في حوش البيت كان الكل مجتمع حول الذبيحة .
وبالجنب كانت طاوله فيها كل شي يحتاجونه .
وبعيد عنهم كانت جلسه دائريه راقيه .
وبنصها كان الحلا والقهوه والتمر .
طلع راجح من البيت وهو يضحك ويرفع ثوبه ويستلم السكين : يلا بسم الله !
محمد كان واقف يناظره جنبه .
والبنات كانو يجون ويورحون للجلسه .
بشرى كانت واقفه تناظر جدها وهو يبدأ يقطع .
راجح ابتسم : يابشرى مايصلح روحي اجلسي
بشرى بخوف راحت وجلست .
وابتدا راجح يذبحها وبالداخل كانت هتان تدور بالبيت بالبخور .
ونسيم كانت واقفه تسوي المكياج الناقص .
دق باب الحوش وكانت هديل وابوها .
لف راجح ومحمد ورحبو فيهم .
راجح شتت نظره وهو يضحك .
دخلت هديل بخجل وتوتر للداخل .
هديل دقت الباب وجاتها هتان وهي تسلم عليها : هلا فيك
هديل : عيدكم مبارك
دخلت هديل وسلمت عليها نسيم .
جلس ضيف الله وهو يقول : اساعدك يارجال !
راجح ضحك وهو يكمل ذبح : ارتاح ياخوي
جلس ضيف الله وقال محمد : شاهي ولا قهوه ياعمي
ضيف الله : شاهي يامحمد
ابتسم محمد وهو يصب الشاهي .
وقدمه لضيف الله اللي قال : انت اكبر عيال راجح ؟
محمد قام وقال وهو يبتسم : ايه البكر
ضيف الله ابتسم وقال راجح وهو يبتسم : اعذرني مشغول
محمد جلس وهو يقدم التمر لضيف الله بدا يتكلم عن حالهم .
وفجأه دق الباب ، وكان تركي وسعود واقفين يضحكون وهم ياشرون عليهم .
محمد قام وهو يضحك وتوجه لهم وقال وهو يحضنهم : سلامتكم
تركي ابتسم : سلامتك انت ، وينك ماعاد صرنا نشوفك
دخلو الحريم لجوا ودخل ابو تركي وابو سعود .
سعود : امشو نطلع مثل قبل ونلف بالحاره علبال ماتستوي الذبيحة
محمد ضحك بخفه : ماصارنا مثل قبل
ولف يناظر ابوه : ابوي محذر علي اقعد جنبه علشان اساعده
تركي بقرف وهو ينظر لمنظر الذبيحة وسلخها : وعوه !
سعود نظر بصدمه وابتسم : تركي ابك علامك
محمد ابتسم وقال : الله جابك ياتركي امسك هاذي واوقف عند ابوي
محمد لابوه : تركي جنبك يايبه
ودخل لداخل من الباب الخلفي لغرفته .
تركي بصدمه لسعود : روح انت
سعود بسخريه وهو يجلس بالجلسة : رح يالرخمه
مسك جواله وكان متأمل انها بترسل له لو عيديه .
ولو انه مو واثق في حبها له أو ثقتها فيه الا انه عنده امل .
طولت وم ارسلت مما جعله يرمي الجوال بالسرير بتذمر وقام بهدوء وهو يحاول يهدي نفسه .
لكن بدا يسرع ويدور بسرعه وهو يحك يده .
نفس الحاله رجعت له ، وهو يحاول يكبتها علشان محد يسمعه .
بخنقه وبسرعه بدا يفتش شنطته وهو يرتجف .
مسك العلبه واخذ الحبه وشرب مويه .
حس براحه لدرجه حط نفسه بالسرير ونام بدون مايحس .
كانت الراحه لاتوصف ، ولأول مره يحس براحه كذا .
ولربما هذا تأثير العلاج .
-----------
إيناس |
مسكت جوالها وهي تناظر فيه بهدوء .
منى وهي تشرب القهوه وتبتسم : لاتنتظرين شي ، تراه مشغول
إيناس تركت الجوال وقالت بعدم فهم : مين
موده ضحكت : تقصد محمد يعني مين !
إيناس ابتسمت بخفه : لا م انتظره
منى هزت رأسها بتسليك .
إيناس وهي تلف وجهها يمين ويسار : وش نسوي بوسط الكوفي ؟ كيف نعيش العيد الصح !
منى وهي تنظر للمشروب : والله اذا تبون اوديكم عند قريبه لي ، لكن حذاري وش بتلقون عندها !
إيناس بعدم فهم : مافهمت
موده ابتسمت : حريم زمان اللي يمسكون البنت ويفحصونها اذا تحصل لولدهم ، حتى يمكن يتحرشون فيها علشان يتفقدونها
بلعت ريقها بهدوء ولفت تناظر المشروب .
ناقصه بدون اهل بدون اخ او اخت .
ماتحس حياتها وهي صغيره زي الحين .
ومن يوم ذكرو التحرش وهي تتذكر آلاف المرات اللي تحرش في القريب والبعيد .
والأسوء من كل هذا ان عندها بنت جات بدون تعرف وغير شرعيه .
كيف كل هذا تجي على بنت ماتعدت عمرها 26 ! .
منى : الو
إيناس بشرود : معليش شردت
موده بطفش : خلونا ناخذ خط للطائف ، مادام عندنا اجازه ؟!
منى استجابت للفكرة وقالت لايناس : شرايك تنزلين معنا للطائف ؟
إيناس ابتسمت بهدوء ومسكت الكوب : اللي تبونه
------------------
تولين بصراخ : فستاني !!!
عزام بصدمه وهو يبعد : وجع
ببكاء وهي تجلس على الفستان : جعل يدك تنكسر ان شاءالله !
ام تولين بتحذير : عيب ياتولين !
تولين قامت بسرعه وقالت وهي تصارخ : فستاني يايمه انخرب !
لفت بغضب على عزام اللي يزبط الشماغ : كله بسبب الأصلع !
عزام بتحذير وهو ينظر لنفسه : م الأصلع غيرك
طلع عليهم ابوهم رامي وقال وهو يسال ويجلس جنب ام تولين : صراخكم واصل اخر الشارع ! وشفيه
تولين وهي على وشك البكاء : فستاني حق العيد خربه يايبه !
ام تولين تنهدت : تلبسين غيره يابنتي مافرقت !
عزام وهو يجلس على الكنب ويقول وهو مبتسم وياخذ من الحلا : وامي صادقه في غيره يعني !
صرخت بغضب ودخلت الغرفه وقفلت الباب .
------------
بعد ساعه دخلت رغد هي وامها يسلمون عليهم .
رغد بفضول : تولين وين ؟
ام تولين ابتسمت : حابسه نفسها في الغرفه علشان عزام خرب فستانها
رغد قامت وقالت وهي تبتسم : اشوفها
دقت الباب وقالت بسخريه : مسكينه فستانك خرب !
فتحت تولين الباب وقالت وهي تمسك يد رغد وتوريها الفستان : شوفي بالله شوفي ! فوق م انه خربه مايعطيني فلوسه !
رغد وهي تنظر بالفستان وقالت وهي تمسكه : هذا تغير 180 درجه ! وش مسوي فيه
تولين جلست بتذمر : وش البس الحين يعني !
رغد ابتسمت وهي تقوم وتفتح الدولاب : مو معقوله مافي اي فستان ثاني تلبسينه
قامت تولين بهدوء وقالت وهي تضم يدها لبعض : في حق عيد الفطر ، والكل شافه ، اساسا الفستان ذا شريته للعيد ذا !
رغد ابتسمت وقالت وهي تلف عليها : خلاص ياتولين البسي حق عيد الفطر ، وعزام خليه علي
------------------
ياسمين فتحت الدولاب وهي تدور فستان .
تأخر الوقت اساسا وفيصل كان بيطلع لأهله .
دخل فيصل عليها وقال متعجب : للحين مالبستي !
جلست بتعب وقالت وهي تتنهد : بطني يعورني !
فيصل بصدمه وهو يجلس جنبها : يعورك ؟
هزت رأسها وقامت بسرعه تستفرغ .
جلس يناظر بحيره وهو مايعرف يتصرف بمواقف كذا .
انتظر لدقايق حتى طلعت وقالت ووجها شاحب : انا بنام انت روح لأهلك !
جلست على السرير وقام فيصل وقال بتحذير : كيف اروح وانتي تعبانه ، نروح المستشفى ؟
هزت رأسها بسرعه وقالت وهي تتلحف : لا م ابغا !
فيصل بتفكير مايعرف اذا يتركها ويروح ، ولا يقعد وتساله امه .
جلس على الكرسي اللي يطل على مسبح وبقى يناظر فيها .
دق الجوال وكانت رغد وقالت : فيصولي وينك ؟
فيصل : رغد قولي لأمي ان ياسمين تعبانه م اقدر اجي
رغد بجديه وبتعجب : اما ! وشفيها ؟
فيصل : بطنها يعورها واستفرغت
قالت بخجل وهي تضحك : اما عاد سريعين انتم ! احسب بتطولون
ضيق عينه وقال : وش ؟
رغد بسخريه : مبروك يافيصل بتصير اب ان شاءالله !
تغيرت ملامحه وقال وهو يستنكر الفكره : ماله شغل البنت تعبانه أمكن سخونه
رغد : تمام قفل وانا بقول لأمي
قفل وطيف الابتسامه على وجهه وهو يناظر باللي نايمه .