في داخلي جمر انتظارك مستعر

قلة الحيله

.
.
•

ابو سعد جالس يتعشى مع عياله وكانت ام سعد سرحانه ما تاكل
ابو سعد : ام سعد ليش ما تاكلين
ام سعد : هيا وسعد والله ان قلبي منشلع عليهم
نورة : تونا مالنا الا اسبوع هنا
نايف : ما كملنا بعد
ابو سعد : ما نقدر نترك ابوي لوحده
ام سعد : عارفه والله ، بس اخاف تحتاج شي
ابو سعد : اخوها عندها ماعليك ، وبعدين نهاية الاسبوع بنطلع لهم ان شاء الله

جات عطلة الاسبوع ورجع ابو سعد وعياله لديرة وكان جالس مع ابوه في المجلس
ابو راجح : بنتك هيا جاها خطيب رجال والنعم فيه
ابو سعد بكل فرح : والله ، من هو
ابو راجح : ابو مفلح
ابو سعد : ابو مفلح ماغيره اللي عنده حرمتين وبيته مليان وراعيين
ابو راجح : ايه ليش هذا الشي يعيبه
ابو سعد : يبه تقوله صادق تبغاني ازوج بنتي شايب عنده حرمتين ، والله ماارميها هذه الرميه تجلس في بيتي اكرم لها
ابو راجح : معاد احد بيخطبها البنت كبيره
ابو سعد بعصبية : الرزق من الله مو من الناس
ابو راجح : يمكن بنتك تبغي العرس
ابو سعد : يبه الله يخليك لنا ويديمك فوق روسنا قفل هذا الموضوع ، هيا انا المسول عنها الحين
ابو راجح : وش قصدك
ابو سعد : صدقت كلامك ومشيت على شورك لين انقال لي ان اعيالي مو قد المقام
ابو راجح : انت للحين تعلك هذا الكلام
ابو سعد : خلاص عيالي انا مسؤل عن زواجهم وحياتهم
تكفي يبه لا تزعل مني
في هذه اللحظه دخل عبدالرحمن ومعه ولده وبناته
ودخل عبداللطيف مع عياله بعد
كان سعد تو جاي من عند النياق لما شافهم رحب فيهم وقلطهم
قرب عبدالرحمن وباس راس ابوه وجلس بجنبه
سلم عبداللطيف والعيال على الجد
استغرب ابو راجح من الوضع اما ابو سعد جلس منزل راسه
ابو بدر : سعد ناد خواتك
التفت سعد لابوه مستغرب
هز ابو سعد راسه موافق ، راح سعد ونادي اخواته
اجلسوا العيال في نص المجلس والبنات تجمعوا وراهم
ابو سلطان : يبه انا جايك انا وعيالي علشان اقول لك سوى اللي تبغي بس لا تزعل على انت وعبدالرحمن والله ما يهون على زعلكم
ابو بدر : يبه خلونا نقفل موضوع الزعل ونرجع زي اول
وترى ابو سلطان ما كان يقصد شي واعتذر لكم ،تكفي يبه بعدين عيالنا طول عمرهم مع بعض عايشين مثل الاخوان صعبه الحين نغير الوضع
ابو سلطان : والله اني احسب عيال اخواني مثل عيالي واغليهم ولا ارخص فيهم لكذا ما اشوف يصلح يتزوجون من بعض
ابو بدر : الزواج من الاقارب ما يجيب غير المشاكل
واخاف يتقاطعون اخواني لو ما صار توافق بين عيالهم
ابو راجح : عيالكم معاد لي دخل فيهم ، زوجوهم او احرقوهم معاد يهمني ، كلكم معاد تسمعون كلامي شفتوني كبرت ولا عاد لي حيل فيكم
ابو سعد : محشوم يبه
ابو راجح : ولا كلمه ، اجل اسمع انت وياه ،عيالكم محرمين على بعض حرمة الدم
فز سعد ووقف من غير ما يحس قال : لا تكفي ياجدي
ابو راجح : اقطع الصوت ، كلمه قلتها ولاعاد اعيد فيها
ابو سلطان : انا موافق يبه
ابو بدر : وانا بعد
ابو سعد نظر في سعد اللي كان منزل راسه : وانا بعد موافق
رفع سعد راسه لابوه وكانه يعاتبه
ابو بدر : تعالو سلموا على راس جدكم
طلع سعد ولحقه نايف من غير ما يسلمون على جدهم
سعد ركب سيارته وراح حاول نايف يوقفه بس ماقدر
طلع ابو سلطان وركب سيارته وعياله معه وراح الدمام
بعد المغرب مشي عبداللطيف

رجع سعد في الليل ودخل على جده معصب كان اول مره في حياته يرفع صوته على جده
سعد : الحين انت ماتعرف تغضب الا على انا واخواني ،لكن غيرنا تنفذ طلباته بكل راحه ، مو انت اللي كنت تقول لي بنت عمك غاليه لك ومو انت اللي تقول بسوى لك كل شي تبغاه بس لا تغضبني منك مو انت ..
دخل ابو سعد وصفق سعد كف خلاه يسكت
التفت سعد وعيونه حمراء من الغضب والدموع تتجمع في عيونه : حتى انت يبه ، ظلمتني سجنتني هنا ، واليوم دفنتوني حي
ابو راجح : خل عنك الكلام الفاضي
سعد بغضب : مو فاضي ياجدي اللي ملينان ظلم وقهر
ابو سعد جر سعد وطلعه من غرفة جده وهو يهاوش : انت شكلك انهبلت ، الشره على ساكت عنك
سعد مسك يد ابوه وحطها على راسه وقال بحسرة : اذبحني يبه خذ روحي ، مو قادر اتحمل
دخل ابو سعد سعد في غرفته ثم قفل الباب عليهم
ابو سعد : ابوي سعد يكفي ، ماحد يستاهل اللي تسويه في نفسك ، لو البنت تبغاك ما سكت ابدا واخذتها لو بالغصب من ابوها لكنها ما تبغاك
سعد : وش دراك
ابو سعد : هي قالت لهيا ما تبغاك
سعد وقف عند الباب : افتح الباب خل هيا تقول لي الكلام بنفسها
فتح ابو سعد الباب ونادي هيا
ابو سعد : هيا قولي لسعد الكلام اللي قلتيه لي اليوم
هيا نظرت في سعد مترددة ، قرب سعد منها وقال : تكلمي
هيا : انا سالت غاليه وهي قالت انك ما تناسبها ابدا
وان المستوي التعليمي بينكم مو متكافئ
جلس سعد على الارض وحط يديه على راسه يحس بقهر والم وعجز ، تمني لو جده ما تكلم على الاقل يعيش في الانتظار ولا الرفض
اشر ابو سعد لهيا تطلع
جلس قدام سعد وقال : وانا ابوك خلاص قفل على الموضوع معاد لك نصيب فيها
رفع سعد راسه وناظر في ابوه بعيون حزينه كان عاجز يوصل لهم اللي يحس فيه ، بس قرر يسكت الحين على امل يتغير الوضع بعدين
هز سعد راسه باستسلام
ابو سعد : روح تعذر من جدك
راح سعد وحب على راس جده من غير ما يقول ولا كلمه ثم رجع لغرفة وسكر عليه وانسدح وهو داخله يغلي لكن عاجز وهذا اللي يزيد قهره