في داخلي جمر انتظارك مستعر

ملامح فرح

٠
٠
•

سلطان رجع يكلم امه بس ما زالت رافضه الموضوع ورافضه تسمع له
سلطان : يمه تكفين ، لا تسوين فيني كذا
ام سلطان : وش سويت فيك ،انت باقي شاب وهذه اول مره تتزوج ليش تبغي تاخذ مطلقه
سلطان بعصبيه : وش فيها المطلقه يمه
ام سلطان : مافيها شي ، بس انا ابغاك تفرح وتتزوج بنت
سلطان : من قال اذا تزوجت مطلقه ما راح افرح ، يمه تفكيرك صدمني
ام سلطان بصوت عالي : سلطان ،قلت لا يعني لا واذا تزوجتها من غير موافقتي ، ترى والله ..
قرب سلطان من امه وحضنها وهو يحاول يهديها مايبغاها تحلف عليه
دخلت الجده وهي تقول : ام سلطان ، وش الكلام اللى تقولينه
كان واقفه عند الباب مع غاليه
سلطان علشان غاليه ماتتاثر : مافيه شي ياجده
الجده : الا فيه ، وش فيها المطلقه ها ، انا تزوجت ابوك وكنت مطلقه ، بنتك مطلقه
ام سلطان : غاليه وضعها غير
غاليه : ليش ايش يفرق ولا علشان انا باقي بكر
ام سلطان بعصبيه : وجع بنت استحي
سلطان : خلاص ، لا احد يتكلم ، رجاءً الموضوع بيني وبين امي
طلعت غاليه معصبه والجده قالت بحزم : هذه حياة ولدك لا تظلمينه ، ولا تنسين ان عندك بنات واللي يعاير الناس يصيبه ماصابهم
طلعت الجده ، ام سلطان صارت تبكي ، سلطان حضن امه وباس راسها : عمري ماتزوجت اذا بزعلك يمه ، والله رضاك اهم عندي من كل شي
طلع سلطان وترك امه

سعد جلس مع ابوه كان يصب له قهوة
ابو سعد : بتروح الديرة يابوك
سعد : ان شاء الله ، ودي اقعد فيها ايام مشتاق لها ولهواها
ام سعد : مامعك احد
سعد : انا اعرف اتصرف ولا نسيتني اني عشت عزوبي ثلاث سنين
ام سعد : الله لا يعيدها
سعد : امين يمه ، اجل زوجيني علشان ماتنعاد
فرحت ام سعد : من عيوني ازوجك ، اصلا حصلت لك بنت وش زينها واهلها طيبين واكيد ما راح يحصلون احسن منك لبنتهم
ضحك سعد : هذ اللى خل نص الشباب يصدقون نفسهم انهم الافضل والاحسن ، المدح المبالغ فيه من الام
ابو سعد : اخطبيها اجل كلمي اهلها نروح لهم
سعد : صبرك يبه ، اعرفها اول واعرف اهلها
ام سعد : بنت عم مصعب وش زينها وامها حرمه اجوديه
والبنت تدرس في الجامعة
سعد : ما ابغاها ، ابغي وحده ثانيه
ام سعد : فيه بعد بنت عمة مصعب
سعد : ماعندك غير عائلة مصعب
ام سعد : لاني شفت بناتهم في تمايم ناصر بنات مؤدبات مزيونات
سعد : الله يستر عليهن ، انت تعرفين من ابغى يمه
ابو سعد بحده : مالك نصيب فيها ، ماتفهم انت
سعد : خلنا نروح ونجرب ، واثق المره هذه انهم بيوافقون
ام سعد : علشان البنت مطلقه تقول كذا حرام يمك غاليه مايعيبها شي والدنيا قسمه ونصيب
سعد : لا طبعا ، انا اقول كذا علشانها غاليه بنت عمي اللى ابغاها من زمان وطلاق غاليه مو عيب ولا نقص
ابو سعد : اعرف ان طلاقها مو عيب ،بس دور غيرها
سعد : والله ثم والله ما تزوج غيرها لو اقعد طول عمري عزابي
ابو سعد بعصبيه : قم ، قم انقلع من عندي
سعد بتحدي : ماني منقلع ، اخطبها يبه تكفي والله لو ردوني هذه المره معاد اقول شي
ابو سعد : ردوك مره ثانيه
سعد باستغراب : متى
ابو سعد : قبل شهر رحت اخطبها لك من اخوها بس قال هي رافضه الزواج
ابتسم سعد وقرب من ابوه : شهر يبه ، شهر تسقط دول وتقوم دول وتتغير حتى مكان النجوم ، ما تبغي الانسان يتغير ، يبه تكفي طلبتك ، خلنا نروح لهم
ابو سعد : اسمع ياسعد
سعد قاطع ابوه وباس يده : تامر امر يابو سعد
ابو سعد يمسح على راس سعد ويبتسم : خلاص بعد يومين نروح لهم
سعد : ليش يومين يبه ، اليوم تكفي طلبتك
ابو سعد بحده : لاحول ولاقوة الا بالله ، انهبلت انت
سعد : يبه تكفي خير البر عاجله
ابو سعد : يصير خير
ام سعد : انا اكلم امها اول
سعد بفرح : ايه تكفين