في داخلي جمر انتظارك مستعر

فرح خجول

٠
٠
•
ابو سعد دخل غرفة البنات بعد الظهر وام سعد معه
ابو سعد : نورة ريم اطلعوا
طلعوا ودخل ابو سعد وجلس قدام بنتي هيا : اجلسي يابوك
جلست هيا وامها بجنبها
ابو سعد : امك قالت لك عن خطبة مصعب
هزت هيا راسها بخجل
ابو سعد : اسمعي وش بقول اول : وانا ابوك انت غالية عندي وتسوين عيوني والله ما ارخصك ، كنت اظن لك نصيب مع سلطان لكن ربي ماكتب ، بس جاب لك الافضل
ولد عمتك ( مصعب ) رجال والنعم فيه ،صح مر في ضروف بس الحمدالله تعافي والحين يشتغل في حلال ابوه الله يوفقه ويعوضون خسارتهم ، رجال ماشفنا منه او من ابوه زله ، رجال رمي الماضي وراء ظهره ، وبيكمل حياته
وانت يابوك مرأة سنعه وهذا اللي خلاهم يجون يخطبونك
السنين تمر يابوك ولا احد يضمن عمره بس انا متاكد ان مصعب راح يحافظ عليك مثل ما ابوه حافظ على عمتك وعزها رغم الاختلاف الكبير بينهم هو متعلم وتاجر و عمتك بدويه جاهله ، انت مو مثل عمتك انت متعلمه وفاهمة
وتعرفين مصلحتك ، لا تظنين بغصبك عليه ، بس الناس بيرجعون اليوم وودي نعطيهم ردنا قبل يروحون ، وش قلتي وانا بوك
هيا بخجل : اللي تبغاه يبه
ابو سعد : لا انت وش تبغين
هيا هزت راسها بخجل
ام سعد : يعني موافقة
ابو سعد : بسمعها منك
هيا بصوت واطي : موافقة
ابو سعد حب راسها ودموعه في عيونه : الله يكتب لك السعادة والهناء ، مبروك يابوك

ناصر يشيل شنطة امه ويحطها في السيارة ثم يرجع يسلم على راس جده
ام مصعب : نشوفكم على خير يا بوي
ابو سعد جاء ووقف قدام مصعب وضرب على كتفه بشويش وقال : سلم على ابوك ، وقله خالي يقول : شرينا نسبكم للمرة الثانية
مصعب فهم بس خاف يقول شي ويطلع غلط
ابو راجح : زوجك الله يامصعب
ام مصعب : الحمدالله ، الله يجعلها مباركه للاثنين
ناصر : يعني ايش
سعد يضرب على ظهره ويقول : يعني موافقين على خطبة مصعب
قرب ناصر من اخوه واحضنه وهو يبارك له
ركب مصعب بجنب ناصر اللي يسوق
ابو راجح : استودعناكم الله

يوم الاحد الثقيل
سلطان ماسك كوب قهوته وداخل مقر الاجتماع معصب لانه مانام بسبب ازعاج الغرفة اللي جنبة في الفندق كان صوت التلفزيون عالي مره ،حتى بعد ما اشتكي مانفع شي
جلس على اقرب كرسي وتفاجئ بشنطه نسائية على الكرسي اللي جنبة بس تجاهلها
صوت انثوي يقول : عفوا ، هنا مكان النساء
سلطان من غير يلتفت قام من مكانه وتعثر وانكبت القهوة على الكرسي اللي فيه شنطة ، تافف وهو يلتفت بعصبية للي كانت تكلمه وشاف الدكتورة بسمه حاطه يدها على فمها والدموع تملي عيونها ( ما تتنقب )
بعدين قالت : شنطتي وتوجهت لها شالتها من على الكرسي كانت تنقط من القهوة التفتت على سلطان وقالت بعصبية : ما تشوف
سلطان : ماكنت قاصد
بسمة بكل جنون اخذت قهوه فتون وصبتها على شنطة سلطان اللي وقف مصدوم وكل اللي في الغرفة ينظرون فيه
سلطان قبل يقول شي يندم عليه طلع من قاعة الاجتماعات
راح لحديقة الفندق وفتح الشنطة يشوف اوراقة وحاسوبه
الحمدالله الشنطة جلد يمنع السوائل لكن بنطلونه البيج توسخ وجزمته بعد
شاف بسمة تطلع وراح لها قبل تبعد عنه
سلطان : مجنونه انت ليش تكبين القهوة
بسمة : انت البادي
سلطان : ما تفهمين انت ، قلت مو قصدي ، بعدين ايش دراني انها شنطتك
بسمة : لا تحاول انا اعرفك واعرف امثالك
سلطان بتعجب : امثالي
بسمه : تتعمدون تهينون المراه وتوضحون انكم المتحكمين
سلطان ينظر فيها متعجب من كلامها : والله انك مجنونه
مشي سلطان  وتركها بس هي لحقته وهي تقول : ليش مشيت
سلطان : اسمعي يا حرمه
قاطعته : حرمة عيشتك
سلطان ينظر حوله وهو يتعوذ من ابليس : وش هالمصيبة
اسمعي يا بنت الناس ، تعوذي من ابليس وقفلي الموضوع خلاص اخذتي حقك وزيادة
بسمه : انت البادي
ثم راحت وتركته
رجع سلطان للغرفة في الفندق وغير ملابسه لبس بنطلون اسود وجزمه سوده ونزل للقاعة ، كان طول الوقت يغلي من الغضب ويحس راسه بينفجر من التفكير ، هي جالسة وراه لكذا مو قادر يلتفت لها

بسمة جالسة معصبه لان اوراقها اتلفتها كلها من القهوة وشنطتها انعدمت تماما ، قالت في نفسها لو دريت انه موجود ما حضرت الاجتماع ، دخل الغرفة بطوله وعوضه الملفت كان له هيبه وحضور سحب كرسي وجلس قدامها بكرسيين
جلس بجنبه الدكتور عادل ، وما تدري ليش قعدت تقارن بينهم سلطان كتوفه عريضه وشعره اسود مرتب على اسود
عادل نحيف وشعره على بني واضح من وجهه انه طيب
عكس سلطان المكشر طول الوقت
الطبيبة فتون : بنت اكلتي الرجال بعيونك خلاص
بسمه : مقهوه والله
فتون : مسكين والله ما يقصد تعثر بشنطتي كانت على الارض
ضربت بسمه فتون على يدها بقوه وطلع صوت عالي فالتفت سلطان وعادل وباقي القاعة لهن
ارفعت بسمة الاوراق تغطي وجهها ويقول قالت بخجل : اسفه شد عضلي
انفجر سلطان بالضحك والتفت للمحاضر وهو يقول : مجنونه اكيد

غاليه بعد ما ارجعت الجامعة حصلت حور تبكي
غاليه : ليش تبكين
حور : ابوي هاوشني
غاليه : وش مسوية
حور : الاستاذة نقمة دقت عليه تشتكي وجاء المدرسة اخذني وهاوشني ، فصلوني ثلاث ايام
شهقت غاليه : وش مسوية يامجنونة
حور : جبت جوالي وفتحت بث مع صديقاتي
ضربتها غاليه على راسها وهي تقول : ليته ضربك
حور : وش اسوي الحين اخذ جوالي ولابتوبي ومنعني اشوف التلفزيون ثلاث ايام
جاء صوت ابو سلطان : حور تعالي
فزت حور و مسكت يد غاليه : تكفين انقذيني
توجهو البنات لغرفة ابوهن كان جالس على الكنب في غرفته ولما شاف غاليه قال : اطلعي انت
غاليه قربت وحبت راس ابوها وقالت لحور : بوسي راس بابا واعتذري
قربت حور بس ابوها رفع يده يوقفها : وقفي ، سلطان وهو ولد ماعمره فشلني في مدرسته ، لكن انت بنت كل سنه مشكله كل سنه جاره امك للمدرسة او جارتني حتى سلطان ورطيه معك ، تدرين ان المعلمة تقول ولدك يغازلني يكلمني عن الحب
غالية : يبه انت عارف ان سلطان عاقل بس عيبه يحب تفلسف بسبب الكتب اللي يقراءها
حور واقفه دموعها تبلل وجهها ومنزله راسها اول مرة ابوها يهاوشها بهذه القسوة
وقف ابوها وقرب منها ماتهون عليه هذه حور اخر العنقود السكر المعقود ، حضنها وهو يمسح على راسها
حور بدات تبكي بصوت عالي وتشاهق
ابو سلطان : اوعديني يا حبيبتي معاد تعيدينها
حور بصوت متقطع من البكي : او_عد_ك با_با