انثنى غيم نجد لخد الحجاز النرجسيه

١٥

فتح عيونه والتفت يناظر الشمس اللي دخلت على المكان وتثاوب بتعب والتفت بتعب يحاول يقوم
وجلس على حيله واخذ كيس ادويته وناظر الكيس وهو يتثاوب واخذه ووقف مشى للمطبخ وصب لنفسه كاس مويه واخذ دواه وشرب المويه ومشى للحمام فصخ فانيلته ووقف قدام المرايه يغطي جرحه بالمرهم الموجود ويطهر جرحه بنفسه
غسل يدينه ووجهه ونشف يدينه ولبس ثوبه وخرج من الحمام متجه برا البيت اللي سكنه لحاله وتوسطت الوحده مكانه
خرج ووقف من شافهم جالسين عند الباب:علامكم ؟
فهد:نستناك ياطويل العمر
قفل الباب بهاج والتفت يساره ورجع ناظرهم:بالله علامكم ؟
سلطان:والله قلنا ناخذك نفطر سوا
بهاج:عشان ما اقابله يعني ؟ مردي بشوفه
سلطان:انت امش وكب ذي السواليف
مشى بهاج:وين ؟
فهد:قالطين عند النياق
بهاج مشى معهم للطرف الثاني من المزرعه وناظر قعدتهم والجمر وريحة القهوه اللي تفوح بالمكان وجلس
سلطان مشى للجمر وهو يتفقده والتفت فهد له:وش بيسوون ؟
لف له بهاج:منهم ؟
فهد اشر براسه للجهه الثانيه من المزرعه وصد بهاج وتنهد:مدري
سلطان شال الدله بيده وهو يناظرها:ماتعودوا ينقال لهم لا بيتعبوون
فهد:ماهي نهاية العالم عاد من زينه عقاله اكبر من راسه
ضحك بهاج والتفت سلطان من ضحك:لا انت شوف كيف يقلده وتفهم
لف بهاج من وقف فهد وحط شماغه على راسه وقلّد بندر وتعالت ضحكاتهم بالمكان والتفت بهاج لسلطان يناظره وهو يضحك ويضرب كفه بكف سلطان بضحك عالي
وجلس فهد وهو يضحك:والله اني صادق تقول اسعد عمر قلي اللي بطاش ماطاش
بهاج عض شفته:لا يسمعونك تراها تبيه وتبكي عليه
فهد:مامن عقل يا ابو سعود اجل مخليني انا ورايحين ورا ذا ؟
سلطان:بغيت اناديهم بس قلت اسألك
بهاج:تسألني ليه ؟
سلطان ابتسم:قالوا عنك كلام زوين والله قلت نستشيرك دامهم يعتبرونك اخوهم
بهاج:وش علي فيك تبي تناديهم الملحق هناك
سلطان:فهد روح بالله
فهد:فهد صبي عندك تتأمر عليه ؟
سلطان:فهد بكسر راسه والله
فهد:رايح لاني ناسي جوالي بالبيت والا والله تعقب
وقف ومشى رايح والتفت بهاج لسلطان:ما بيجون دام فهد رايح
سلطان ابتسم:وانت تبيهم يجون ؟
بهاج:ابتسامتك تستفزني تدري ؟
سلطان ابتسم وهز راسه وناظره بهاج:بتشتاق لسنونك ان طولتها
ضحك سلطان ووقف ورفع راسه بهاج ونطق سلطان:بجيبهم لك ابشر ياطويل العمر تك انت هنا انا بروح مع فهد
بهاج:شعلي فيك
مشى سلطان ورا فهد والتفت بهاج يصب له قهوه وتكى بظهره وهو يناظر النياق قدامه ورفع ذراعه خلف راسه
،
دق الباب فهد وهو ينتظر احد يفكه وفتحت الباب حليمه وناظرتهم وهمست:وين بهاج؟
سلطان:جايين يم البنات زيحي شوي ياعمه
حليمه:وين داخلين ؟ عمك يرجع ويلقاكم
طلت ريوف بكوبها ومن ناظرتهم وناظروها اشر فهد:تعالي بت
ريوف وقفت خلف حليمه:خير يالله صباح خير ؟
سلطان:ازهمي خواتك وامشوا معي
ريوف:على وين ؟
فهد:انتي ورا اسئلتك واجد ؟
ريوف تعدت حليمه ووقفت عند الباب:محنا ناقصينك شلويح اذلف
جات بتقفل الباب ودخل سلطان وحطت يدها على فمها حليمه ودخلوا بالصاله
تلفت سلطان:مامنك رجاء ، يانورا
ريوف:تو ماتش !
فهد:والله مدري وش ترطنين بس اسلمي
ريوف:سلطان اشبك ؟
سلطان:سلطان يبي تطلعون من البيت بدال كتمتكم ذي
ريوف:محد بيرضى يطلع كلنا مكتئبين لصالحكم ما نخرج
فهد:ياخي ادخلي ناديهم قبل يصيدنا عمي
ريوف:والله مو راضيين حتى محد افطر معايا
سلطان:شسمها هي ؟
ريوف:مين ؟
سلطان لف لفهد:شسمها ياورع ؟
فهد:منهي ؟
سلطان:اختك اختك الثانيه
ريوف:أنهار ؟
سلطان ابتسم:انهار اجل ، يا أنهار أنهار
ريوف مشت وفتحت باب الغرفه وطلت نورا:اشفيه؟
ريوف:العيال برا
أنهار وقفت ومشت وهي تلبس فوق بجامتها وتخرج لهم
سلطان:حيّ أنهار اقلطوا
أنهار ناظرت حليمه ورجعت ناظرتهم:اشبكم؟
فهد:انتم علامكم كأننا داخلين عليكم بسلاح
ريوف:اها يعني ما شفت كيف دقيتوا الباب ؟
سلطان:بهاج هناك يستناكم
أنهار:فين يستنانا ؟
سلطان:نادي اختك خل تطلع من جحرها وامشوا احنا برا
خرجوا ولفت حليمه للبنات ولفت أنهار لريوف ومشت داخل:نورا
نورا:سمعت وماراح اطلع خلوني مو ناقصه مجانين
أنهار:بتخرجي حياتي قومي
نورا:لا
ريوف:بنت نورا تراك بفستانك ماغيرتيه حتى خلاص قومي يابنتي
نورا:ما ابغى خلوني
،
ماسك فنجانه بيمينه وبيساره حاط ذراعه خلف راسه متكي على ظهره بالمركى ويناظر النياق وساهي كل ما يذكر انها ابتسمت له وقطعت المسافه بينهم وجلست جنبه يرتبك
هو ماغاب عن باله حالها امس جنبه وكيف انها بدون تخجل لمست كفه ونظراتها له بإعجاب من بعد مانطق جملته اللي خرجت بدون وعي منه
هو اصلاً ما يصير واعي جنبها هي تبعثر كلامه وحاله
نزل انظاره لفنجانه والتفت من سمع حسّهم ورفع حاجبينه من شافهم جميع جايينه سوا
سلطان:اقعدي ابكي بجحرك علامك يابنت ؟
ماردت نورا وهي متكتفه:يكفي جايبيني غصب لا تتكلمون معاي عن حاجه
رفعت انظارها أنهار لبهاج اللي جالس وجلسوا
فهد:صبوا للعروس
ريوف:اخ ياثقل الدم بس
التفتت لبهاج وسلطان:انا اقول خلوا النياق هذي وتاجروا بدم شليويح لانه نفط
ضحك فهد:تمونين
التفت بهاج لنورا اللي متكتفه وناظر ملامحها الشاحبه:فطرتي ؟
نورا هزت راسها بالإيجاب
وكمل بهاج بتساؤل:شفيك مصفره ؟
ريوف:مو حاطه كونسيلر عشان كذا
بهاج عقد حاجبينه:منهو ؟
ضحكت ريوف ودفتها نورا:نفس دم شليويح
عضت شفتها ريوف وهي تضحك ولفت لفهد:اهانوني
فهد:شبهوك في شيخ الرجال وشهي اهانه ؟
ريوف هزت راسها وهي تناظره:اها
سلطان:لا تقعدين تبكين هذي خيره ونصيب وابوك مرده بيزيين معكم
نورا:ما بكيت عشان احد بكيت لانه حتى ما راضاني وكلمني وعطاني اسبابه
رفع انظاره بهاج لها وهي جالسه ومنزله راسها وهاديه ونقل نظره لنورا
فهد:عاد كنت بقول لك لا تبكين على ذاك ما يستاهل وخفت تزعلين زين ما بكيت عشانه
نورا:ليش ما يستاهل ؟ جاني يخطبني مع اهله من اخر الحجاز
سلطان:اي ونعم بس والله ذوقك ماش
ضحك فهد وناظرتهم نورا ولف سلطان لفهد:بالله قوم ورهم
التفت بهاج لهم بحده:ولد !
فهد:ياخي نمزح
التفت لنورا:تزعلين لو قلدته؟
ريوف:بمووت امانه خليه يقلده
نورا:ريوف !
ضحكت ريوف:بليز احس يضحك
فهد:والله ما اردك
وقف وابتسم بضحكه بهاج وعض شفته من قام فهد يمثل لهم كيف مشية بندر وشكله بالشماغ
رفعت انظارها نورا بصدمه وهي تسمع ضحكاتهم وشكل فهد وابتسمت وهي تكبح ضحكتها:حرام !
ابتسمت أنهار ولفت لنورا اللي مانعه ضحكتها وضحكت
لفت عليها نورا:أنهار لا تضحكين !
التفت من نطقت بإسمها وناظر ضحكتها وابتسم
لف سلطان وحك شاربه وهو يناظر بهاج والتفت بهاج ومن لمحه يناظره رفع حاجبه:بكسرها لك
ضحك سلطان:بالله عطنا مسكين مسكين
بهاج:ياليل
فهد جلس:هو يقول غيرها اصلاً ؟
سلطان:بالله غنها خل يسمعون
بهاج ابتسم وهو يناظر سلطان اللي مصرّ على كلامه:صب قهوه واسكت
ريوف:بهاج يغني ؟
فهد:قصيد قصيد ماهي اغاني السرابيت اللي خبرك
ريوف:اش يعني يغني والا ما يغني ؟
سلطان دق رجل بهاج:سمعهم ياشيخ
بهاج اعتدل بقعدته:نورا وش ودها ؟
ابتسمت نورا من التفت لها وناظرته أنهار وابتسمت
نورا:بهاج ! مره كيوت انت
بهاج:تمدحيني ؟
فهد:مسبه مسبه يابهاج
نورا:لا والله بهاج انت مره لطيف
بهاج التفت لهم:لطيف اسمعوا
سلطان:اي على خير اقول قصد وفكنا
تقدمت أنهار؛وأنهار ماتسألها اش ودها ؟
التفت يناظرها ولانت ملامحه بإرتباك وبلع ريقه هو ماتوقع تتكلم وماتوقع يرتبك لو تكلمت
التفت بهاج وهو يخفي ابتسامته وهز راسه بهاج:وش ودك ؟
أنهار ابتسمت:تسمعنا
هو كيف يقولها انه ارتبك لدرجة ضيّع هو جرب يداعب نورا عشان تضحك وتنسى لكنها سدّت عليه طريق ضحكاته بسؤالها
والتفت ومن ناظر سلطان صاد عنه حك شاربه:تم
التفت سلطان وعدل جلسته:اسلم ، سمع أنهار ونورا
ناظره بهاج وبلل شفايفه من شافه يبتسم وتقدمت ريوف:خير وريوف كمان !
التفت سلطان لها:انتي اسمك ريوف ؟
هزت راسها ولف لفهد:وتناديك شليويح تخيل !
فهد:لو داري اسمك ريوف ماكنت زعلت على اسمي
ريوف:خير شفيه اسمي ؟
سلطان:وش اسامي الحضران ذي ؟
ضحكت نورا:وي ! عنصري
سلطان لف لبهاج:عطنا
اخذ نفس وشد على فنجانه وناظر سلطان وفهد وأنشد بصوته
:ياعاذلين الهوى ما يفيد الكلام مسكين مسكين من قد بلي بالغرام ، يامنية العاشقين احييني بإبتسام مسكين مسكين من قد بلي بالغرام ، في الحب جنه وفي البعد نار وهيام مسكين مسكين من قد بلي بالغرام
ابتسم من وقف وسمع اصواتهم جنبه
نورا:الله سو كرييتف بهاج
ابتسمت أنهار وهي تراقب خجله من كلامهم وضحكت:بهاج يخجل
التفت لها بصدمه:ابو سعود !
سلطان:والله يخجل صدقتي
ريوف:مين كاتب الكلمات ؟ مره حلوه
التفتت لأنهار:بارت الجنه والنار خيااال
ضحك سلطان والتفت لفهد من تعليقاتهم
وجاهم صوت من بين النياق:صح لسانك
اعتدل بجلوسه بهاج وناظر جده ماشي بعصاته لاتجاههم ومبتسم
ناظروه وهو جايهم وسكتوا ينتظرونه يتكلم
وقف عندهم على حوض النياق وناظر قعدتهم وابتسم:ونعم
ماردوا عليه وتكى بيدينه على العكاز:شاردين من خيّام اعمامكم عشان تقعدون مع بنات عمكم؟ ونعم
التفت سلطان لبهاج وصد عنه
وكمل رَده:وانتم ؟
ناظر البنات اللي يناظرونه بحده:تحسبونكم قاعدين على البحر الاحمر ؟ لموا نفسكم
ماتكلموا وهز راسه:قهوههم
ناظر بهاج اللي يناظره والفنجان بيده ورجع بخطواته يبتعد عنهم
التفتت نورا:ماكان ينقصني الا هذا العجوز الصراحه
سلطان همس:اششش
نورا:عارفه هذا يسمع اللي بالمزرعه كلهم
أنهار:مافهمت يعني شفيها لو جلسنا ؟ يعني يانجلس سوا عندهم ويرمون كلام علينا ياصرنا بالبحر الاحمر ؟
ريوف:هو ما يرتاح لو شافنا مبسوطين الحين بيروح يملي راس بابا
نورا لفت لها:باقي تنادينه بابا ؟
سكتت ريوف وصدت عنهم واخذ نفس بهاج هو متأكد ان رَده بيخرج بشي جديد من بعد جيّته لعندهم ، هو ما يترك ثقب يطلع منه راحه لو شوي
،
كان واقف مع سلطان ونظراته حاده ويسمع لكلام سلطان اللي يهمس له من قريب وشاده من ثوبه
عقدت حاجبينها تراقبهم من بعيد وتحاول تفهم حدة نظراته وتوترهم ولا استنتجت شي
اخذت نفس والتفت لفهد:بلحق البنات انا
فهد:اقعدي عادي
اخذت جوالها وابتسمت:لا ، باين عندكم موضوع بتركك تلحق عليهم
فهد:ماعندهم شي بهاج وسلطان دايم كذا
وقفت وابتسمت له والتفتت لهم تناظرهم والتفت بهاج تارك حواره مع سلطان من شافها وقفت رايحه
لف سلطان وابتعد عن بهاج ورجع لفهد يجلس عنده
مشت تاركتهم وهي تمشي بهدوء وتشيك على جوالها ورفعت انظارها بتفكير والتفتت وشافته يلحق خطواتها بهدوء ووقفت محلها تقدم لها:كملي
ناظرته من وقف جنبها:عبالي تبغاني
بهاج:راجع البيت
ناظرته ثواني وصدت وهي تمشي معاه:الاحد بيبدأ دوامك شكلك ناسي
بهاج اخذ نفس طويل:ناسي
أنهار:توقعت بس ماغفلت انا كنت بذكركك
بهاج ابتسم بهدوء ونزل راسه لخطواته
وهمست:فيك شي ؟
بهاج هز راسه بالنفي وكملت وهي تراقب صدوده:عشان امك ؟
بهاج التفت يناظرها وهو ساكت وبلعت ريقها من سكوته هي فهمت انه ما يبي يتكلم وهي قاعده تضغط عليه وهمست:اوكيه اسفه
مشت قبله لكنها وقفت وعقدت حاجبينها تناظر سيارة ابوها اللي وقفت والتفتت بهاج لنظراتها ووقف جنبها وعقد حاجبينه
ولانت ملامحها وهي تشوفه نازل ببوكيه ورد وكيس هديه كبيره وهمست:لنورا
عقد حاجبينه بهاج ومشى عمر وهو يناظرهم سوا عند باب الملحق
ترددت تسأله من وقف قدامهم وتفقدت بنظراتها الكرت وهي تحاول تقراه
لكن قطع الأمل اللي فيها من نطق لبهاج:نراضي امك
رفعت انظارها لعمر بصدمه وابتسم عمر:ما بتندم انها ما باعتني ، تطمن
ناظر أنهار ومشى ودخل الملحق وظلوا واقفين جنب بعض يناظرون الباب اللي انقفل
كانت تتوقع انه بيعتذر ويحس بغلطته زي دايم يقدّر ويهدي ويعطي الورد ويعتذر بس خابت آمالها هو كل اتجاهه على مكان ثاني من حياته
عقد حاجبينه وهو يراقب الباب هو ما يدري كان صادق انها لامه او لا لانه ما جرب الهدايا والورد وما جربت امه بالذات هالدلال هي فعلاً مرتاحه معاه وبهاج ما يدري !
التفت لأنهار اللي ساهيه محلها وهمس:ادخلي
بلعت ريقها من نطق وناظرته وهزت راسها ودخلت الملحق وقف قدام الباب يناظر الملحق وغيّر اتجاهه ومشى للبيت
،
عمر دخل عليها الغرفه وهي تطبق المفارش ولفت عليه واستغربت من شافت الورد والكيس ووقفت بإرتباك
ابتسم عمر وحط الكيس بالارض ومشى بالورد لها
:حليمه !
ارتبكت من نطق بإسمها ونزلت انظارها وزادت ابتسامة عمر:لا ترتبكين
حليمه ماردت عليه ومد الورد عمر:ياليت تقبلينه اعتذار
اخذت الورد وهي تناظره وكمل عمر:ماصار وقت بيننا عشان نتكلم سوا وحسيت ضايقتك امس لكن وقوفك معي قدام العيال خلاك تكبرين بعيني ، بيّن لي انك واعيه وفاهمه وحاطه زواجنا حقيقه ومصير ونصيب ماهو ضغط وإجبار
بلعت ريقها حليمه وتقم لها عمر:وزي ما عاملتيني زوجك قدام بناتي وولدك انا ودي نستمر سوا زوجين متفهمين نحل مشاكل عيالنا سوا نربيهم سوا تشورين علي واشور عليك ، وحتى تربين بناتي انتي بطريقتك بتفهمك بصبرك بعقليتك
رفعت انظارها له حليمه وابتسم عمر:وابي تتجولين ببيتك بحريّه تلبسين اللي ودك هالجلال تلبسينه لصلاتك بس
ماردت حليمه وتقدم عمر وهو يبعد عن شعرها الجلال وارتبكت وهي ترجع لورا
وناظر شعرها من نزل الجلال وابتسم لها:كذا أجمل
ماردت عليه وهي تشد على الورد بيدها وكمل عمر:لا تستحين مني
حليمه:ماتعودت !
عمر ناظر الورد:هذا شي قليل عليك
رفعت انظارها له وابتسم عمر لها هو فعلاً متقبلها من حيائها سكوتها واهتمامها بأكله وشربه وملابسه هي من أول ليله كانت له زوجه وفيّه ، وفعلاً هو ناوي يستقر معاها ويعتبرها زوجه له حسّ انها بتسانده بكثير اوقات من بعد وقوفها امس معاه
رفعت راسها وهمست:بهاج !
عمر اخذ نفس:بهاج بهاج
رفع حاجبينه:بهاج يكبر المشاكل بيني وبين بناتي مابعدته كرهاً فيه والا عشان احرمك منه وانتي فاهمه
حليمه:ترا شهامه ببهاج اللي يسويه ماهو تعالي على احد
عمر:ليته يوفرها افضل يبعدنا عن المشاكل
حليمه سكتت وكمل عمر:وبناتي لحالهم بينقدر على عنادهم
ابتسم لها:بتساعديني فيهم اكيد
هزت راسها وابتسمت له بحيا تخبيه على ملامحها
،
نورا اخذت عبايتها وهي تناظر البنات اللي ناموا واخذت جوالها وخرجت من الملحق مشت وهي تاخذ نفس طويل وتشد على يدينها بضيق التفتت تناظر بيت بهاج اللي مولعه لمباته ومشت له بتردد ودقت الباب بهدوء ورجعت لورا بتوتر
فتح بهاج وعقد حاجبينه:صاير شي ؟
نورا رفعت كتفها:متضايقه وشفت لمباتك وجيت ، بتنام ؟
بهاج هز راسه بالنفي:تعالي
مشت ودخلت وترك الباب بهاج ومشى وجلس قدامها
رفعت انظارها نورا وهمست بغصه:مارد علي
بهاج نزل انظاره بهدوء وكملت نورا:اخته تقول انه ماجاهم ولا شافوه بعد مارجعوا لينبع
رفع انظاره يناظر يدينها اللي ترجف وتفركها ببعض
نورا:بهاج ماقدرت اقول لخواتي حتى خايفه خايفه افكر وش بيصير خايفه تطلع هذي النهايه خلاص
بهاج اخذ نفس وكملت نورا وهي تحاول ماتبكي
:انتظره يقول بيحاول مره ثانيه وانتظر ابويه يعتذر ويحس بغلطه ويكلمهم ، انتظر اتخلص من المكان هذا وارجع لمكاني احس بالوحشه بهاج مو قادره
تنهد من شاف دموعها وهمس:طيب لا تبكين شوفيني اسمعك
نورا:مالقيت احد اتكلم معاه احسني مخنوقه
بهاج:تبين رايي ؟
هزت راسها واخذ نفس بهاج وتقدم لها وجلس قدامها:ادري صعب لكن ابدي تقبلي فكرة ان يمكن هذي النهايه ونصيب وانرفض ورديناه لانه خيره ، ولا تفكرين فيه يرجع ويحاول مره ثانيه والا لا ، فكري في نفسك انتي ماخسرتي شي انتي ماتزوجتيه حتى
نورا:بس بهاج هم رفضوه !
بهاج:ادري لكن كله تدبير ربي يمكن ربي مخليك تطولين مع خواتك لانهم يحتاجونك
سكتت نورا وكمل بهاج بهدوء:ترا خواتك يخفون عنك تراهم يشيلون همك وزعلانين عليك وزعلانين على ابوك لكنهم يحاولون عشانك
نورا رفعت اصابعها تمسح دموعها:حاسه فيهم
بهاج:عشانك يحاولون انتم مالكم الا بعض ونعمه انكم ثلاث خوات كل وحده تخيط جرح الثانيه
ناظرته بحزن من نطق بطريقه غير مباشره بوحدته واحتياجه لأحد يخيط جرحه
ونزل انظاره:اختك كانت عندي امس وبكت تشتكي من نفس شكواك
نورا:أنهار ؟
هز راسه بهاج:ليه ما تشكون لبعض وتقوون نفسكم ببعض اذا كل احد اخفى مشاعره عن الثاني وتصنع القوه ما بتقدرون تتخطون
نورا هزت راسها وبهاج رفع حاجبينه يذكرها
:واختك الصغيره للحين ما تدري كيف تكمل دراستها وسنتها الاخيره ، انتم تحتاجون تتكلمون سوا
نورا:ونحتاجك بهاج ترا
ابتسم بهدوء وكملت نورا:جد بهاج انا ارتاح لك وأنهار ترتاح لك أكثر
نزل راسه وكملت نورا:لا تخلي احد يبعدك عنا احنا هنا مو متقبلنا احد غيرك انت
بهاج:وسلطان وفهد موجودين
نورا هزت راسها بالنفي وناظرها بهاج وتكلمت بهدوء:ما اعرف مشاعر الاخوان بس احسك اخونا
ابتسم ورجع ظهره لورا:وانا اخوكم
ابتسمت نورا:وانت بهاج كمان تكلم معانا عادي انا اسمع لك وأنهار وريوف ، اي شي بخاطرك قوله لا يجلس الزعل بقلبك مو كويس
بهاج:لا ماعليك أدبر اموري انا
نورا:لا بتجينا وبنتكلم ، بليز بهاج
هز راسه لها ووقفت:برجع انا تصبح على خير
وقف ومشى خلفها:نايمين ؟
التفتت عليه وكمل:خواتك !
هزت راسها:ايوا الكل نايم
هز راسه وابتسمت له نورا وخرجت وقفل الباب خلفها اخذ نفس بضيق ومشى لغرفته ما يعرف كيف يوصف وحشته بالبيت لحاله بس يدري ان وجودهم عنده يحييه ويشغلونه بتفكيره عن التفكير اللي يتعبه