٠
٠
•
ام سلطان ارجعت كلمت غاليه في الموضوع قالت لها : طولنا على الناس لهم شهر ينتظرون ، ولازم ننهي الموضوع اما موافقه او رفض ، تعرفين ورانا عرس سلطان وترتيباته
غاليه بخجل : مدري ايش اقول
ام سلطان : انت شفتي حنية سعد مع امه واخواته والرجال اللى يقدر ويهتم في امه واخوته راح يقدر بنات الناس ، وترى ام سعد لمحت لي في عرس عساف و نورة ان سعد مره يبغاك وكل يوم يسال عن ردك
غاليه سكتت وقلب وجهها احمر من الاخراج استحت تقول موافقه
ام سلطان : بنتي واعرفك ، بس ودي اسمع منك اول
غاليه : موافقه
ام سلطان تحضنها وتبوس راسها :حبيبتي الله يوفقك ويسخر لك ويجعلها زواجة الدهر السعيده والهنيه
اخيرا وصل رد غاليه لسعد اللى حس ان الدنيا ماتوسع فرحته باس راس امه ويدينها وهو يضحك
بعدين باس راس ابوه ويدينه وقال : مشينا نكلم سلطان
ابو سعد : لاحول ولاقوة الابالله ، اصبر يابوك لاتصير مطفوق
سعد : خلاص يبه صبرت بما فيه الكفايه معاد اقدر
كلم ابو سعد سلطان وخبره انهم جايينهم بكره الدمام
في بيت ابو سلطان جلس ابو سعد مع سعد في المجلس
وكان سلطان معهم اللى امه عطته خبر عن سبب جيت عمه لبيتهم ، مع انه كان مو راضي تماما ، بس بما ان غاليه موافقه ، وافق
ابو سعد : سلطان هذا ولد عمك سعد ، تعرفه من زمان وتعرف كل شي عنه وهو اليوم جايك يخطب اختك غاليه له
ويوعدك يصونها ويراعي الله فيها
سلطان : ولد عمي على عيني وراسي ، وهو غالي وغلاته من غلاك ياعم ، وعطيناه بنتها ، والله يوفقه ويبني بيتهم على السعادة والرضي
هنا سعد معاد يقدر يتكلم سكت يحاول يمنع دموعه تنزل لان مشاعره سيطرت عليه تماما اخيرا غاليه بتكون له اخيرا غاليه حبيبته اللى من زمان يحلم فيها ، سعد في داخله فرح وخوف ولهفه وده يعبر ويتكلم بس ماعنده احد يسمعه ، تمني عساف يكون معه في هذه اللحظه
وصل خبر خطبة سعد لغاليه وموافقتها لنورة وهي مع عساف في شهر العسل في فرنسا ، وصارت تبكي من السعادة ، عساف كان يتسبح طلع ولما شافها تبكي قرب منها وسال بقلق : فيك شي حبي
نورة : اخيرا سعد راح يتزوج غاليه
عساف بفرح اخذ جواله وهو يسال : من قالك
نورة : ريم تو خبرتني
دق عساف على سعد على طول
رد سعد : هلا بالعريس
عساف : ليش يالخاين ماخبرتني او انتظرت لين ارجع
سعد ضحك : وليش استناك ، انت الحين مو فاضي لي
وانا مستعجل
عساف : مبروك ياسعد ، اخيرا
سعد : اخيرا ، ياعساف ، اخيرا قلبي بتطفي ناره وترتاح مشاعره ، اخير يا عساف
كِل جَمرِي صآح لجلك : شِبّنِي !
واشتعل عودي وفاح الصدر طِيب
آآه من طاري غلاك إن هَبِّـني
وإنت ما تسمع ولا تقدر تجيب !
ابو سعد حدد الزواج بعد شهر ، وزواج سلطان كان بعد شهرين
ام سلطان : ليش مستعجلين
سلطان : يقول لان الاجواء الحين زينه في الديرة
ام سلطان : ماكنت ابغي الديرة ، بس بما ان غاليه موافقه بكيفها ، الله يعين اجهز لزواجها ولزواجك
سلطان : زوجي الحمدالله تقريبا خلصنا اغلب الحجوزات
القاعه والفندق والطيران والشقه باقي لها قليل وتخلص
والاثاث يوصل بعدها
سلطان كان جالس في غرفته سرحان قطع سرحانه صوت جواله يدق وكانت بسمه
رد : هلا وغلا بنور عيني
صاحت بسمه : سلطان امي ، تكفي تعال البيت
فز سلطان واخذ مفتاح سيارة وطلع يركض قبل يوصل بيت بسمه دقت تخبره ان الاسعاف اخذ امها للمستشفي
على طول غير الاتجاه وراح للمستشفي وصل هناك وشاف بسمه منهاره قرب منها ، كان وده يحضنها ويهديها بس ماقدر
سلطان : وش صار
بسمه وهي تبكي : مدري حصلتها طايحه على سجادتها ، سلطان امي ، اخاف تموت وتتركني
سلطان على طول ارسل لغاليه تجي هي وامه للمستشفي علشان بسمه ، قبل يوصلون طلع الدكتور من الغرفه وقال لهم : البقاء لله
صرخت بسمه بصوت عالي ، مسك سلطان يدها لكن لما شافها انهارت حضنها بين يديه وصار يهديها من قوة الصدمه فقدة الوعي بين يدينه على طول شالها واخذها لغرفه ثانيه وصار ينادي على الممرضات
وصلت ام سلطان وغاليه وشافوا سلطان مرتبكه وخايف والدمعه في عينه
سلطان : ماتت امها ، وبسمه انهارت ، مدري ايش اسوي لها
فاقت بسمه وحصلت ام سلطان وغاليه بجنبها بكت وهي تخبرهم : امي ماتت ، امي تركتني لحالي في الحياة المخيفه
ام سلطان تحضن بسمه وتمسح على ظهرها : انت مو لحالك انا معك وسلطان بجنبك وكلنا معك ، انت صرتي وحده من بناتي وانا راح اقاتل علشان ، لاتخافين
بسمه باكيه : راحت قبل تشوفني عروس قبل تشوفني بالفستان الابيض قبل ترقص في عرسي وتزفني ، اخخ ياخاله
ايش اسوي لحالي
ام سلطان : سلامة قلبك وروحك من الاه ، اذكر الله يا امك
دخلت بسمه لغرفة امها علشان تودعها وتبوسها
بسمه : ليش رحتي يمه ، باقي احتاجك ، على طول وثقتي في سلطان وتركتيني له ، باقي احتاجك يمه
سلطان دق على عمها ابو تركي وبلغه يجي ، اول ماخلصوا اجراءات الوفاة اخذوها يغسلونها ويدفنونها
كانت ام سلطان وغاليه طول الوقت مع بسمه ماتروكوها لحالها ، ودعت امها واخذوها للمقبرة ،كان سلطان هو اللى نزلها في قبرها همس لها : لاتخافين على بسمه والله ماتضيمها الدنيا وانا موجود ، طول مدة ايام العزاء الثلاث بقت غاليه مع بسمه في البيت
ورابع يوم مر سلطان من بيتها وحصل الشرطه واقفه عند الباب نزل وشاف تركي يصارخ وبسمه واقفه عند باب
انهبل على طول صار يركض لها اول ماوصل وقف قدام بسمه وسال : وش فيه
بسمه بقهر : ولد عمي المحترم تهجم على
هنا سلطان فقد عقله وعلى طول هجم على تركي وبدء يضربه ويسبه بالقوة بعده العسكري عنه
سلطان : والله ماخليك ياكلب ، تحسب ان ماعندها احد ، لا انا موجود والله اموت دونها يارخمه
تركي : رخمه انت تاركها على كيفها لارقيب ولاحسيب
هجم سلطان مره ثانيه عليه واضطر العسكري يدخل سلطان الدوريه
سلطان بقهر : ليش تبعدني انا ، بعده هو ، هو الخسيس اللى تهجم عليها
العسكري : انت ماعندك علاقة قرابه معها
سلطان : انا خطيبها
في القسم دق سلطان على سعد بما انه محامي
على طول وصل ولما شاف سلطان جالس معصب وثوبه مشقوق وشعره مبهذل قرب منها وسال : سلطان وش صار
خبره سلطان بكل شي
هنا سعد قال : سلطان راح يكون زوج البنت وراح ناخذ منها توكيل ساعتها اقدم فيك بلاغ والله لتخيس في السجن ياخاين ، نعنبوك هذه بنت عمك عرضك ، ليش تتهجم عليها
سلطان : سعد ، اقدر اعقد عليها من غير موافقة عمها
سعد : ايه لان الاذي اللى جاها منهم واذا عقدت عليها تقدر ترفع عليه قضية اذي وتعرض لزوجتك
طلع سلطان وسعد على طول لبيت بسمه دخل سلطان البيت : بسمه تعالي معي راح نعقد في المحكمه واخذك معي للبيت ، اسف بسمه ما راح اخليك لوحدك هنا
بسمه استسلمت لطلب سلطان وراحت للمحكمة
سعد عطي سلطان ثوبه وشماغه وسعد راح للبيت غير ولحقهم للمحكمه ، ملك سلطان على بسمه ، وهناك اعطي سعد توكيل وطلب منه يرفع قضيه عليهم كلكم
اخذ بسمه لبيتها وقال : اطلعي خوذي لك ملابس راح تروحين معي لبيتنا
بسمه معاد لها حيل تقاتل او تحارب في الحياة من بعد امها لكذا وافقة على كل اللى سواه سلطان ، وهي مرتاحه لانها اخيرا لقت من يحارب الدنيا علشانها ويوقف ولد عمها الظالم
دخل سلطان البيت وهو شايل شنطة بسمه بيد وماسك يدها باليد الثانيه ، ام سلطان والجده انصدموا وهو يشوفون بسمه واقفه معه وعيونها تدمع
ام سلطان تقرب منهم : خير ، وش فيكم
سلطان : تزوجنا يمه
ناظرت بسمه في ام سلطان بخوف ، لكن ام سلطان قربت
وضمتها بحنان : هلا ومرحبا بعروسة ولدي
هنا انهارت بسمه وصارت تبكي بصوت عالي وشهقات كبيره ، ترك سلطان يدها
اخذتها ام سلطان عند الجده اللى جلستها بجنبها وحضنتها وباست راسها : مبروك يا بنتي وحياك بينا
ام سلطان حضنت سلطان وامسحت على ظهره : مبروك يا ولدي
سلطان : اعذريني يمه الضروف كانت اكبر منا
ام سلطان : لاحقين خير ، نسوي لكم عرس بعدين
دخلت ريم وغاليه جايين من السوق ، لما شافوا بسمه جالسه مع امها وجدتها وشايله حجابها وسلطان فيه انصدموا
ام سلطان : باركوا لخوكم وبسمه تزوجوا وصارت في بيتنا
قربت غاليه منها وحضنتها وباركت لها
حور بعباطه : شكل روميو معاد يقدر يصبر خطف جوليت
رغم الحزن الا ان بسمه ضحكت بخجل من كلامها
سلطان : تلوميني ياحور ، هذا الزين من يصبر على بعده
ام سلطان رمت المخده على سلطان : تادب ولد
بسمه حست بامان و حست ان قلبها مليان اطمئنان وسعادة وفرح
سعد رجع للبيت وارسل لسلطان : تم رفعت ثلاث قضايا عليه ، ولد ابوه ان قدر يطلع منها ، بس لاتنسي اتعابي
تعرف تو بادي شغل حتى مكتب مافتحت للحين
رد عليه سلطان : سلمناك اعتابك مقدما ولا نسيت غاليه بس لايكون ماتوفي
سعد : توفي وتوفي كل طوايفك يا الخايس ، وش رايك اسوي مثلك املك واخذ عروستي من غير تكاليف ومصاريف
سلطان : انا ماعندي مانع بس نشوف الاهل وغاليه اهم شي
ام سلطان : بسمه تعالي نامي في غرفتي
سلطان : ليش يا الوالدة غرفتي وش تشكي منه تراها زوجتي ، لاتاخذينها مني
اخذ سلطان بسمه لغرفته دخلت بسمه وهي تحس باحراج
سلطان : الغرفه لك كلها انا باخذ اغراضي واطلع لغرفه ثانيه
بعد ما تنتهي شقتنا نزفك لها عروس
هزت بسمه راسها بخجل