بعد مرور شَهر - الرياض
ناظر الأوراق وهو عاقد حاجبينه ولف لإبراهيم اللي تكلم:كيف يعني احنا بيننا عقد ومده زمنيه انت طول هذي المده مجبور انك تدفع سداداتك
رفع كتفه:فلست
لف يناظره بحده بهاج وكمل ابراهيم:تصرف انت متعاقد مع شركه ماهو لعب عيال ، هذا العقد ممكن يدخلك السجن واحنا ماودنا كسبناك فتره طويل وكان بيننا ودّ
اخذ نفس الرجال:والله هذا اللي عندي تبي محاكم انا جاهز خسرت فلوسي كلها ماعندي شي اخسره
وقف بهاج وهجم عليه يوقفه من ياقته:تستهبل انت ؟
وقف ابراهيم ووقفوا الموظفين وحاولوا يبعدون بهاج وكمل بهاج يسحبه:بتحط الريال على الريال وانت مانت شايف تفهم ؟ والله والله لابكي امك عليك تفهم
سحبه ابراهيم:بهاج
ناظره بحده بهاج وسحبه بقوه ابراهيم للخارج واخذ نفس بهاج من دخل مكتبه ورمى شماغه وفتح زراره وتقدم ابراهيم:وش جاك انت ؟ تحسب ان تفاهمنا معه بالكلام بنتفاهم معه بالضرب ؟ هذا الحل ؟
لف بهاج عليه بغضب:يقولك بكل بجاحه ماني دافع وش تنتظر منه ابراهيم يرحم لي والديك
ابراهيم:نجرّه بالمحاكم عندنا محامي قانوني ياخذ حقنا وش لك انت ؟ هذا شغل والفراغ اللي جانا من افلاسه نسدّه ، ما تعبنا على هذي الشركه بيوم بدون تخطيط
بهاج مارد ولف كرسيه وجلس عليه وتقدم ابراهيم:بهاج ان كانك ما انت طيب ارجع بيتك
بهاج؛مافيني شي
تقدم ابراهيم:ما اتكلم عن اليوم اتكلم طول هالفتره وكيف غارق بالشغل هذي مو اول مره تتهاوش بالشركه ، ارجع بيتك بهاج لين تستجمع نفسك
رفع راسه بهاج له وكمل ابراهيم:ارجع
هز راسه بتكرار بهاج ووقف اخذ مفتاحه وشماغه وخرج بسرعه من مكتبه
نزل وهو عاقد حجاجه بغضب وركب سيارته وقفل الباب واخذ نفس صوت الغضب اعلى منه ماهو قادر يتحمل النيران لوحده وده يولع بكل الدنيز عشان يرتاح عشان تطفى نيرانه
شد على دركسون سيارته وناظر سيارته بعيونه هذي سيارته اللي حلم فيها طول حياته وتعب عشان يجيبها وجابها لكن ما كان وده يعيش معها هالايام لوحده
حرك سيارته وعض شفته وهو يفكر هم تركوا البيت راح للبيت ولا لقاهم ولا لقي سلطان
ولا يقدر يتصل على اي احد فيهم لانه لأول مره بدّا نفسه وامه على الجميع
خسر كل شي ولا وده يخسر نفسه لف لجواله اللي يدق ورد عليه:حط الاوراق على مكتبي اشوفها بكره ، طيب اذا عاجل ارسلها ايميل اشيك عليها اذا وصلت البيت ، كلم ابراهيم انها عندي انا بحلها
قفل جواله جواله الجديد برقمه الجديد بجهات اتصاله الجديده ووقف عند بيت امه ونزل فتح الباب ودخل ورمى مفتاحه وجواله واخذ نفس وتقدم يفتح ستاير الصاله من ضيقته وطلعت حليمه وعقدت حاجبينها:بهاج ! وش جابك بدري ؟
التفت عليها يناظرها ورجع صد وتقدمت له:خلصت بدري
هز راسه ووقف بإعتدال:بكمله هنا
حليمه:كان قلت لي عشان استعجل بالغداء
بهاج مسك كتوفها:لا تستعجلين ماني جيعان
مشى ياخذ اغراضه ولفت له حليمه تناظره يدخل غرفته اخذ نفس وقفل الباب وغمض عيونه
جلس وهو يستجمع نفسه وتقدم يفتح لابتوبه وجلس على كرسيه يناظر شغله قدامه
اندفن لمده طويله بين شغله بين اتصالاته وبين اوراقه هو شال نص شغل ابراهيم واكثر بسبب فراغه ماوده يهرب لشي من عقله لكن بين وهله ووهله هو يغرق بذكريات ثانيه
رجع ظهره للخلف يناظر الفراغ كم مرّ يوم وهو غايب عن سلطان وفهد ، كيف قدر بعد ما قضى عمره كله معهم قدر يفارقهم قدر يهجر طريقهم ، هو يوم ولد وكبر بمزرعه معهم كان متوقع ان بيوم بتنفصل طرقهم عن بعض ؟
هو ينسى كل ايامه بس ما ينساهم ، ما ينسى كل يوم عاشه معهم
ظل يناظر جواله الجديد اللي مليان بأرقام ناس ما يعرفهم ما يودّهم ووقف يمشي لشباكه ورفع راسه يناظر البيوت قدام عينه واخذ نفس رفع انظاره من انفتحت البلكونه اللي قدامه وخرجت منها خدامه تمسح ابوابها وعقد حاجبينه يناظر البلكونه
-
:استقبلك من البلكونه ؟ واودعك منها كمان
ابتسم لها:اذا بتسهريني كل يوم هنا ؟ ما بيمديني اكمل دراستي من الحين اقولك
ضحكت تحاوط عنقه وتبعد شعرها عن وجهها
:بنسهر كل يوم هنا ماراح تقولي لا حتى لو وراك شغلك ودراستك وكل دنيتك بتوقف كل شي عشان ليله نجلس فيها ببلكوتنا سوا
حط اصبعه على خشمه:على خشمي ام سعود
ضحكت له تحط براسها على صدره
ولف من انفتح الباب وناظر امه ورجع يناظر البلكونه اللي قدام عيونه
وهمست حليمه:تجي تاكل ؟
هز راسه وهو يناظر البلكونه وتقدمت له ومسكت ذراعه وابتسمت تمسح على ظهره وتمشي معه للخارج:سويت لك حنيذ اللي تحبه
لف يناظر امه اللي مبتسمه وناظر السفره وهز راسه:حنيذ !
حليمه جلست:تعال يا أمي تعال اجلس وقول بسم الله
شد على يدينه اللي متمسكه بالكرسي وهو يناظر الاكل ولف لها:انتي منعتيني اكلم اي احد وخليتيني اهجر كل درب يوديني لهم بس ماقدرتي على شي واحد
لفت تناظره وكمل بهاج يحط اصبعه على عقله:ماقدرتي تطلعينهم من هنا ، لا هي ولا سلطان ولا فهد ولا حتى خواتها
تنهدت حليمه وصدت:بهاج تكلمنا كثير
بهاج:تكلمنا كثير لكن لا تحاولين تخلين كل شي يمرّ عادي ! انا مكوي
ضرب صدره بهدوء:هنا انحرق كل شي ماعاد به الا رماد ، لا تعيشيني ولا كأن شي صار
حليمه:صار وادري ان اللي صار كثير وماهو لك بس لي انا بعد وهذاني قدامك اتعايش واتخطى وابي اكسب حياتي وحياتك
لفت تناظره:وانت بتسوي نفس الشي بتكمل دراستك وشغلك اللي بديته وتتعايش وبتشوف ان العمر كله مشى وانت مو حاس
بهاج:لا والله مو هذا اللي بسويه ولا بهجر سلطان وفهد لكن ابي الامور تهدأ وبكلمهم وارجع كل شي نفس ماكان وباقي بحط راسي براس الشيبه
تنهدت حليمه بتعب:بهاج !
بهاج:انا ولد سعود وماني تارك أرض ابوي وحلاله اللي تركه لي باخذ حقه بدق خشوم
حليمه:انت اللي بتخسر نفس ماخسرنا كلنا الحين
بهاج:اخسر ان كان الموضوع يخصني لكن الموضوع ابوي وحق ابوي وباخذه منه
تنهدت حليمه بتعب وجلس على كرسيه ومدت له كاسة اللبن:سمّ بالله
ناظر امه ثواني واخذ الكاسه من يدها وبدت تاكل بهدوء
'
ضامه رجولها وساهيه ولفت لنورا اللي تقدمت وهي تاكل بسكوت بيدها ولابسه عبايتها وناظرتها:أنهار
لفت لها بهدوء ونطقت نورا:بخلي سيارتي عندك وبروح مع وحده من البنات بس تنتبهين لنفسك اوكيه ؟
هزت راسها أنهار وكملت نورا:كان خليتيني اجي معاك طيب ونطلع سوا
أنهار:مابروح مكان ، بروح امشي على البحر بس
نورا ناظرتها:ما بتخوفيني عليك صح ؟
ابتسمت بهدوء أنهار وابتسمت لها نورا وتقدمت تحضنها واخذت نفس نورا من تجمعت الغصه بحلقها وابتعدت تبتسم لأنهار ومشت تخرج من البيت
تمسكت بباب الباب تحس انها قاعده تحبس شي كبير داخلها قاعد يعورها طول هذي الفتره تقوّت عشان أنهار لكن ما نست نفسها
ما نست انها ركضت ورا باب يوصلها لريوف لكن مالقت ولا شباك ، وما نست انها مالقت لسلطان رساله ولا جواب لمده طويله
وما نست انها انتظرته وانتظرت الدنيا تتحسن لكن كل مالها تتعب اكثر توظفت عشان يكملون حياتها لكنها تحس بإنها ترجع لورا اكثر من انها تتقدم
رفعت راسها تناظر السماء الزرقاء اللي مدى بصرها واخذت نفسها الطويل ومشت
لفت أنهار تناظر جوالها وفتحته تقرأ الرساله : أنهار لديك موعد الساعه ٩ صباحاً
وقفت وهي تمشي حافية القدم تتجاهل برودة الارض ودخلت الحمام وغسلت وجهها وناظرت وجهها وهمست:ماراح اشيل شي اكبر من همومي ماراح اشيل شي اكثر ، تكفى يارب
اخذت نفس بربكه وخرجت تلبس عبايتها برجفه واخذت مفتاح سيارة نورا وطلعت
ركبت السياره واخذت نفس وهي تسوق كلها أمل ، كلها رجاء كانت مو قادره تخفف من رجفتها وتحاول تقوي نفسها لين وصلت ووقفت بالمواقف
لفت لجوالها واخذته تناظره فارغ ودورت رقمه وهي تتصل عليه من جديد تتصل ولا تمل الاتصال لكن كعادته كان مغلق
غمضت عيونها واخذت نفس تستجمع نفسها
ونزلت وبلعت ريقها تمشي ودخلت ناظرت الناس بالمكان وتقدمت وهي تسمي بالله:مرحبا عندي موعد بإسم أنهار عمر
هزت راسها:صحيح تفضلي نهاية الممر على اليمين
هزت راسها أنهار ومشت وهي ضامه يدينها من شدة البرد ومن شدة رجفتها وتقدمت للمكان ناظرت الغرفه اللي قدامها وقرت اللوحه اللي قدامها ونزلت دموعها بخوف
: عيادة النساء والولاده
جلست على الكرسي وهي ترجف بشده وعضت شفتها تبكي وتقدمت لها ممرضه:انتي كويسه ؟
ماردت وهي تبكي بدون صوت وصبت لها مويه وتقدمت:اشربي مويه
هزت راسها بالنفي ووقفت:عندي موعد هنا
الممرضه:بردانه ؟
كانت ترجف ووجهها مصفّر ونطقت الممرضه:طيب تعالي ادخلي
دخلت الغرفه وناظرت الدكتوره وتقدمت الممرضه تجلسها وجلست أنهار ورفعت راسها:شكراً
خرجت الممرضه وقفلت الباب وناظرتها الدكتوره
:أنهار !
لفت أنهار وهزت راسها وهي تفرك يدينها ونطقت الدكتوره:تعبانه ؟
هزت راسها بالنفي وناظرتها الدكتوره:طيب اسمعك
بلعت ريقها أنهار وناظرت الدكتوره:انا متأخره دورتي الشهريه
الدكتوره؛متزوجه ؟
سكتت أنهار تناظرها ورفعت نظرها الدكتوره وهزت راسها بالنفي أنهار
الدكتوره؛اول مره تنقطع يا أنهار !
أنهار هزت راسها وكملت الدكتوره:طيب بناخذ منك تحاليل وبكشف عليك تفضلي على السرير
وقفت أنهار ومشت للسرير وانسدحت وهي تناظر السقف ونزلت دموعها بخوف وتقدمت لها الدكتوره وهمست أنهار:كنت متزوجه
تقدمت الدكتوره:خايفه انك حامل ؟
أنهار لفت لها وبكت بخوف وتكلمت بهدوء الدكتوره:مهما كان وضعك ولو كنتي فعلاً حامل هذا خيره من ربي لا تخافين
أنهار هزت راسها بالنفي:لا ما ابغى ما ابغى
الدكتوره:طيب خلينا نطمن على صحتك ارتاحي
كشفت عليها وسحبوا منها دم وجلست وهي ماسكه ذراعها ونطقت الدكتوره:ساعه وتطلع النتيجه بعدها تعالي لي
خرجت من الغرفه بدون تتكلم ومشت بالمستشفى بتعب وطلعت جوالها من شنطتها اللي يدق وناظرت رقم نورا وردت:الو
نورا:اشبك ؟
تنحنت من صوتها المبحوح:كويسه بس بردانه
نورا:رجعتي البيت ؟
أنهار:لا
نورا:متأكده انك بخير ؟ أنهار اجيك لو تعبانه
أنهار:لا لا كويسه لا تخافين شوي وارجع البيت باخذ لي قهوه
نورا:اوكيه تمام انتبهي لنفسك وطمنيني لو رجعتي
أنهار؛تمام
قفلت جوالها وتكت على الجدار بظهرها وظلت علو حالها تناظر الفراغ كل اللي بعقلها انها تنفي موضوع حملها ماودها تغرق اكثر ماودها تتدمر اكثر هي ماتعرف شي غير انها النهايه مع بهاج واختار طريق غير طريقها
-
وقف يناظر البيت من سيارته هو ما تجرأ يدخل البيت او يبيعه او يأجره كل اللي يسويه انه يجي يشوفه من برا ويتركه حرك لبيت أمه ونزل من السياره ودخل البيت
لفت عليه حليمه من دخل:هاه أمي بهاج جبت الاغراض ؟
مدّ الكيس على الطاوله واخذته تفتحه:ماقصرت ياحبيبي ، جيعان تبي تاكل ؟
بهاج تنهد بتعب:لا بنام
حليمه مسحت على كتفه ومشى ودخل غرفته فتح ازارير ثوبه وانسدح على ظهره بتعب وناظر السقف
ظل يهوجس بأفكاره بظنونه بخيالاته وكأن الكون كله متوقف عند ذاكرته اللي تخون كل جوارحه وتشتغل هي لوحدها
جلس بإعتدال وناظر الساعه وخرج من غرفته مشى لغرفة أمه ودق الباب لكن ماردت سمع صوتها بالمطبخ وعرف انها فيه
مشى بيروح لها لكنه توقف ثواني ورجع لف للغرفه دخل بهدوء وناظرها وتقدم لأدراجها
فتش فيها على جواله يبي يكلمها ويتطمن عليها وعلى سلطان وفهد مو قادر يصبر عنهم أكثر هو قضى شهر بعيد عنهم لكن ماتعايش ماصبر
لقي الجوال وناظره بعيونه وانقبض قلبه وجلس وهو يشغله كان كفه يرجف من توتره وارتباكه
وانتظر لين اشتغل وناظره من انفتح وصلته مكالمات كثيره ورسايل ولمحها من بين المكالمات مكالماتها له كانت تتصل بتكرار وبمدة زمنيه بسيطه بين مكالمه ومكالمه واخت مكالمه قبل نصف ساعه
عقد حاجبينه بتعب لانها كانت تدوره وهو مايقدر حتى يرد عليها هارب من كل شي حتى من نفسه هارب خوفاً عليها لان اللي جاها من وصاله ماهو شوي وقربه لها بيأذيها قبل يأذيه
نزل يناظر يدور رقم سلطان لكن ماحصل الا مكالمه وحده وقديمه من تاريخ قديم
استغرب ودق مباشرة على اول شخص فكر يكلمه سلطان لكن جواله كان مغلق
اخذ نفس يشد على جبينه من صداعه ومن تعبه وصراع مشاعره اللي يعيشها الحين دخل الرسايل وناظر من بينها رساله رقم غريب لكن هذا الرقم هو اللي ارسل له صورة نياق أبوه متأكد
دخل الرساله يقرأ مضمونها : بهاج سلطان صار عليه حادث وحالته صعبه نقلوه للمستشفى بالرياض
جمد وجهه ووقف يرجع يقرأ الرساله كل خوفه من تاريخ الرساله من الفتره اللي مرت كل الظنون تجمعت بعقله ، وش صار عليه ووينه الحين
رجفت يدينه من خطر بباله فكره وحده فكرة انه مات ، لو مات وين يروح من ضميره وين يروح من قلبه
قفل الدرج واخذ الجوال معه وخرج من الغرفه طلع من البيت وركب سيارته وحرك
دق على الرقم وهو يناظر الطريق ومسرع
ناظرت رقمه وانصدمت تناظر اهلها بالغرفه ابوها جالس وامها تقرأ قرآن ووقفت تخرج من الغرفه وترد:بهاج !
بهاج:وين سلطان؟ وش صار عليه ؟
شموخ:وين كنت؟
عقد حاجبينه بهدوء:انتي شموخ ؟
شموخ:اي
بهاج:وين سلطان ؟ وش صار له ؟ ليه ما يرد علي؟
شموخ:سلطان منوم بالمستشفى بالرياض
بهاج بلع ريقه:للحين ؟
شموخ:اي على حاله ماتغير شي
بهاج:وش صار له ؟
شموخ:حادث طاحت سيارته من فوق الكوبري تكسرت ضلوعه وجمجمته ودخل بغيبوبه فاقد الاحساس ما يستجيب لشي لكنه على الاجهزه
مسك راسه بهاج وهو مصدوم ويسوق وهمس:جاي
قفل الجوال يناظر الطريق تجمع الخوف بصدره وشد على قبضة يده وهو يسوق
كيف طاوع أمه كيف طاوع نفسه كيف طاوع راحته وهجرهم ، كيف قدر ينام شهر كامل وسلطان بين الحياه والموت !
مايدري كيف وصل للمستشفى لكنه دخل يدور على مكانه ووقفت من شافته وتقدم لها:وينه ؟
شموخ ناظرته متغير حاله وشكله وسكتت تناظره وتقدم للغرفه ودخل
وقف محله وهو يشوف سلطان على السرير ولفت منيره تناظره ووقف زيد من شافه:بهاج !
تقدم بهاج لسلطان يناظره بصدمه يتأمل وضعه وحاله ولف لزيد:كيف وضعه ؟ ليه ماطاب للحين ؟
زيد:وين كنت ؟
بهاج:كيف وضع سلطان ؟ لا تسألون عن حالي
زيد:دقينا عليك نبي نبلغك لكنك مارديت
بهاج رفع صوته:اسأل انا
ناظر زيد عصبيته وخوفه ورجفة يدينه ولارد وعض شفته بهاج وخرج من الغرفه سأل عن الطبيب المسؤول وسأل عن حالة سلطان
'
حطت المفتاح وخرجت نورا:رجعتي ؟ ليش مارديتي علي ؟
جلست بتعب أنهار:ما انتبهت
جلست نورا على ذراع الكنبه:وبكيتي اكيد صح ؟
أنهار شالت طرحته عن رقبتها:مرّ يوم وما بكيت اصلاً ؟
نورا سكتت وضمت رجلينها أنهار تجلس وبلعت ريقها نورا:ما ادري كيف يتحسن هذا الوضع بس مو مرتاحه
ماردت أنهار وكملت نورا:وحشتني ريوف مره
بللت شفايفها أنهار ونزلت دموعها بدون صوت وبدون تأثر ومسحتها
نورا:يارب بس ابغى ريوف ماعاد ابغى احد بس الا اختي
بلعت ريقها أنهار ووقفت تاخذ شنطتها وناظرتها نورا:لا تنامين وتخليني
أنهار:ما بنام
مشت للغرفه ودخلت وجلست على السرير وهي ماسكه شنطتها وتناظر الفراغ
فتحت شنطتها وهي تمسح وجهها وطلعت الورقه من الشنطه تقراها مره ثانيه
ناظرت الورقه وغمضت عيونها ترفع راسها للسقف لفت لجوالها واخذته وهي تدور رقمه ومشت لشباكها ودقت عليه
عقدت حاجبينها لانه كان يدق كان يوصل اتصالها ماهو مغلق ارتبكت توقف بإعتدال
خرج من المكتب وطلع جواله اللي يدق وناظر اسمها رفع راسه لغرفة سلطان ورجع يناظر اسمها
هي بعد كل هذي الأيام لا زالت تدق عليه
تعب من شدة تفكيره وجلس ومسك راسه يغمض عيونه رجفت كفوفه وده يرد لكنه خايف لكنه متردد ورفع عيونه من وقف الاتصال وتنهد ووقف يرجعه بجيبه ودخل الغرفه وناظرهم
لف له زيد:هاه وش لقيته حصان ؟
مارد بهاج وتقدم يناظر سلطان وكمل زيد:خليتوه لوحده شهر كامل محد زاره غيرنا
لف بهاج عليه:وقت تعاتبني ؟ اخر اشخاص يعاتبوني انتم ، ان جيت هنا جيت عشان سلطان وان كان واحد منكم بمحله ما جيت
غطت فمها منيره من كلامه وجمد وجه زيد وهز راسه بهاج ولف لسلطان يناظره
نزلت أنهار انظارها لجوالها مارد عليها جلست وهي تناظر الجوال كيف يهجرها شهر كامل بدون ما يتصل بدون ما يتطمن بدون ما يسأل عن مكانها حالها كيف قدر شهر كامل يغيب ما يسأل عليها مستحيل تكون هيّنه عنده لدرجة ينساها
مسكت راسها بتعب وغمضت عيونها:اخ
نطقتها بعد ما حست ان جسمها كله يعورها كل مكان بجسمها متورم ومجروح
'
جلست جنبه ومدت له صحنه واعتدل ياخذه من يدها وناظرت التلفزيون ورفعت الصوت ولف لها
:قلت لك جيبي معاك شطه
ريوف:عندك رجلين ويديين كويس سويت لك اكل
تأفف فهد وجلس وهو ياكل ويناظر معها
ولف لها وهو ياكل:جربت ادق على بهاج اليوم من جوال صاحبي مارد علي ولا سلطان يرد جوالاتهم مقفله
لفت عليه ريوف وعقدت حجاجها:غريبه غيروا جوالاتهم يعني !
فهد ناظرها ورفع كتفه:يمكن
سكتت تناظره وكمل وهو ياكل:ومالقيت احد داق على رقم جوالي لا بهاج ولا سلطان
ريوف:ماتدري عن وضعهم يمكن اضطروا
فهد:نفس ما أنا اضطريت
ريوف حطت أكلها قدامها وتنهدت وكمل فهد
:خلانا نفكر بأنانيه ونسوي اشياء ماودنا بها ، والله اشتقت لهم الله حسيه فرقنا عن بعضنا
لفت تناظره:حتى انا وحشوني خواتي ابغى اعرف فينهم واش صار عليهم ، فهد خلني اكلمهم اجرب
فهد:واذا طلعوا بالمزرعه وجاهم خبر عنا !
ريوف:حتى لو بالمزرعه مستحيل يكون الوضع نفس اول اكيد الحين هدأت الأمور
فهد تنهد وحط صحنه ولف يناظرها تنتظر منه رد وهز راسه:جربي الحين
ابتسمت واخذت جوالها الثاني تفتحه وحطت اصبعها بين اسنانها بتوتر وهي تناظره وناظرها فهد
لفت عليه:نورا والا أنهار ؟
فهد رفع كتفه ولفت ريوف تناظر جوالها واتصلت على نورا تنتظر ردها
حطت جوالها على اذنها وبلعت ريقها تنتظر رد
لفت نورا لجوالها اللي يدق ووقفت محلها ولفت لها أنهار:مين ؟
نورا:ريوف
تقدمت أنهار:ردي طيب ردي
ردت نورا:ريوف !
غطت وجهها ريوف من سمعت صوتها وصد فهد ياخذ نفس وعادت كلامها نورا:ريوف !
ريوف:وحشتيني
نورا:وينك انتي ؟ ليش ماتردين ؟ وين رحتي ؟
ريوف:بالرياض
نورا:ليش ماتردين علينا ؟
ريوف:ماقدرت خفت جاتنا اخت فهد هذاك اليوم وقالت يدورون عليكم وبيفصلوني من جامعتي وان بهاج طلق أنهار وهربنا
نورا جلست بتعب وهي ماسكه ركبتها وجلست جنبها أنهار
نورا:اش صار عليك طيب؟
ريوف:نقلنا شقه جديده وفهد غير دوامه وانا باقي ادرس ، فهد ما يكلم اهله ولا بهاج وسلطان
نورا سكتت ثواني:وين بهاج وسلطان ؟
ناظرتها أنهار وعقدت حاجبينها ولفت ريوف لفهد وكملت:ما ادري جوالاتهم مقفله
نورا هزت راسها:ما يعرف وينهم ؟
ريوف:ما نتواصل مع احد احنا
نورا سكتت تنزل راسها وسألت ريوف:انتوا فين ؟ كيف ابويه ؟
نورا رفعت راسها للبحر اللي قدامها وضحكت بسخريه:في جِده
ريوف جمد وجهها:جِده ؟ انتي ومين !
ناظرها فهد وعقد حواجبه
نورا لفت لأنهار اللي جنبها:أنا وأنهار بس بدون أحد
ريوف:بهاج وسلطان ماكانوا معاكم ؟ كنتوا في المزرعه انتوا ؟
نورا اخذت نفس:قلت لك محد معانا جينا قبل شهر
ريوف سكتت ورجعت ظهرها لورا بصدمه
وكملت نورا:انتي ماشيه في دراستك ؟
ريوف:كانت اثقل ايام حياتي بدونكم
نزل راسه فهد يسمعها وكملت ريوف:استصعبت وربي وكان ودي اكلمكم نورا بس انحديت ، خفت يوقفوني
نورا:لا كويس اللي سويتيه فهد معاك صح ؟
ريوف ناظرته وابتسمت:ماخلاني
لف يناظرها وتنهدت ريوف بتعب:كيف أنهار ؟
نورا لفت لأنهار اللي جنبها ورجعت تناظر البحر:كويسين نمشي عند البحر
ابتسمت ريوف بهدوء:نفس مكاننا ؟
نورا هزت راسها:نفس ماكنا نجلس
ريوف اخذت نفس:وبتظلون هناك ؟
نورا:مالنا مكان غيره
ريوف سكتت تناظر فهد:برجع اكلمكم دايم كويس انكم لحالكم كويس خرجتوا من المزرعه
نورا:حمدلله
ريوف:ماشفتوا ابويه قبل تروحون ؟
نورا:انا اللي شفته كان واحد ثاني ما ادري اذا هذا اللي تقصدينه
سكتت ريوف واخذت نفس نورا:انتي اهتمي بدراستك وكملي وتخرجي وارجعي لنا
ريوف:ان شاء الله
نورا:انتبهي على نفسك
ريوف:ان شاء الله وانتوا كمان
قفلت ريوف وناظرها فهد:راحوا جِده ؟
ريوف ناظرته:هي وأنهار بس لهم شهر هناك وما يدرون عن سلطان وبهاج
عقد حاجبينه فهد:كيف خلوهم ؟
ريوف:مدري حتى انا استغربت ووين بهاج وسلطان اصلاً ؟
فهد سكت وكملت ريوف:بس احس نورا تعبانه متغيره مررره واكيد أنهار تعبانه أكثر
فهد تنهد:الله المستعان
ريوف:فهد تخلينا نروح اذا خلصت فاينلز صح ؟
فهد:انا ظنيت انهم عند الشيبه بس زين دامهم هجوا
ريوف سكتت ولف عليها فهد:اذا خواتك راحوا جِده اجل سلطان وبهاج وين ؟
ريوف:بتجرب تكلم اهلك ؟
فهد:لا
ريوف:كلمهم فهد بس مو لازم تعلمهم فينك
فهد:نفتح علينا باب جديد ؟
ريوف:لو مكانك بحاول ولا اجلس شهرين زياده ما ادري عن بهاج وسلطان
فهد مارد عليها وناظرته ريوف ولف يضيع الموضوع:غيري فلمك طفشت منه
لفت للتلفزيون تاخذ الريموت:في فيلم حلو نفس شخصيتك بس هو كان فقير وصار غني ويعرف يلبس
لفت له:انت كنت بدوي وغيرتك انا وصرت تلبس ملابس حلوه ياربي لك الحمد وصرت تعرف تحلق
ناظرها ورفع حاجبه:سوي خير وانكتمي كل شوي تذليني الله والتغيير عاد
رفعت كفها لشعره:هذا كان يشتكي كويس حلقته
بعد كفها وضحكت وناظرها:يبي لي انا بعد اغيرك انتي والوان السبوره اللي تلبسينها كل يوم
ريوف:عباياتي لا تدخل فيها
فهد:اي تدخلي فيني مابقي شي ما غيرتيه حتى خشمي دخلتي فيه وانا ما اتدخل
ضحكت ريوف:بس انت سمعت كلامي انا ما غصبتك
فهد:سمعت كلامك لان مافي الا انا وانتي لو ما سويت اللي تقولينه بتطلعين لي انيابك نفس اول ليله زواج
ضحكت ترجع ظهرها لورا وناظرها تضحك:اي اضحكي لين الحين آثار جنونك على يديني
لفت له وهي تضحك وناظرها تضحك:والحين نشبت فيك
ريوف ضربت ذراعه:مو نشبه صح !
فهد:نشبه ونصين بعد حتى سيارتي صارت لك كل ما اركب بعدك الدركسون يوصل بطني
ضحكت لانه يقلد سواقتها وكيف تقدم المقعده وجلس يقلدها وهي تضحك والتفت لها وضحك
كحت من الضحك ولفت له:أحُبَك ياخي
لف يناظرها تضحك وضحك يصد وعضت شفتها وهي تضحك ولفت للتلفزيون
كانت خارجه منها عفويه ولكنها ضحكت بتوتر عشان لا يفهمها عشان ما يستوعب وفعلاً ضحك معها وصد عنها وبلعت ريقها تناظر التلفزيون
ظل يناظر التلفزيون لين انتهى الفلم ورمى عليها المخده واخذ صحنه:نامي بكره ماني مصحيك
ابتسمت وهزت راسها ومشى يحط صحنه بالغساله ودخل غرفته قفل الباب وانسدح ورفع راسه للسقف هو متأكد انه سمعها ومتأكد انها تقصدها لكنها ضحكت تدارك الموضوع وضحك يصك الموضوع عشان لا يوقف عنده
كانت مزحه مقصوده وبين ضحك هستيري بينهم لكن لاهو اللي قدر ينام بعدها ولاهي اللي قدرت تنام
لمت الاغراض وقفلت الانوار ومشت للغرفه انسدحت بتعب تفكر في خواتها وكيف وضعهم لحالهم بعيد عنها وكيف وضعها هي لحالها مع فهد هي ماتوقعت بيوم بتعيش فتره طويله بعيده عن خواتها ومع فهد اللي تمنعت ورفضت وخافت قبل ترتبط فيه لكنه الان هو الوحيد اللي يساندها بدراستها ترك اهله ترك جماعته ومكان عيشته وعاش حياه ثانيه معها عشانها هي ، قدم تضحيات لها مستحيل تنكرها او تنساها
'
اخذت من يدها كوب القهوه وجلست جنبها نورا اللي تشرب من قهوتها وتناظر البحر
تنهدت نورا بتعب ونزلت انظارها لكوبها:ريوف مرتاحه من صوتها
هزت راسها أنهار:كويس انها تدرس وفهد معاها لو رجعت معانا كان انهد حيلها
لفت لها أنهار وضحكت بخفوت:من يوم جينا ولا وحده قدرت تفضفض كل اللي نسويه نبكي سوا وبس
نورا ابتسمت:ماعندي كلام أطمنك فيه اقل شي اسويه اني ابكي معاك
لفت عليها أنهار تناظرها وابتسمت نورا تشرب من قهوتها
أنهار:يعني همومنا قد بعض قصدك ؟
نورا:احس اللي جاك جاني واللي عشتيه عشته وقاعدين نعيش نفس الشي مع بعض
أنهار هزت راسها وحاوطت ذراع نورا وسندت راسها على كتفها تناظر البحر
كانت تشرب قهوتها نورا وساكنين قدام البحر مر على سكوتهم وقت طويل انتهت قهوة نورا ولا زالت أنهار على حالها وقهوتها بين يدها
نزلت راسها نورا:نمتي ؟
هزت راسها بالنفي ونطقت نورا:بردت قهوتك
اعتدلت أنهار تبعد عنها وناظرت كوبها ولفت لنورا
:لو بقولك شي قاعده اعيشه لوحدي مستحيل تعيشينه وتفهمينه ويزود حزنك وهمّك اكثر بتسمعيني ؟
نورا ابتسمت:متعادلين أنهار انتي كنتي تنتظرني الأمل من أبويه وانا انتظرت ، انتي فقدتي شخص تحبينه وانا فقدت ، انتي انتركتي وانهجرتي من الشخص اللي كان يقول مستحيل يخليك وانا نفس الشي
رفعت كتفها نورا:كل شي يعورك يعورني
زمت شفايفها أنهار تناظرها وكملت نورا:بس تكلمي اذا بيريحك اسمعك
أنهار لفت تناظر البحر ثواني ولفت لنورا بتعب
:كنت شايله همومي وبس الحين شايله روح غير روحي
سكتت نورا تناظرها وتغير حال أنهار ورجفت يدينها وتجمعت بعيونها دموعها وهمست:انا حامل
جمد وجه نورا وبكت أنهار تغطي عيونها بكفها وظلت تناظرها بصدمه نورا وهمست:ايش !
ماردت أنهار وهي تبكي وبلعت ريقها نورا ووقفت واخذت نفس بسرعه من صدمتها مسكت جبينها ولفت لأنهار تناظرها بصدمه وتقدمت:متى عرفتي ؟ متى متى أنهار جاوبيني
رفعت راسها أنهار:اليوم
مسكت راسها نورا وصدت:يارب رحمتك
غمضت عيونها بتعب أنهار ولفت لها نورا:كيف عرفتي ؟
أنهار:سويت تحليل نورا سويت تحليل من فتره ما جاتني الدوره الشهريه ونسيت الموضوع مع جيتنا لجده وشكيت يوم طول الموضوع
نورا:تكفين أنهار لا لا تكفين لا
ناظرتها أنهار:على أساس كان ودي بهذا الوقت ؟ تمنيته ايوا وحلمت في هذا الخبر بس مو الحين مو وانا لحالي
رفعت سبابتها بحرقه تكمل:مو وانا مطلقه لحالي ما ادري وين أرض أبوه
نورا ناظرتها وبكت أنهار:كل شي تجمع علي كل شي علي مو قادره اطيب واتخطى شي
تقدمت نورا لها ومسحت على ذراعها:أنهار !
ناظرتها أنهار وهي تبكي:عمره ٦ أسابيع نورا ٦ أسابيع
بكت وتقدمت تحضنها بسرعه نورا بصدمه وهي تسمعها تبكي
عضت شفتها نورا وعقدت حاجبينها بضياع بتعب وشدت عليها أنهار وهي تبكي ، كانت صدمتها كبيره يوم عرفت الخبر وعرفت عمره ببطنها وعرفت انها كانت حامل قبل يجون لجِده قبل تترك يده يدها كان بإمكانها تعرف الخبر وهي معاه وتعيشه بأحلى أيامها لكن عرفته لوحدها ، يوم هجرت يدينه يدها يوم قفل كل بيبانه عنها وضاعت عناوينه