه وحده الياس هناك وعلي
الجدة:هذا النغ** لا تخلي يضل يمه لا يموته
اطردو اشتكو عليه ذبو بالسجن هذا مو ابني
راحو عمامي وصتهم بيبي اذاراحو الصبح يمرون عليها
ضي أيضاً راحت
ضلينا وحدنه امي تبجي وبيبي راحت لغرفتها تبجي
ونامت
اني مانمت رحت لغرفته حسين لكيتها فارغه
كل مره اجي اسولف وياه وينطيني موبايله
بس هلمرة غرفته فارغه
كاعده ع سريره ابجي ماحس بروحي غير غفيت
كعدت الصبح ع صوت امي تبجي
نزلت يمها لكيت بيبي ام خضر هنا
وتبجي وياها أيضاً
ام خضر:هذا مثل عمه هم اخذ وليدي
ضيعه
نرجس:والله ماخلي يعيش مرتاح اشكتي عليه
واخلي يتعلل بالسجون
وهنه ديحجن عليه دخل ابوي مدنك راسه
ملابسه بيها شويه دم
باوع بوجه بيبي ام خضر وعيونه دمعن
حضنها وضل يبجي بصوت عالي
علي الدر:خاله ابني راح كتلته
خاله والله مادري بي راح يصير بي هيج
اخخخخ خاله اذا صار بي شي اني اموت
اني سمعته هيج گال اني انتهيت
طلعت برا اناشغ من البواجي
وامي مو اقل مني
ابوي بالربع ساعه هو حاضن خالته ويبجي بحرگه قلب
لاول مرة اشوفه يبجي
او اشوف رجال هيج يبجي
بحيث بصوت عالي ومبحوح
ويناشغ صدك يعني متندم ومقهور
ام خضر:يلاا يخاله يبعد عمري مابي شي هسه
يصير زين وينساها،،بس بعد كون توب ماتمد ايدك عليهم
هذا اختبار من ربك يريد يصحي ضميرك
علي الدر:لا بعد التوبة ما امد ايدي ع واحد
ابد،،حتى لو يحركون البيت ماحاجيهم بعد
بس خلي حسين يگوم بسلامه شوفي شلون راح ادلله
كعد ابوي وبيبي ام خضر وامي ع تخم
جبت مي لابوي
يباوع لامي بقهر
علي الدر:اذا تكرهيني حقج واذا تريدين تشتكين عليه حقج،،بس اني اوعدج بس ماضربهم وراح تشوفين شلون راح اتغير
سولف الحادث كله وبعد ماكمل صاحلي:
علي الدر:فيّ بويه
اني نصدمت هاي البويه متعودين عليها وهيج بلطف يصيحلنه خير انشالله
رحتله،،
فيّ:ها بويه
علي الدر: طلعلي ملابس حطيهن بالحمام اريد اسبح
اذا تكدرين
فيّ:انه بخدمتك
صح مصدومه من طريقه كلامه بس هوا يوميه يصيحني بخوف واني بخدمته
نوب اليوم وياها يبويه
اشتغل بكل حب (تأثير الكلمة ع الانسان) وبالاخص اني
كلش تأثر بيه الكلمة،تتحكم بمزاجي طول اليوم
حطيتله ملابسه بالحمام سبح
وصلى وراح نام العصر يروح لحسين
احنه منتظرين خبر عنه
خابرنه ع بيبي
نرجس:ها يمه بشري شلونه وليدي
الجدة:دخلو للعمليات وقبل شويه طلعو
هسه راح يگعد من البنج
نرجس:اييي شسوله؟
الجدة:حطوله شبكة ع مكان الضربه
وخيطو المكان وبعد 6اشهر يشيلوها
يحطوله بلاتين
نرجس:وهوا شلونه مابي شي
الجدة:لا مابي شي،اني من اجي اسولفلج
نرجس:يلا خوش،ابني بأمانه الله وبأمانتج
مرت عشرة ايام وحسين بالمستشفى
نعرف اخباره من موبايل،،وبيبي تروح يمه
من صبح للمغرب تجي تسولفنه شصاير هناك
اليوم يطلع حسين،،متحضرين وجهزنا
اله غرفه بيبي لان جوه ميكدر يصعد احنه غرفنه فوك
بالطابق الثاني
وصلو،،نزلو يمشي ع كيف ماسك ايده عمي مرتضى
بس شنو ضعيف كلش يمكن نازل 10كيلوات
وصوته مبحوح من الصياح من شفته ماعرفته
بس يلا اهم شي طلع بسلامه
هلهلت بيبي وطشت جكليت
دخلو للغرفه ينام مو زين عليه الصوت العالي
نرجس:يمه فيّ گعدي يمه اذا يريد شي ميكدر يصيح
جرحه بعده رطب
فيّ:صار،،
دخلت شغلت التلفزيون وكعدت اباوع وهو نايم ع جربايه
فيّ بهمس:حسين!!
حسين:ها
فيّ:اطلبك بواجي
حسين:شنو
فيّ:بجيت عليك بواجي دموعي خلصن لو متبرعه بيهن
جا حليت ازمه الماء يلي بالبلد
حسين:ههههه اسكتي لتضحكيني ماكدر راسي يوجعني
فيّ:ودموعي منو يرجعلي ياهن
عندي حل تكدر توفي دينك
حسين:اي تحفينه بله
فيّ:افتح عيونك واسمعني،بس بيناتنه الموضوع
الحل هوا اتزوج وابجي عليه وعلى فراكي
حسين:خوب كولي تريدين تزوجين عليمن ماخذتني حجه
فيّ:مو شوف هو مال ازوج هاي منتهين منها ماجاي اخذ رأيك بس اريدك تبجي عليه كأني ميته
بعيد الشر عني هيج تگطع روحك بالبواجي
هنا تبين المعزة
حسين:شوكت تسكتين بالعة روضة مال جهال
فيّ:الله عليك انه هواي احجي
جا والبواجي البجيتها عليك
بس هو مو صوجك صوجي انه
حسين:يبوووو والله نذليت ذلة
اكلج فتحي الشاش ورجعي شدي
فيّ:لعبتي العمليات وكذا يمي وصلت
تقربت عليه فتحت الشاش
شفت المكان مزين وطبرة
مقابيل اذانه من طول للطول
كلش طويله وكلها خياطات والجرح احمر
روحي رادت تطلع كلش منظر يخوف
عفت الشاش يم راسه وطلعت من الغرفة بسرعه
اجر النفس بصعوبه من شكل المنظر المخيف
امي وبيبي شافني هيج اتنفس بصعوبه
وايدي ع حلكي
تطافرن من مكانهن
نرجس:شكو شبي اخوج احجييي
فيّ:روحي شدي راسه فك الشاش
دغمتني وراحت
نرجس:خوفتيني عبالي شصار بي
لفت راسه زين وغطته ونام
اجيت اني فرشت فراشي
انام يمه خاف يريد شي بيبي متكدر
ولبيبي أيضاً فرشت فراش لان حسين نايم ع جربايتها
نمنه،حسين ماكعد ضاربينه ابر تنوم
الصبح كعدت 9:00
بيبي ماهيه بفراشها
باوعت لحسين نايم
طلعت يم امي
فيّ:بيبي وين؟
نرجس:راحت للسوق
فيّ:ليش ماكلتلي قبل لاتطلع
نرجس:ليش تريدين شي
فيّ:لا غير تاخذ رأيي ماعندي نسوان تطلع للسوق
نرجس:يلا مرة الثانيه تاخذ رأيج
وترگعج فد نعالين قبل لاتروح
فيّ:هههههههه هاي عليمن؟
نرجس:عليج
فيّ:ها عبالي مو عليه
حسين:فييييّ
نرجس:اخوج شوفي شبي
فيّ:خادم ولوگي
في:ها
حسين:شمأكله من صبح وهلكد حجيتي
فيّ:تدري بيه ماتريك بس هاي موهبه من الله
حسين:عمت عيني على الله مالكه غير هاي الموهبه
يذبها علينا،
فيّ:غيركم يتحسر على الحجايه مني
حسين:اويلي عليه،،اخذيني للتواليت اذا تكدرين
فيّ:هوا آني ماكدر والله بس غصبن عليه
حسين:صدك
فيّ:لا لا جذب اشاقه اخدمك ع راسي افااا عليك الخوة افعال
حسين:شوكت نتوكل بحيل الله
فيّ:هههههه يلا امشي
لزمت ايده وهوا يمشي ع كيف
دخل لتواليت وره دقيقه طلع
التواليت برا بالطارمه والشمس قويه
اول ماطلع صارت الشمس بعيونه
مشى خطوه،،اغمى عليه وگع بالگاع..
يتبع...
~•~•~•~•~•~••~•~•~•~•~•~•~•~•
ممكن تعليق بين الفقرات وتصويت للقصه حته تصعد
فدوه اروحلكم
دمتم في حفظ الله ورعايته ❤️
الكاتبه بنين أيتان
#ظلمات_الرائد